METHIU 2

Aksing Mii in Anveeng

1 # Luk 2:4–7; 1:5 Herot kurung in akpuihlai, Judia ramvaa Bethlehem a Jisu in apokche kulkung tongnata aksing mii Jerusalem a thlengseia, anruipei, 2#Mak 15:2; Jon 1:49“Judiei kurung pokkha ramnasame? Alamva kannih in amahvaa arsita kulkung tonga kanmuh, churella amahta amthruun thlengsung.” 3Herot kurung in mahchuta atheihlai, aril inhalsa, Jerusalem am mii annaamtekho anril inhalsei. 4Che akthloi thiimpu leh Ringjih lulok akveimii naamteta onga mahchunna Khrista pokchu ramna umeta aruiei. 5#Jon 7:42Anmah in akuunga anson, “Judia vaa Bethlehem a poktu, alamva ringraan in nga tloh a amijihpei:

6“Judia ram asuungna, O Bethlehem, nangva Judia rampuui

“ankaara andihrem nohche;

“alamva kei kimii Israel ta

“khuhnatu rampuui inkhat nikuungnata inthruhtu.”

7Chunna Herot in aksing mii eita inrukte onga aruiei, che jaknang laitalla arsi in nanimmuh umeta ankuungnata arompei; 8che “Naochu nannih in thratea seh a jonve, che nannih in nantuukche keikho trong kamphahve, chuleva keikho mahchu seh a kithruunnatu” tih a amah in Bethlehem tonga amseh ei. 9Anmah in kurung trongchuta antheihche sehsei, che anve Kulkung nata anmuh arsi in nao apokna ajatalla angeihnohmiil anmah anmaa a sehsa. 10Anmah in arsichuta anmuhlai khalmo tlanna anroomthoksei. 11#Met 1:18; 12:46Che anmah in innsuunga luut anao in Meri soh amchu anmuh, che inluk a naota amithruunpei. Cheva, andoon adoonta mahoonga, ra–ao, amrimtui haalna leh amrimtui thaota akuunga ankatpei. 12#Met 2:22; Noon 10:22; Hib 11:7Che Herot in amnatonga inlengnoh natu anmanga mathrit a ammuh ei, che anmah in aktleilam juih a anramtinga inlengsei.

Ijip a Inseng

13Pekva anmah in anlenglai, anve, Akpu vaa ringroi in Joseph ta akmanga mamuh a ason, “Inthouro, naoleh anuta phurh a Ijip ah tlaanrosa, che keiin inlengrosa ta nikuungah kisonnohmiil mah khanna amve, alamva Herot in naoita ammaangnatu ajonsampei.” 14Chunna Joseph in khulouh ah inthoua naoleh anuta phurh a Ijip ah sehsa. 15Che Herot in athihnohsot mahchunna amsei. Mah i Akpu in ringraan ta amsonkha atlungna veisa, mah chuvah: “Ijip nata kei kisa kupata kiongpei.”

Naota Ramkir a Anthat

16Aksing mii in keita kanleemna peiang ta Herot in aromlai, khalmo amlung inhaangsa, cheva aksing mii ankuungnata amah in atheihna lai aknujuih a Bethlehem suungleh akom apangah ak am nao kum innihnata athlangna anaamte raalmii mathlah a ramkir a amthat peiei. 17Chunna ringraan Jeremiah in asonkha atlungnasa, mah chuvah: 18“Ramah in asuunga aril sok a traptruuia onghou kitheih, Rachel in amah asaturel trap, amahta maneem janohsa, alamva naoeikha amnohsei.”

Ijip Nata Inleng

19 # Met 1:20; 2:13 Chuta Herot in athihche, Akpu vaa ringroi in kak hanga Ijip ah am Joseph ta akmanga mamuh a ason, 20“Inthourosa, naoleh anuta phurh a Israel ramma inlengrosa, alamva naota thatnatu akjon miikha thikirsei.” 21Cheva Joseph in inthoua naoleh anuta phurh a Israel ramma inlengsa. 22Chuta Arkhelas in apa Herot angut a Judia rampuui veisa ta atheih in ram achunna luutva intrisa. Che akmanga mathrit a asontaningva amah in Kalili vaa ramsiin tonga inpeella sehsa. 23#Luk 1:26; 2:39; Mak 1:24Cunna amah in Najareth khuuboomma amsa alamva ringraan in ansonkha atlungna veisa, mahchuva, “Amahta Najareth na mii tih a an ongtu.”

လက်ရှိရွေးချယ်ထားမှု

METHIU 2: TARAOBSI

အရောင်မှတ်ချက်

မျှဝေရန်

ကူးယူ