Genèse 12
12
ABRAAM (12.1–25.18 )
Unimbɔti yíiń Abram ú yīkì u-tiŋki pu
1Dalbee ní ti-Dindaan bí Abram yii:
«Yīkì a-tiŋki pu, a-tincaliiki yab kansikin nì a-baa cindin kí nīn cá kitiŋ kin poon m làá dàkà-see#12.1 Kpèè Atuun 7.2-3, Eebru 11.8.. 2M làá dī a-pu ní kí náań ditimbuŋkpaandi ní kí bìin̄ a-boon. M làá yòon̄ a-yindi yilpu. A-pu ní m làá dī kí bìin̄ inibool kɔkɔ pu. 3Bin yaa ŋá-si tiŋanee, m làá ŋá bidambi tiŋan, bin yaa tɔ́-si mbusuee, m làá tɔ̄-bi mbusu. A-puee, m làá ŋá kitiŋ pu nibuliŋ kɔkɔ tiŋan#12.3 kitiŋ pu nibuliŋ kɔkɔ: dūú ŋmàntī nì Atuun 3.25, Gala 3.8-9..»
4Abram gbìl̄ mimmee ní ki yíkìi búntì kii ti-Dindaan nín tùkū-u puee, ní Looti nóó-u. Ŋyunti ŋun Abram nìn yíkì Kaaran tiŋkinee, u nìn cáá abin aŋmoo kpá imuŋku inaa ní. 5U nìn kpáaǹ u-nimpuu Saarayi ki kútì u-nabiki Aran jipɔɔn Looti pu, ki kpáaǹ u-gaajawanti tin u nìn cááyee kɔkɔ, nì iyumbu in u nìn dáal̀ Kaaran tiŋkinee. Bi nìn yíkìi kāl̀ nsan pu ki cōom̀ ki cūtì Kanaan tiŋkin.
Abram bí Kanaan tiŋkin
Ŋyunti ŋun Abram bàn̄ Kanaan tiŋkinee, 6ní bi yìin̄ kitiŋ gbanti poon ki tin bàn̄ laaba bi yíì niin yii Siikeem, ní ki tin nyáń Mooree#12.6 Mooree nìn sá mpaan ní buwaasubu bubɔ nìn yú niin. subu pu. Ŋyunti gbantee, Kanaan yab di nìn dá láá kóò kitiŋ gbantin.
7Ní ti-Dindaan nyántì u-ba ki dàkā Abram ki lī yii: «A-niboolii ní m làá dāá dū kitiŋ nee kí tīī.» Ní Abram máń nsaraafan niin ki tīī ti-Dindaan un nìn nyántì u-ba ki dàkā-uee#12.7 Kpèè Atuun 7.5, Gala 3.16.. 8Míǹ boonee ní u yíkì niin ki nín cá ajoon ŋin pìlīǹ Beeteel tiŋki ŋwìiń nyalaŋki púee. U bàn̄ee ní ki gāā u-tantiu Beeteel nì Aayi timmu kansikin, ní Beeteel bí ŋwìiń jeetilaŋki pú ní Aayi bí ŋwìiń nyalaŋki pú. U nìn gíti máń ti-Dindaan nsaraafan ŋubɔ niin mun ní ki jáam̀-u. 9Míǹ boonee ní Abram tí yíkì ki còom̄ ki kàal̀ ntimu ki nìkì ki cá Neegeeb watil pú.
10Boonee ní ŋkùm dāa nyáń kitiŋ kin poon Abram kóòyee, ní u yíkì ki nín sìntī Eejipiti tiŋkin kí cùú kàl̄ niin, kun puee ŋkùm nìn pɔ̄ɔ̄ kitiŋ kin poon u nìn kóòyee tikpil. 11Bi tóob́ kí kɔ́ Eejipiti tiŋkinee ní u bí u-nimpuu Saarayi yii: «M nyí yii a baasii ŋān̄ unimpu. 12Eejipiti yab yaa ká-see, bi làá lì yii m-nimpuu di sá-si, ní kí cúú-mi, kí kpɔ̀-mi ní kí yàntī sii ń nīn bí. 13An puee m gbāam̀-si, bi yaa tin bālifì-see, á lì yii m-niisal di sá-si, án nín làá ŋá pu a-puee, bí ŋúb́-mi tiŋan kí taa kpɔ̀-mee.»
14Bi dūu bàn̄ Eejipitee, niin yab ká yii u-nimpuu ŋān̄ tikpil. 15Faaroo#12.15 Faaroo taapu di sá yii Eejipiti yab bɔtikpaaŋwu. kàliŋkpilib mun nìn ká u-nimpuu gbanti ní ki cūtìi máafì Faaroo unimpuee nyaaŋku pu, ki yōoǹ-u ki cáa cūnnì Faaroo cindi. 16U-puee, Faaroo fōō Abram tiŋan, ki tīī-u ipii nì inaa nì mmamu nì bitɔntɔnliibi bininjab nì binimpoobi, nì mmansalimu nì igutaamu. 17Ama ní Abram nimpuu Saarayi puee, ti-Dindaan yāntì iweeŋkpaan iba dɔ́miń ki jéetì Faaroo nì u-cindi yab kɔkɔ pu. 18Niinee ní Faaroo yíiń Abram ní ki bālifì-u yii: «Ba ŋá ní a ŋá-mi mimmee? Ba pu ní saa tùkū-mi yii unimpu nee sá a-nimpuu? 19Ba pu ní a bí yii u sá a-niisal ki yāntì m dū-u ki kpántì m-nimpuu? Too, a-nimpuu sèé! Fōō a-wanti kí kpáàá yīkì.»
20Ní Faaroo pú u-yab kinyɔkɔ yii bí nyāntí u nì u-nimpuu, ú kpáaǹ u-wanti tin u cááyee kɔkɔ nì u-nimpuu kí nīn cá.
လက်ရှိရွေးချယ်ထားမှု
Genèse 12: BASSARDC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
BIBLE EN N'TCHAM (Bassar) © Alliance Biblique du Togo, 2013.