Text: © B.F.B.S. 1971 Audio: ℗ 2011 Hosanna

Lorma - 1971 Edition (NT)

Loma New Testament © British and Foreign Bible Society, 1971.

Na maziɛ su Ziizɛ ɣɛni levesu kpalagi zu ga doowo folo. Pulu ɣɛni ná kala dopoitiɛ ma. Na ma te vɛɛni sa ga dɔɔlɔ ƃazii ƃolo‐kpologa gá ga te mi. Kɛ̀ tei Favilesiitiɛ te wɛlɛni na va, te ɣɛni Ziizɛ ma, “Wɛlɛ! Yà ɣala dopoitiɛ ta fai nii ɣɛɛzu lɛ tɔ su ga nu kɛ ga doowo folo.” É ɣɛni te ma,“? Tei pulu ɣɛni Deeve ma ta numaitiɛ te ɣɛni ba, nii é kɛɛni wɛ lɛ dodoni Gala kɔlɔi zu? Na ɣa ga velei é lɛɛni la Gala na pɛlɛi wu é kpoolo‐ʋɔi nii mi dái ɣɛ na Gala gaazu, nii lɛ ŋɛni tɔ su ga é mi ɔ́ nɔ ɣɛ ga é ɣɛ tɔ su niitiɛ ʋaa ma te ɣɛni bá ga te mi. Laa‐ʋaalegitiɛ nɔ ɣa é te ʋaa ma ga te mi. ?Ƃaa wɛ lɛ dɛ dodoni Gala na tɔgi zu ga laa‐ʋaalegitiɛ te Gala‐feli wɔta walai wu velei te doowo foloi maa woolasu la, tɔwɔ ɛ́ lɛ vɛɛzu te va ga faa? Gè bo wiɛ, ŋɛni ta ɣa vɛ tevegɛi Gala‐feli wɔta walai va. Nii ponɛi Gala kɔlɔi zu mawoi ga, ‘Gaazu‐maa‐wõi‐ɣaa ɣa mawõi wɔɔlɔi mà, ɛ́ lɛ ga zalaɣa,’ è ɣɛ wo woi na zu‐wulo‐zu wɛ̃ni, niitiɛ te ɣɛɛ‐zɔ gɛ lɛ faa zu wɛ lɛ ƃega faa vɛɛ te va. Toku ge zei ga nu ƃuse lui ɣa é doowo foloi maazu.”

Ziizɛ ziɣini na é li é lɛ ta Ɣala‐feli wɔtai wu. Zunu ta wɔ ge ɣɛni na zée ʋɔi ma. Numaitiɛ te Ziizɛ ɣaa zaɣa kɛɛni sa te ɣɛ ma, “Tɔ tɔ su ga nu é nu valo ga doowo foloi?” Te nii ɣɛɛni ga te faa vɛɛ Ziizɛ va. É ɣɛni te ma, “Wo ta zɛƃɛ ɣa baala ka ɣɛ zéea é loo zeɣe zu ga doowo foloi manui ƃe sosu é kulo zeɣei zu? Tɔwɔ nu ƃuse lɔnɔ wala ƃakpavɛ é leve baala ba! Na ma tɔ tɔ su ga nu faa vagɔ ɣɛ ga doowo foloi.” É ɣɛ sa zunui ma, “Yee zu zakpa.” Nà zɛba é yee zu zakpa zée ƃɛtɛ sa wulu ga zée zɔi ɣavele. Kɛ̀ Favilesiitiɛ te wuloni te li te fuo loo ga Ziizɛ la ga velei ta sú ƃɔnɔ wo da.

Tei tɔwɔ Ziizɛ ɣɛ ga fai nii wɛ̃ɛga, é ziɣini na é li. Nu lamaa vileni púlu é te pɛ te valo. Tɔwɔ é deʋeni é da te ya ga te mɛ lɛ faa wo numaa ma ɔ́ vile bá natiɛ tɔ kwɛ̃ɛ. Nii ɣɛɛni ga fai Gala daa woo‐wo nui Aizeea boni é leve ma. Na ɣa ga tei é boni ga Gala ge ɣɛni tea,
“Wɛlɛ! Nà tii‐ɣɛɛ nui nii ɣa zèe ƃadogɛi bá,
é ga ẁõila nui nii zìi wala lai máʋai vɛ.
Gà bàa ŋinɛgi yii ma,
na ɣa ɣɛɛ na towaa faa‐wo gaa‐leve ʋai wo
ga woo maa zeezea zii pɛ ma.
Ɛ́ lɛ daaza lɔɔ nu la. Ɛ́ lɛ wɔnɔ ƃɔɛ ga woo wala
ɔ́ nɔ ɣɛ ga nu nɛpɛ ge goo mɛni pele‐vɛɛgitiɛ ma.
Ɛ́ lɛ ziɛ ƃute kɔkɔgi nii ɣalea sú ɣa ƃili
ɔ́ nɔ ɣɛ ga é wui nii liʋi yá ɣɛ ɣalazu
so faa lɛ ɣɛɛ ba.
Towaa yɛ na é yɛsu tele‐bo fai yee wudɛ fai pɛ maazu.
Na ɣa ɣɛɛ na ná daa‐zeigi ɣa yá ɣɛ ga zii pɛ ki‐to‐su.”

Te vaani Ziizɛ wɔ ga nu ta gɔʋɛ yowũ púlu. Nà kɛɛni gaazu wu é ɣɛ ga mumu. É manui valoni. Mumugi na yɛpɛni sa é ŋada maa ƃɛɛ. É wuloni ga numaitiɛ ɣaazɔ ga kpakpaa te ɣɛ tea,“? Nii ɣa zoo é ɣɛ ga Deeve duu?” Kɛ̀ tei Favilesiitiɛ te mɛnini, te ɣɛni tea, “Biazibɔ nii é ga gɔʋɛ yowũitiɛ ta masagi ná gaa‐ƃai ɣa zunui nii é gɔʋɛa ƃɛɛzu la numaa wulu.” Ta ɣi‐gaa‐ziɛi wɛ̃ɛ pele ma Ziizɛ vɛ é ɣɛni te ma, “Masadai nɛpɛ gáa ɣa wɛɛ su tiɛ wɔ ɣii wɔ, mamasadai zu ɣa ŋala‐ŋala. Na ɣa ɣɛɛ na taa nɛpɛ ɔɔ pɛlɛ nɛpɛ gɛ lɛ ɣaa wɛɛ su tɔ ɣɛ wɔɔzu ɣiini pɔ malai ɔɔ mavɛlɛi ɔ́ ɣɛ loni. Tɔwɔ ani Seeta ɣa ɣɛ na Seeta ƃɛɛzu numaa wulu, a kɛ tii é ɣaa wɛɛ su yíɛ wɔ ƃɔɔ wɔ. Ná masadai wɔ ka sa a yɛ ma ɣɛ le? Ani gà ɣɛ na gɔʋɛ yowũa ƃɛɛzu numaa wulu ga Biazibɔ na gaa‐ƃai, ƃɛ na gaa‐ƃaa ɣa sa wa numaitiɛ ta te ƃɛɛ la numaa wulu? Ta ɣa te ga wa ʋaa ɣaa‐leveai. Kɛ̀ tɔwɔ ani Gala baa ŋinɛgi na gaa‐ƃai ve gè kɛɛzu la, a kɛ na mu Gala na masadai ziitia wo ma. Ɔɔ nu ɣa zoo ɣɛ le é lɛ gaa‐ƃaa nu na pɛlɛ wu é kweligitiɛ ziɣi ga gaa‐ƃaa, kɛni kilaa manui ɣa gaa‐ƃaa nui ɣili ɣaʋu pa, kɛlɛɛ? Na ɣa ɣɛɛ na tɔ sa yá nà ná pɛlɛi wu ʋowo ga ƃɔɔƃɔɔ su. Nui nɛpɛ ɛ́ lɛ bà tɔ ga kɔ̀ɔ yɔ̃wɔ. Nui nɛpɛ gá tɔ gɛ́ lɛ ŋɛnii ɣaa lɛɛzu ba tɔ su ʋazasu. Na ma gè bo wiɛ, faa yowũ nɛpɛ é vɛɛ Gala daa ŋala‐ŋala faa nɛpɛ ba te zu ʋaa ɣa yɛ nu ƃuse vɛ. Kɛ̀ daa‐ŋala‐ŋalagi nɛpɛgi yá wo ga Gala baa ŋinɛgi sú ʋaa le yɛga. Nu nɛpɛ ka ɣɛ faa yowũ wosu ga nu ƃuse lui la manui zu ʋaa yɛ. Kɛ̀ nui nɛpɛ é faa yowũ wosu ga Gala baa ŋinɛgi la, sú ʋaa lɛ yɛga ŋeteai nii ƃalaa zu ɔ́ nɔ ɣɛ ga sú ʋaa yɛ ŋeteai zɔi zu é vaazu vaazu.”

Ziizɛ ɣɛni tea, “Pagɛ nɔ nu gului ziɣi ga gulu vagɔ, na ɣa ɣɛɛ na é gaa vai ziɣi ga gulu vaa vagɔ. Ɔɔ é siɣi ga gulu yowũ é mavai ziɣi ga gulu vaa yowũ. Toku ge zei ga nu ɣa gului wɛ̃ɛ nɔ ga gaa vai. Wai ŋɛ ni wo ʋaa wuloai ga kaalia, wa leve ɣɛ le wo faa vagɔ wo, wa wɔ wo ga tuo‐vele‐yowũ vea? Toku ge zei ga faa lama‐lamagi yá ɣɛ nu yii zu ta nɔ ɣa yá wulo manui la yíɛ bo. Nui nii é ga nu vagɔi, faa vagɔi gáa lɛi ba zíi zu nà mavelei ɣa yá wulo la ga faa vagɔ. Nii wɔgi é ga tuo‐vele‐yowũ nui, ná tuo vele yowũi gáa lɛi ba zíi zu mavelei nɔ ɣa yá wulo la ga tuo vele yowũ. Gè bo wiɛ, gaa‐vala‐ba ƃɔɛ nɛpɛ nu ƃuse ɣa bo, ta mawoo‐zu‐wulo‐kɛɛ wo ga faa‐wo gaa‐leve ʋoloi. Ƃɔvɛlaale è woi nɔ ɣa faa ɣa ziɣi la è va, è woi wɔ nɔ ɣa wɔnɔ faa ɣa yɛ da è ma.”

Tei sa nà ɣɛɛni, tɔ‐dɛɛ ɣala‐mɔitiɛ te taniga vɛɛ Favilesiitiɛ te taniga va te ɣɛni Ziizɛ ma, “Kala‐mɔi, gé wõini è faa maa‐wɔlɔ‐wɔlɔ ta ɣɛ yíɛ dɛ ga seele.” Kɛ̀ é te woi ɣaa woteni é ɣɛ te ma, “Ʋala‐wonɛɛgi nii é ga tuƃo‐vele‐yowũ nu é ga nui nu lɛ laa la towaa yá ɣɛ faa maa‐wɔlɔ‐wɔlɔ gaa ziɛzu ga seele. Tɔwɔ tɛ lɛ faa maa‐wɔlɔ‐wɔlɔ nɛpɛ maa zɔlɔ woga é wulo Gala daa woo‐wo nu Joona maʋaa maa‐wɔlɔ‐wɔlɔgi wulu. Toku ge zei ga velei nɔ Joona kɛɛni la feza gwala wuu zu ga folo saagɔ kpidi saagɔ, vele nɔ na nu ƃuse lui ɣa kɛɛ la zui wu ga folo saagɔ kpidi saagɔ. Niniva lai zu veaitiɛ ta wu ziɣi ga ʋala‐wonɛɛgi nii ga faa‐wo gaa‐leve ʋoloi te faa vɛɛ te va. Ƃɔvɛlaale ta dɛi te wulu ɣaa ʋeni ta ʋaa yowũi va Joona na Gala goo‐wogai ma. Tɔwɔ a wɛlɛ, ŋɛni ta ɣa vɛ gwala levegɛi Joona va. Ŋaza nu ɣalasogi nii é ziɣini ga nu wɔwɔ yee‐su vele foloi ʋaa va towaa wu ziɣi ga ʋala‐wonɛɛgi nii ga faa‐wo gaa‐leve ʋoloi é faa vɛɛ ba. Ƃɔvɛlaale é wuloni zui mawɛ̃ɛ pele ma é va ga é Salamɔ na kele‐ɣele goi mɛni. Kɛ̀ tɔwɔ ŋɛni ta ɣa vɛ gwala levegɛi Salamɔ va.

“Gɔʋɛ yowũ ɣa ziɣi na nu wulu, towaa li yíɛ leve‐teve vɛtiɛ ziɛ lɛ natiɛ yíɛ doowo‐bo‐su maa vele ɣaa ziɛ, tɔwɔ lɛ ná ta maa zɔlɔ woga. Tɔ sa a ɣɛ tea, ‘Pɛlɛi nii gè wuloa bu gà wotesu gè li wulu na.’ Tɔwɔ yá vaa na, towaa wɛlɛ ná va ná yãkai, ná ƃalegɛi, ná maʋaa zeiyai ga sei vele. Tɔ sa a li na zu é gɔʋɛ yowũ lɔfela ta ƃɔnɔga vɛɛ va te luo velei yowũai é leve tɔ ɣagi va. Te lɛ sa ná te yɛ ná. Nà wɔ ka ɣɛɛ na, nui nii ta vile púlu ná ŋetea ɣaa‐ƃelagi zu ɣa yowũ é leve mamaa wũgi va. Vele nɔ na ƃalaa yá ɣɛɛ la ga tuo‐vele‐yowũ ʋala‐wonɛɛgi niitiɛ.”

Tei dɛ nɔ Ziizɛ ɣɛni ƃɔɛzu numaitiɛ wɔ, dée ƃɔga déɣe zinaitiɛ te ɣɛni loni ŋeteavɛ tiɛ bo ga te wõini te yɛpɛ pɔ́. Nui ta ɣɛni Ziizɛ ma, “È lee ƃɔga è leɣeitiɛ ta loni ŋeteavɛ tiɛ bo ga te wõini te ƃɔɛ è wɔ.” Kɛ̀ nui é boni má é gói ɣaa woteni é ɣɛ má, “Ƃɛ ɣa é ga dèe? Ƃɛni ka kɔnɔ te ga dèɣeitiɛ?” É yee zakpani sa ná kala dopoitiɛ ma é ɣɛ tea, “Dèeni ka ta dèɣeitiɛ! Ƃɔvɛlaale nui nɛpɛ yá kèeai nii yii‐mai ɣɛ é gee‐zuvɛ, manui ɣa é ga dèɣe é ga nà seela é ga dèe.”

နားထောင်ပါ။ MAFIYU 12