Luka 24
24
Mfulukulu ya Yesu
1Bu kuma kia na kilumbu ntete ya lumingu bau kwizaka ku ndiamu, bau twalaka bima nsunga mbote ya bau yidikaka. Mat. 28:1; Mal. 16:1; Yoa. 20:1
2Bau kutaka ditadi imene kunengumuka tuka ndiamu;
3bau kotaka, kansi monaka ve nitu ya Mfumu Yesu.
4Yo vandaka, bu bau yituka mingi, tala, babakala zole telema mfinama na bau na mvwatu ya kenzima. Mat. 28:5; Mal. 16:5
5Bu bau vandaka na boma ye bau yinama luse ya bau va ntoto, bau tubaka kwa bau: Sambu na nki beno ikele kusosa yandi ya moyo nankati ya bafwa ?
6Yandi ikele awa ve, kansi imene kutelema; bambuka, mpilamosi yandi tubaka kwa beno, bu yandi vandaka mu Ngalili, Luk. 9:22; 18:33
7yandi tubaka: Mwana ya muntu fwiti kuyekulwa mu maboko ya bankwa masumu, ye komwa va kulunsi, ye fulukiswa mu kilumbu ya tatu.
8Bau bambukaka mambu ya yandi,
9bau katuka tuka ndiamu, ye tubaka mambu yai yonso kwa bau kumi ye mosi ye kwa bau yonso yankaka, Mat. 28:8; Mal. 16:8; Yoa. 20:2
10Malia mwisi Mangadala, ye Yoana ye Malia ngudi ya Yakobi, ye bankento yankaka ya vandaka na bau, tubaka mambu yai kwa bantumwa.
11Mambu yai monikaka na luse ya bau bonso mambu ya mpamba, bau kwikilaka bau ve.
12Kansi Petelo telemaka, ye kwendaka ntinu ku ndiamu; yandi yinamaka ye talaka muna, ye monaka lele ya lino na sika ya yo; ye vutukaka ku nzo ya yandi ye yitukaka sambu na mambu ya salwaka.
Yesu monika kwa banlonguki zole ikele kwenda ku Emausi
13Tala, kilumbu yina banlonguki zole kwendaka ku bwala, nkumbu ya bwala yai Emausi, yo vandaka ntama tuka Yelusalemi, mfinama kumi ya kilometre. Mal. 16:12
14Bau solulaka sambu na mambu yai yonso ya kubwaka.
15Yo vandaka bu bau solulaka ye yuvulana, Yesu kibeni mfinamaka ye kwendaka na bau.
16Kansi meso ya bau tala mbote ve, na bau lenda kuzaba yandi ve.
17Yandi tubaka kwa bau: Nki mambu yai ya beno ikele kusolula, bu beno ikele kutambula ? Bau telemaka na luse ya ntantu.
18Mosi ya bau, nkumbu ya yandi Kleopa, yandi vutulaka, kutuba kwa yandi: Kansi nge ikele kaka nzenza mu Yelusalemi, ye nge zaba ve mambu yai ya kubwaka mu bilumbu yai ?
19Yandi tubaka kwa bau: Nki mambu ? Bau tubaka kwa yandi: Mambu ya Yesu, mwisi Nazaleti, yandi vandaka mbikudi ngolo mu bisalu ye mu mambu nantwala ya Nzambi ye bantu yonso, Mat. 21:11; Luk. 7:16; Yoa. 6:14
20bambuta banganga ye bankuluntu ya beto, yekulaka yandi ye bedisaka yandi mu mbedoso ya lufwa, ye komaka yandi va kulunsi.
21Kansi beto tulaka vuvu, yandi ikele yina ya tavulusa Isaeli; kansi tuka ntangu ya salwa mambu yai yonso, yai ikele kilumbu ya tatu. Bis. 1:6
22Bankento yankaka nakati na beto yitukisaka beto, bau kumaka suka yonso ku ndiamu;
23bu bau monaka nitu ya yandi ve, bau kwizaka tuba: Bau imene kumona mona-mesa, ye banjo ya tubaka: Yandi ikele na moyo. Mat. 28:8
24Bankaka ya bau ya vandaka na beto bau kwendaka ku ndiamu, ye monakaka kieleka, bonso bankento tubaka, kansi bau monaka yandi ve.
25Buna yandi tubaka kwa bau: O, beno bantu ya buzoba ye ntima na kwikila nswalu ve mu mambu yonso ya tubaka bambikudi.
26Kadi na Klisto fwiti kumona mpasi yai ve ye kukota mu nkembo ya yandi ? Yes. 50:6; 53:1; Fili. 2:8; Eb. 12:2
27Yandi yantikaka tuka Mose ye bambikudi yonso, ye tendudilaka bau masonukwa yonso, mambu yai ikele sambu na yandi. 1 Mose 3:15; 12:3; 22:18; 26:4; 2 Sam. 7:12; Nk. 22:1-31; 132:1; Dan. 9:24
28Bau mfinamaka ku bwala ya bau kwendaka; yandi sala bonso yandi zola kuluta.
29Bau bombidilaka yandi, kutuba: Vanda na beto; sambu na nkokila imene kubwa, ye kilumbu imene. Yandi kotaka ye vandaka na bau.
30Yo vandaka bu yandi vandaka na bau na meza, yandi bakaka dimpa, ye sakumunaka ye bukunaka yo, yandi pesaka bau.
31Ye meso ya bau kangukaka, ye bau zabaka yandi, yandi vilaka na meso ya bau.
32Bau tubana: Ntima ya beto lemaka ve mu beto ? Bu yandi tubaka kwa beto mu nzila, ye bu yandi kangudilaka beto masonukwa.
33Mu lokula yina bau telemaka, ye vutukaka ku Yelusalemi, ye monaka bau kumi ye mosi imene kutakana, ye bankaka ya vandaka na bau,
34bau tubaka: Kieleka, Mfumu imene kufulukiswa ye kumonika kwa Simoni.
35Buna bau tubaka mambu ya kubwaka mu nzila ye mpilamosi yandi zabakana kwa bau, bu yandi bukunaka dimpa.
Yesu monika kwa banlonguki ya yandi yankaka
36Bu bau tubaka mambu yai, yandi kibeni telemaka nakati ya bau ye tubaka kwa bau: Yenge kwa beno. Yoa. 20:19
37Kansi bau zakamaka, boma kubwilaka bau, bau banzaka bau imene kumona mpeve.
38Ye yandi tubaka kwa bau: Sambu na nki beno ikele kutita ? Beno ikele na mabanza telema mu ntima ya beno ?
39Beno tala maboko ya mono ye makulu ya mono, yai ikele mono kibeni. Simba mono ye tala; kadi mpeve ikele na nsuni ye mikuwa ve, bonso beno mona mono ikele na yau.
40Bu yandi tubaka yai, yandi songaka bau maboko ya yandi ye makulu ya yandi.
41Bu bau vandaka kwikila ve sambu na kiese ya bau, ye yitukaka, yandi tubaka kwa bau: Beno ikele na kima ya kudia awa ? Yoa. 21:5
42Bau pesaka yandi kitini ya mbizi ya masa ya yangwa.
43Yandi bakaka yo, ye kudiaka nantwala na bau.
44Yandi tubaka kwa bau: Yai ikele mambu ya mono tubaka kwa beno, bu mono vandaka na beno, na mambu yonso fwiti kumaniswa, ya sonikwa mu nsiku ya Mose ye bambikudi ye bankunga sambu na mono. Luk. 9:22; 18:33
45Buna yandi kangulaka mabanza ya bau, na bau lenda kuzaba masonukwa.
46Yandi tubaka kwa bau: Mpilayai yo sonama, Klisto fwiti kumona mpasi ye fulukiswa tuka bafwa mu kilumbu ya tatu,
47na mpindulu ya mabanza ye mvidisilu ya masumu tasamunwa mu nkumbu ya yandi kwa makanda yonso, yantika na Yelusalemi. Bis. 13:38; Yoa. 2:12
48Beno ikele bantemo ya mambu yai. Yoa. 15:27
49Tala, mono tafidisa nsilulu ya Tata ya mono va beno. Kansi beno vingila na mbanza ti beno tavwatiswa na ngolo tuka zulu. Yoa. 14:25; 15:25; 16:7; Bis. 1:4; 2:1
Yesu tomboka ku zulu
50Yandi twalaka bau ti ku ndambu ya Betania, yandi nangulaka maboko ya yandi, ye sakumunaka bau. Bis. 1:4
51Yo vandaka bu yandi sakumunaka bau, yandi katuka na bau, ye natwa ku zulu. Bis. 1:9
52Bau sambilaka yandi ye vutuka ku Yelusalemi na kiese mingi;
53bau vandaka mu tempelo ntangu yonso, kusakumuna ye kusika Nzambi. Amen.
လက်ရှိရွေးချယ်ထားမှု
Luka 24: NTK50
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Nouveau Testament en Kikwango © BAliiance Biblique de la RD Congo, 1950.