The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

ဘုရားသခင်​၏​လူ​တစ်​ဦး​သည် ထာဝရဘုရား​၏​အမိန့်​တော်​အတိုင်း ယုဒ​ပြည်​မှ ဗေသလ​မြို့​သို့ ရောက်လာ​၏​။ ထို​အချိန်​တွင် ယေရောဗောင်​မင်းကြီး​သည် နံ့သာပေါင်း​ကို မီးရှို့ပူဇော်​ရန် ယဇ်ပလ္လင်​နား​တွင် ရပ်​နေ​၏​။ ထို​သူ​သည် ထာဝရဘုရား​ဆင့်ဆို​စေ​သည့်​အတိုင်း ယဇ်ပလ္လင်​ကို​ဆန့်ကျင်​လျက် “​အို ယဇ်ပလ္လင် ယဇ်ပလ္လင်​၊ ထာဝရဘုရား​က ‘​ကြည့်ရှု​လော့​။ ဒါဝိဒ်​အမျိုးအနွယ်​မှ ယောရှိ​အမည်​ရှိ​သော​သား​တစ်​ယောက် မွေးဖွား​လိမ့်မည်​။ သူ​သည် အထွတ်အမြတ်​ထား​ရာ​ကုန်းမြင့်​များ​၌ နံ့သာပေါင်း​မီးရှို့ပူဇော်​သော​ယဇ်ပုရောဟိတ်​တို့​ကို သင့်​အပေါ်​တွင် ပူဇော်​လိမ့်မည်​။ လူ​၏​အရိုး​တို့​ကို သင့်​အပေါ်​တွင် မီးရှို့​လိမ့်မည်​’​ဟူ၍ မိန့်​တော်မူ​ပြီ​”​ဟု ကြွေးကြော်​လေ​၏​။ ထို့နောက် သူ​က “​ထာဝရဘုရား​မိန့်​တော်မူ​သည့် နိမိတ်လက္ခဏာ​ဟူမူကား ‘​ကြည့်ရှု​လော့​။ ယဇ်ပလ္လင်​အက်ကွဲ​ပြီး ယဇ်ပလ္လင်​ပေါ်ရှိ​ပြာ​များ ဖိတ်ကျ​လာ​လိမ့်မည်​’​ဟူ၍ ဖြစ်​၏​”​ဟု ဆို​လျက် ထို​နေ့​တွင် နိမိတ်လက္ခဏာ​တစ်​ခု​ကို ပြ​လေ​၏​။
ဘုရားသခင်​၏​လူ​သည် ဗေသလ​မြို့​ရှိ​ယဇ်ပလ္လင်​အား ဆန့်ကျင်​ကြွေးကြော်​ခဲ့​သော​စကား​များ​ကို ယေရောဗောင်​မင်းကြီး​ကြား​လျှင် သူ​သည် ယဇ်ပလ္လင်​ပေါ်တွင်​ရပ်​လျက် လက်​ကို​ဆန့်​ပြီး “​သူ့​ကို ဖမ်း​ကြ​လော့​”​ဟု အမိန့်ပေး​၏​။ ထိုသို့​ဆန့်​လိုက်​သော​လက်​သည် ခြောက်သွား​သဖြင့် ပြန်ရုပ်​၍​မ​ရ​တော့​ချေ​။ ဘုရားသခင်​၏​လူ​ကို ထာဝရဘုရား​မိန့်​တော်မူ​ခဲ့​သည့် နိမိတ်လက္ခဏာ​အတိုင်း ယဇ်ပလ္လင်​အက်ကွဲ​ပြီး ယဇ်ပလ္လင်​ပေါ်မှ​ပြာ​များ ဖိတ်ကျ​လာ​လေ​၏​။
ထိုအခါ ရှင်ဘုရင်​က ဘုရားသခင်​၏​လူ​အား “​သင်​၏​ဘုရားသခင်​ထာဝရဘုရား​ထံ တိုးလျှိုးတောင်းပန်​ပေး​ပါ​လော့​။ ငါ့​လက်​ကို ပြန်ရုပ်​နိုင်​ဖို့ ငါ့​အတွက် ဆုတောင်း​ပေး​ပါ​လော့​”​ဟု ဆို​သဖြင့် ဘုရားသခင်​၏​လူ​သည် ထာဝရဘုရား​ထံ တိုးလျှိုးတောင်းပန်​ပေး​ရာ ရှင်ဘုရင်​၏​လက်​သည် နဂို​အတိုင်း​ပြန်​ကောင်း​သွား​၏​။
ထိုအခါ ရှင်ဘုရင်​က ဘုရားသခင်​၏​လူ​အား “​ငါ​နှင့်အတူ နန်းတော်​သို့​လိုက်​ခဲ့​၍ စားသောက်​ပါ​လော့​။ သင့်​အား လက်ဆောင်​လည်း ပေး​လို​ပါ​သည်​”​ဟု မိန့်ဆို​၏​။
သို့သော် ဘုရားသခင်​၏​လူ​က ရှင်ဘုရင်​အား “​အကျွန်ုပ်​အား နန်းတော်​တစ်ဝက်​ပေး​လျှင်ပင် အကျွန်ုပ်​မ​လိုက်​နိုင်​ပါ​။ ဤ​အရပ်​၌ အစာ​ကို​လည်း မ​စား​၊ ရေ​ကို​လည်း မ​သောက်​ပါ​။ အကြောင်းမူကား ထာဝရဘုရား​က ‘​သင်​သည် အစာ​ကို မ​စား​ရ​၊ ရေ​ကို​လည်း မ​သောက်​ရ​၊ လာ​သော​လမ်း​အတိုင်း​လည်း မ​ပြန်​ရ​’​ဟူသော​စကား​ကို ငါ့​အား မှာထား​တော်မူ​ပြီ​”​ဟု ပြန်ပြော​၏​။ ထို့ကြောင့် သူ​သည် ဗေသလ​မြို့​သို့​လာ​ခဲ့​သော​လမ်း​အတိုင်း မ​ပြန်​ဘဲ အခြား​လမ်း​မှ ပြန်သွား​လေ​၏​။

ဗေသလ​မြို့​တွင် အသက်ကြီး​သော​ပရောဖက်​တစ်​ပါး​ရှိ​ရာ သူ့​သား​တို့​သည် သူ့​ထံ​လာ​၍ ထို​နေ့​၌ ဗေသလ​မြို့​တွင် ဘုရားသခင်​၏​လူ ပြု​ခဲ့​သော​အမှု​အလုံးစုံ​ကို ပြောပြ​ကြ​၏​။ ရှင်ဘုရင်​အား​ပြော​ခဲ့​သော​စကား​တို့​ကို​လည်း သူ​တို့​ဖခင်​ကြီး​အား ပြောပြ​လျှင် ဖခင်​ဖြစ်​သူ​က သူ့​သား​တို့​အား “​ထို​သူ မည်သည့်​လမ်း​မှ​ပြန်သွား​သနည်း​”​ဟု မေး​ရာ သူ့​သား​တို့​က ယုဒ​ပြည်​မှ​လာ​သော ဘုရားသခင်​၏​လူ ပြန်သွား​သည့်​လမ်း​ကို ပြောပြ​ကြ​၏​။ ထိုအခါ ဖခင်​ဖြစ်​သူ​က သူ့​သား​တို့​အား “​မြည်း​ကို​ကုန်းနှီးတင်​ပေး​ပါ​”​ဟု ဆို​သဖြင့် သူ​တို့​လည်း မြည်း​ကို​ကုန်းနှီးတင်​ပေး​ကြ​ရာ ဖခင်​ဖြစ်​သူ​သည် မြည်း​ကို​စီး​၍ ဘုရားသခင်​၏​လူ​နောက်သို့​လိုက်သွား​ရာ သပိတ်ပင်​အောက်​၌ ထိုင်​နေ​သည်​ကို​တွေ့​လျှင် “​သင်​သည် ယုဒ​ပြည်​မှ​လာ​သော​ဘုရားသခင်​၏​လူ​လော​”​ဟု မေး​၏​။ ဘုရားသခင်​၏​လူ​က​လည်း “​ဟုတ်​ပါ​၏​”​ဟု ပြန်ပြော​၏​။
ထိုအခါ ပရောဖက်​က “​အကျွန်ုပ်​အိမ်​သို့​လိုက်​၍ အစားအစာ​သုံးဆောင်​ပါ​လော့​”​ဟု ဖိတ်ခေါ်​လျှင်
ဘုရားသခင်​၏​လူ​က “​သင်​နှင့်အတူ မ​လိုက်​နိုင်​ပါ​။ သင်​နှင့်အတူ ပြန်လိုက်​သွား​ပြီး ဤ​အရပ်​၌ အစာ​ကို​လည်း မ​စား​၊ ရေ​ကို​လည်း မ​သောက်​နိုင်​ပါ​။ ထာဝရဘုရား​၏​စကား​တော်​သည် ငါ့​ထံသို့​ရောက်လာ​၍ ‘​ထို​အရပ်​၌ အစာ​ကို မ​စား​ရ​၊ ရေ​ကို​လည်း မ​သောက်​ရ​။ လာ​သော​လမ်း​အတိုင်း​လည်း မ​ပြန်​ရ​’​ဟု ငါ့​အား မိန့်မှာ​ထား​ပြီ​”​ဟု ပြန်ပြော​၏​။
ပရောဖက်​က “​ငါ​သည်​လည်း သင်​ကဲ့သို့ ပရောဖက်​တစ်​ပါး​ပင်​ဖြစ်​ပါ​၏​။ ‘​သူ့​ကို သင့်​အိမ်​သို့ ပြန်ခေါ်​သွား​ပါ​။ အစာ​လည်း ကျွေး​ပါ​၊ ရေ​လည်း တိုက်​ပါ​’​ဟူသည့် ထာဝရဘုရား​၏​စကား​တော်​ကို ကောင်းကင်တမန်​တစ်​ပါး​က ငါ့​အား မိန့်​တော်မူ​ပြီ​”​ဟု လိမ်ညာ​ပြောဆို​လေ​၏​။ ထို့ကြောင့် ဘုရားသခင်​၏​လူ​က ပရောဖက်​နောက်​သို့​ပြန်လိုက်လာ​ပြီး သူ့​အိမ်​တွင် အစားအစာ​ကို​စား​၍ ရေ​လည်း သောက်​လေ​၏​။
စားပွဲ​တွင် သူ​တို့​ထိုင်​၍​စား​နေ​စဉ် ဘုရားသခင်​၏​လူ​ကို​ပြန်ခေါ်လာ​သော​ပရောဖက်​ထံသို့ ထာဝရဘုရား​၏​နှုတ်ကပတ်တော်​ရောက်လာ​၍ သူ​သည် ယုဒ​ပြည်​မှ​လာ​သော​ဘုရားသခင်​၏​လူ​အား “​ထာဝရဘုရား​က ‘​သင်​သည် ထာဝရဘုရား​၏​နှုတ်ကပတ်တော်​ကို ဖီဆန်​ပြီ​။ သင်​၏​ဘုရားသခင်​ထာဝရဘုရား မိန့်မှာ​သော​စကား​တော်​ကို မ​လိုက်နာ​ဘဲ “​အစာ​လည်း မ​စား​ရ​၊ ရေ​လည်း မ​သောက်​ရ​”​ဟု သင့်​အား ငါ​မှာထား​သော​နေရာ​သို့ ပြန်သွား​ပြီး စား​သောက်​လေ​ပြီ​။ ထို့ကြောင့် သင့်​အလောင်း​သည် သင့်​ဘိုးဘေး​တို့​၏​သင်္ချိုင်း​သို့ ရောက်​ရ​မည်​မ​ဟုတ်​’​ဟူ၍ မိန့်​တော်မူ​၏​”​ဟု အော်ဟစ်​ပြောဆို​လေ​၏​။
အစာရေစာ စား​သောက်​ပြီး​သောအခါ သူ့​အား​ပြန်ခေါ်လာ​သော​ပရောဖက်​က သူ့​အတွက် မြည်း​ကို​ကုန်းနှီးတင်​ပေး​ပြီး သူ​ပြန်သွား​ရာ လမ်း​တွင် ခြင်္သေ့​နှင့်​တိုး​၍ သူ့​ကို​ကိုက်သတ်​သဖြင့် သူ​၏​အလောင်း​သည် လမ်း​ပေါ်တွင်​လဲ​နေ​၏​။ အလောင်း​ဘေး​တွင် မြည်း​နှင့်​ခြင်္သေ့​တို့ ရပ်​နေ​ကြ​၏​။
ထို​နေရာ​သို့ ဖြတ်သန်းသွားလာ​သူ​တို့​သည် လမ်း​ပေါ်တွင်​လဲ​နေ​သော​အလောင်း​နှင့် အလောင်း​ဘေး​တွင်​ရပ်​နေ​သော​ခြင်္သေ့​ကို​မြင်​လျှင် အသက်ကြီး​သော​ပရောဖက်​နေထိုင်​ရာ​မြို့​သို့​သွား​၍ ပြောပြ​ကြ​၏​။ လမ်းခုလတ်​မှ သူ့​အား​ပြန်ခေါ်လာ​ခဲ့​သော​ပရောဖက်​သည် ထို​သတင်း​ကို​ကြား​သောအခါ “​ဤ​သူ​သည် ထာဝရဘုရား​၏​စကား​တော်​ကို ဖီဆန်​သော ဘုရားသခင်​၏​လူ​ဖြစ်​လိမ့်မည်​။ ထာဝရဘုရား​သည် ခြင်္သေ့​ကို​အခွင့်ပေး​သဖြင့် သူ့​ကို ခြင်္သေ့​ကိုက်ဖြတ်​သတ်ပစ်​လေ​ပြီ​။ သူ့​ကို ထာဝရဘုရား​မိန့်​တော်မူ​သည့်​အတိုင်း ဖြစ်​လေ​ပြီ​တကား​”​ဟု ဆို​၍
သူ့​သား​တို့​အား “​ငါ့​အတွက် မြည်း​ကို​ကုန်းနှီးတင်​ပေး​ကြ​ပါ​”​ဟု ဆို​သဖြင့် သူ​တို့​က​လည်း ကုန်းနှီးတင်​ပေး​ကြ​၏​။ သူ​သည်​လည်း ထွက်သွား​၍ လမ်း​ပေါ်တွင် လဲကျ​နေ​သော​အလောင်း​နှင့် အလောင်း​ဘေး​တွင်​ရပ်​နေ​သော မြည်း​နှင့်​ခြင်္သေ့​ကို​တွေ့​၏​။ ခြင်္သေ့​သည် အသေကောင်​ကို​မ​စား​၊ မြည်း​ကို​လည်း မ​ကိုက်​ပေ​။ ပရောဖက်​သည် ဘုရားသခင့်​လူ​၏​အလောင်း​ကို​မ​၍ မြည်း​ပေါ်​ပွေ့တင်​ပြီး ပြန်​သယ်လာ​၏​။ အသက်ကြီး​သော​ပရောဖက်​သည် သူ​နေထိုင်​ရာ​မြို့​သို့​ပြန်လာ​ပြီး သူ့​အတွက် ငိုကြွေးမြည်တမ်း​ခြင်း​ကို​ပြု​လျက် သူ့​ကို​သင်္ဂြိုဟ်​လေ​၏​။ အလောင်း​ကို မိမိ​သင်္ချိုင်း​တွင်​သင်္ဂြိုဟ်​ပြီး “​အလို​၊ ငါ့​ညီ ဖြစ်ရလေခြင်း​”​ဟု ငိုကြွေးမြည်တမ်း​လေ​၏​။
ပရောဖက်​သည် ဘုရားသခင်​၏​လူ​ကို သင်္ဂြိုဟ်​ပြီးနောက် မိမိ​သား​တို့​အား “​ငါ​သေ​လျှင် ဘုရားသခင်​၏​လူ​ကို​သင်္ဂြိုဟ်​သော​သင်္ချိုင်း​တွင် ငါ့​ကို​သင်္ဂြိုဟ်​ပါ​။ ငါ့​အရိုး​ကို သူ့​အရိုး​ဘေး​တွင်​ထား​ပါ​။ ဗေသလ​မြို့​ရှိ​ယဇ်ပလ္လင်​၊ ရှမာရိ​မြို့ရွာ​ရှိ​အထွတ်အမြတ်​ထား​ရာ​ကုန်းမြင့်​မှ​ဝတ်ကျောင်း​များ​နှင့်​ပတ်သက်၍ ထာဝရဘုရား​၏​စကား​တော်​အတိုင်း ထို​သူ​ကြွေးကြော်​ခဲ့​သော​အရာ​သည် အမှန်​ဖြစ်လာ​လိမ့်မည်​”​ဟု မှာကြား​လေ​၏​။
ဤသို့​ဖြစ်ပျက်​ခဲ့​ပြီးနောက်​တွင်​လည်း ယေရောဗောင်​မင်းကြီး​သည် လမ်းမှား​ကို​မ​စွန့်​။ အထွတ်အမြတ်​ထား​ရာ​ကုန်းမြင့်​များ​တွင် ယဇ်ပုရောဟိတ်​ကို သာမန်လူ​များ​ထဲမှ ရွေးကောက်​ခန့်ထား​၏​။ ယဇ်ပုရောဟိတ်​လုပ်​လို​သူ​များ​ကို မိမိကိုယ်တိုင်​ခန့်အပ်​ရာ ထို​သူ​တို့​သည် အထွတ်အမြတ်​ထား​ရာ​ကုန်းမြင့်​များ​တွင် ယဇ်ပုရောဟိတ်​များ​ဖြစ်လာ​ကြ​၏​။ ဤသို့​ပြုမူ​ခြင်း​များ​သည် ယေရောဗောင်​မင်းမျိုးမင်းနွယ်​အတွက် အပြစ်​ဖြစ်လာ​ပြီး သူ​တို့​ကို မြေမျက်နှာပြင်​ပေါ်​မှ​ဖျက်ဆီးသုတ်သင်​ပစ်​ရ​မည့်​အခြေ​သို့ ဆိုက်​လေ​၏​။

နားထောင်ပါ။ ဓမ္မရာဇဝင်တတိယစောင် 13