Luka 20
20
1Koko en’in’omoi, enem’end’olak’ato en’otumba bona Yakomba, ko amasumola bosimo bon’olotsi, nkanga ina toome l’atengi ban’ekanda baoy’eneyal’ende, iyo la bingambe bin’ato, 2ko bamufola, iy’ate, Otosumole, oila baoyi’ane la lifoka lika nai? Ko onokofaki lifoka line oka nai? 3Ko amakutwela, ate, Emi nkoho nongokufol’ino yoi, ko bonsumole: 4inelo ena Yoane, eyaaki yoi lin’ato, yombo yoi lina loola? 5Ko baosumolana, Mbo yombo tila, Ekambwa ena loola, ende angotila, ate, Ino botiimedya lacina nai? 6Koko lakina, yombo tila, Ekambwa en’ato vo…; bato bahatu bangotofusela baufe; lacin’iyo baimedy’oka Yoane ayaaki bosumoli. 7Ko baokutol’oka bafanonganya eneki inelo enande oyaka. 8Ko Yesu amasumola, ate, Ko l’emi nkoho mpakosumol’ino lifoka linakamb’emi baoyi’ane.
9Ko aomatsa lisumol’ato ekolanya ene: ate, Boto’omoi afusaki lisala lina bekoli bena vina, ko aosombya liho eneyali batombanyi, ko aocoa okinda elela en’onyang’omoi. 10Ko en’esike en’enukelo aotomela batombanyi boombo lacina baofe bemamo bena lisala; koko batombanyi bamofoma la mpomi, ko bamutodya bototoloto. 11Ko lakina ait’otoma boombo’omoi; ko iyo bamofoma nk’osamb’oho, ko bamiilela bokotua bona nsoi mene, ko bamutodya bototoloto. 12Ko lakina aotoma boombo bon’asaso; koko baok’ende mpota, ko bamiitanya. 13Mene lisala aila, ate, Njila v’oya? nongotoma bon’onami ona nganji; yombo enen’iyo ende bangofika. 14Koko eneki batombanyi oenak’ende, baotendana, iy’ate, One nko bosangoli; mbo toyake, lacina lisango liyalame nko liniso. 15Ko bamofodya ena lisala lina bekoli bena vina, ko bamoyaka tutu. Mene lisala lina bekoli bena vina angailel’iyo bokotua’oya? 16Angoya, ko angoyaka batombanyi’aho, ko angosombya bakin’ato lisala liho lina bekoli bena vina. Ko enek’iy’ookaka yoi liho, baila, iy’ate, Yoi liho litilamake! 17Koko amalenda ta, ko aila, ate, Iya, yoi line linalitengi liyali’oya,
Lufe linaliki bafaki ofengolaka,
Liho limoyalama lin’oso lina likoka?
18Boto l’oto onokwela lufe liho angomunya; ohonde boto onongi lufe liho okwela, lingominyaminy’ende yoka lofucifuci.
19Ko nkanga ina toome la batengi ban’ekanda baofon’etelo oyund’ende ena heure eho; koko baang’ato; lacin’iyo baofokol’oka atendaki ekolanya ene lacin’eniyo. 20Ko bamotakamela, ko baotoma baongi banafot’oka bayali bato bana mbongi, lacina baong’ende longo en’etendelo enande, lacin’eho baate etelo oyoleky’ende eneyali lifoka nko gouverneur. 21Ko bamufola, iy’ate, Bolaki, iso tomey’oka e otenda ko olaka nko cilili, ofatambe boto la likai, ohonde olaka mboka ena Yakomba nko la solosolo; 22noka, enafut’iso Kaisala mpuci, yoi liho likoli yombo lifakoli? 23Koko ende aofokola longo loniyo, ko amakutwela, ate, 24Bontume franc. Ene nk’efoya l’etengelo ena nai? Iy’ate, Ena Kaisala. 25Ko amasumola, ate, Bofaka Kaisala toma tona Kaisala, ko bofaka Yakomba toma tona Yakomba. 26Ko batasungya yoi en’etendelo eho linaling’iy’ounda en’oso bon’ato; ko baofefa l’okotua bonoki’nd’okutolaka, ko baoyala nko mwi.
27Ko Basadoke bamoi, nk’iy’anil’oka efana eetwelo en’ewedi, baoya eneyal’ende; ko bamufola, 28iy’ate, Bolaki, Mose atotengelaki’ale, ate yombo botoolo’on’oto ayali l’ooli, ko aowa, ko atacik’ona, bakune’onande atambake booli’oho, lacina aotele botoolo’onande bana. 29Mpame nsambo iyaaki, nko botoolo l’akune; on’oso aotamba booli, ko aowa kum’ataote’ona; 30on’afe nk’osamb’oho; 31ko on’asaso aotamb’oyoto’oko, ko l’iyatu nsambo yok’osamb’oho, ko baowa kuma bataote’ona. 32Ko ena mbus mene boyoto aowa nkoho. 33Iya, en’eetwelo en’ato en’ewedi, angoyala booli’ona nai? lacin’oka iyo nsambo baotambaki yoka booli. 34Yesu amakutwela, ate, Ban’ana loko lone batamb’aali, ko balekya bana ena liala; 35ohonde iy’anatangama yoka bakoli lacina bayele ena liiko loho lon’esik’eho, ko l’en’eetwelo en’ewedi, bafatambe’aali, ko bafatome bana ena liala. 36Iyo bafawaki lakina: bakoli la bikima bina loola nko kocu; ko bayali ban’ana Yakomba, lacin’oka bayali ban’ana eetwelo en’ewedi. 37Koko ena likambo lin’eetwelo ena banawaki, Mose mene, ena bosimo bon’itete, amotum’oka baetwa, eneki’nd’otangaka Yawe, Yakomba ena Abalayama, ko la Yakomba ena Isaka, ko la Yakomba ena Yakobo. 38Ende afayali Yakomba ena bawei: ayali nko Yakomba ena banayaike; lacin’oka eneyal’ende bahatu bayali yoka bayaike. 39Ko batengi’amoi ban’ekanda baamba, iy’ate, Bolaki, omotenda nk’olotsi. 40Ko batit’oyufol’ende bufo bomoi, lacin’oka baanga.
41Koko amaufola, ate, Bato bail’oka Masiya ayali bon’ona Dawidi bosamb’oya? 42lacina Dawidi’mene ailaki en’okanda bona Njembo, ate,
Yawe aosumola Nkolo enami, Kisase en’ili bona likasa linami y’ome,
43Yengoko enengi’m’oila baokyi’owe’ane limbolongo en’ase ban’akak’ane.
44Yok’oho Dawidi mene amotanga Nkolo: iya, ayali bon’onande bosamb’oya?
45Ko eneki bato bahatu olofaka baoyi’ane, aosumola bakili’anande, ate, 46Boongya lilota bokotua bon’atengi ban’ekanda; iyo balanga lacina baete l’isenda bin’itale, ko balanga beeso en’ekala bena limbongo, ko la nkici inay’oso ena basunagoga, ko la bisanga bin’oso ena bilambedya; 47bakumola bayato bana beweli betumb’eniyo, ko baonda beondo ben’etale nko l’okotua bon’osimo. Ekwelo eneng’iy’okwa linga likambo engoleka nko ndeka.
လက်ရှိရွေးချယ်ထားမှု
Luka 20: BBY62
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Bokanda Bona Yakomba Bon’ototo © Alliance Biblique de la R. D. Congo, 1962