Kejadian 9
9
1Ataru dinin amendada, Allahdi Nuh cap, erdi deiamu nyapu cap tep, ‘Teleppu kunkameng’ tenen, telep upu pepra deipka deiki di, sun yuma tep telep kweipu. Aupu pepu.
Sun yumada, nyapu weik derinkamrume. Weike deipmumpa, dadeipdanen baramenganen, gung weik kupbaramenganen, tuai mutu ban-ban yuma bena kunkamenge. 2Tuai mutu deiki gam kure keca yala-yala yumada, sun tep karepsene. Tuai mutu gam kure keca yuma cap, im neitamai lakra embaramre ma yala yuma cap, tu deiki yanipra embaramre keca yala yuma cap, laut mokon neitamai kure mekina yala yuma cap, sun nimi tuai nesala tep, kware weik dangkamenge. Sun amutarapu kunkamenge.
3Ware keca do yuma, gam kuredi embaramre keca yala-yala yumada, sun jen keca tep karepsene. Menop taruda, tuai di paramu keca bo-bo keca yala-yala yuma, sun jena tep kareramsisitopu, ukutaruda, akeca-keca yuma dukdongopra karepsene. Akeca yumada, jena telepe pepsene. 4Ange yuma jena telep dinin, gam keca popra tu jepkumem taruda, yapi kepman men jeptume. Yapida gam kuna deiyo keca kurura tep, yapi kepman jena meme. Yapi yuma emberyopda, jena telepe.
5Nimi tuai nesala, sun yapi peda ila mambul atep, popsengepa sun yapi embaryopda, pona deiyo neng tep, wenepra upu bokeipkamsene. Tali bura embaramre gam keca yuma peda, yuk gam keca popmengopda, nedi upu bokeipkamsene. Tali bura embaramre gam keca yuma peda, yuk gam keca popmengopda, nedi upu bokeipkamne. Ange utopu, nimi tuai nesala yuma tep nengeda, sun cap kikiman kunge nesala tep, melipra kalengdanapu kunkamenge. Ton nengdi yuk neng popmengopda, nedi wenepra upu bokeipkamsene. Nimi yuma sun gam kunada, ila mambul tep pepsene.
6Ware ngebo do yuma utopua, sundi yuk neng tep poptapmengopda, yuk nengdi sun pona deiyo neng, sun wenemna tep poptapkamenge. Angeda tali tep gum dinin, Allah er kuretopu, yambulanun utopu, er kamo utopu kupra, nimi ketekepra deipka tep, nimi podana meme.” 7Allahdi upepu dingeda, Nuh cap, er nyapsilip cap tep upepu. “Sun yuma tep nengeda, nyakdarumdi, nyapu weik derinkamrume. Tuai mutu neitamai bena kumumdi, gung weik kupbankamrume.” Allahdi pepu.
8Upepudi, aupu ton cap, Nuh cap er nyapu cap tep pepu. 9“Ukuda nedi sun tep, ‘Tek sisi ukupkamsene,’ pepra, pedina upu pepsene. Ada nedi sun cap, sundi deipra dadeipdanen baramenganen, amenda taru sun nyapudi deipkamenge nesala yuma cap tep, pedina upu pepsene. 10Tonda, sun cap gapung co ati neitamai kikiman kunmai gam kure keca cap, ma cap, nimidi peinung keca cap, ware yala keca do yuma, sun cap gapung co ati pumbon di kikiman bura tara yanmarum keca yuma cap, uda tuai mutu neitamai gam kure keca yuma cap tep, ne pedina upu pepsene.
11Apedina upuda ake. Ukutaru di dipra doryankamre taru neitamai yumada, kange di ton cap nedi pepnepa, ila mokon deipredi, gam kun keca yala-yala yuma men jepropkamre. Yuk taru, amenda taru yumada, tuai mutu ban-ban yumada, ila mokon di pio men jepkamre. Angeda, kange di ton cap pio men kupkamne.” Allahdi pepra deipu. 12Upepu dingeda, aupu ton dukdongopra pepu. Apepmasen pedina upu, er peten keca tep nengeda, dua kan-kan neitamaida, nimi mi tu ambuka deipnepa, pio dinkamrume. Ada nedi sun cap, uda sun cap kikiman kure gam kun keca yuma cap tep, pepra deipsene. Ukutaru di dipra, amenda doryankamre taru neitamai yumada, apedinmasen upu, pio tek sisi kunkamre. Men tapkamne.
13Atep konuma, ne nimi mi tu ambuka dua kan-kan konum deipmana tep, akeca eprumyopda, ‘E, Allahdi nun tuai mutu kunup nesala cap, gam kun keca yuma cap tep, pedina peipseu upu, er peten kecada akonuma,’ tenenkamrume. 14Ware taru do yuma, nedi peipnepa, doua weik tuai mutu deiki yakarepa, nimi mi tu ambuka deipmasen keca belepredi, katuai kuprepa, epne.
15Epnyopda, nedi sun tuai mutu kurum nesala cap, gam kure keca yala-yala yuma cap tep, “Kange di ton ila mokon deipredi, tuai gam kure keca pio men jepkamsere,” pepra, pedina upu pepmasenada, pio tenenkamne. Men lupronkamne. 16Atep nimi mi tu ambukada, dua kan-kan katuai belepre taru yumada, nedi tek sisi epkamne. Epnyopda, ne Allahdi, sun tuai mutu kurum gam kun keca yala-yala yuma tep, “Mokon di ton cap men popkamsene,” pepra, pedina pepmasen upuda, pio tenenkamne. Apepmasen upuda, pio men gum kupkamre. Allahdi pepu.
17Aupu pepka deiki di, Allahdi Nuh tep aupu lap pepu. Nimi mi tu ambuka deipmasen ada, ne Allahdi sun tuai mutu gam kunkamrum nesala cap, tali gam kure keca cap yuma tep, ‘Mokon di men jepkamsere’ pepra, pedina upu er peten kecada, nimi mi tu ambuka tepa.
Nuh er nyapu tep pepu upu
18Nuhdi deipu nyapu, sun gapung co ati pum di, er cap yai nyapu sun sida, Sem cap, Ham cap, Yafet cap kurami. (Hamda erdi deipu mi sida, Kanaan kuramu). 19Nuh er nyapudi sun nyapu deipra, dadeipdanen baramyane, derirami nyapudi deiami nesalada, tuai mutu ban-ban yuma bena kurami. Atep, Nuh er nyapu wenerida, tuai mutu nesala sun apu yapu kurami.
20Uda, Nuhda er wa pepra, tu palipra yal keca kouna kael ngebo cadi, erdi adipapu anggur tapu du wa pepu. 21Anggur tapu du konum ekupa, du dakra puruprapupa, mokon deipra dakuramnganen, amendada kange yawaramne me kupu. Nuhdi anggur du mokon kange yawaramrenge dopra jepupa, er kange yawarapupa, er opkal ati, tenda ati pumbon bena, tali nong dempu mapu.
22Ukupupa, er mi Hamdi (ada Kanaan er nai) er nai bo sisa, tali nong dempu mapmaupa, epu. Epudi, er du bo Sem cap, er weit bo Yafet tep lape pepu. 23Hamdi, er nai nong tali epu dinin, Sem cap, Yafet capdi, ‘Nun nai bo sisa er bananga mapmaraida, epnum’ tenen, lyom opkal dana-dana talepdongopra, sun amnyo tara di yakanmareiyanen, aopkal di sun nai er nong yan singipdonoprei.
24Amenda taruda, Nuh bukroudi, kange di ton cap kange doupudi, er mi Hamdi mali kupmaunge, kael kepudi, upepu. 25“Ham er mi Kananda, er nong deiki mali upu pepra deipkene. Er tep wipne. Kanaan er du yape yumada, er deiki tara kunkamenge. Er puda, sun amutarapu kuredi, sun tali melimna ngebo kunkamre,” Nuhdi pepu.
26Upepudi, aupu ton pepu. “Akeca-keca yuma deiki tara kure Deiyo Ngebo Allah Yahweh pio telepe. Semdi Allah er si Yahweh tep, er si erepra teka tenerure. Kananda, Sem er amutara kunkamre. Er tali melimna ngebopu kunkamre. 27Allahdi melimrepa, Yafet er talenkamre tu weik kupkamre. Tonda, Allahdi Sem tep weika di melimrepa, pio telep kupyopda, Yafet cap ton doronkamre. Kikiman kunkamrenge. Kananda, Yafet er amutara kuredi, er tali melimna ngebopu kunkamre,” Nuhdi pepu.
28Allahdi deipu mokon konum gum kupupa, Nuhda keteng tamun keteng tamun denge weik, 350 tahun ton cap gam kuramu. 29Nuh er keteng tamun yumada, denge weik 950 tahun gam kuramudi, depu.
လက္ရွိေရြးခ်ယ္ထားမွု
Kejadian 9: KNTOT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2022 Wycliffe Bible Translators, Inc