Keriekitho 1

Ukepenuopfü Mhatho Keriethoko Dze

1Sietsenu Ukepenuopfüe tei mu kijüu chüshü.#1:1 Moro Sietsenu Ukepenuopfüe teiko mu kijüu chükeshü ki,. 2Kijüu methuo mu puorhi jü, siro kezei thuo kesouko zepfü ba, mu Ukepenuopfü Ruopfüue dzü süko mhogei mele tuo. 3Süki Ukepenuopfüe, “Zielie” sishü, sitse zie parta. 4Sitse Ukepenuopfü kezieu vicü ngulie; süsie Ukepenuopfüe kezieu mu kezeiu kho kekreiwa. 5Siro Ukepenuopfüe kezie pie “Teiso” üdi kielie mu kezeiu pie “Teizei” üdi kielie. Sünu thevatie mu khise ba, zha puote.

6Siro Ukepenuopfüe, “Dzüko donu teimeluo bu balie; süu bu dzüko pfükho kekreise balie,” ishü ru silie. 7Sidi Ukepenuopfüe tei chüshü, mu süu bu puomho rei puokhro rei dzü kebako pfükho kekreiwa. 8Ukepenuopfüe süu pie “Tei” üdi kielie. Sünu thevatie mu khise ba, zha keniete.

9Siro Ukepenuopfüe, “Tei khro dzüko bu vo thechü puo nu kengulie, mu kijü keso bu parlie,” ishü ru silie. 10Sitse Ukepenuopfüe kijü keso-u üse, Kijü mu dzü kengukelieko üse Dzükezha üdi kielie. Tsiu Ukepenuopfüe mha süko vicü ngulie. 11Süsie Ukepenuopfüe, “Kijüu gei nha, puotsia kepfü gako, mu puosi kepfü nhasiboko bu puo thuo puorhi kheki chü di lhou parlie,” ishü ru silie. 12Sütuoi kijüue nha, puo thuo puotsia kepfü gako, siro puo thuo puosi vüshüyakezha puotsia kepfü seiboko bu lhou parlie, mu Ukepenuopfü mha süko vicü ngulie. 13Sünu thevatie mu khise ba, zha sete.

14Siro Ukepenuopfüe, “Kezieko bu teigei zhalie, süko bu zasiko chü di teiso mu teizei chü kekreishü mu puoteila kekreikecüko, teisozhako mu teicieko teigei nu thashülie, 15tsiu uko bu teigei nu kijüu va pezielie,” ishü ru silie. 16Hamhie di Ukepenuopfüe kezie kezha kenie chüshü, niaki bu khinhie mho mu khrüu bu theva mho dinu di; mu puo themvüko rei chüshü. 17Ukepenuopfüe süko bu kijüu va pezieketuo, 18teiso-u mu teizeiu mho baketuo tsiu kezieu mu kezeiu kho kekreiwaketuo la süko pie teigei shüshü; mu Ukepenuopfüe süko vicü ngulie. 19Sünu thevatie mu khise ba, zha diate.

20Siro Ukepenuopfüe, “Rhei ketuo khunuo kekra bu dzüko ketshu chülie, mu perako bu kijü mhogei ketshu chü pruo tuolie.” 21Sidi Ukepenuopfüe puo thuo dzükezha nu khunuo kezhako mu dzü nu khunuoko pete, mu puoshü chükepfü pera kheko rei, u thuo u rhi kheki sü chü phreshü: siro Ukepenuopfüe süko vicü ngulie. 22Sitse Ukepenuopfüe japie uko tsü di sie, “Nie si vülie mu kruolie; sidi dzükezhako nu dzüko ketshu chülie, mu kijü gei perako bu rei kruolie,” sishü. 23Sünu thevatie mu khise ba, zha pengoute.

24Siro Ukepenuopfüe “Kijüu bu khunuo kekreikreicüko, perinuoko, tsiu gou ketuo khunuo mu nhachüko pete, u thuo u rhi kheki sü chü di pelhoushülie,” ishü ru silie. 25Sidi Ukepenuopfüe puo thuo nhachüko, perinuoko mu gou ketuo khunuoko pete u thuo u rhi kheki sü chü di chüshü. Mu Ukepenuopfüe süko vicü ngulie.

26Siro Ukepenuopfüe, “Úko u rhi nunu themia#1:26 Ibri nu ro Adam. chülie khe; u kemhie di, sidi uko bu dzükezha nu khuoko, teirako, perinuoko mu khunuo kekreiko, tsiu kijüu gei gou ketuo khe kekhase balietuo.”

27Sidi Ukepenuopfüe puo thuo puo rhi nunu themia chüshü,

Ukepenuopfü rhi nunu puoe themia chüshü;

puoe thepfu mu thenu chüshü.

28Kepenuopfüe japie süko tsü di, “Nie si vülie mu kruolie, di kijüu ketshu chülie, di süu penyülie, tsiu dzükezha nu khuoko, teirako mho, mu kijüu gei mele ketuo kheko mho tuolie,” sishü. 29Siro Ukepenuopfüe “Harie, kijüu zie gei ketuo khe, ae puotsia kepfü ga pete, seibo puosi chü di puotsia khashüyakezha pete pie nie tsüwate ho, süsü pie nie ca chüshüwate. 30Kijüu gei ha tsiu mele ketuo nhachüko, teirako mu gou tuoyakezha khunuoko bu nha kepejoko pie u ca chütuoü ae khashüwate,” sishü ru silie. 31Siro Ukepenuopfüe puo mhatho chükelieko pete mehoshü, ru harie, süko vithor zo. Sünu thevatie mu khise ba, zha soroute.

Terpilih Sekarang Ini:

Keriekitho 1: ANBRBSI

Highlight

Kongsi

Salin