Chivkeeb 1
1
Zaaj Kws Has Txug Kev Tsim Nplajteb Hab Lub Ntuj
1Thaus chivkeeb, Vaajtswv tsim lub ntuj hab lub nplajteb,#1:1: Thaus chivkeeb… lub ntuj hab lub nplajteb; lossis Thaus chivkeeb Vaajtswv tsim lub ntuj hab lub nplajteb; lossis Thaus Vaajtswv pib tsim lub ntuj hab lub nplajteb. 2lub nplajteb yeej tsi tau tsheejxeeb hab nyob dlocuas xwb; sau tej nplaimdlej havtxwv yeej tsausntuj nti, hab Vaajtswv tug Ntsujplig#1:2: Vaajtswv tug Ntsujplig; lossis Vaajtswv lub fwjchim; lossis Vaajtswv le cua; lossis ib nthwv cua kws muaj fwjchim. yuj moog yuj lug sau nplaimdlej. 3Vaajtswv txhaj xaaj has tas, “Cale muaj qhov kaaj,” tes txawm muaj qhov kaaj. #2Klt 4:6; 1:6-8 4Vaajtswv pum tas qhov kaaj ntawd zoo; tes Nwg txawm muab qhov kaaj cais tawm ntawm qhov tsaus, 5hab Nwg tis npe rua qhov kaaj hu ua “Nruabnub” hab qhov tsaus hu ua “Montuj.” Montuj dlhau moog lawm tes nruabnub tawm tuaj, ntawd yog nub thib ib.
6-7Vaajtswv has tas, “Cale muaj ib txheej fuabcua lug quas dlej hab muab tej dlej ntawd cais kuas nyag nyob nyag.” Yogle ntawd, Vaajtswv txhaj tsim lub ntuj hab muab tej dlej kws nyob huv qaabntuj hab sau nruabntug cais nyag nyob nyag. Tes txawm muaj le ntawd. 8Vaajtswv tis npe rua txheej ntawd hu ua “Ntuj.” Montuj dlhau moog lawm tes nruabnub tawm tuaj, ntawd yog nub thib ob.
9Vaajtswv has tas, “Ca tej dlej kws nyob huv qaabntuj sissau lug nyob ib qhov chaw uake, sub aav txhaj yuav tawm tuaj,” tes txawm muaj le ntawd. 10Vaajtswv tis npe rua aav hu ua “Nplajteb,” hab tej dlej kws lug sissau uake hu ua “Havtxwv.” Vaajtswv pum tas qhov ntawd zoo lawm. 11Tes Vaajtswv txhaj xaaj has tas, “Ca nplajteb muaj nrojtsuag, txhamxwm, hab qoobloo; yog tej qoobloo kws muaj noob hab tej xyoob ntoo kws muaj txiv hab muaj noob lawvle nyag hom,” tes txawm muaj le ntawd. 12Yogle ntawd, lub nplajteb txhaj muaj nrojtsuag, txhamxwm, hab qoobloo kws muaj noob lawvle nwg hom, hab tej xyoob ntoo kws txitxiv hab muaj noob lawvle nyag hom. Vaajtswv pum tas qhov ntawd zoo lawm. 13Montuj dlhau moog lawm tes nruabnub tawm tuaj, ntawd yog nub thib peb.
14Vaajtswv has tas, “Ca kuas muaj tej lub ci-ci tshwm rua sau nruabntug lug quas nruabnub tawm ntawm montuj, hab ua cim qha txug caijnyoog, nub, hab xyoo; 15tej ntawd yuav ci sau ntuj lug rua nplajteb nuav kuas pumkev,” tes txawm muaj le ntawd. 16Yogle ntawd, Vaajtswv txhaj tsim ob lub ci-ci kws luj heev; lub kws ci tshaaj ca kaav nruabnub hab lub ci tsi heev ca kaav montuj; Nwg tsim tej nubqub huv tuabsi hab. 17Vaajtswv muab tej kws ci-ci ntawd teeb rua sau ntuj kuas ci rua nplajteb, 18kuas kaav nruabnub hab montuj, hab muab qhov kaaj cais tawm ntawm qhov tsaus. Vaajtswv pum tas qhov ntawd zoo lawm. 19Montuj dlhau moog lawm tes nruabnub tawm tuaj, ntawd yog nub thib plaub.
20Vaajtswv has tas, “Ca kuas muaj ntau yaam tsaj muaj sa txawm puvnpo rua nruabdleg, hab ca kuas muaj noog yaa puvnpo sau nruabntug.” 21Yogle ntawd, Vaajtswv txhaj tsim tej tsaj kws luj tshaajplawg nyob huv havtxwv, hab tsim txhua yaam tsaj nyob huv nruabdleg lawvle nyag hom, hab txhua yaam noog lawvle nyag hom huv tuabsi. Vaajtswv pum tas qhov ntawd zoo lawm. 22Vaajtswv tau foom koobmoov rua tej tsaj kws nyob huv nruabdleg kuas fuamvaam moog puv havtxwv, hab kuas tej noog fuamvaam moog puv nplajteb. 23Montuj dlhau moog lawm tes nruabnub tawm tuaj, ntawd yog nub thib tsib.
24Vaajtswv has tas, “Ca kuas lub nplajteb txawm muaj txhua yaam tsajtxhu kws muaj sa lawvle nwg hom: tsaj nyeg hab tsaj qus, tsaj luj hab tsaj miv, naab, qaav, kaab, hab ntsaum lawvle nyag hom,” tes txawm muaj le ntawd. 25Yogle ntawd, Vaajtswv txhaj tsim txhua yaam tsaj lawvle nyag hom. Vaajtswv pum tas qhov ntawd zoo lawm.
26Vaajtswv has tas, “Zagnua ca peb tsim tuabneeg zoole peb tug fwvxyeej, hab lawvle peb tug yaamntxwv. Puab yuav muaj fwjchim kaav tej ntseg huv havtxwv, tej noog sau nruabntug, hab kaav taagnrho tej tsaj nyeg, tsaj qus, tsaj luj tsaj miv kws nyob thoobplawg lub nplajteb nuav.” #1Klt 11:7 27Yogle ntawd, Vaajtswv txhaj tsim tuabneeg kuas muaj fwvxyeej zoole Nwg. Nwg tsim muaj txivneej hab quaspuj. #Math 19:4; Malak 10:6; 1:27-28 #Chiv 5:1, 2
28Vaajtswv foom koobmoov rua obtug hab has tas, “Meb cale muaj tub muaj ki kuas coob, sub meb tej xeebntxwv txhaj yuav fuamvaam moog nyob thoobplawg txhua qhov chaw huv nplajteb hab puab yuav kaav lub nplajteb. Kuv tsaa meb kaav tej ntseg huv havtxwv, tej noog sau nruabntug, hab txhua yaam tsaj kws nyob huv nplajteb. 29Kuv muab txhua yaam qoobloo kws muaj noob nyob thoob nplajteb hab txhua yaam ntoo kws txitxiv muaj noob rua meb tau noj, 30tabsis Kuv tsim tej nrojtsuag hab nplooj maab nplooj ntoos ua zaub rua tej noog hab tej tsaj kws muaj sa nyob huv lub nplajteb nuav tau noj.” Tes txawm muaj le ntawd. 31Vaajtswv saib ibpuas tsaavyaam kws Nwg tsim ntawd mas Nwg pum tas zoo kawg le! Montuj dlhau moog lawm tes nruabnub tawm tuaj, ntawd yog nub thib rau.
လက်ရှိရွေးချယ်ထားမှု
Chivkeeb 1: HNJ2022
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2022 United Bible Societies. All rights reserved.