Matyu 10
10
Yesus aqa aŋgro 12-pela naŋgo ñam
1Onaqa Yesus na aqa aŋgro 12-pela naŋgi metnjrnaqa aqa areq bonabqa a na naŋgi siŋgila enjrej. Naŋgi na tamo uŋgasari naŋgo jejamuq dena mondor uge uge winjroqnqajqa deqa ti tamo uŋgasari naŋgo ma kalil kobotetnjroqnqajqa deqa ti marsiq naŋgi siŋgila enjrej.
2Aqa aŋgro 12-pela siŋgila enjrej qaji naŋgo ñam agiende. Bei Saimon. Aqa ñam bei Yesus na Pita waiyej. Naŋgi aqa was Andru wo. Bei Sebedi aqa ŋiri Jems wo aqa was Jon wo. 3Ariya Filip wo Bartolomyu wo. Bei Tomas naŋgi takis o qaji tamo Matyu wo. Bei Alfias aqa ŋiri Jems naŋgi Tadius wo. 4Bei Saimon agi Rom naŋgi winjrqajqa maroqnej qaji. Ariya bei Judas Iskariot agi Yesus osiqa jeu tamo naŋgo baŋq di atej qaji a di. Yesus aqa aŋgro 12-pela naŋgo ñam agide.
Yesus na aqa aŋgro 12-pela naŋgi qariŋnjrnaqa Israel naŋgoq giloqneb
5Osiqa aŋgro 12-pela naŋgi di qariŋnjrsiqa minjrej, “Niŋgi qure qureq giloqniye. Ariya niŋgi tamo sawa bei bei qaji naŋgoq giloqnaib. Samaria naŋgo qureq dego giloqnaib. 6Niŋgi Israel tamo uŋgasari naŋgo segiq giloqniye. Israel naŋgi tulaŋ sougetejunub. Naŋgi kaja bul mandor saiqoji. 7Deqa niŋgi Israel naŋgo segiq giloqnsibqa anjam endegsib minjroqniye, ‘Qotei a bosim nuŋgo Mandor Koba sosim niŋgi taqatŋgwajqa bati jojomqo.’ 8Niŋgi Israel naŋgi degsib minjroqnsibqa naŋgo ma tamo naŋgi boletnjroqniye. Tamo moreŋoqnibqa olo tigeltnjroqniye. Tamo naŋgo jejamu yu na ugeeleŋo qaji naŋgi olo gereiyetnjroqniye. Mondor uge uge naŋgi dego tamo uŋgasari naŋgo jejamuq dena winjroqniye. E na siŋgila eŋgonum qaji di niŋgi ijoq dena awaiyosai. E na laŋa eŋgonum. Deqa niŋgi dego tamo naŋgi laŋa gereinjroqniye. Naŋgi awai bei yainjraib.
9“Niŋgi gol ti silva ti meniŋ silali kapa ti osi gilaib. 10Niŋgi walwelosib nuŋgo qaquŋ aib. Gara jugo aiye aiyel aib. Siŋga tatal aiye aiyel aib. Walwelqajqa toqoŋ ojaib. Niŋgi Qotei aqa wau tamo deqa niŋgi qure qureq giloqnibqa naŋgi na iŋgi iŋgi deqaji niŋgi eŋgeleŋoqnqab.
11“Niŋgi qure bei beiq di brantoqnsibqa tamo bole bei itoqnsib aqa talq di soqniye. Dia sosib dena tigelosib olo qure beiq giloqniye. 12Niŋgi tal bei gogetoqnsibqa tamo uŋgasari tal miligiq di unub qaji naŋgi endegsib minjroqniye, ‘Qotei na niŋgi kumbra bole eŋgeme.’ 13Degsib minjroqnibqa naŋgi niŋgi joqsib gereiŋgibqa nuŋgo lawo anjam di naŋgoq di uratib soqnem. Ariya naŋgi niŋgi gereiŋgosaiabqa nuŋgo lawo anjam di olo puluosim nuŋgoq bem. 14Tamo bei na niŋgi gereiŋgwa uratimqa kio nuŋgo anjam quqwa asgiyimqa kio niŋgi qure di uratqa oqnsib nuŋgo siŋga tumbrum butuyoqniye. Yimqa naŋgi nuŋgo kumbra di unsib poinjrqas, ‘Bole, iga kumbra ugetonum.’ 15Niŋgi quiye. E bole merŋgwai. Mondoŋ Qotei na tamo uŋgasari naŋgo une qa peginjrqa batiamqa qure deqaji tamo uŋgasari naŋgi ijo anjam uratonub deqa Qotei na naŋgi tulaŋ padaltnjrougetqas. Ariya Sodom qure ti Gomora qure ti naŋgi Qotei na mondoŋ degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa.”
Tamo qudei naŋgi na Yesus aqa aŋgro naŋgi gulube enjroqnqab
16Osiqa Yesus a olo anjam endegsi minjrej, “Niŋgi quiye. Niŋgi kaja du du bul deqa e na niŋgi qariŋgitqa gilsib bauŋ juwaŋ naŋgo ambleq dia walweloqnqab. Deqa niŋgi amal naŋgo kumbra dauryoqniye. Amal naŋgi geregere ŋam atoqnsib laqnub. Dego kere niŋgi geregere are qaloqnsib walweloqniye. Niŋgi binoŋ naŋgo kumbra dego dauryoqniye. Binoŋ naŋgi kumbra uge yosaieqnub. Dego kere niŋgi kumbra uge yqajqa are qaloqnaib. 17Niŋgi tamo naŋgi qa geregere ŋam atsib soqniye. Tamo qudei naŋgi na bosib niŋgi ojeleŋosib tamo kokba naŋgo ulatamuq dia niŋgi tigeltŋgoqnqab. Osib nuŋgo jejamuq di anjam gargekoba laŋa laŋa qametŋgoqnsib naŋgo Qotei tal miligiq dia niŋgi kumbaiŋgoqnqab. 18Naŋgi ijo ñam ugetqa maroqnsib deqa niŋgi joqoqnsib Rom naŋgo gate kokba ti naŋgo mandor kokba ti naŋgo ulatamuq dia niŋgi tigeltŋgoqnqab. Bati deqa niŋgi ijo anjam bole naŋgi minjroqnqab. Osib sawa bei bei qaji tamo naŋgi dego ijo anjam bole minjroqnqab. 19Naŋgi na niŋgi ojsib gate kokba naŋgo ulatamuq dia tigeltŋgoqnibqa niŋgi ulaosib endegsib are qalaib, ‘Iga na kamba anjam kie minjrqom?’ Niŋgi degaib. Bati deqa Qotei na nuŋgo medabu siŋgilatetŋgimqa niŋgi kamba anjam minjrqab. 20Di kiyaqa? Niŋgi segi na anjam minjrqasai. Nuŋgo Abu aqa Mondor na nuŋgo medabu siŋgilatetŋgim niŋgi anjam marqab.
21“Bati deqa kumbra uge endeqaji branteleŋqas. Tamo qudei naŋgi na naŋgo segi was naŋgi ojeleŋoqnsib jeu tamo naŋgo baŋq di ateleŋoqnibqa naŋgi na naŋgi ñumoqnib moreŋoqnqab. Tamo qudei naŋgi na naŋgo segi aŋgro naŋgi dego degsib ojeleŋoqnqab. Aŋgro qudei naŋgi na naŋgo segi ai wo abu wo naŋgi jeutnjroqnsib ojeleŋoqnsib jeu tamo naŋgo baŋq di ateleŋoqnibqa naŋgi na naŋgi ñumoqnib moreŋoqnqab. 22Niŋgi ijo ñam ejunub deqa tamo uŋgasari kalil naŋgi niŋgi qa are tulaŋ ugeinjroqnqas. Ariya tamo uŋgasari naŋgi ijo ñam siŋgila na ojsib gilsi gilsib diŋo bati itqab di Qotei na naŋgi oqas. 23Qure bei beiq dia tamo uŋgasari naŋgi na niŋgi ugeugeiŋgoqnibqa niŋgi naŋgo qure di uratoqnsib olo qure beiq giloqniye. Niŋgi quiye. E bole merŋgwai. Niŋgi Israel naŋgo qure qure kalil keretosaisoqnibqa e Tamo Aŋgro olo bqai.
24“Aŋgro kiñala bei na aqa abu buŋyqa keresai. Kaŋgal tamo na aqa tamo koba buŋyqa keresai. 25Aŋgro a kobaqujaosimqa di aqa abu ombla kerekereqab. Kaŋgal tamo a powo koba osimqa di aqa tamo koba ombla kerekereqab. Jeu tamo naŋgi na tal aqa abu a ñam Belsebul waiyeqnub. Deqa iga qalieonum, naŋgi na aqa aŋgro naŋgi ñam tulaŋ ugedamu wainjrqab.”
Niŋgi jeu tamo naŋgi ulainjraib. Qotei segi ulaiyiye
26Osiqa Yesus a olo anjam endegsi minjrej, “Niŋgi jeu tamo naŋgi di ulainjraib. Kumbra kalil uliejunu qaji di boleq dqas. Uli anjam kalil dego tamo naŋgi qusib poinjrqas. 27Anjam e ambruq dia merŋgeqnum qaji di niŋgi olo suwaŋoq dia maroqniye. Anjam e lumu na merŋgeqnum qaji di niŋgi olo bijal goge dia tigeloqnsibqa tamo uŋgasari naŋgi minjroqniye. 28Niŋgi jeu tamo naŋgi ulainjraib. Naŋgi nuŋgo jejamu segi qalsib moiotqa kere. Naŋgi nuŋgo qunuŋ moiotqa keresai. Deqa niŋgi naŋgi ulainjraib. Qotei a segi ulaiyiye. A na tamo naŋgo qunuŋ ti jejamu ti padaltnjrsim naŋgi ŋamyuoq breinjrqa kere.
29“Niŋgi qalie. Tamo naŋgi qebari sinjir silali kobaquja na awaiyosaieqnub. Silali kiñala na awaiyeqnub. 10 toea dego. Ariya nuŋgo Abu a na qebari sinjir naŋgi geregere taqatnjreqnu. Deqa a na qebari sinjir bei taqatim a uloŋosim mandamq aiqa keresai. 30Dego kere Qotei a nuŋgo gate baŋga segi segi sisiyeqnu. A niŋgi segi segi qa qalie bole. 31Deqa niŋgi ulaaib. Niŋgi na qebari kalil naŋgi tulaŋ buŋnjrejunub.”
Niŋgi Yesus aqa ñam marqajqa ulaaib
32Osiqa Yesus a olo anjam endegsi minjrej, “Tamo naŋgi ijo ñam tamo uŋgasari naŋgo ulatamuq dia mareqnub qaji mondoŋ e kamba ijo Abu laŋ qureq di unu qaji aqa ulatamuq dia naŋgo ñam dego marqai. 33Ariya tamo naŋgi ijo ñam tamo uŋgasari naŋgo ulatamuq dia marqajqa jemainjreqnu qaji mondoŋ e kamba ijo Abu laŋ qureq di unu qaji aqa ulatamuq dia naŋgo ñam dego marqajqa jemaibqas.”
Tamo bei na Yesus tulaŋ qalaqalaiyqasai di a aqa aŋgro sqa keresai
34Osiqa Yesus a olo anjam endegsi minjrej, “Niŋgi kiersib are qalonub? E na qaja kobotitqa tamo uŋgasari naŋgi geregere lawo na sqajqa deqa e mandamq aiem kio? Sai. E na qaja kobotqajqa bosai. E na tamo uŋgasari naŋgi pupoinjritqa naŋgi jeu jeu sqajqa deqa e bem. 35Od, e jeu kumbra tigeltqa bem. Deqa aŋgro mel naŋgi na naŋgo segi abu naŋgi jeutnjroqnqab. Aŋgro sebiŋ naŋgi na naŋgo segi ai naŋgi jeutnjroqnqab. Aiŋ yala naŋgi na naŋgo segi aiŋ qeli naŋgi jeutnjroqnqab. 36Tamo uŋgasari tal qujaiq di unub qaji naŋgi segi jeu jeu sqab.
37“Deqa tamo bei na aqa ai wo abu wo naŋgi tulaŋ qalaqalainjrsimqa ariya di buŋyosim e tulaŋ qalaqalaibqasai di a ijo aŋgro sqa keresai. Tamo bei na aqa aŋgro mel naŋgi ti aqa aŋgro sebiŋ naŋgi ti tulaŋ qalaqalainjrsimqa ariya di buŋyosim e tulaŋ qalaqalaibqasai di a ijo aŋgro sqa keresai. 38Tamo bei na aqa segi ŋamburbas qoboiyosim e daurbqasai di a ijo aŋgro sqa keresai. 39Tamo bei a aqa segi ŋambile qa areqalo kobaiyqas di a padalqas. Ariya tamo bei a e qa are qalsimqa aqa segi ŋambile uratqas di a olo ŋambile bole oqas.”
Tamo bei na Yesus aqa aŋgro bei gereiyqas di Qotei na a awai bole yqas
40Osiqa Yesus a olo anjam endegsi minjrej, “Tamo bei na niŋgi osim geregereiŋgwas di a na e dego osim geregereibqas. Tamo a e oqas di a na ijo Abu e qariŋbej qaji di dego oqas. 41Tamo bei a endegsi are qalqas, ‘Tamo di a Qotei aqa medabu o qaji tamo bei. Deqa e na a aqaryaiyqai.’ A degsi are qalsimqa tamo di osim aqa talq di gereiyqas di Qotei na kamba awai bole a yqas. Di kiyaqa? A Qotei aqa medabu o qaji tamo gereiyqo deqa. Tamo bei a endegsi are qalqas, ‘Tamo di a Qotei aqa anjam dauryeqnu qaji tamo bole. Deqa e na a aqaryaiyqai.’ A degsi are qalsimqa tamo di osim aqa talq di gereiyqas di Qotei na kamba awai bole yqas. Di kiyaqa? A na Qotei aqa anjam dauryeqnu qaji tamo bole gereiyqo deqa. 42Tamo bei a endegsi are qalqas, ‘Tamo di a Yesus aqa aŋgro. Deqa e na a aqaryaiyqai.’ A degsi are qalsimqa ijo aŋgro di osim ya ulili tigsim anaiyqas di Qotei na kamba awai bole yqas. Niŋgi quiye. E bole merŋgwai. A na ijo segi aŋgro gereiyqo deqa aqa awai bole Qotei na yqo qaji di tamo bei na olo yaiyqa keresai.”
လက္ရွိေရြးခ်ယ္ထားမွု
Matyu 10: bojNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.