Psom 10
10
Segner Bondie, ed mwa kont bann opreser
1Kifer to res lwin ar nou, SEGNER?
Kifer pa trouv twa dan moman detres?
2Avek arogans move dimounn persekit bann pov;
zot may bann-la dan zot latrap.
3Move dimounn li fier so prop move dezir;
dimounn gourman li modi LESEGNER e li pena respe pou li.
4Dan so arogans move dimounn pa pran Bondie kont;
dan so panse pena plas pou Bondie.
5Move dimounn reisi tou seki li fer.
Li pa konpran lazistis divinn, sa tro lwin pou li
e li mepriz so lennmi.
6Li dir ar limem, “Pena nanye ki kapav bouz mwa!
Problem ek traka? Zame zot pa pou tous mwa!”
7So labous ranpli ar malediksion; li modi, li koz manti, li menase;
anba so lalang ena parol blesan ek mesanste.
8Li kasiet pre ar bann vilaz san defans
e atann so ler pou touy inosan;
dan kasiet li espionn so viktim;
9li res dan kasiet parey enn lion,
li vey so ler pou atake;
li ris bann pov, li trenn zot dan so piez.
10Bann viktim san defans pa sape
e zot tom dan so pouvwar.
11Dan so panse move dimounn dir, “Bondie pa pran kont;
so figir tourn lot kote, zame li pou trouve.”
12Lev twa, SEGNER! Lev to lame pou pini zot, Bondie;
pa bliye bann ki pe soufer!
13Kifer move dimounn mepriz Bondie?
Li dir, “Bondie pa pou demann mwa rann kont.”
14Tousala pa vre! To bien trouv tou.
To kone ena problem ek soufrans
e to pran tou dan to lame.
Bann ki feb ek san defans
zot remet zotmem dan to lame.
To finn touletan vinn osekour orfelin.
15Kas lerin move dimounn ki viv dan pese;
grenn zot mesanste ziska pa res nanye.
16LESEGNER, limem Lerwa pou leternite.
Bann ki priye lezot bondie
pa pou ena plas dan pei LESEGNER.
17SEGNER, to tann dezir bann ti dimounn,
to pou ekout bann feb e donn zot kouraz.
18To pou rann zistis an faver bann ki pe gagn kraze kouma orfelin;
koumsa bann zans ordiner pou aret sem terer.
လက္ရွိေရြးခ်ယ္ထားမွု
Psom 10: KMNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Nouvo Testaman Kreol Morisien Harmonisation NTPS KM © Bible Society of Mauritius, 2021.