ᒐᓂᓯᔅ 4
4
ᑎᐸᒋᒧᐅᓐ—ᐊᑕᒻ ᑭᔭ ᐃᑉ, ᐅᑦ ᐊᐛᓯᒧᐛᐛ ᑲᐃᓇ ᑭᔭ ᐊᐳᓚ
1ᐊᑯ ᐊᑕᒻ ᒋ ᐎᐸᒪᐤ ᐎᐛ ᐃᐸᔨᒋ᙮ ᒂ ᐊᓱᐛᐱᒪᐅᓱᑦ ᐃᑉ ᑭᔭ ᒋ ᐅᑯᓱᐤ; ᑲᐃᓐ ᒋ ᐃᓯᓂᐧᑲᑕᐤ (ᓂ ᑭᓄᐛᔨᒪᐤ, ᐊ ᐃᑥᒥᑲᒡ) ᐛᔅ ᒋ ᐃᔅᒋᔄᐤ, “ᑎᐸᔨᒋᒐᓱᐤ ᐊ ᐎᒋᐃᑦ, ᓂᒋ ᑐᑕᓐ ᒐᒋ ᑭᓄᐛᔨᒥᒃ ᐅᑯᓯᒪᐤ᙮” 2ᓇᓇᒐ ᐃᑉ ᒥᓐ ᒋ ᐅᑯᓱᐤ, ᐊᐳᓪ ᒋ ᐃᓯᓂᐧᑲᑕᐅᒡ᙮
ᑲᒋ ᒋᓯᓂᑕᐅᒋᒡ ᐊᐳᓪ ᑭᔭ ᑲᐃᓐ, ᐊᐳᓪ ᒋ ᒪᔭᑕᓂᓯᐅ-ᐃᔪᐤ, ᑲᐃᓐ ᐎᔾ ᒋ ᓂᑕᐅᒋᑕᐤ ᒥᒋᒥᔪᐤ᙮ 3ᐸᐃᒂᐤ ᑲᐃᓐ ᒋ ᐅᑎᓂᒻ ᒥᒋᒥᔪᐤ ᑲ ᓂᑕᐅᒋᑕᑦ ᑭᔭ ᒋ ᒥᔭᐤ ᑎᐸᔨᒋᒐᓱᐛ ᒧᔭᒻ ᐱᔅᑎᓂᒐᐅᓂᔪᐤ; 4ᐊᐳᓪ ᑭᔭ ᐎᔾ ᒋ ᐸᓱᐛᐤ ᐱᔅᒐ ᐊᔭᐱᓯᓯᔨᒋ ᓂᔅᑎᒻ ᑲ ᑕᔨᒋ ᐅᒪᔭᑕᓂᓯᒪ ᑭᔭ ᒂ ᓂᐸᐊᑦ ᑭᔭ ᒋ ᒥᔭᐤ ᑎᐸᔨᒋᒐᓱᐛ ᐊ ᐎᔪᔨᒋ ᒧᔭᒻ ᐱᔅᑎᓂᒐᐅᓂᔪᐤ᙮ ᑎᐸᔨᒋᒐᓱᐤ ᒋ ᒥᔽᔨᑕᒥᑯᐤ ᐊᐳᓚ ᑭᔭ ᐅᐱᔅᑎᓂᒐᐅᓂᔪᐤ, 5ᒥᒄ ᒋ ᐊᑐᐛᔨᒪᐤ ᑲᐃᓇ ᑭᔭ ᐅᐱᔅᑎᓂᒐᐅᓂᔪᐤ᙮ ᒋᒋᐛ ᒋ ᒋᔄᐳᐤ ᑲᐃᓐ ᐅᔭ ᑲ ᐃᔅᐱᔨᒡ᙮
6ᐊᑯ ᑎᐸᔨᒋᒐᓱᐤ ᐎᔭᐱᒪᑦ ᑲᐃᓇ ᐊᑯ ᐊᑕᑦ, “ᒐᒂᓐ ᐛᒋ ᒋᔄᐱᔨᓐ ? ᒐᒂᓐ ᐛᒋ ᐃᓯᓇᒂᒡ ᒋᑕᔅᑎᒥᐧᒄ ? 7ᓇᒪ ᒋᔅᒐᔨᑕᓐ ᐊ, ᐃᑐᑎᒥᓇ ᐊ ᒥᔽᒡ ᒋᑭ ᐸᐱᒂᔨᓐ ? ᒥᒄ ᓇᑭᑐᐛᔨᑕ ᐛᔅ ᐊᑲ ᐃᑐᑎᒥᓇ ᐊ ᒥᔽᒡ, ᒧᔭᒻ ᒥᒋᒥᓂᑐᐅᒡ ᐃᓯᓇᒂᓐ ᒥᒋᑥᐅᓐ ᓇᔅᒡ ᐊ ᐸᓱᓇᑯᓯᑦ, ᓇᓂᑐᐛᔨᑎᒻ ᒐᒋ ᑎᐸᔨᒥᔅᒃ᙮ ᓇᔅᒡ ᒋᐸ ᐎ ᓱᒋᓯᓐ ᒐᒋ ᓴᑯᑕᔨᓐ ᐅ ᑯᒂᒋᐃᐛᐅᓐ᙮”
8ᑲᐃᓐ ᒂ ᐃᑕᑦ ᐊᐳᓚ, “ᐊᔅᑎᒻ ᐃᑐᑕᑕᐤ ᓄᒋᒥᒡ᙮” ᑲᒋ ᑕᒡ ᒪᒃ ᐊᓐᑕ ᓄᒋᒥᒡ, ᓯᔅᒋᑯᒡ ᐛᑕᒪᐛᑦ ᑲᐃᓐ ᐅᓯᒪ ᑭᔭ ᒂ ᓂᐸᐊᑦ᙮
9ᐊᑯ ᑎᐸᔨᒋᒐᓱᐤ ᐊᑕᑦ ᑲᐃᓇ, “ᑕᓐᑕ ᐊ ᑕᑦ ᐊᐳᓪ ?”
ᑲᐃᓐ ᐃᑕᐤ, “ᓇᒪ ᓂ ᒋᔅᒐᔨᒪᐤ᙮ ᓂᔾ ᐊ ᓂᐸ ᑭᓄᐛᔨᒪᐤ ᓂᓯᒻ ?”
10ᐊᑯ ᑎᐸᔨᒋᒐᓱᐤ ᐊᑕᑦ, “ᓂ ᐛᐸᑕᓐ ᑲ ᐃᓯ ᓂᐸᐃᑦ ᒋᓯᒻ᙮ ᒧᔭᒻ ᐊ ᑕᑈᑎᑯᐅᒡ ᐅᒥᐧᒄ ᐊ ᐃᑎᑯᒡ ᒐᒋ ᐊᓏᔨᒥᒋ ᐊᐛᔪᐛ ᑲ ᓂᐸᐃᑯᑦ᙮ 11ᐛᔅ ᑲ ᐃᑐᑎᒧᑦ ᒋᓯᒻ ᐅᒥᐧᒄ ᒐᒋ ᐱᒥᑯᔨᒡ ᐊᓐᑕ ᒧᔅᑎᔅᑭᒥᒡ, ᐊᐅᑯᐤ ᒐ ᐃᓯ ᐊᓏᔨᒥᑕᓐ᙮ 12ᐎ ᓂᑕᐅᒋᑕᔨᓇ ᒋᒥᒋᒻ, ᓇᒪ ᒐᒂᓐ ᒋᑭ ᓂᑕᐅᒋᓐ; ᒋᑭ ᐱᐸᒧᑕᓐ ᑭᔭ ᓇᒪ ᒋᑭ ᒋ ᑎᒂᓐ ᐊᓐᑕ ᒐ ᐎᒋᔨᓐ ᐅᑕ ᐊᔅᒋᒡ᙮”
13ᐊᑯ ᑲᐃᓐ ᐊᑕᑦ ᑎᐸᔨᒋᒐᓱᐛ, “ᐅᒪ ᐊ ᐃᓯ ᐊᓏᔨᒥᔨᓐ ᒋᒋᐛ ᐊᔨᒥᓐ᙮ 14ᐊᓄᒡ ᑲ ᐃᑲᑎᓴᐎᔨᓐ ᐅᑕ ᑲ ᑕᔭᓐ; ᓇᒪ ᓂᑭ ᒋ ᑕᓐ ᐅᑕ ᐊ ᑕᔨᓐ᙮ ᓂᑭ ᐱᐸᒧᑕᓐ ᑭᔭ ᓇᒪ ᒋᑭ ᒋ ᑎᒂᓐ ᒐ ᐎᒋᔭᓐ ᐅᑕ ᐊᔅᒋᒡ; ᑭᔭ ᓂᒋᔅᑯᐅᑲ ᐊᐛᓐ ᒐᔅᑎᓇᔅ ᓂᑭ ᓂᐸᐃᒄ᙮”
15ᑎᐸᔨᒋᒐᓱᐤ ᐃᑕᐤ, “ᓇᒪ, ᓂᐸᐃᔅᒐ ᐊᐛᓐ, ᓂᔄᐅᑕᒡ ᑕᑥᐤ ᐊᔨᒥᓂᔨᒡ ᓂᑭ ᐊᓏᔨᒪᐤ ᑲ ᐃᔅᐱᔅ ᐊᓏᔨᒥᑕᓐ᙮” ᑎᐸᔨᒋᒐᓱᐤ ᒂ ᒥᓯᓇᐛᑦ ᑲᐃᓇ, ᒐ ᐊᑲ ᐊᐛᓐ ᓂᐸᐊᑦ ᓂᒋᔅᑯᐛᒐ᙮
ᑲᐃᓐ ᐅᑦ ᐊᓂᔅᑯᑕᐸᓇ
16ᐊᑯ ᑲᐃᓐ ᒂ ᓂᑭᑕᑦ ᑎᐸᔨᒋᒐᓱᐛ ᐊ ᑕᔨᒋ, ᐛᐱᓄᑕᒡ ᐊᔅᒋᒡ ᐃᑕᒐ ᒋ ᐃᑐᑕᐤ ᓄᑦ ᐊᓯᓂᐧᑲᑕᔨᒡ, ᓴᔅ ᓇᒪ ᒋᑭ ᒋ ᓂᑐᐛᐱᒪᐤ ᑎᐸᔨᒋᒐᓱᐛ᙮ 17ᓇᓇᒐ ᑲᐃᓐ ᒋ ᐎᐸᒪᐤ ᐎᐛ; ᒋ ᐊᓱᐛᐱᒪᐅᓱᔪᐛ ᑭᔭ ᓇᐸᓴ ᒂ ᑕᔨᒋ᙮ ᐃᓄᒃ ᒋ ᐃᓯᓂᐧᑲᑕᐤ ᑲᐃᓐ᙮ ᒂ ᐃᑐᑕᐧᒃ ᐅᑕᓇᔪᐤ ᑲᐃᓐ, ᐃᓄᒃ ᒋ ᐃᓯᓂᐧᑲᑎᒻ ᒧᔭᒻ ᐅᑯᓴ ᐊ ᐃᓯᓂᐧᑲᓱᔨᒋ᙮ 18ᑲᒋ ᒋᓯᓂᑕᐅᒋᑦ ᐃᓄᒃ, ᒋ ᐅᑯᓱᐤ ᐃᕋᑦ ᒋ ᐃᓯᓂᐧᑲᓱᔪᐛ᙮ ᐊᑯ ᐃᕋᑦ ᒋ ᐅᑯᓱᐤ ᒥᐧᑯᒐᐃᓪ ᒋ ᐃᓯᓂᐧᑲᓱᔪᐛ᙮ ᒥᐧᑯᒐᐃᓪ ᒋ ᐅᑯᓱᐤ ᒥᑐᓴᐃᓪ ᒋ ᐃᓯᓂᐧᑲᓱᔪᐛ᙮ ᑭᔭ ᒥᑐᓴᐃᓪ ᒋ ᐅᑯᓱᐤ ᓚᒪᒃ ᒋ ᐃᓯᓂᐧᑲᓱᔪᐛ᙮
19ᓚᒪᒃ ᒋ ᐎᒋᒪᐤ ᓂᓱ ᐃᔎᐛ, ᐊᑕ ᑭᔭ ᓯᓚ ᒋ ᐃᓯᓂᐧᑲᓱᔪᐛ᙮ 20ᐊᑕ ᒋ ᐅᑯᓱᐤ ᒐᐸᓪ ᒋ ᐃᓯᓂᐧᑲᓱᔪᐛ᙮ ᒐᐸᓪ ᐎᔾ ᒋ ᐅᑕᐎᒪᐤ ᒥᓯᐛ ᐃᔪᐛ ᐱᒍᐎᔭᓂᒋᐛᐱᒡ ᑲ ᐎᒋᔨᒋ ᑭᔭ ᒥᒋᑎᒂ ᒋ ᑭᓄᐛᔨᒪᐤ᙮ 21ᐊᑕ ᑯᑎᑲ ᒋ ᑕᔪᐛ ᐅᑯᓴ ᒍᐸᓪ ᒋ ᐃᓯᓂᐧᑲᓱᔪᐛ᙮ ᒍᐸᓪ ᐎᔾ ᒋ ᐅᑕᐎᒪᐤ ᒥᓯᐛ ᐃᔪᐛ ᑲ ᒪᑐᐛᔨᒋ ᒋᔍᐛᐱᒋᑭᓂᔪᐤ ᑭᔭ ᐳᑕᒋᑭᓂᔪᐤ᙮ 22ᓯᓚ ᒋ ᐅᑯᓱᐤ ᑐᐸᓪ-ᑲᐃᓐ ᒋ ᐃᓯᓂᐧᑲᓱᔪᐛ, ᒋ ᐅᓯᑕᐤ ᒥᓯᐛ ᑕᑐᐎᒡ ᒐᒂᔪᐤ ᐃᓴᑯᔪᐤ ᐊ ᐊᐱᒋᑕᑦ᙮ ᑭᔭ ᓇᐊᒪ ᒋ ᐃᓯᓂᐧᑲᓱᔪᐛ ᐅᒥᓴ ᑐᐸᓪ-ᑲᐃᓐ᙮
23ᐸᐃᒂᐤ ᓚᒪᒃ ᐃᑕᐤ ᐊ ᓂᓯᔨᒋ ᐎᐛ,
“ᒋᔨᐛᐤ ᐊᑕ ᑭᔭ ᓯᓚ, ᒥᔪ ᓂᑐᑎᒧᒄ ᒐᒂᓐ ᒐ ᐃᔅᒋᔄᔭᓐ᙮
ᐊᐛᓐ ᐅᑕᒪᐅᒐ, ᑎᐛᒡ ᓂᑭ ᓂᐸᐊᐤ᙮
24ᐊᐛᓐ ᓂᐸᐊᒐ ᑲᐃᓇ, ᓂᔄᐅᑕᒡ ᐊᐛᓐᒋ ᒋᑭ ᐳᓂᐱᒪᑎᓯᐅᒡ᙮
ᒥᒄ ᐊᐛᓐ ᐊᑯᐎᒐ, ᓂᔄᐅᑕᒡ ᑕᑐᔪᐤ ᐊᓱ ᓂᔄᐅᑕᒡ ᐊᐛᓐᒋ ᒋᑭ ᐳᓂᐱᒪᑎᓯᐅᒡ᙮”
25ᐊᑕᒻ ᒥᓐ ᒋ ᐎᐸᒪᐤ ᐎᐛ ᑭᔭ ᒋ ᐊᓱᐛᐱᒪᐅᓱᔪᐛ, ᒋ ᐅᑯᓱᐤ ᑭᔭ ᓴᑦ ᒋ ᐃᓯᓂᐧᑲᑕᐤ (ᒥᔨᐛᐅᓐ ᐊ ᐃᑥᒥᑲᒡ) ᐛᔅ ᐃᔅᒋᔄᐤ, “ᒋᓴᒪᓂᑐᐤ ᓂᒋ ᒥᔨᒄ ᑯᑎᑲ ᐊᐛᓴ, ᒐᒋ ᒥᔅᑯᑎᔅᑯᐛᑦ ᐊᐳᓚ, ᑲᐃᓐ ᑲ ᓂᐸᐊᑦ᙮” 26ᑲᒋ ᒋᓯᓂᑕᐅᒋᑦ ᓴᑦ, ᒋ ᐅᑯᓱᐤ ᐃᓄᔅ ᒋ ᐃᓯᓂᐧᑲᑕᐤ᙮
ᐊᑯᑕ ᐃᔪᒡ ᓂᔅᑎᒻ ᑲ ᐅᒋ ᒋᒋᐱᔨᒡ ᐊ ᐃᓯᓂᐧᑲᑕᒡ ᒋᓴᒪᓂᑐᐛ, “ᒋᓴᒪᓂᑐᐤ”, ᑭᔭ ᐊᔭᒥᐊᔅᑐᐛᒡ᙮
လက်ရှိရွေးချယ်ထားမှု
ᒐᓂᓯᔅ 4: ᓇᔅᑲᐱ
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada