သုတ္တံကျမ်း 3မှ လူကြိုက်နှစ်သက်သော ကျမ်းပိုဒ်များ။

မျှဝေရန်

ထာဝရဘုရား​ကို စိတ်နှလုံး​အကြွင်းမဲ့ ယုံကြည်ကိုးစား​လော့​။ မိမိ​၏​အသိဉာဏ်​ကို အမှီ​မ​ပြု​နှင့်​။ သင်​ပြုမူကျင့်ကြံ​သမျှ​သော​အမှုအရာ​တို့​၌ ကိုယ်တော်​ကို မျက်မှောက်ပြု​လော့​။ သို့ပြုလျှင် ကိုယ်တော်​သည် သင်​၏​လမ်းခရီး​တို့​ကို ဖြောင့်တန်း​စေ​တော်မူ​လိမ့်မည်​။

ကိုယ့်ကိုယ်ကိုယ် ပညာရှိ​ဟု မ​ထင်မြင်​နှင့်​။ ထာဝရဘုရား​ကို​ကြောက်ရွံ့​၍ မကောင်းမှု​မှ​ဖယ်ခွာ​လော့​။

သင်​၏​စည်းစိမ်ဥစ္စာ​နှင့် သင်​ရရှိ​သမျှ​သော​အသီးအနှံ​၏​အသီးဦး​ဖြင့် ထာဝရဘုရား​ကို​ဂုဏ်ပြုချီးမွမ်း​လော့​။ သို့ပြုလျှင် သင်​၏​ကျီ​တို့​သည် ပြည့်နှက်​လျှံကျ​လျက် သင်​၏​စပျစ်သီးနယ်ရာကျင်း​တို့​သည်​လည်း စပျစ်ဝိုင်​အသစ်​နှင့် ပြည့်လျှံ​လိမ့်မည်​။

မေတ္တာကရုဏာ​နှင့်​သမ္မာတရား​ကို သင့်​ထံမှ​စွန့်ခွာ​မ​သွား​စေ​နှင့်​။ ၎င်း​တို့​ကို သင်​၏​လည်ပင်း​၌​ဆွဲ​ထား​၍ သင့်​နှလုံးသား​ပြင်​၌ ရေး​ထား​လော့​။

ငါ့​သား​၊ ထာဝရဘုရား​၏​ဆုံးမပဲ့ပြင်​တော်မူ​ခြင်း​ကို အလေးမထား​ဘဲ​မ​နေ​နှင့်​။ ကိုယ်တော်​၏​ဆိုဆုံးမ​ခြင်း​ကို​ခံရ​သောအခါ​၌​လည်း စိတ်​မ​ပျက်​နှင့်​။ အကြောင်းမူကား ဖခင်​သည် နှစ်သက်​သော​သား​ကို ဆုံးမ​တတ်​သကဲ့သို့ ထာဝရဘုရား​သည် ချစ်​တော်မူ​သော​သူ​ကို ဆုံးမ​တော်မူ​၏​။

ငါ့​သား​၊ ငါ​၏​သွန်သင်ချက်​ကို မ​မေ့လျော့​နှင့်​။ ငါ​၏​ပညတ်ချက်​တို့​ကို​လည်း သင်​၏​စိတ်နှလုံး​သည် ထိန်းသိမ်းစောင့်ရှောက်​ပါစေ​။ အကြောင်းမူကား ၎င်း​တို့​သည် အသက်ရှည်​ခြင်း​၊ အသက်တာ​၏​နှစ်ကာလ​နှင့် ငြိမ်းချမ်းမှု​ကို သင်​၌ ထပ်ဖြည့်​ပေး​လိမ့်မည်​။

ဉာဏ်ပညာ​ကို​တွေ့ရှိ​သော​သူ​နှင့် ထိုးထွင်းဉာဏ်​ကို​ရရှိ​သော​သူ​သည် မင်္ဂလာ​ရှိ​၏​။ အကြောင်းမူကား ဉာဏ်ပညာ​မှ​ရရှိ​သော​အကျိုးအမြတ်​သည် ငွေ​မှ​ရရှိ​သော​အကျိုးအမြတ်​ထက် ပို၍​ကောင်း​၏​။ ၎င်း​၏​အမြတ်အစွန်း​သည်​လည်း ရွှေ​ထက် ပို၍​ကောင်း​၏​။ ဉာဏ်ပညာ​သည် ပတ္တမြား​ထက်​အဖိုးတန်​၍ သင်​နှစ်သက်​သော​မည်သည့်​အရာ​နှင့်​မျှ နှိုင်းယှဉ်​၍​မ​ရ​နိုင်​။

သင့်​လက်​ထဲ၌ ကောင်းကျိုး​ပြု​နိုင်စွမ်း​ရှိ​လျက်​နှင့် ထို​ကောင်းကျိုး​ကို​ခံထိုက်​သော​သူ​တို့​အား မပြု​ပေး​ဘဲ​မ​နေ​နှင့်​။

ထာဝရဘုရား​သည် ဉာဏ်ပညာ​အားဖြင့် မြေကြီး​ကို​တည်​၍ ထိုးထွင်းဉာဏ်​အားဖြင့် ကောင်းကင်​ကို မြဲမြံ​စေ​တော်မူ​၏​။