Yaya 7
7
Isa dɔgɛnu la dɛnkɛnɛyabaliya
1Wo koenu tanbi kɔma, Isa be Galile duge matagamanna. A ma sɔn tagala Juda duge matagamanna, bayi wo ka a taran Yahude kuntigenu be a faga fɛrɛ ɲinila ɲɔ la. 2Wo ka a taran, Yahudenu la Bagenu Sɔ Sale#7:2 Yahudenu benbanu la san binaanɛ tagamaŋɛ janfue tɔ, bon bele fɔ bagenu anu be min sɔla ka ki anu tɔ. Han bi anu bɔnsɛ tugun be wolo naamuɛ mala san yo san, han tele wɔrɔwila. bata sutuya. 3Wo butɔ, Isa dɔgɛnu ka a fɔ a ye: «Bɔɔ yan i ni taga Juda, alako i be kabanakoe minnu mala, ɲɔ la talibenu tugun ni wonu lasaga. 4Ka mɔgɛ be diren bɛ ni a lɔn, a te fenfen ma dogoŋɛ tɔ. I to be kɛ kabanakoenu mala, ile tugun bɛnta anu mala dunuya bɛ ɲala.» 5Anu ka wo fɔ le, bayi hali ande yati bele dɛnkɛnɛyaren a ma. 6Wo butɔ, Isa ka a fɔ anu ye, a ko: «N na wagate ma ke betunna, kɔnɔ wagate bɛ kaɲin wole kan ye. 7Dunuya mɔgɛnu te nɔ wo kɔnna, kɔnɔ anu be nde kɔnna, bayi n mu seede la, ka a fɔla anu la walenu koron. 8Wole ká taga sale tɔ. Nde te taga kɛ sale tɔ betunna, bayi n taga wagate ma ke.» 9A la bandeŋɛ wo fɔla anu ye, a tota Galile duge tɔ ɲɔ.
Isa la toe Bagi Sɔ Sale tɔ
10Isa dɔgɛnu banta tagala sale tɔ wagate min tɔ, ale tugun tagata, kɔnɔ a dogoŋɛ le tɔ. 11Wo butɔ, Yahude kuntigenu be a ɲinila sale tɔ, anu be a fɔla: «Ale kaye be mina?» 12Da kɔtɔ kuma min be fɔla a la ko tɔ jama tɛma, a siyata. Donu ko: «Mɔgɔ ɲinma le.» Donu ko: «Ade, a be mɔgɛnu le latantanna.» 13Kɔnɔ mɔgɔ yo ma kuma do fɔ a la ko tɔ kɛnɛ tɔ, bayi anu be kilanden Yahudu kuntigenu la.
14Awa fayida, anu bata ke Sale tɛma. Wo lun, Isa tagata Ala batu boŋɛ tɔ, a fɔlɔta mɔgɛnu kawandila ɲɔ. 15Wo butɔ, Yahudenu kaabɛta, anu ko: «Kɛ kaye karamɔgɔ to bele, a ka sɛbɛre lɔn kama le?» 16Isa ka anu jaabi, a ko: «N na karaŋɛ bele fatanden nde la le. Min be n kiiren, a be fatanden wolo la. 17Ka mɔgɔ yo be a hanigeren a ni Ala sagoe ma, wo tigi si a lɔn de, ka kɛ karaŋɛ be fatanden Ala le la, ka wo ma a be fatanden n yɛtɛ le la. 18Min be kumala a yɛtɛ la mira la, wo tigi be a yɛtɛ tɛn biliya le ɲinila. Kɔnɔ min be a kiilá tɛn biliya ɲinila, tɔɲa tige le wo la. Telenbaliya yo bele a la ko tɔ. 19Musa ma Ala la sariya don de wo bolo ba? Adun, hali wo dɔndɔ bele wo sariya latagamanna. Wo be katala n faga koe la fenna?» 20Jama ka a jaabi, anu ko: «Kɔnɔ jinna bele i bolo ba? Ɲɔmɔ le ɲan be diren i fagala?» 21Isa ka anu jaabi, a ko: «Lun do, n ka kabanako dɔndɔ le ma, a ka wo bɛ makaabɛ! 22Wole tugun si kaye sunna hali sulen lɔ́gɛ́ tɔ#7:22 Yahudenu si kaye sunna a tele sagin luŋɛ tɔ., iko Musa ka wo yamɔri kaye sunna koe la ki min na, hali ale le to ma a lafɔlɔ, a fɔlɔta wo mɔ benbanu le ma. 23Wo dun be kaye sunnala sulen lɔ́gɛ́ tɔ alako Musa la sariya kana tiɲa, fenna wo dumɛnta nde ma n to ka kaye lakendeya ken sulen lɔ́gɛ́ tɔ? 24Wo ni koenu butɔ fɛlɛ a ɲinma la yannun wo ni kiite sa, alako wo ni kiiti telendeŋɛ sa.»
Ala la mɔgɔ masubɛreŋɛ Isa
25Wo butɔ, Darisalamu kaa donu be a fɔla anu ko: «Kuntigenu be katala min faga koe la, ale ma kɛ la ba? 26A fɛlɛ, a be kumala kɛnɛ tɔ le ka, anu dun bele fenfen fɔla a ye. Kuntigenu ma laa a la ba, Ala la mɔgɔ masubɛreŋɛ le mu kɛ la? 27Adun, wo mɔ ka kɛ bɔɔ dula lɔn. Ala la mɔgɔ masubɛreŋɛ kan tini na, mɔgɔ yo te a bɔɔ dula lɔn.» 28Awa, Isa be mɔgɛnu kawandila Ala batu boŋɛ tɔ wagate min tɔ, a ka a kulɛ mayɛlɛ, a ko: «Wo ma n lɔn ba? Wo mɛn ma n bɔɔ dula lɔn ba? Adun, n bele naren n yɛtɛ ma. Tɔɲa tige le be n kiiren, kɔnɔ wole ma a lɔn. 29Nde ka ale lɔn, bayi n be fatanden ale le la. Ale le ka n kii.» 30Wo kuma le ka a ma, anu be a bita fɛrɛ ɲinila, kɔnɔ hali mɔgɔ dɔndɔ ma a bolo sa a ma, bayi a la wagate ma ke betunna. 31Kɔnɔ jama tɛma mɔgɔ siyama dɛnkɛnɛyata a ma, anu tota a fɔla: «Ala la mɔgɔ masubɛreŋɛ tini na wagate min tɔ, a si kabanakoenu ma ba, minnu si tanbi kɛ kaye tɛŋɛ la? Ade!»
Farisinu la kɔsɔbilenu lasanba koe
32Mɔgɛnu be kumala Isa la ko tɔ anu da kɔtɔ ki min na, Farisinu ka wo mɔɛ. Wo butɔ, Farisinu anun sarika lakela kuntigenu ka kɔsɔbilenu lasanba anu ni Isa bita.
33Isa ka a fɔ: «N mɛn ni wagati donden ma wo fɛ, wo kɔma n ni naa taga n Kiilá kɛnna. 34Wo si naa n ɲini le, kɔnɔ wo te n yen. N be naala tola dula min tɔ, wole te nɔ kela ɲɔ.» 35Wolo ka a ma, Yahude kuntigenu ka a fɔ ɲɔgɔn ye: «Bɔ, kɛ be tagala mina le, wo mɔ te nɔ a yenna ka min na? Hali kɛ ni bɔɔ jamanɛ kɔma le ba? A ni taga Yahudenu dula, minnu be malansanden Girɛkenu la jamanɛ tɔ? A ni taga anu lakaran ba? 36A la kɛ kuma be fen de fɔren ka, a ko aa mɔ si naa a ɲini, aa kɔnɔ mɔ te a yen? A mɛn ko aa a be naala tola dula min tɔ, aa mɔ te nɔ tagala ɲɔ?»
Malakise je la ko
37Bagi Sɔ Sale lɔgɔ tɔɛ mu lɔgɔ banba le la. Wo lun, Isa wulita, a sɔta a ka a kulɛ mayɛlɛ, a ko: «Ka ji min sɔgɛ be mɔgɔ yo la, a ká na nde ma, a ni je min. 38Min tini dɛnkɛnɛya n ma, malakise je le be kɔɛɛ lafarala wo tigi juse tɔ, a ni woyi, iko Ala la sɛbɛre ka a fɔ ki min na.#7:38 Annabi Esekiyɛli, sora 47, haaya 1. Anun kɛ kitabue, sora 19, haaya 34.» 39Isa be Hakkili Saniyandeŋɛ le la ko fɔla. Minnu tini dɛnkɛnɛya a ma, anu be Hakkili Saniyandeŋɛ le sɔtɔla. Wo ka a taran, Hakkili Saniyandeŋɛ ma jigi, bayi Isa ma kunnawule sɔtɔ betunna.
Jama la fatan koe fila la Isa la ko la
40Jama la wo kuma mɔɛreŋɛ, donu tota a fɔla anu tɔ: «Ale nabiyonmɛ yati le mu ka!» 41Donu tugun ko: «Ala la mɔgɔ masubɛreŋɛ le kɛ la!» Kɔnɔ donu ko: «Bɔ, Ala la mɔgɔ masubɛreŋɛ si nɔ bɔɔla Galile jamanɛ tɔ ba? 42Kaa, a bele fɔren de Ala la sɛbɛre tɔ, Ala la mɔgɔ masubɛreŋɛ be bɔɔla Dauda bɔnsɛ le tɔ, Betilɛmu saa tɔ, Dauda sɔtɔta ka min na?» 43Wolo ka a ma, Isa la ko ka jama fatan fila la. 44A sɔgɔ tota donu la anu ni a bita, kɔnɔ mɔgɔ yo ma a bole sa a ma.
45Awa, kɔsɔbilenu saagita sarika lakela kuntigenu anun Farisinu ma. Wonu ka anu maɲininka: «Fen de wo ma a nati?» 46Kɔsɔbilenu ka anu jaabi, anu ko: «Ee! han bi mɔgɔ yo ma kuma iko wo kaye.» 47Farisinu ka a fɔ anu ye: «Bɔ, a ka wole tugun natantan de ba? 48Adun, kuntige yo, Farisi yo, hali dɔndɔ ma dɛnkɛnɛya a ma feu! 49Kɔnɔ kɛ jama min ma Ala la sariya lɔn, wonu be bɔnɔren de.»
50Kɔnɔ wo ka a taran, Nikodemu tugun be ɲɔ, min tagata Isa dula nun sue tɔ. Ale tugun be Farisinu ɲaama. Awa, wo ka a fɔ anu ye: 51«Wo mɔ la sariya te mɔgɛ makiiti fɔ a ni i maɲininka, a ni a lɔn betunna i be min maren, kaa?» 52Anu ka a jaabi, anu ko: «Bɔ, ile tugun be bɔɔren Galile le ba? Awa kitabue butɔ fɛlɛ koola, i si a lɔn ka a fɔla nabiyonmɛ yo te bɔɔ Galile duge tɔ.» 53Wo kɔma, bɛ saagita a bata.
လက္ရွိေရြးခ်ယ္ထားမွု
Yaya 7: MOG
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ