Kèʼlo 4
4
Keen wùn Abel
1Adam nèn lò, e shìíy wùn wiiy və Efa. Wù bóŋ bvəm, e dzə̀ə́ wán lumèn, e yòŋ jii, «M kòóy ne wán é vitaaví vé Nyùy Tàr.» Wù nèn shù yír rə́ ji Keen#4.1: Keen: E Lǎm Hibru, yír rə́ne koó fo kisuŋnìn moo jí yee «koóy.». 2Fo bàm, wù kfən tìím bvəm, e dzə̀ə́ fər Keen, e shù yír ji Abel. Abel kúy, a lèm nyám si, a Keen lim súm.
3Wáa dzə e ghan símóʼ sí, Keen lì vifá vímóʼ ví ve wù‑uù kavin fó sum, e wìy, e cù Nyùy Tàr shó. 4Á bèy, Abel táy wan nyàm woo dzəə́ mbìyi, e seè, e tàr mbìv se juŋ si, e cù sa Nyùy Tàr shó. Nyùy Tàr yén, kí bòŋ wun, e səə̀sí wun wùn à cu rəə́. 5Yii bèy, wù ŋwáy Keen wùn à rə́ yee cúu. Keen nèn a shwiíy kilòŋ é ŋàŋén, a tsəmrí rə́r.
6 Nyùy Tàr yén bey, e dzə̀r shó jii, à shwiiy kilòŋ kfə̀n tsə́mri rə́r bìʼ ka? 7Aà kì yiì réŋ, m wàa ten wò vèn à cu yée á? Kinyo ke bi kí dzə wuú yé, a kí yíi ghaʼ wò, aà ben dzə̀ là fóo bàʼàr, a yiì a dzə̀ kinyo ke réŋ kí. 8Keen nèn lò, e bì fə́r və woo Abel ji wùn wun du á e kwaʼ.#4.8: ji wùn wun du á e kwaʼ; Lám Hibrùu yòʼ kér kinshèr kìn. Á dù, e mèé fo, wù koó Abel, e yùyrí.
9 Nyùy Tàr nèn dzə̀r e Keen jii, «Abel woo fər wò bèé?»
Wù bìnèr jii, «M yoʼ kìíy. Yii leey mo fo wun à?»
10 Nyùy Tàr nèn kfə̀n dzə̀r shó jii, «À mùm kin a dzə̀ ka? Mensə́ me fər wò mè tóŋ fo nsay, kan mo ji m siir ŋkfə́tír. 11Lèn və̀n, m shòv ne wò. Mo à yuyrin fər wò, nsay nó mensə́ mvə, bo yì kù mèŋ ne wò bèy. 12À wíy a lìm kifá, é la kí yòʼ a bòŋ. À wíy a ghan ghanén é yuv ji làŋgày e kitu ke nsay, là meemè.»
13Keen nèn sùúy e Nyùy Tàr jii, «Ŋgeʼlàʼ yem kùʼ ne e ŋàáŋàŋ, e shaà vitaáví vém. 14Leéy ri e yèn, à jùm ne mo lán fo wòŋàn, a bó m yòʼ dzəə́ wìy a dzə fo wò mentsə̀m. M sí wìy a ghan e yuv ji làŋgày. Bo a wìr yèn mo, a fèn dzə̀ feé, bo wù sí yúyri.»
15Yii bèy, Nyùy Tàr suúy e Keen jii, «Bó yòʼ dzə̀ bey. A wìr yùyrí wò, bo rə́ə yee ŋgeʼ yíi tav, e shaà ye, kirə́ʼ saàmbà.» Nyùy Tàr nèn səə̀m Keen ji wìr lóo yen wun, é la wù yòʼ dzəə yùyrí. 16Keen ku nèn lò fo Nyùy Tǎr si, e dù, a dzə e wòŋ woo Nod. Nod və̀n‑eè dzə̀, e lò fo Eden, a dù e mbìv ye shùy yii tó fo fo.
Rám Keen
17Keen‑eè shìíy wùn wiiy və, wù bóŋ bvəm, e dzə̀ə́ Enok. Keen wìy lò, e bàʼrì ŋkàlaʼ yìmòʼ, e fò yír ŋkàlaʼ yee shooy moo yé wan və bey. 18Enok nèn dzə̀ə́ Irad, Irad dzəə́ Mehujael, Mehujael dzəə́ Metushael, Metushael dzəə́ Lamek. 19Lamek‑iì kér vikìy abaà, wùmòʼ‑oò dzə̀ Ada, wùmòʼ Tsilla. 20Ada‑aà dzə̀ə́ Jabal. Jabal nèn wìy a dzə tàr à wìr ve vé‑eè shiiy e tàv sí, kfə̀n kér nyám si. 21Yír fər vəə́‑əə̀ dzə̀ Jubal, a Jubal və̀n‑eè dzə̀ tàr à wìr ve vé‑eè kum lúŋ, kfə̀n tóŋ loŋ. 22Tsilla nèn lò, e dzə̀ə́ sa wán lumèn, aá yoŋ ji Tubal‑Keen. Dzə̀ wun wo wù‑uù kèʼèn kilam ké a tòn vifá ve lìm e visha vi, e kfəə́ se vishà si jeéy jeéy. Tsilla wùn Lamek kfən kòóy wán woo wiíy, aá yoŋ ji Naama.
23Kishiíy kímóʼ kí wìy fəə̀, Lamek yòŋ e vikìy vəə́ jii,
«Ada, vèn Tsilla yú kinyo ke m suuy ki.
Ven vee vikìy vém, vèn yuúrí é mbòŋén.
Wìr lémer mo, bo m kù yúyri.
Kìn lò wánlè, e sòy mo, bo m kù yúyri wun.
24A ŋgeʼlàʼ wìr wo wù yuyrin Keen dzə̀ kirə́ʼ saàmbà,
bo ye wìr wo wù yuyrin mo féyì,
yì yíi a dzə kirə́ʼ nshòv saàmbà e msaàmbà.»
Set kèʼ rə́ yee rám
25Adam nèn kfə̀n shìíy wùn wiiy və. Wù bóŋ bvəm, e dzə̀ə́ wán lumèn. Wiíy shú yír ji Set#4.25: Set: E Lǎm Hibru, yír rə́ne koó fo kisuŋnìn moo jí yee «fó.» Yír yee shooyi nén a dzə moo yee «Áfòne» e Lǎm Nsoʼ.. A wù‑uù shu bèy, suuy jii, «Nyùy fò ne mo wán, wù lí kilíŋ ke Abel wo Keen‑eè yuyrin.» 26Set nen wìy kòóy wán lumèn, e shù yír ji Enosh. Dzə̀ ghán sin se wíri‑iì kèʼèn, a cù Nyùy, a yòŋ yír Nyùy Tàr.
လက္ရွိေရြးခ်ယ္ထားမွု
Kèʼlo 4: LNB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2022 CABTAL