If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ଫାରୂଶୀ ଆର୍ ସାଦ୍ଦୂକୀମ୍‍ନ୍ ଯୀଶୁର୍ ଲ୍‌ଗେ ଆସି ତାକେ ହାନ୍ଦାଇ ହ୍‍କାମ୍‍କେ ସ୍‌ର୍‌ଗେ ହ୍‍ଣି ଗଟେକ୍ ଚିନ୍ ଦ୍‍କାଉ ବ୍‌ଲି ଗ୍ଉଆରିକ୍‍ରି କଇଲାଇ। ମ୍‍ତର୍ ଯୀଶୁ ସେମ୍‍ନ୍‍‍କେ ଉତର୍‍ଦିଲା, “ସ୍ଞୁଆ ବ୍‍ଳ୍ ତୁମିମ୍‍ନ୍ କ୍ଉତି ରିଆସ୍‌, ବ୍‍ଲ୍ ହାଗ୍ ଅଇଦେ, କାଇତାକ୍ ଆକାଶ୍‌ ର୍‍ତା ଅଇଆଚେ।
ଆରେକ୍‌ ସ୍‍କାଳ୍ ବ୍‍ଳ୍ କ୍‌ଉତିରିଆସ୍, ଆଜି ବାଉହାଣି ଅଇଦେ, କାଇତାକ୍ ଆକାଶ୍‌ ର୍‍ତା ଆର୍ ମେଗ୍ ଅଇଆଚେ। ତୁମିମ୍‍ନ୍ ଆକାଶ୍‍କେ ଦ୍‍କିକ୍‍ରି ବେଦ୍‌ ବୁଜୁ ହାରୁଲାସ୍, ମ୍‍ତର୍ କ୍‍ନ୍‍କ୍‍ରି ଇ କାଳାର୍ ଚିନାମ୍‍ନ୍ ନ୍‍ଜାଣୁଲାସ୍? କ୍‍ରାପ୍ ଆର୍ ଦାରିକାମ୍ କ୍‌ର୍‌ତା ଲକ୍ ଚିନ୍ ମାଗ୍‍ତି, ମ୍‍ତର୍ ଯୁନସାର୍‌ ବବିଶତ୍ କ୍‌ତା କ୍‌ଉତାଲକ୍ ଗଟ୍‍ଲା ଚିନ୍ ଚାଡିକ୍‌ରି ବିନ୍ ଚିନ୍ ହେଁ ସେମ୍‍ନ୍‍‍କେ ଦିଆ ନଇ।” ଆରେକ୍‌, ଯୀଶୁ ସେମ୍‍ନ୍‍‍କେ ଚାଡିକ୍‌ରି ଗ୍‍ଲା।


ଚେଲାମ୍‌ନ୍ ସେହାଟିକେ କେଟିକ୍‍ରି ଦ୍‍କ୍‍ଲାଇ ଯେ, ସେମ୍‍ନ୍ ରୁଟି ନେମ୍‍କେ ହାସୁର୍‍ଲାଇ। ଯୀଶୁ ଚେଲାମ୍‍ନ୍‍କେ କଇଲା, “ଜାଗ୍‌ରତ୍ ଅଉଆ, ଫାରୂଶୀ ଆର୍ ସାଦ୍ଦୂକୀମ୍‍ନ୍‍କାର୍ ଖମିର୍ ତ୍‌ଇହ୍‌ଣି ସାବ୍‍ଦାନ୍ ଅଇରିଆ।” ସେଡେବ୍‍ଳ୍ ସେମ୍‍ନ୍ ନିଜାର୍ ନିଜାର୍ ବିତ୍‌ରେ ଚିଡ୍‍ହଡ୍ ଅଇ କ୍‍ମ୍‍କେ ଲାଗ୍‍ଲାଇ, “ଅମିମ୍‍ନ୍ ରୁଟି ଆଣି ନ୍‌କେରୁ ବ୍‍ଲି ସେ ଇରି କ୍‌ମ୍‌ଲା।” ମ୍‍ତର୍ ଯୀଶୁ ସେରି ଜାଣିକ୍‍ରି କଇଲା, “ଏ ଅଳ୍‍କ୍ ବିଶ୍‍ବାସିମ୍‌ନ୍‌, ତୁମାର୍ ଲ୍‌ଗେ ରୁଟି ନାଇବ୍‍ଲି କାଇତାକ୍ ନିଜାର୍ ନିଜାର୍ ବିତ୍‌ରେ ଚିଡ୍‍ହଡ୍ କ୍‍ରୁଲାସ୍?
ତୁମିମ୍‍ନ୍ କାଇରି ଅବେହ୍‍ତେକ୍ ବୁଜି ନ୍‌କେରାସ୍? ଆର୍ ସେ ହାଁଚ୍ ହ୍‌ଜାର୍ ଲକ୍‌କେ ହାଁଚ୍‍ଗଟ୍ ରୁଟିକେ ହେଟ୍ ବର୍‍ତି କାଳାଇ ରିଲେ, ଆରେକ୍‌ ବାର ଡ୍‍ଲା ବ୍‌ର୍‍ତି କ୍‍ରି ତୁମିମ୍‍ନ୍ ରୁଟି ବେଟି ରିଲାସ୍, ଆର୍ ସେ ଚାରିହ୍‌ଜାର୍ ଲକ୍‌ମ୍‍ନ୍‌କେ ସାତ୍‍ଗଟ୍ ରୁଟିକେ ହେଟ୍ ବର୍‍ତି କାଳାଇଲେ, ଆରେକ୍‌, ସାତ୍ ଡ୍‍ଲା ବ୍‌ର୍‍ତି କ୍‍ରି ତୁମିମ୍‍ନ୍ ଚିଡାଇ ରିଲା ରୁଟିକେ ବେଟି ରିଲାସ୍, ସେରି ସ୍‍ବୁ ତୁମାର୍‌ମ୍‌ନ୍‌କାର୍ ମ୍‌ନେ ନାଇ କି?
ମୁଇ ଯେ ତୁମୁକ୍‌ମ୍‌ନ୍ ରୁଟି ବିଷୟେ କ୍ଇ ନ୍‌ରିଲେ, ଇରି କ୍‍ନ୍‍କ୍‍ରି ତୁମିମ୍‍ନ୍ ଅବେହ୍‍ତେକ୍ ବୁଜି ନ୍‌କେରାସ୍? ମ୍‍ତର୍ ଫାରୂଶୀ ଆର୍ ସାଦ୍ଦୂକୀମ୍‍ନ୍‍କାର୍ ଖମିର୍ ଲ୍‌ଗେ ହ୍‍ଣି ତୁମିମ୍‍ନ୍ ସାବ୍‍ଦାନ୍ ଅଇରିଆ।” ସେ ଯେ ରୁଟିର୍ ଖମିର୍ ତ୍ଇହ୍‍ଣି ସାବ୍‍ଦାନ୍ ଅଇ ରେମ୍‌କେ ନ୍‌କଇ ଫାରୂଶୀ ଆର୍ ସାଦ୍ଦୂକୀମ୍‍ନ୍‍କାର୍ ଶିକ୍ୟା ତ୍ଇହ୍‍ଣି ସାବ୍‌ଦାନ୍ ଅଇ ରେତାର୍ ଗିନେ ସେମ୍‌ନ୍‍କେ କଇରିଲା, ଇରି ସେମ୍‌ନ୍ ସେଡେବ୍‍ଳ୍ ବୁଜ୍‌ଲାଇ।


ହ୍‌ଚେ ଯୀଶୁ କାଇସରିୟା ଫିଲିପୀ ବାଟାର୍ ଗାମେ ଆସି ନିଜାର୍ ଚେଲାମ୍‍ନ୍‍କେ ହ୍‍ଚାରୁକେ ଲାଗ୍‌ଲା, ମାନାଇ ହିଲାକେ ଲକ୍‍ମ୍‍ନ୍ କେ ବ୍‍ଲି କାଇରି କ୍ଉତି? ସେଡେବ୍‍ଳ୍ ସେମ୍‍ନ୍ କଇଲାଇ, କେ କେ କ୍ଉତି, ଡୁବେନ୍ ଯୋହନ୍, କେ କେ ଏଲିୟ, ଆରେକ୍‌ କେ କେ ଯିରିମିୟ ନ୍‌ଇଲେକ୍ ଆଗାର୍ ବବିସତ୍ କ୍‌ତା କ୍ଉତା ଲକ୍‍ମ୍‍ନ୍‍କାର୍ ବିତ୍‌ରେ ଏକ୍‍ଲା ବବିଶତ୍ କ୍‌ତା କ୍‌ଉତାଲକ୍। ଯୀଶୁ ସେମ୍‍ନ୍‍‍କେ ହ୍‌ଚାର୍‌ଲା, ମ୍‍ତର୍ ମୁଇ କେ ବ୍‍ଲି ତୁମିମ୍‍ନ୍ କାଇରି କ୍‍ମ୍‍ଲାସ୍? ଶିମୋନ୍ ପିତର୍ ଉତର୍‍ଦିଲା, ତୁଇ ଇଶ୍ୱର୍‌ ଲ୍‌ଗେ ହ୍‍ଣି ହ୍‌ଟାଇଲା ଖ୍ରୀଷ୍ଟ, ଜୀବନ୍ ରିଲା ଇଶ୍ଵରାର୍ ହଇସି।
ସେତାକ୍ ଯୀଶୁ ତାକେ ଉତର୍‍ଦିଲା, “ଏ ଯୁନସାର୍‌ ହଇସି ଶିମୋନ୍, ତୁମି ଦନ୍ୟ, କାଇତାକ୍ ମାନାଇ ତୁମାର୍ ଲ୍‌ଗେ ଇରି ବାର୍‌କ୍‌ରି ନ୍‌କେରେ, ମ୍‌ତର୍ ମର୍ ସ୍‌ର୍‌ଗାର୍ ଉବା ଇଶ୍ୱର୍‌ ଇରି ବାର୍ କ୍‍ରିଆଚେ। ଆରେକ୍‌ ମୁଇ ହେଁ ତୁମୁକ୍ କ୍‌ମ୍‌ଲେ, ତୁଇ ପିତର୍, ଆରେକ୍‌, ଇ ଟେଡା ଉହ୍‍ରେ ମୁଇ ମର୍ ମ୍‌ଣ୍ତଳି ତିଆର୍ କ୍‌ରିନ୍ଦ୍, ଆର୍ ହାତାଳାର୍ ଶ୍‌କ୍‌ତି ତାକେ ଆରାଇ ନ୍‌କେରେ।
ମୁଇ ତୁମୁକେ ସ୍‌ର୍‌ଗ୍‌ ରାଇଜ୍‍‍ର୍ କୁଚିକାଡା ଦ୍ଇନ୍ଦ୍, ଆର୍ ତୁମି ହୁର୍‌ତିବି ତ୍‌ଇ ଯାଇରି ହେଁ ବ୍‍ନ୍ଦ୍ କ୍‍ରାସ୍, ସ୍‌ର୍‌ଗେ ସେରି ବ୍‍ନ୍ଦ୍ ରେଇଦ୍, ଆରେକ୍‌, ହୁର୍‌ତିବି ତ୍‌ଇ ଯାଇରି ହେଁ ଉଗାଡାସ୍, ସ୍‌ର୍‌ଗେ ସେରି ଉଗାଡି ଅଇରେଇଦ୍।” ସେଡେବ୍‍ଳ୍ ଯୀଶୁ ହ୍‌କା ଖ୍ରୀଷ୍ଟ, ଇରି କାକେ କ୍ଇ ନ୍‍କେରୁକେ ଯୀଶୁ ତାର୍ ଚେଲାମ୍‍ନ୍‍କେ ଡାଟ୍‍କ୍‍ରି ଆଦେଶ୍ ଦିଲା।


ସେଡେବ୍‍ଳ୍ ହ୍‍ଣି ଯୀଶୁ ଖ୍ରୀଷ୍ଟ ନିଜାର୍ ଚେଲାମ୍‍ନ୍‍କେ ବୁଜାମ୍‍କେ ଲାଗ୍‌ଲା ଯେ, ତାକେ ଜ୍‌ନ୍‌କାର୍ ହେଁ ଯିରୁଶାଲମ୍‌ ଜ୍‌ମ୍‌କେ ଅଇଦେ ଆର୍, ପାରାଚିନ୍, ମୁକିଆ ଜାଜକ୍ ଆର୍ ମୋଶାର୍ ନିଆଇ ଶିକାଉତା ଲକ୍‍ମ୍‍ନ୍‍କାର୍ ଲ୍‌ଗେ ହ୍‍ଣି ବେସି ଦୁକ୍‍କ୍‍ଷ୍ଟ ହାଇ, ମ୍‌ର୍‌ନେ ମ୍‌ରୁକେ ଅଇଦେ, ଆରେକ୍‌ ତାକେ ତିନିଦିନ୍ ହ୍‌ଚେ ଆର୍ ଗଟେତର୍ ଜୀବନ୍ ହାମ୍‌କେ ଅଇଦେ। ସେଡେବ୍‍ଳ୍ ପିତର୍‍ ଯୀଶୁକେ ଗଟେକ୍ ଜାଗାଇ କୁଦିନେଇ, ସେ କଇରିଲା ତାର୍ ନିଜାର୍ ଦୁକାର୍ ଆର୍ ମ୍‌ର୍‍ନାର୍ କ୍‌ତାର୍ ଗିନେ ତାକେ ଉଳୁକେ ଲାଗ୍‌ଲା ଆର୍ କଇଲା, “ଏ ମାପ୍‌ରୁ, ଇଶ୍ୱର୍‌ ତକେ ଦୟାକ୍‌ର୍, ଇରି ତର୍‍ଗିନେ କ୍‍ବେହେଁ ନ୍‌ଗେଟ।” ମ୍‍ତର୍ ଯୀଶୁ ବୁଲିକ୍‍ରି ପିତରକେ କଇଲା, “ମର୍ ମୁଏ ହ୍‍ଣି ଦୁର୍ ଅଉଅ, ଶଇତାନ୍, ତୁଇ ମର୍ ବାଦା ହର୍, କାଇତାକ୍ ତୁଇ ଇଶ୍ଵରାର୍ ବିଷୟ୍ ନ୍‍ବାବି ଲକାର୍‌ ବିଷୟ୍ ବାବୁଲିସ୍।”


ସେଡେବ୍‌ଳ୍ ଯୀଶୁ ନିଜାର୍ ଚେଲାମ୍‍ନ୍‍କେ କଇଲା, “କେ ଯ୍‌ଦି ମର୍ ଚେଲା ଅମ୍‍କେ ମ୍‌ନ୍‌କ୍‍ରେଦ୍, ତ୍‍ବେ ସେ ନିଜାର୍ ସ୍‍ବୁ ଇଚାକେ ଚାଡିକ୍‌ରି କୁର୍‍ଶର୍ ଦୁକ୍ ହର୍ ଦୁକ୍ ବଗୁକେ ତିଆର୍ ଅଇ ମର୍‍ହ୍‌ଚେ ଆସ। କାଇତାକ୍ ଯେ କେ ନିଜାର୍ ଜୀବନ୍‍କେ ଉଦାର୍‌ କ୍‌ରୁକେ ଚେଷ୍ଟା କ୍‍ରେଦ୍, ସେ ତାର୍ ନିଜାର୍ ଜୀବନ୍‍କେ ଆରାଇଦ୍। ମ୍‍ତର୍ ଯେ କେ ମର୍‌ଗିନେ ତାର୍ ନିଜାର୍ ଜୀବନ୍‍କେ ଆରାଇଦ୍, ତ୍‍ବେ ସେ ତାର୍ ନିଜାର୍ ଜୀବନ୍‍କେ ସ୍‌ତ୍‌କ୍‌ରି ଉଦାର୍‌ କ୍‍ରେଦ୍। ଆର୍ ମାନାଇ ଯ୍‌ଦି ସ୍‍ବୁ ଜ୍‍ଗତ୍‌କେ ହାଇକ୍‍ରି ନିଜାର୍ ଜୀବନ୍‍କେ ଆରାଇଦ୍, ତ୍‍ବେ ତାର୍ କାଇଲାବ୍? ଆରେକ୍‌ ଲକ୍ ନିଜାର୍ ନ୍‌ସେର୍‌ତା ଜୀବନ୍ ବାଦୁଲେ ମାପ୍‌ରୁକେ କାଇରି ଦେମ୍‌ହାରେ?
ଆରେକ୍‌, ମୁଇ ମାନାଇ ହିଲା ନିଜାର୍ ଉବାର୍ ମଇମା ସ୍‌ଙ୍ଗେ ନିଜାର୍ ଦୂତ୍‍ମ୍‌ନ୍‌କାର୍ ସ୍‍ଙ୍ଗ୍‍ ଆସେଦ୍ ଆର୍ ସେଡେବ୍‍ଳ୍ ସେ ସ୍‍ବୁ ଲକ୍‌କେ ତାର୍ କ୍‍ଲା କାମାର୍ ହର୍ ହ୍‍ଳ୍ ଦେଇଦ୍। ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ମୁଇ ମାନାଇ ହିଲାର୍ ନିଜାର୍ ରାଇଜେ ଆସ୍‌ତାର୍ ନ୍‍ଦେକ୍‍ତା ହ୍‍ତେକ୍, ଇତି ଟିଆ ଅଇରିଲା ଲକ୍‍ମ୍‍ନ୍‍କାର୍ ବିତ୍‌ରେ କ୍‍ତେକ୍ ଲକ୍ ମ୍‌ରି ନ୍‌କେର୍‌ତି।”

နားထောင်ပါ။ ମାଥିଉ 16