The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

စိတ်အာရုံ​ချိုင့်ဝှမ်း​နှင့်ဆိုင်သော​ဗျာဒိတ်​တော်​။ မည်သည့်​အကြောင်း​ကြောင့် သင်​တို့​အားလုံး ခေါင်မိုးပြင်​ပေါ်သို့​တက်သွား​ကြ​သနည်း​။ သင်​သည် ဆူညံသံ​နှင့်​ပြည့်​သော​မြို့​၊ အုတ်အုတ်ကျက်ကျက်​ဖြစ်​သော​မြို့​၊ အပျော်အပါး​များ​နှင့်​စည်ကား​ခဲ့​သော​မြို့ ဖြစ်​ပါ​သည်​တကား​။ အသတ်ခံရ​သော သင်​၏​လူ​တို့​သည် ဓား​ဖြင့် သေဆုံးသူ​မ​ဟုတ်​။ စစ်ပွဲ​၌ ကျဆုံး​သူ​များ​လည်း​မ​ဟုတ်​။ သင့်​ကို အုပ်ချုပ်သူ​အပေါင်း​တို့​သည် အတူတကွ​ထွက်ပြေး​ကြ​၏​။ လေး​ကို​ပင်​မ​သုံး​ရ​ဘဲ ဖမ်းဆီးတုပ်နှောင်​ခြင်း​ခံရ​၏​။ အဝေး​သို့​ထွက်ပြေး​ကြ​သော်လည်း အတွေ့​ခံရ​သော​သူ​အားလုံး အတူတကွ​ဖမ်းဆီးတုပ်နှောင်​ခြင်း​ခံရ​ကြ​၏​။ “​ငါ့​ကို​မကြည့်​ကြ​နှင့်​။ အားရပါးရ​ငိုကြွေး​ပါရစေ​။ ငါ့​လူမျိုး​သမီးပျို​တို့ ပျက်စီး​သည်​ဖြစ်၍ ငါ့​ကို​နှစ်သိမ့်​ဖို့ မ​ကြိုးစား​ကြ​နှင့်​”​ဟု ငါ​ဆို​၏​။ ကောင်းကင်​ဗိုလ်ခြေ​အရှင်သခင်​ထာဝရဘုရား​၌ နေ့ရက်​တစ်​ရက်​ရှိ​၏​။ ထို​နေ့​၌ စိတ်အာရုံ​ချိုင့်ဝှမ်း​တွင် ထိတ်လန့်ချောက်ချား​ခြင်း​ရှိ​မည်​၊ နိုင်ထက်စီးနင်း​ခံရ​မည်​၊ ရုန်းရင်းဆန်ခတ်​ဖြစ်​မည်​။ မြို့ရိုး​ပြိုပျက်​၍ တောင်​များ​ဆီသို့ အော်ဟစ်သံ​များ ရောက်သွား​လိမ့်မည်​။ ဧလံ​အမျိုး​သည် မြားကျည်တောက်​ကို​ယူ​၍ မြင်းရထားစီးသူရဲ​နှင့်တကွ လာ​၏​။ ကိရ​ပြည်သား​သည်​လည်း ဒိုင်းလွှား​ကို ထုတ်​၏​။ သင်​၏​အကောင်းဆုံး​ချိုင့်ဝှမ်း​တို့​သည် စစ်ရထား​နှင့်​ပြည့်​၏​။ မြင်းစီးသူရဲ​တို့​သည် မြို့​တံခါး​၌ အခိုင်အမာ​နေရာယူ​ကြ​၏​။ ကိုယ်တော်​သည် ယုဒ​ပြည်​၏​အကာအရံ​ကို ဖယ်ရှား​တော်မူ​ပြီ​။ ထို​နေ့ရက်​တွင် သင်​သည် တော​နန်းတော်​ရှိ​လက်နက်​ကို ကြည့်ရှု​ခဲ့​၏​။ သင်​တို့​သည် ဒါဝိဒ်​၏​မြို့​၌ ကျိုးပေါက်​သည့်​နေရာ​များစွာ​ရှိ​သည်​ကို တွေ့မြင်​ရ​၏​။ အောက်​ရေကန်​၏​ရေ​တို့​ကို သို​ထား​ကြ​၏​။ ဂျေရုဆလင်​မြို့​ရှိ​အိမ်​များ​ကို​ရေတွက်​၍ မြို့ရိုး​ကို အခိုင်အမာ​ပြုပြင်​ရန် အိမ်​များ​ကို ဖြိုဖျက်​ကြ​၏​။ သင်​တို့​သည် ရေကန်​ဟောင်း​မှ​ရေ​ကို​သိုလှောင်​ရန် မြို့ရိုး​နှစ်​ခု​ကြားတွင် ရေလှောင်ကန်​ဆောက်လုပ်​ကြ​၏​။ သို့သော် သင်​တို့​သည် ဤ​အမှု​ကို စီရင်​တော်မူ​သော​အရှင်​ကို မ​ကြည့်​ကြ​။ ရှေးယခင်​ကပင် ဤ​အမှု​ကို စီမံ​ထား​တော်မူ​သော​အရှင်​ကို မ​မြင်​ကြ​။ ထို​နေ့ရက်​၌ ငိုကြွေး​မြည်တမ်း​ကြ​ရန်​နှင့် ခေါင်းတုံးတုံး​ပြီး လျှော်တေအဝတ်​ဝတ်​ကြ​ရန်​အတွက် ကောင်းကင်​ဗိုလ်ခြေ​အရှင်သခင်​ထာဝရဘုရား နှိုးဆော်​တော်မူ​၏​။ “​ငါ​တို့​သည် မနက်ဖြန်​သေ​ရ​မည်​ဖြစ်၍ စား​ကြ​သောက်​ကြ​ကုန်စို့​”​ဟု ဆို​လျက် သိုး​နွား​တို့​ကို​သတ်​၍ အသား​စား​ကြ​၏​။ စပျစ်ဝိုင်​သောက်​လျက် ရွှင်မြူး​ဝမ်းမြောက်​ကြ​၏​။ ကောင်းကင်​ဗိုလ်ခြေ​အရှင်​ထာဝရဘုရား​သည် ငါ့​ကို ဗျာဒိတ်​ပေး​တော်မူ​၏​။ “​သင်​တို့​၏​အပြစ်​ကို သင်​တို့​သေ​သည့်​တိုင်အောင် ဖြေလွှတ်​လိမ့်မည်​မ​ဟုတ်​”​ဟု ကောင်းကင်​ဗိုလ်ခြေ​အရှင်သခင်​ထာဝရဘုရား မိန့်​တော်မူ​၏​။

ကောင်းကင်​ဗိုလ်ခြေ​အရှင်သခင်​ထာဝရဘုရား ဤသို့​မိန့်​တော်မူ​၏​။ “​နန်းတော်အုပ်​ဖြစ်​သော ဘဏ္ဍာစိုး​ရှေဗန​ထံသို့​သွား​လော့​။ ‘​ဤ​နေရာ​၌ မိမိ​အတွက်​သင်္ချိုင်းဂူ​ထွင်း​သော​သူ​၊ မြင့်ရာအရပ်​၌ မိမိ​၏​သင်္ချိုင်းဂူ​ထွင်း​သော​သူ​၊ ကျောက်​ကို​ထွင်း​၍ မိမိ​နေရာ​ကို​လုပ်​သော​သူ သင်​သည် ဤ​နေရာ​နှင့် မည်သို့​ဆိုင်​သနည်း​။ မည်သူ​က သင့်​ကို​အခွင့်ပေး​သနည်း​။ အချင်း​လူ​၊ ကြည့်ရှု​လော့​။ ထာဝရဘုရား​သည် သင့်​ကို ကြမ်းတမ်း​စွာ​လွှင့်ပစ်​တော်မူ​မည်​။ သင့်​ကို မြဲမြဲ​ကိုင်ထား​၍ ဘောလုံး​ကို လှိမ့်​သကဲ့သို့ ကျယ်​သော​ပြည်​သို့ သင့်​ကို အရှိန်​နှင့်​လှိမ့်​တော်မူ​မည်​။ သင်​သည် ထို​ပြည်​၌ သေ​ရ​မည်​။ ဂုဏ်သရေ​ရှိ​သော သင်​၏​စစ်ရထား​တို့​သည် သင့်​သခင်​တို့​၏​အမျိုးအနွယ်​အတွက် ထို​ပြည်​၌ အရှက်ကွဲစရာ​ဖြစ်​မည်​။ ငါ​သည် သင့်​ကို သင့်​အရိုက်အရာ​မှ ဖယ်ရှား​မည်​။ သင့်​တာဝန်​မှ သင့်​ကို​ဖြုတ်ချ​မည်​။
ထို​နေ့ရက်​၌ ငါ​သည် ဟိလခိ​၏​သား ငါ့​အစေအပါး​ဧလျာကိမ်​ကို​ခေါ်​၍ သူ့​အား သင့်​ဝတ်ရုံ​ကို​ဝတ်​စေ​၍ သင့်​ခါးစည်း​ကို​စည်း​စေ​မည်​။ သင့်​အာဏာ​ကို သူ့​လက်​သို့ ငါ​အပ်​မည်​။ သူ​သည် ဂျေရုဆလင်​မြို့သား​နှင့် ယုဒ​အမျိုးအနွယ်​တို့​၏​ဖခင်​ဖြစ်​မည်​။ ဒါဝိဒ်​၏​နန်းတော်​သော့​ကို သူ့​ပခုံး​ပေါ်မှာ ငါ​တင်​ထား​မည်​။ သူ​ဖွင့်​လျှင် မည်သူမျှ​ပိတ်​နိုင်​မည်​မ​ဟုတ်​။ သူ​ပိတ်​လျှင်​လည်း မည်သူမျှ​ဖွင့်​နိုင်​မည်​မ​ဟုတ်​။ သူ့​ကို မြဲမြံ​သော​နေရာ​တွင် ငုတ်တိုင်​ကဲ့သို့ ငါ​စိုက်​မည်​။ သူ​သည် မိမိ​ဖခင်​၏​အမျိုးအနွယ်​အတွက် ဘုန်းအသရေ​ပလ္လင်​ဖြစ်​မည်​။ သူ့​ဖခင်​အမျိုးအနွယ်​၏​ဘုန်းအသရေ​ဖြစ်​သည့် သားမြေး​များ​၊ အဆွယ်အပွား​များ​၊ သေးငယ်​သော​တန်ဆာပလာ​များ​ဖြစ်​သည့် အင်တုံ​တန်ဆာပလာ​များ​မှစ၍ အိုးခွက်​တန်ဆာပလာ​အားလုံး​ကို သူ​၌​ချိတ်​ထား​ကြ​လိမ့်မည်​။ ထို​နေ့ရက်​၌ မြဲမြံ​သော​နေရာ​၌ စိုက်​ထား​သော​ငုတ်​သည် ဆွဲနုတ်​ခံရ​မည်​။ ခုတ်ဖြတ်​လှဲချ​ခံရ​မည်​။ သူ​၏​ဝန်ထုပ်​သည်​လည်း ဖယ်ရှား​ခြင်း​ခံရ​မည်​’​ဟူ၍ ကောင်းကင်​ဗိုလ်ခြေ​အရှင်​ထာဝရဘုရား​မိန့်​တော်မူ​သည်​”​ဟု ဆင့်ဆို​လော့​။

နားထောင်ပါ။ ဟေရှာယအနာဂတ္တိကျမ်း 22