Genèse 15
15
Unimbɔti būsì ki pōoǹ Abram dipoondi
1Míǹ jítì boonee, ní ti-Dindaan lēē u-ba ki dàkā Abram ki bí-u yii: «Abram, taa fàŋkì tiba, man di wúń a-pu. Tiŋan tin m làá ŋá-see làá nīn wīikí tikpil.» 2Ní Abram kíí yii: «Ti-Dindaan Unimbɔti, ba ní a làá tīī-mi ní? Man dee, maa cáá kibiki, ní Eeliyeeseer udamaasja di làá dāá jī m-fakal.» 3Ní Abram gíti bí yii: «Man dee, aa tīī-mi kibiki, ní uyumbu un bi màl̄ m-cindinee di làá jī m-fakal.» 4Niinee ní ti-Dindaan bí-u yii: «An kaa sá Eeliyeeseer di làá jī a-fakal, sisi a-ba poon biki di làá jī a-fakal.» 5Ti-Dindaan lī-u mimmee ní ki nyántì-u mmɔŋki, ní ki bí-u yii: «Wáaǹ kí kpèè yilpu a yaa ŋūǹ kí kàaǹ iŋmalbijaa nee.» Ní ki kútì-u yii: «Míǹ ní a-biyaamu làá dāá nīn wīikí#15.5 Kpèè Room 4.18, Eebru 11.12..»
6Niinee ní Abram fōō ti-Dindaan nín lī puee ki kíí. Míǹ pu ní ti-Dindaan yíiń-u deedeedaan#15.6 Kpèè Room 4.3, Gala 3.6, Yaku 2.23.. 7Ní ti-Dindaan bí-u yii: «Man di sá a-Dindaan un nyántìń-si Uur, Kaaldee tiŋkin kí dū kitiŋ kin poon a bí nee kí tīī-si á nīn kíǹ ki yèe.» 8Ní Abram bí yii: «Ti-Dindaan Unimbɔti, m làá ŋá mana kí béé yii man di làá nīn lafun yì kitiŋ gbanti?» 9Ní ti-Dindaan bí-u yii: «Cúú unasal un cáá abin atee nì uŋɔsal un cáá abin atee, nì upìja un cáá abin atee, nì kinanjilii nì dibeenanjipɔmbil kí cáań.» 10Ní Abram nyàabìń an waŋkutee ní ki cúú-tì ki gífì ki nābitì mili mili, ní ki dū aginee ki bíl̀ ki túĺ tɔb. See kinanjilii nì dibeenanjipɔmbil ní waa gífì ki nābitì mili. 11Ní ikaabu kpákatìń kí jī an nanti ní Abram jìn̄-i.
12Ŋwìiń cá kí jēetée ní ŋgeem miba dɔ́miń ki cúú Abram. Niinee ní tifaandi kɔ́-u ní dibɔmbɔŋkpaandi diba jéetì u-pu#15.12 Kpèè Yoob 4.13-14.. 13Ní ti-Dindaan bí Abram yii: «Á nīn nyí tiŋan yii a-naantiibi làá dāá nīn kóò kitincaŋ kiba poon ní. Bi làá dāá dū-bi kí kpántí iyumbu kí sàaǹ-bi áli abin alaataa anaa#15.13 Isirayeel nín bí Eejipiti kuyuŋun puee bɔtee: kpèè Disa 1.1-14, Atuun 7.6.. 14Ama m làá dāá dáaĺ ditimbundi din làá dāá cúú a-naantiibi kuyuŋuee tafal, ní boonee bí dāá nyā kitiŋ gbantin nì tigaajakpaandi#15.14 Isirayeel yab nín nyáń Eejipiti puee, kpèè Disa 12.40-41, Atuun 7.7.. 15Siiyee, a làá bà a-naanjab nì nsɔŋfi poon ní. A làá púĺ kí bà titikpiti laŋki nì dipɔɔsɔŋkil ní bí nín síb́-si. 16A-naantitɔntɔkɔŋ dinanaatiil di làá dāá fàtīí gítiń doo, di sá yii kí dāá sāā ŋyunti gbanti ní Amɔɔr yab kpitii làá wíiǹ kí bà i-nyɔkɔm.»
17Ŋwìiń jéetì kunyeeu mɔ́ee ní ŋfan ŋubɔ nì ŋŋminyiim nì ŋŋminaapool#15.17 ŋfan nì ŋŋminyiim nì ŋŋminaapoolee dàkà yii Unimbɔti di jítì tinan tin bi gífì ki bíl̀ee kansikin. dɔ́miń ki jítì tinan tin Abram gífì ki bíl̀ee kansikin. 18Ŋwiin gbanti dal ní ti-Dindaan pūtì ki pōoǹ Abram ki bí-u yii:
«A-naantiibi ní m làá dū kitiŋ nee kí tīī#15.18 Kpèè Atuun 7.5.,
kí yòon̄ Eejipiti mɔɔl kí tin cáá sāā Eefiraati mɔɔkpaandi.
19An dàkà yii kitiŋ kin pu Keeni yab nì Keeniisi yab nì Kadimoon yab 20nì Eeti yab nì Peeriisi yab nì Reefa yab 21nì Amɔɔr yab nì Kanaan yab nì Giirgaasi yab nì Jeebusi yab kóòyee.»
လက်ရှိရွေးချယ်ထားမှု
Genèse 15: BASSARDC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
BIBLE EN N'TCHAM (Bassar) © Alliance Biblique du Togo, 2013.