Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወሀሎ አሐዱ ብእሲ እምፈሪሳውያን ዘስሙ ኒቆዲሞስ መልአኮሙ ለአይሁድ። ወውእቱ መጽአ ኀበ እግዚእ ኢየሱስ ቀዲሙ ሌሊተ ወይቤሎ ረቢ ነአምር ከመ እምኀበ እግዚአብሔር መጻእከ ከመ ትኩን መምህረ እስመ አልቦ ዘይክል ይግበር ዘንተ ተአምረ ዘአንተ ትገብር ዘእንበለ ዘእግዚአብሔር ምስሌሁ። ወአውሥአ እግዚእ ኢየሱስ ወይቤሎ አማን አማን እብለከ ዘኢተወልደ ዳግመ ኢይሬእያ ለመንግሥተ እግዚአብሔር። ወይቤሎ ኒቆዲሞስ እፎ ይክል ሰብእ ዳግመ ተወልዶ እምድኅረ ልህቀ ይክልኑ በዊአ ወገቢአ ውስተ ከርሠ እሙ ወይትወለድ ዳግመ። ወአውሥአ እግዚእ ኢየሱስ ወይቤሎ አማን አማን እብለከ ዘኢተወልደ ዳግመ እማይ ወእመንፈስ ቅዱስ ኢይክል በዊአ ውስተ መንግሥተ እግዚአብሔር። እስመ ዘተወልደ እምሥጋ ሥጋ ውእቱ ወዘተወልደ እመንፈስ መንፈስ ውእቱ። ወበእንተ ዝንቱ ኢታንክር እስመ እቤለከ ሀለወክሙ ትትወለዱ ዳግመ። እስመ መንፈስ ኀበ ፈቀደ ይነፍኅ ወቃሎ ትሰምዕ ወኢተአምር እምኀበ ይመጽእ ወኀበሂ የሐውር ከማሁኬ ውእቱ ኵሉ ዘይትወለድ እመንፈስ ቅዱስ። ወአውሥአ ኒቆዲሞስ ወይቤሎ እፎ ይትከሀል ዝንቱ ይኩን። ወአውሥአ እግዚእ ኢየሱስ ወይቤሎ አንተ ሊቆሙ ለእስራኤል ወዘንተ ነገረ ኢተአምር። አማን አማን እብለከ ከመ ዘነአምር ንነግር ወበዘርኢነ ሰማዕተ ንከውን ወስምዐነሰ ተአብዩነ ነሢአ። ወሶበ እንዘ ዘበምድር እነግረክሙ ኢተአምኑኒ እፎ እንከ ተአምኑኒ እመ ነገርኩክሙ ዘበሰማያት። ወአልቦ ዘዐርገ ውስተ ሰማይ ዘእንበለ ዘወረደ እምሰማይ ወልደ ዕጓለ እመሕያው ዘውእቱ ይነብር ውስተ ሰማይ። ወበከመ ሙሴ ሰቀሎ ለአርዌ ምድር በገዳም ከማሁ ሀለዎ ለወልደ ዕጓለ እመሕያው ይሰቀል። ከመ ኵሉ ዘየአምን ቦቱ ኢይትኀጐል አላ የሐዩ ለዓለም። እስመ ከመዝ አፍቀሮ እግዚአብሔር ለዓለም እስከ ወልዶ ዋሕደ መጠወ ወወሀበ ቤዛ ለኵሉ ከመ ኵሉ ዘየአምን ቦቱ ኢይትኀጐል አላ ይረክብ ሕይወተ ዘለዓለም። እስመ ኢፈነዎ እግዚአብሔር ለወልዱ ውስተ ዓለም ከመ ይኰንኖ ለዓለም ዘእንበለ ከመ ያሕይዎ ለዓለም በእንቲኣሁ። ዘየአምን ቦቱ ኢይትኴነን ወዘሰ ኢየአምን ቦቱ ወድአ ተኰነነ እስመ ኢአምነ በስመ ወልደ እግዚአብሔር ዋሕድ። ወዝ ውእቱ ኵነኔሁ እስመ ብርሃን መጽአ ውስተ ዓለም ወአብደረ ሰብእ ጽልመተ እምብርሃን ፈድፋደ እስመ እኩይ ምግባሩ። እስመ ኵሉ ዘእኩይ ምግባሩ ይጸልእ ብርሃነ ወኢይመጽእ ኀበ ብርሃን ከመ ኢይትከሠቶ ምግባሩ እስመ እኩይ ውእቱ። ወዘሰ ጽድቀ ይገብር ይመጽእ ኀበ ብርሃን ከመ ያስተርኢ ምግባሩ እስመ በእንተ እግዚአብሔር ይገብር።

ወእምዝ ሖረ እግዚእ ኢየሱስ ምስለ አርዳኢሁ ውስተ ምድረ ይሁዳ ወህየ ነበረ ምስሌሆሙ እንዘ ያጠምቅ። ወሀሎ ዮሐንስኒ ያጠምቅ በሄኖን በቅሩበ ሳሌም በማዕዶተ ዮርዳኖስ እስመ ቦቱ ህየ ብዙኅ ማያት ወይመጽኡ ኀቤሁ ብዙኃን ወያጠምቆሙ። እስመ ዓዲሁ ኢተወድየ ዮሐንስ ውስተ ቤተ ሞቅሕ። ወእምዝ ኮነ ተኃሥሦ ማእከለ አርዳኢሁ ለዮሐንስ ምስለ አይሁድ በእንተ አጥሕሮ። ወሖሩ ኀበ ዮሐንስ ወይቤልዎ ረቢ ዝኩ ዘምስሌከ ሀሎ በማዕዶተ ዮርዳኖስ ዘአንተ ሰማዕተ ኮንከ በእንቲኣሁ ናሁ ሀሎ ውእቱሂ ያጠምቅ ወኵሉ የሐውር ኀቤሁ። ወአውሥአ ዮሐንስ ወይቤ ኢይክል ሰብእ ነሢአ ጸጋ ለሊሁ ወኢምንተኒ እመ ኢተውህበ ሎቱ እምሰማይ። አንትሙ ለሊክሙ ሰማዕትየ ከመ እቤለክሙ አንሰ ኢኮንኩ ክርስቶስሃ ዳእሙ ተፈነውኩ ቅድሜሁ እስብክ። ዘቦቱ መርዓት መርዓዊ ውእቱ ወአርኩሰ ለመርዓዊ ዘይቀውም ወይሰምዖ ፍሥሓ ይትፌሣሕ በእንተ ቃለ መርዓዊ ወመርዓት ወፍሥሓ ዚኣየሰ ናሁ ተፈጸመት። ወእንቲኣሁሰ ትበዝኅ ወእንቲኣየሰ ተሰልጠት። እስመ ዘእምላዕሉ መጽአ መልዕልተ ኵሉ ውእቱ ወዘእምድርሰ ምድራዊ ውእቱ ወዘበምድር ይነገር ወዘሰ እምሰማይ መጽአ መልዕልተ ኵሉ ውእቱ። ወበዘርእየ ወበዘሰምዐ ሰማዕተ ይከውን ወስምዖሰ አልቦ ዘይትዌከፎ። ወለዘሰ ተወክፎ ስምዖ ዐተቦ እግዚአብሔር እስመ ጻድቅ ውእቱ። ወዘእግዚአብሔር ፈነዎ ቃለ እግዚአብሔር ይነግር እስመ አኮ በመስፈርት ዘይሁብ እግዚአብሔር መንፈሶ። አብሰ ያፈቅር ወልዶ ወኵሎ ኵነኔሁ አወፈዮ ውስተ እዴሁ። ዘየአምን በወልድ ቦ ሕይወት ዘለዓለም ወዘሰ ኢየአምን በወልድ ኢይሬእያ ለሕይወት ዘለዓለም አላ መቅሠፍተ መዓቱ ለእግዚአብሔር ይነብር ላዕሌሁ።

နားထောင်ပါ။ ወንጌል ዘዮሐንስ 3