Maatiyoos 15
15
Goop Yeese Joop Paarisik Agut Ijaag Nɛŋk
(Mar. 7:1-13)
1Saadi baŋiya joop Paarisik a rɔɔriytaanak higi Muuseek sigɛɓa kurak Yorsaleemek wideetarɓa ɛɛk son lak Yeeseek nɛ tonurgeeɗ kɛ, 2"Kir nomtaanak goonɛk eemɛyɔɔn barɛ bɔɔlɔŋeeroŋk agut jikon? Ɗami a kir aadi arin."
3Nɛɓa jumur sɛɛga Yeese kɛ, "Kiir eemɛyɔɔn sekiyɛ Waakoyotoŋk agut barɛ noŋk agut jikon? 4Saa Waakoyot toniiɗ kɛ, 'Eemɛy ŋaaŋa a ɓaaɓa, iɗit sinɔ nyɔɔn ɛmɛs maŋk ɛpɛnik in ɓokotɛ.' 5Yakana sɔɔk ɔkɔn iɗit omaay tonu ɛpɛna maŋk ɛmɛsa kɛ, 'Tɔkɔny sinɛ gun laŋiir eetek wideerakɔ a tigi Waakoyotaŋ,' 6nɛ sɔɔk toniir kɛ, 'Ki eta sinaana ɗɛyɛ a eemɛy ɛmɛs maŋk ɛpɛniŋ.' Nɛ aalɛɛr pɛɛni Waakoyotoŋk agut barɛ noŋk. 7Iinak joop sigɔ gayar joop sigɔ mentaanaŋɔŋkuk, eekeer any sinɛɓa tonu Isaayas pɛrkaakɛ agut iinak kɛ,
8'Joop sigi eemɛyarti atutunɛ gɛŋk,
ma ɓayɛtunɛɛkɛ gɛŋk yowɛrju eeteeŋ.
9Ugumerta kanysɛya,
a rɔɔriyaaɗ rɔɔriyɔn barɛ etoŋk.'"
Rɔɔriyaaɗ Yeese Any Sinɛ Ar Iɗit A Somkank
(Mar. 7:14-23)
10Riyiriɓa Yeese joop sigɛ ɓɔɔkaak kɛnɔ widerki ɛɛk son lak sɛɛnik nɛ tonu sɛɛga kɛ, "In tiyɛɛ, ɛ in koɓɛɛ. 11Arɗi iɗit a somkan any sinɛ waasɛ ad nɛɛkɛkik, ma moko ɗama sinɛ gaɓɛ ada nɛɛkaakik."
12Wideetarɓa ɛɛk nomtaanak gɛɛnɛ son lak sɛɛnik nɛ tonurgeeɗ kɛ, "Ɗegerin kɛ tiyɛrkɔ joop Paarisik any sinɛkɔ tonunk, nɛ ŋadirŋ?"
13Nɛɓa sɛɛga tonu kɛ, "Kɛɛt sinɔɓa ki waayɛ Baabɛ dariyoŋkuk baŋɛ montɛɛkoyŋ. 14In ŋɔɗurɛɛ sɛɛg, sɛɛg ɔɗɔweer sigɔ motakik sigɔ diiler motakik. Ɔkɔn diile mot motuŋ, nɛ gaagami a getu pɛɛy, nɛ ɗiirtar utula takana."
15Nɛɓa Petros tongeeɗ kɛ, "Wooru tina rɔmɛ nɛɛk."
16Nɛɓa Yeese tonu sɛɛga kɛ, "In kiir koɓiiɗ nɔ mɛlɛɛɗa sisɔwa? 17Kiir ɗegerɔɔn kɛ ɗama sinɛ guuguny adak baŋɛ, nɛ ɗeyiir amɗa nɛ saadi ŋaariri walasa? 18Ma any sinɛ waasɛk ŋɛɛwɛnŋɔŋk ŋaarkiɗ ɓayaay takik sinɛ ari iɗit a somkank sɛɛn sini. 19Ŋaaraki ɓayaay etoŋk koɓi sinɔ ŋɛɛwɛnŋɔŋk, ɓokotiit etoŋk, ibe, ruunyikeen, agɛy, waasiyɛ nyonoŋk a sɔɔkiyɛ tiriya etoŋkuk. 20Ola sigɛ arir iɗit a somkank sɛɛg sigi, ma ɗama a kɛɛ aadi arink ki ariiɗ iɗit a somkan."
Ŋaadiyɛ Jarti Om Kɛnɛaanik
(Mar. 7:24-30)
21Ŋaarɓa Yeese saadi, nɛ mɛlɛ ɗooka Tiiroos a Sidoonaak. 22Ŋaarkiɓa saadi jarti om sinɔ moko Ayuuduk, nɛ kus son lak Yeeseek nɛ ooyɛ kɛ, "Iin Tɔɔn Daawitik, Suumi naakɛ, tɔkɔny tin. Tɔɔn naak sinɔ peetik gaamurkanre wɛɛŋa sigɔ somkaanakik, nɛ rakatɛŋ jɛt."
23Yakanaɓa sɛŋk kɛɛ any sinɔ jumurgeeɗik. Saaɓak wideetarɓa nomtaanak gɛɛnɛ ɛɛk son lak sɛɛnik nɛ tonurgeeɗ kɛ, "Nonom tine jarti sini a oo'oyŋ tɔkɔnyre nɔ ŋaar."
24Nɛɓa sɛŋk jumur kɛ, "Wosɛykɛɓati agut joop Israeelik sigɛ badɛr a ito jiŋkuyɛk dakɛɗa."
25Nɛɓa jarti sinɛ mɛlki nɛ ugume Yeeseya, nɛ tongeeɗ kɛ, "Suumi naakɛ, tɔkɔnytuk."
26Nɛɓa jumurgeeɗ Yeese kɛ, "Ki gayɛ a boŋɛɛ ɗama tɔɔmɔkoŋk nɔ gaɓɛɛ wartuna."
27Nɛɓa sɛŋk tongeeɗ kɛ, "Liki. Suumi naakɛ, ɗamar aasi wartun kootaayɔ sigɛ ɗiiɗirark lokoy suumii nɛŋkik."
28Saaɓak tongeeɗɓa Yeese kɛ, "Iin jarti sini, ɓɔɔka ŋaadiyɛ goonɛŋ. Inna ɓɛɛlɛ oko sinɛkɔ ɗɛyɛɗink." Nɛɓa tɔn nɛɛkɛ bɔdɛ a tukiɗi ɔɔtɛ sinaanɛ.
Ebɔdɛ Yeese Gortaanak A Ɓɔɔkaaŋ
29Ŋaarkiɓa Yeese saadi, nɛ kɛɛ nyona sinɔɔna ar goroo Gɛlilaak jɔkuk. Nɛ kɔtɔɔŋɛ kurkuma nɛ dokuɗe saadi. 30Nɛɓa joop a ɓɔɔkaaŋ diilerki, joop sigɔ kamarŋɔŋk, a motak, a nyɔŋtaanak, a joop sigɔ kir tonɗiitik a gortaanak ɔgɔ a ɓɔɔkaaŋ. Nɛɓa riiɓer sɛɛg Yeesee derakɛ goyse ɗeek, nɛɓa sɛŋk ebɔdɛ sɛɛgiŋ. 31Dɛnɛrɓa joop sigɛ ɓɔɔkaak joop sigɛɓa kir tonɗiitik a tonɗiiŋ, a bɔdɛr nyɔŋtaanak, a ŋawiiter kɛɗɔm joop sigɛɓa kamark, a dɛnɗi motak nɛɓa reemɗi ɓayɛtun gɛŋkiŋ. Nɛ eemɛyar Waakoyo Israeelik.
Gije Yeese Ɗama Joop Sigɔ Kumɛɛ Aŋank
(Mar. 8:1-10)
32Riyiriɓa Yeese nomtaanak gɛɛŋk nɛ tonu sɛɛga kɛ, "Sanɗita joop sigi ɓɔɔkaaŋɔŋkuŋ agut sinɔ sɛɛgkɔ a eet agut omoŋ a ɗoŋ jiit. Nɛ kɛɛ sɛɛge any sinɔ ɗamarŋɔŋk. Kaa ɗɛyɛ a ŋɔɗura sɛɛg a kir ɗamiitiŋ agut sinɔ kɛnɔ mokɔɔ latu ŋaawu nɔ ɗiirar gopɛ tak."
33Nɛɓa jumurargeeɗ nomtaanak gɛɛnɛ kɛ, "Nɛkɔɔ laŋii eet ɗama sinɔ gayɛ joopa sigeega ɛtɛr oko sinikik paaton sineene?"
34Nɛɓa Yeese kɔɔniy sɛɛg kɛ, "Latukari kiiwakɔ a eger?" Nɛɓa sɛɛg jumurargeeɗ kɛ, "Lakii kiiwakɔ a tula pɛɛy a oltiir sigɔ temetuŋɔŋk a tekerŋ."
35Nɛɓa Yeese tonu joopa gɛɛna kɛnɔ dokurɗe ɗook. 36Nɛ gaamu kiiwakɔ sigɛ tula pɛɛyk a oltiir gɛɛŋk. Nɛ pɔɔsɛ Waakoyo nɛ ŋapati nɛ gaɓɛ nomtaanaka gɛɛnaak. Nɛ kaakasar joopa sigaaga ɓɔɔkaak. 37Nɛɓa ɗami baŋɛ nɛ ɓooɗorarŋ, nɛɓa nomtaanak gɛɛnɛ ɓɔŋgɔɔrɛr kootaayɔ sigɛɓa ŋayɗiikik a kantɛyɛ tula pɛɛy a enyaataŋ. 38Joop sigɛɓa ɗamiik kumɛɛɓa aŋan aɓa kɛɛ ikomiit jartiyatɔk a tɔɔmɔk. 39Saaɓa Yeese ŋɔɗurkuɗ joop sigɛ ɓɔɔkaakik baŋiya, nɛɓa teeŋɛ emɗa nɛ ŋaar ɗooka Mɛgedoonuk.
လက္ရွိေရြးခ်ယ္ထားမွု
Maatiyoos 15: KSTM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ