Matyo 11

Eyɔɔ Andɛʼndim saa bɔntɔm ebe Yeso

(Luk 7:18-35)

1Èndzobo chɛ Yeso à mɛɛrɛ tee abwa zɔnɔ ebe bɔ bɛɛrɛ abwa wum ǹchwɔ̀ fyee mɔ ngɛ, engɔ nyɛrɛ afwɔ yɛ ngɔɔ é tee gɛ̀rɛ̀ sɛ̀ɛrɛ̀ ega Ngwe efwɔ entiri ebɛ byɛ abɛɛ abɛ Galilii ngɛ. 2Aŋu Eyɔɔ Andɛʼndim à zo efwɔ ndɔdzɔm mbɔʼ abwa yɛ Ǹtɔmzhwaʼa à ma fwɛʼ ngɛ, è saa bɔ bɛɛrɛ abwa mɔ adeʼ ebe engɔ, 3é biiri ebe engɔ kpe, “Ngwo ne engɔ wɛ Ngwe à tɔ̧ɔrɔ kpe mbè wa sàa ngɛ kà mbyɛɛ sa kɔʼ egho tsɛrɛ?” 4Yeso gíì kpe, “Mbɔn ngɔɔ achim, gɛ̀rɛ̀ tòʼrò abwa yɛ mbɔn ma zo gɛ̀rɛ̀ zɔ ngɛ ebe Eyɔɔ. 5Abɔ byɛ â ne ma zɔ akwâ bo ngɛ a sa zɔ akwâ, abɔ byɛ elo â me buʼru ngɛ sa zhin, abɔ byɛ â ma gwɔn akɔ̂m ngɛ shi pɛ, àkoo ètimi sa zo, e zhwɛɛmɛ bɔ kudu gɛ̀rɛ̀ sɛ̀ɛrɛ̀ ekɔn ǹchwɔ̀ ebe bɔ ndzaŋa. 6Ǹchwɔ̀ ebe abɔ byɛ e ma fɔɔ embè ma shi ebɛrɛtaa àmɔ̀ ene mmɛ ngɛ.” 7Aŋu bɔ bɛɛrɛ abwa Eyɔɔ Andɛʼndim â sa nyɛnnɛ ngɛ, Yeso sa ga mbɔʼ Eyɔɔ ebe ebaŋabɔ kpe, “Èndzobo chɛ mbɔn à ngɔɔ ebe Eyɔɔ edɔm eguńked ngɛ, mbɔn à na ke é zɔ ayɛ? Mbɔn à na ke é zɔ ago yɛ efùu à ma gùuru ngɛ? 8Aŋu mbɔn à ngɔɔ ese ngɛ mbɔn à na ke é zɔ ayɛ? Mbɔn à na ke é zɔ gho deʼ wɛ à me ge ǹdiri nchwɔnchwɔ ngɛ? Abɔ byɛ e ma ge ǹdiri nchwɔnchwɔ ngɛ na tsɔmɔ efwɔ ǹtɔʼ! 9Mbɔn toʼro ena, mbɔn à ngɔɔ ese ma ke é zɔ ayɛ? Àmɛnɛkɔn Ngwe? Ɔ̧̀ɔɔ, éŋwaʼaŋwâʼ mbɔn à zɔ egho wɛ a me fɔɔ Àmɛnɛkɔn Ngwe ngɛ. 10Enga Eyɔɔ ne egho wɛ aŋwɛʼrɛ Ngwe à ga mbɔʼ engɔ kpe ‘Kɔʼɔ anɔ, mmɛ wa sàa ghontɔm ngu embè njɛ é fuʼ aghɛʼnji engɛ̂.’ 11Mmɛ ga éŋwaʼa endɔn kpe Eyɔɔ Andɛʼndim we fɔɔ bɔ gimkpaʼ byɛ â shi mwɔ ngɛ. Bɛʼngɛ egho wɛ me tɛŋɛ kpɛɛ efwɔ ebwa m̀fɔ̀ ekere ngɛ we fɔɔ Eyɔɔ. 12Ebwa m̀fɔ̀ Ngwe shi zɔ ǹgoʼ ghɛʼ nyɛrɛ èndzobo chɛ Eyɔɔ Andɛʼndim à klada é sɛ̀ɛrɛ̀ ekɔn mɔ ngɛ gli ànchwɔ̀. Abɔ e ma ke asɛʼ ngɛ ba twàʼrà àmɔ̀ é fèe ene ekama. 13Bàmɛnɛkɔn Ngwe gimkpaʼ mane etsɛrɛ Mose â ga mbɔʼ ebwa m̀fɔ̀ ekere bwɛn efwɔ endzobo Eyɔɔ. 14Mala ngwo me doʼo é le ebɛrɛ ene ekɔn angɔ, Eyɔɔ na Elayja wɛ â kpe engɔ wa zeʼ ngɛ. 15Abɔ byɛ e me le ètimi ngɛ e zhuru! 16Ene ekyɛ bɔ zɔnɔ ànchwɔ̀ nɔ, mmɛ we né moŋoro angɔ ene yɛ? Angɔ ne mwɔ na adɔ̀kpara me tsɔmɔ efwɔ ewu̧, abɔ ma flaba ebe abê nɔ. 17‘Mbyɛɛ à kwɔrɔ atsa nchwɔnchwɔ endɔn é bin bɛʼngɛ mbɔn tɔn ke bin! Mbyɛɛ kwɔrɔ atsa ku endɔn, mbɔn tɔn kè kù̧u!’ 18Mmɛ na ga énde mbɔʼnga èndzobo chɛ Eyɔɔ à zeʼ ngɛ, engɔ à na tsɔmɔ ene chwɔ tsaʼra Ngwe, ne ma nde bo gɛ̀rɛ̀ ne ma ŋwɔ mɔm bo, bɔ gimkpaʼ ga kpe ‘Engɔ we le azhwɛɛrɛ bɔɔbɔɔ ekwa mɔ.’ 19Enjitsɔ, Ŋwɔ Gho shi zeʼe ma nde gɛ̀rɛ̀ ma ŋwɔ mɔm na abɔ abê nɔ, bɔ gimkpaʼ gɛrɛ ga kpe, ‘Kédé egho wunɔ! Engɔ na akùʼnde gɛ̀rɛ̀ mwɔ àŋwɔ mɔm, engɔ ne esɔrɔ ebe bàshuru aŋwɛ mane bɔ abwa bɔɔbɔɔ.’ Bɛʼngɛ azɔm Ngwe ya ngo gli éŋwaʼa nyɛ̀rɛ̀ zeʼ ene abwa yɛ bɔ ma lè èndzobo chɛ e me le azɔm yɛ ngɛ.”

Akwâ yɛ â ne me le ebɛrɛtaa ene Yeso bo ngɛ

(Luk 10:13-15)

20Abɔ byɛ efwɔ entiri ebɛ byɛ Yeso à tɛŋɛ le abwa zodo zodo mɔ akɛkɛ ngɛ, â ke kobo eleabwa bɔɔbɔɔ àmɔ̀ bo. Éngɛ Yeso bwe gɛ̀rɛ̀ kwɔ̀nɔ̀ angɔ gà kpe, 21“E yà me ngoʼo endɔn bɔ Chorazin, e gɛrɛ yà me ngoʼo endɔn bɔ Bɛtsayda! Mala â le abwa zodo zodo yɛ â le endɔn ngɛ efwɔ ebɛ Taya mane Sidɔn shi abɔ aŋu ngɛ à shi ge ǹdiri ku gɛ̀rɛ̀ zhwaʼa akwa àmɔ̀ ene aburu bli egha tsɛrɛ é tee kpe mbɔɔ shi kobo abwa bɔɔbɔɔ ndzɔɔ. 22Mmɛ ga éŋwaʼa endɔn kpe anji tsɛrɛ esɛʼ, Ngwe yà tee eklasɔn ebe bɔ Taya mane Sidɔn fɔɔ angɔn. 23E ndɔn gɛrɛ bɔ Kapɛnaum! Mbɔn bwaʼ kpe mbɔn shi ezob? Bɛʼngɛ Ngwe yà chwee angɔn a chwâ saa efwɔ edzɔwu asatan. Mala â me le abwa zodo zodo yɛ â le endɔn ngɛ efwɔ Sodɔm shi abɛ mɔmbwo a na bli bwɛrɛ ànchwɔ̀. 24Mbɔn nɛɛ kpe anji tsɛrɛ esɛʼ, Ngwe yà tee eklasɔn ebe abɛ Sodɔm fɔɔ angɔn!”

Mbɔn zeʼ ena, ku̧ru

(Luk 10:21-22)

25Éngɛ Yeso klada sa gà kpe, “Àtɛ Masakɛ ekere mane a chwâ, mmɛ è bɛ̀rɛ awɛ mbɔʼnga ngwo shi tee abwa yɛ ngwo me nɛŋɛ ebe bɔ azɔm mane angɔ byɛ e shi bɛɛrɛ abwa ngɛ é tee ebe abɔ byɛ e ne me nɛɛ ebwa bo ngɛ. 26Ɔ̧̀ɔɔ, Àtɛ ngwo à ne ke kpe e gli énde. 27Àtɛ ngu shi ndɛʼ ela gimkpaʼ ena. Tsɛ̀ʼ gho deʼ me nɛɛ ŋwɔ bo à tye àtɛ. Gɛrɛ me tsɛʼ gho deʼ me nɛɛ àtɛ bo à tye ŋwɔ mane angɔ byɛ ŋwɔ me chidi é tee àtɛ ebe angɔ ngɛ. 28Mbɔn bɔ gimkpaʼ byɛ mbɔn me beʼ ediri shi bwara ngɛ, mbɔn zeʼ ena, mmɛ wa le mbɔn ku̧ru. 29Mbɔn mwɔ bɔ bɛɛrɛ abwa mbu gɛ̀rɛ̀ bɛ̀ɛrɛ abwa ena, mmɛ wa ndɛʼ eku̧ru endɔn mbɔʼnga mmɛ we bwada gɛ̀rɛ̀ ma bwaara angu ene azhwɛɛrɛ. 30Aghɛʼ yɛ mmɛ ma gbèe angɔn ngɛ ye zamma endɔn é kìrì. Eku byɛ mmɛ gɛrɛ ma ndɛʼ endɔn ngɛ ne me diri bo.”

Terpilih Sekarang Ini:

Matyo 11: nbt

Highlight

Kongsi

Salin

Ingin menyimpan sorotan merentas semua peranti anda? Mendaftar atau log masuk

Ketahui Lebih Lanjut tentang Aŋwɛʼrɛ Ebuumu Fe Nè Ngwe

Matyo 11

Ayat Alkitab yang Popular daripada
Matyo 11

Alkitab:

Ngwo

Versi: Aŋwɛʼrɛ Ebuumu Fe Nè Ngwe - nbt

Matyo 11

Matyo 11

Ayat Alkitab yang Popular daripada Matyo 11

Alkitab:

Ngwo

Versi: Aŋwɛʼrɛ Ebuumu Fe Nè Ngwe - nbt

Matyo 11

Ayat Alkitab yang Popular daripada
Matyo 11