Esta 2
2
Estate Basitipe saba egeyana gi
1A:pite wapikile kanaba dalagipe ga:o gi biniyala, obate Basiti iwaleladele obate Basitidima miyana babala gi enoba Basitite obape kanaba sabale wama galamiyana gi iwaleloyana. 2Amale gi iwaleda: sa:kemana gisaolana dalate oba auwala litatate oba dima a:nege laiyana, gi awapa a: eta:mi imimi sa:sa:lena amina dala gi pa: itawada:na uluwadolamalelo. 3A: e tida:lona eta:mi wa papalale gisaolana dala domonowela obaite a:mai amina Susa kabiginapa baigama alete pa:da:te aminimunu genama gobama obai na:sa:da:minamadili. Amale a:pe gisaolanapa dalagi Egate obai sa:lele tida:dele sa:sa:lena witala lopala obai dima dapulamalelo obaite sa:lele apeda: gima. 4Amale miya aminagite kanaba a:dowali iwiminada awapa elamalona, a: a:ma aminagi susa:gima gwalilamalelo Basitipe saba egela gima. Kanaba dalagite a:ma gi awapage late a:ma gi a:na:miyana.
5A:ma tepala Beniyamin udaganapa dalagi eloyana Susa kabiginapa baigala, obape gagi Modekai, oba enoba Sayape mata, Simeipe a:iwa. Obape iniwa kabeya enoba Kis, ma:ma Kis enoba Simeipe wawa. 6Kista: gwama eta:mi lumada menagimite Babilonianapa kanaba dalagi Nebukadanesate Yelusalem wa lapote Yuda udaganapa kanaba dalagi Yeoakim dibulama gwalite weloyana tepala, iya gwalite weleyana. 7Modekai a:ma tepala eta aminagi begamunoyana, obape gagi enoba Esta. Ibulu gilalale obape gagi enoba Adasa. Ma:ma Esta enoba Modekaipe kakape aminagi. Obape agita: wawata: a kaokoliyala Modekaite oba begamiyana. Oba enoba aminagi imimi sa:lenapa eloyana.
8Kanaba dalagi amale gilala auda:munoyana luma waelabegate obaimunu amina Susa kabiginapa baigama alete pa:da:mada:le, a:pite a:mai amina waelabega alete pa:diyana tepala Esta iya:ta: gwalite pa:diyana. Obaite a:mai amina alete na:da:te kabiginapa genama gobama na:sa:da:miyana amale Egaite obai tidolamalale. 9Egaite Esta tilite iwaleloyana ma:ma enoba awapanapa aminagi. Enobala obate sela Estadima sa:sa:lena witala lopalata: bayata: apuloyana. Amale Egaite kanaba dalagipe genama gobala 7 gisaolana amina Estadima apuloyana obaite oba iwa:la edelamada:le. Oba amale a:mai amina Estada menagimite eta sa:lenapa sabama auda:miyana obaite a:mala edelamada:le.
10Modekaite Esta a lope anayana obate Yu aminagi eloyana gi pa:pa lalamalale, Esta enobala ya:ma gilala sa:lele a:wamunoyana. 11Modekai kadepa waelabegala a:mai aminate ediliyana genama ta ogosa tepala enamada:da wamunotoloyana, oba Estate a:ta:pi ela eloyana gi itawa ela gima iwiminotoloyana.
12Gogo menagi gobala obaite imimi sa:leda:mina gi a:na:minamadili. Palana 6 samoso gobala obaite sa:lenapa ipowada:napa i edole wi taelamadili. 13Obai na:da:dele obaimunu iwiminada awapada:na lopala alelete kakamite kanabadima na:da:te diliyana. 14A:pite wa debe palala aminagite kanabadima wete a:mala isa menagi etoloyana. A:pite eta ibasegela obate gwama wama saote dala gi itawada:na atote edeliyana genama gobama wetoloyana. A:mala kanaba dalagipe gisaolanapa dalagi Sasagate ato iwa:la eloyana sabama amale obate obai iwa:la elamalale. Obate kanabadima pa:pa gwama wetoloyana, ameta kanabate oba iwimite oba gi lalamila obaite oba kanaba dalagidima gwalite na:da:te diliyana.
15A:pite amale Modekaite begamunoyana Abilaipe aminagi Estate kanaba dalagidima wela tepa saoyala obate eta gi obaya pa:pa a:na:miyana. Ameta Estape gi waelabega kanabape gisaolanapa dalagi Egaite oba anadoloyana gi a:na:pi a:na:da:mina eyana. A:pite Esta tiliyana lumate kabigibegale sa:keladiliyana. 16Obate Tebet naba 10 napa samosola Esta gwalite kanaba dalagipe genama gobama na:diyana. A:ma enoba kanaba Sekesesete naba 7 gogo kanaba eloyana tepa.
17A:ma tepala kanaba dalagite Esta tilite kabigibegale obape iwimina oba dima miyana, Estate eta:mi amina waelabapi gobala kanaba dalagipe alipo ka:ima:yana, enobala obate kanaba atote kakamina wamideletedilina gaolod waiya obape ganabima kaima:te, kanaba susa:gi Basitipe sabama ameta Esta miyana. 18Amale obate Esta gwaliyana gima sa:keladele kabiginapa poko a:na:mite amale obape okona tidiliyana gaganabina dalata: gwama kabigida:na sidina gabamani dalata: a:ma poko sabama awada:miyana. Obai pa:diyala obate a:negelayana, ne tidolowamena eta:mi wa waelabegala edelina lumate ma:ma kadepa menagi a:me edelamadili. A:pite a:ma tepala kanaba dalagite nagala lopala waelabega lumadima dapuloyana.
Modekaite kanaba dalagipe kaola galabe pawamiyana gi
19Amale aminate gwama kanaba dalagidima saodiliyana tepala kanabate Modekaidima eta oko saba atayana. A:ma tepala obate kanabape genama ogosa tepala oko a:na:munoyana. 20Modekaite a lope Esta anayana obate Yu aminagi elelona gi pa:pa kekeminamalale, enobala obate obaya oba gi pa:pa gibalamale kekeminaleyala Modekaite a:inapa oko a:na:munoyana. Esta kowabi tepala eloyana tepala oba Modekaipe gilala pa:pa ka:miyana.
21A:pite Modekai a:mala oko a:na:munoyana tepala kanaba dalagipe genama ogosa tiliyana dala saki Bigitanata: Telestata:te ga:ote kanaba dalagi lapolamada:le gi sa:leda:miniyana. 22Modekaite a:ma dala sakite sa:leminiyana gilala enamate wete kanaba susa:gi Estadima gibaba eyala oba a:ma gilala kanaba dalagi itumiyana. 23Amale obate gibalama gi tila gima gi uwalolote, gibalama gi itawa ete amale obai saki i sidila tao ya:wile dapoyana. Amale obaite Modekaite a:na:miyana sa:lenapa gi kanabape buka gobama aliliyana.
လက်ရှိရွေးချယ်ထားမှု
Esta 2: GBOTP
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Gogodala Bible Translation Project © Bible Society of Papua New Guinea, 2016.