GIING'EETA 15
15
Neajeeda ASEETA sea Abramu
1Iimuchu nea ghang'ata ng'asheesu ghwahidu ng'asheanda NG'UTAMIIDA heeda Abramu aba giirgweatka, ak geehiimsa nea geeyeesha, “Adibeali Abramu, aniini geawooschi igeamboadaang'u; asi giimeardaang'u gaygwaheedu.” 2Ng'ata gwayeesha Abramu, “Ea NG'UTAMIIDA was ASEETA, gaygoonean naaha aniini, nea aniini ea nukwa geanyi diy, nea siida jea gwahearan gheenyu ea Eliyeseriheeda mujiineeda Dameski?” 3Ng'ata gwayi Abramu, “Ng'ula, ang'iing'i miigoonean jeata; nea soomjeanda sijiilsa jeedeaba gheenyu gayghoah siida jea gwahearanan.” 4Asi ng'ula, iimuchu ghwahidu ng'asheanda NG'UTAMIIDA headaanyi ak gwayeesha, “Siisi mayghoah siida jea gwahearanyi; gaygwahearanyi orjeedang'u.” 5Hean gooruuta jarooda ak gwayeesha, “Ang'weersiina humng'eeda, ak giyiidayi miinga, ea jea amuusa iita.” Ng'ata gwayeesha siidida, “Asi nih gichea gwadeena jeataang'u.” 6Hean ghamwas iita NG'UTAMIIDA; ak aba headaanyi ghwanung' ghoah doobiiwnata. 7Ak gwayeesha NG'UTAMIIDA Abramu, “Aniini geawooschi NG'UTAMIIDA ghayi eananeey ng'eanyiida Uru mida ng'eanyiida Galdayo, ak geagoonyeey ng'eanyiini ambala.” 8Ng'ata gwayeesha Abramu, “Ea NG'UTAMIIDA was ASEETA, ak gaydanaldaan gideaba gaydeambal?” 9Gwayeesha ASEETA niny, “Eanean haghweanda gweanyeeka asamwagu, ea mbooyda saawaat bea gweanyeew samwagu, ea lagweenda gweanyeeka asamwagu, ea ghariibajeanda ea bakpakcheanda mwanang'.” 10Ak gweadu haleanjeeni seaniin, ak ghabwaashaada ghoah iyeenya, ak gageanu gabatiisiinyi; ak ea mabwaashaada dariidaka. 11Iidu nea ghwahidu rabearjeeka nal shageata ak goobitpisa diyeanga silajaada, hean ghahoan Abramu ghang'eatng'eata.
12Hean nea ghwariikghta gamikta aseeta, goobissa Abramu ruweanga; ak ghang'ut muuwda ea sawanadeeda haw. 13Ng'ata gwayeesha NG'UTAMIIDA Abramu, “Nala aba huumwa gideaba jeataang'u gayghoah rabasta aba ng'eanyiida mii daanyaawa; ak gayghoah soomjooga aba ng'eanyiita, ak gajeesawan gweanyeew bughalaji ang'wan; 14ak gaydeadu ghoorjooda badaydeaba eemeedida nung' ghoah soomjoogean, ama muchu gayghabeawa ng'eanyiita nea nibaruur. 15Nea ang'iing'i, gaymeawa nea gibeahi hoyyoo; ak gajeebunyi nea gibeahi gwearguumeeda miy. 16Ak gaygabiigu hiji aba seaygeedeaba damanang'wan; aba gideaba munyasnacheeka fuga Amori miighwahit.”
17Iidu nea gamikta aseeta ak gamisaniit, ng'ula, dahuuda joakghta aroosta beasta ea gheaboong'nyeanda sik dageascheeda banyeega. 18Aba eaweedida gwasin NG'UTAMIIDA neajeeda sea Abramu nea gwayi, “Ng'eanyiini gaydaadaw jeacheangaagu, ghang'eada eenda Misri ea ghwahita eenda haw, was eenda Furati, 19ea ng'eanyiida fuga Ganaani, ea fuga Genisi, ea fuga Gadmoni, 20ea fuga Hiti, ea fuga Beresi, ea fuga Refaimu, 21ea fuga Amori, ea fuga Ganaani, ea fuga Girgashi ea fuga Yebusi.”
လက္ရွိေရြးခ်ယ္ထားမွု
GIING'EETA 15: BG15
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Datooga © Bible Society of Tanzania, 2015.