Lúkɩ 21
21
Kʋ́zrɩ̀ŋwnɔ nyɛ́ lé ɔ́ zi nyʋaá fɩ́ɛ́ kʋ́
(Málɩ́kɩ 12.41‑44)
1Tányɩɛ́ mʋ́ Zozíi pla Lagɔ̀wlʋ̀kádʋ̀ɔ̀ a mnɩ́ lé ɔ́ dʋdʋ̀ a, nyʋaá à ŋwʋ́ɛ́ bhɔ́klɔɔ́ a mnɩ́ moníi a, lɛkanyʋa a pʋpʋ kʋ̀. 2Ɔ́ mʋ sɔ́kʋ́ dʋdʋ̀ kà a, ɔ́ yɛ́ ŋazɩ̀kʋ̀zrɩ̀ŋwnɔ a múó, lé ɔ́ páa bhɔ́klɔ a mnɩ́ pìkìni a sɔ́. 3Ɩ́ nɩ Zozíi lé ɔ́ sané: «Cɩ́cása a mnɩ́, náa srʋɛ amɔ mà ŋazɩ̀kʋ̀zrɩ̀ŋwnɔ̀ɔ̀ lɩ̀à nɩ̀ɩ lɛ́ ka a, moníe ɔ́ ŋwʋ́ bhɔ́klɔ a mnɩ́ a, ɩ́ zù lé ɩ́ zi moníe nyʋa fɩ́ɛ́ ŋwʋ́ mɔ̀ a, kʋ́! 4Ámá lɛkanyʋaá, moníe á ŋwʋ́ bhɔ́klɔ a mnɩ́ a, ɩ nɩ́ á gbʋ́ kaa. Mà ɔ́mɔ́ ŋazɩ̀kʋ̀zrɩ̀ŋwnɔ̀ɔ̀, ɔ́ nɩ moníe fɩ́ɛ́ ɔ́ ka la lé ɔ ká la li a, ɩ́mɩ́ ɔ́ ŋwʋ́ mɔ̀ɔ.»
Á yi Lagɔ̀wlʋ̀ɔ̀ wla
(Matíe 24.1‑2; Málɩ́kɩ 13.1‑2)
5Nyʋa àna cíé Lagɔ̀wlʋ̀kádʋ̀ɔ̀ a námawɔlɩ, cémʋ́ á bhá námacɔkpalɩ́ lé náma lɩ́ɛ́ fɩ́ɛ́ nyʋa nyɛ́ wá bhlagɔ̀gɔ̀sa Lagɔ a, lé á pʋ́ a. Zozíi nú wɔlɩ́ɛ́ á cí a, bhʋ́ ɔ́ srʋ á mà: 6«Wlʋɔ́ a dʋdʋɛ lɛ́ dɛ́ a, yruú yi ʋ́ kʋ, lé á yiú wla lé lɛ́ nɩ́ ka ʋ́ tuo.»
Zɩkpa a bhɩabhɩatanyɩ yie
(Matíe 24.3‑8; Málɩ́kɩ 13.3‑8)
7Bhʋ́ á yrá Zozíi mà: «Másɛɛ̀, tányɩ gbá mʋ́ bhʋ́anɩ wɔlɩ́ɛ́ na ká ŋnɩ áa? Lɛ́gbá à nà kà bhá, lé à kà tányɩɛ́ yɩbhlɩ áa?» 8Zozíi anɩ́: «A nɩ nɩ a, a mányɩ, nyʋa nɩ ka amɔ nyɩ́glɩ̀. Mà nyʋa kɔ́kɔ́mnɩ́ yi ná ŋnɩ́ mʋ́ yii lé á yi cí mà: Mɔ́ ŋwɔ́ɔ Kláyɩ́sɩ! Lé ɩ Tányɩɛ́ ya ŋnɩ! Mà a ná jɩ́ á kʋ́! 9A yi sáà tʋ́ a wɔlɩ́ nú, a yi yrè nú, di ná wlʋ́ amɔ mnɩ́, mà sɩ́tɛ̀ mʋ́ ɩ́ na ká fɩ́ɛ́ plɩ́ɩ, mà zɩkpa á bhɩabhɩa tanyɩ nɩ́ àyɩ kakamnɩ́lɛ́ ŋnɩ.»
10Lé Zozíi srʋ á sɔ́kʋ́, ɔ́ anɩ́: «Bhlɩ́ ànɛ a mnɩ́ a nyʋa yi glù sɔɔ̀, lé á yi bhlɩ́ ànɛ tʋ́ fa. Lé léyibhlɩ yi ɛlileyibhlɩ ànɛ tʋ́ fa. 11Dʋ̀dʋ yi tɩtɛɛ̀, lé kɔkwɛ yi pla, plɩ́plɩ́gu yi bhlɩ́ kɔ́kɔ́mnɩ́ a mnɩ́ pla, ŋanɩmawɔlɩ yà lɛ̀wɔ̀lɩ kɔ́kɔ́mnɩ́ sɔ́ yi lagowlú wlʋ́ ɩ́ yi kwlíi lé nyʋa yii yɛ́.
Á yi Zozíi a kʋjɩ̀nyʋ̀àà kalɩmɛ nyɛ́
(Matíe 10.17‑22; Málɩ́kɩ 13.9‑13)
12Mà fɩ́ɛ́ lé wɔlɩɛ́ lɩ̀à ká ŋnɩ a, á yi amɔ kʋ́ bhli lé á yi amɔ kalɩmɛ mʋ́ ŋwʋ́ ná zà. Nyʋa yi amɔ zúfʋcɛcɩghlɩ a mnɩ́ tɩ́tɩ́ ŋwʋ́, lé á yi amɔ jɩ̀ ŋwʋ́, á yi amɔ gɔ̀mnànyʋa yà léyuo sɔ́ gɔ̀ tɩ́tɩ́ ŋwʋ́ ná ŋnɩ́ mʋ́. 13Bhʋ́ a tányɩɛ́, a yi mɔ́ɔ bɩ́ plɩ́, a yi ná ŋwɔ́nɩ́srɩ̀lɛ nɩ. 14A ná bhɔtɔ lé a ká cí mànɩ́: cégbá à yi cí lé à yi à nyòku kʋ́ bhla áa? 15Mà cémʋ́ a na ká cí a, mɔ́ɔ nà kà amɔ mɩ́ neé páa, a gblɩ̀nyʋa nɩ́ ka amɔ neé bhɩa, a yi á sɩà. 16Amɔ mɔ̀glʋ̀ a tinyʋa, a nɛ́nyʋa, a níayúó, a bheyinyʋa, yi amɔ pɛ́lʋ́ ŋwʋ́ a ká amɔ bhlá, á yi aa nyièdɩ a nyʋa kɔ́kɔ́mnɩ́ kúbhlajɩ̀ɩ ŋwʋ́. 17Nyʋaá fɩ́ɛ́ yi amɔ mʋ́ gblɩ̀ ná zà. 18Mà ná srʋɛ amɔ, a nyièdɩ a nyɔ a múó a wlú a nyíplʋ nɩ́ ka tuo. 19Naa, a ŋwʋ́ fɩ́ a tɛ́ma mʋ́, mà a mʋ́ tɛmɛɛ́ mɛ́ nà kà ʋ́ a zizi neé sa!
Zelízalɛ́mʋdùò yi bhusuloò
(Matíe 24.15‑21; Málɩ́kɩ 13.14‑19)
20Tányɩɛ́ mʋ́ a nɩ yɛ́ Zelízalɛ́mʋdùò lé sʋ́ja nɩ glalʋʋ klʋ́ a, a yɩbhlɩ saá mà ʋ́ wlawlatanyɩ ya ŋnɩ. 21Bhʋ́ a tányɩɛ́, nyʋaá à kʋ̀ Zudéebhlɩ a mnɩ́ a, á yi gú lé á yi kíkí a nyièdɩ mʋ! Nyʋa ànàà kʋ Zelízalɛ́mʋduú a, á yi mɔ̀ɔ wlʋ́, ànàà kʋ̀ bìdí kʋ́ nɔnʋ a, a nɩ́ ka yɩ́ dú yrɩ́bhà! 22Bhʋ́ a yrié a mnɩ́, bhʋ́ Lagɔ na ká Zelízalɛ́mʋduú a nyʋa plɔɔ bhʋ́alɛ nɩnɩgbɩɛ fɩ́ɛ́ ɩ̀ jɩ́jrɔ̀ wá Lagɔ̀bɔ̀gʋ a mnɩ́ a, ɩ ká neé sralɔɔ̀. 23Kplé lé ɛ́ kla gbádɩ̀ŋwna lé ŋwná à nyɩ́a yúó a, á yi miè, kalɩmɛ yi bhlɩ́ɛ́ a mnɩ́ pla, lé Lagɔ yi mɔ̀ a nyʋa dɩ kʋ́ ŋwʋ́. 24Tʋ́ yi bhli, á yi nyʋa àna bhlá, á yi àna kʋ́ bhli á yia bhlɩ́ jɩ̀ géyilɛ kʋ́ fa, bhlɩ́ɛ́ ɛ̀ nɩɩ́ Lagɔ yi a, á yi Zelízalɛ́mʋdùò bhusu, á yi sɩ́tɛ̀ a kalɩmɛ a yɛ́ dà kʋ àààn lé a tányɩɛ́ Lagɔ ŋwʋ́ wá ʋ́ a, ɛ́ yi bhɩa.
Nyɔɔ́ a Yuwliyʋɔ́ a yrɩ́bha tanyɩ
(Matíe 24.29‑31; Málɩ́kɩ 13.24‑27)
25Tányɩ yi ʋ́ kʋ, lé yrʋ́ lé cʋ́ bhè lagɔ̀drà sɔ́, a yi ɩ mnɩ́ lɛ̀wɔ̀lɩ̀ɛ̀ ɩ̀ nà kà yrúkanyʋa neé mna a, yɛ́ɛ. Vʋ̀vɔ̀lʋ yà jilakwɩɛ́ sɔ́ɔ́ ɩ̀ wlʋ́ɛ́ jie lé ɩ̀ yie a, ɩ́ yi kɛ́zɔ̀ nyʋa nyakalɩ bhláà. 26Wɔlíɛ́ ɩ̀ nà kà zɩkpa zɔ̀ ŋnɩ a, ɩ́ yi kɛ́zɔ̀ nyʋa ŋanɩmɛ bhláà. Lagɔɔ́ a pɔ́waá à kʋ mɔ̀ɔ a, á yi tɩtɛɛ̀. 27Bhʋ́ á na ká Nyɔɔ́ a Yuwliyʋɔ́ yɛ́, ɔ ká jrù a mnɩ́ laa lé ɔ ká yi, ɔ yà ɔ pɔ́wa yà ɔ blɔ̀blɔ́ɔ́ sɔ́.#21.27 A zɛlɩɩ sáà Danɩ 7.13. 28Tányɩɛ́ mʋ́ bhʋ́anɩ wɔlɩ́ɛ́ na ká ŋnɩ a, a bhá yɩ́ wɛ́ kʋ́, lé a bhá fɩ́, mà a flíiflíitanyɩ ya ʋ́ mɛ́!»
Sií a tɔpɔɛ́ a núnúó
(Matíe 24.32‑35; Málɩ́kɩ 13.28‑31)
29Zozíi pá núnúó a múó mà: «A dʋdʋ̀ figíesuó, lé si ànɩ̀ɛ̀ ɩ̀ kʋ̀ klá a mnɩ́ a! 30Ɩ nɩ tɔpɔ a, á yɩbhlɩɛ yɩ́ saá mà kɔ̀kɔ̀yrʋ̀ ya ʋ́ mɛ́. 31A sɛ́fʋ, a nɩ yɛ́ yɩ́ ɩ́mɩ́ a, a yɩbhlɩ yɩ́ saá mà Lagɔ a Léyibhlɩɛ́ a tányɩ ya ʋ́ mɛ́. 32Náa srʋɛ amɔ cɩ́cása mà bhʋ́anɩ nyʋa a jànyɩ̀ɛ̀ nɩ́ ka bhɩa lé wɔlɩ́ɛ́ fɩ́ɛ́ lɩ̀à yi ŋnɩ. 33Lagɔ yà dʋ̀dʋ sɔ́ yi plɩ́, mà ná cícíwɔlɩ nɩ́ ka kɔ́ɔ̀kɔ́ plɩ́.
A mányɩ a nyoku kʋ́
34A mányɩ a nyoku kʋ́, a di nɩ ka kʋ́ ŋnɔ́maà mà yrié fɩ́ɛ́ ɩ́mɩ́ ɩ̀ nɩ́ glɩ̀sɩ́sɩ ŋwɔ́ɔ lé ɩ ká ŋnɩ́ ka lé a ká nʋ́ mná, ɩ́zà a ná bhɔtɔ sáà a kɔ́ɔ́ a zà, a ná málɩɩ́ kʋ́ lé Nyɔɔ́ a Yuwliyʋɔ́ a yiyiyruó ʋ ká lɛ amɔ zɔ̀ vú 35dàda bhísakʋ́, a nɩ ka lɛ amɔ wlú gbí. Mà Kanyɔ a yruó, yrúkanyʋa fɩ́ɛ́ a zà ʋ́ yie. 36A ná ŋwɔ́ɔ̀, a bhibhie tányɩɛ́ fɩ́ɛ́ lé a ká mʋ́ tɛ́maà a ká nyakalɩɛ́ fɩ́ɛ́ ɩ̀ nà kà yi a, ne wlʋ́, bhʋ́ a yi míi lé a yi Nyɔɔ́ a Yuwliyʋɔ́ a drɩ̀ nynʋ́vʋ̀.»
37Gàgàzrɩ̀ bhʋ́ Zozíi cɩ́alɛ Lagɔ̀wlʋ̀ɔ̀ a mnɩ́, yrʋ́ nɩ bhli a, ɔ́ mnɛ yɩ́ Olivíe kikéé a wlú pʋ́ʋ ka. 38Geglìà míi, nyʋa fɩ́ɛ́ ŋnɩlɔ Lagɔ̀wlʋ̀kádʋ̀ɔ̀ a mnɩ́ wlú lé á pʋɔ nyúkwlí.
လက္ရွိေရြးခ်ယ္ထားမွု
Lúkɩ 21: NEY
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.