YESAYA 44
44
Ki Tuhan, Allah inta tuḷong
1Ki Tuhan in noguman, “Indongogaidon, ei Yakub mogogundoi-Ku,
ei Israel, umat inta piniḻí-Ku!
2Akuoibí in ki Tuhan inta nomaḻí kon inimu,
inta nomia kon inimu nongkon bonupa in sian,
bo inta notuḷung kon inimu.
Dika moondok, iko in mogogundoi-Ku,
umat inta piniḻí-Ku inta kinotabi-ku.
3Sin Akuoi in mopobutakbí in tubig kon butá inta noingkag,
bo mopoiḻig in ongkag mita kon butá inta nongoguang.
Akuoi in mobogoibí in kawasa-Ku kon buímu,
bo momarakat kon adí bo ompumu.
4Mosia in mobiagbí moḷumbá naonda bo bonok kon diug in tubig,
naonda bo pangkoi in gandarusa kon bingkí in ongkag.
5Mopobatu-batúandon inta mongaku kon Akuoi in kitogi kon inia,
bo mamangoi dumugang kon buí i Yakub.
Mopobatu-batu in momais kon ḻimanea: Kapunyaan i Tuhan,
bo tumangoi noituot kon umat i Allah.”
6 #
Yes. 48:12; Why. 1:17, 2:8, 22:13 Naa in guman i Tuhan Inta Totok in Mokawasa,
Datu bo moḷoḷukad in Israel,
“Akuoi in Allah inta tongá totobatú,
Inta muna-munamai bo inta imbuitnea totok.
7Ki ine in ná Akuoi? Pokipongakuaidon in sia!
Pomayádon mako in sia mopotaau bo moponiata kon i-Nakó!
Ki ine in nonoḻindapdon kon onu in mobaḻí kon singgai moiduduimai
nongkon pinomangkoian nodapot in singgai imbuitnea?#44:7: Kon bonu in naska in Ibrani tontagá tanaa diá nosilangmai in mangaḻenea.
8Bangusa-Ku, dika moondok andeka moitaḻikokog;
sin nongkon dungkuḷmaipabí nodapot in tanaa
Akuoi in nonoḻindapdon kon onu in mobaḻí?
Moiko in sakusi-Ku mita.
Moḷoḷukad ibanea in diábí
bo diábí kinotaauan-Ku.”
Mosumba kon patong in aidbí mokooyá
9Intau mita inta nogaid kon patong berhala tua in diábí in mangaḻenea, bo dewa mita inta sinumba monia tua diá in baragunanea. Intau mita inta mosumba kon patong tatua in bilog bo diá nonotaau in onu bo onu, tuamai mosia in mooyábí. 10Diábí in baragunanea in mogaid kon patong pinomia inta iḷoḷang bo sinumba nobaḻí dewa! 11Totuu, bayongan in intau inta nosumba kon patong in mooyábí. Intau inta nogaid kon patong tua in intaubí doman biasa. Pokisindogaidon in mosia moyotakin; yo notantú bidon kon mosia in moondokbí bo mooyá.
12Mononontaḷ in mogamá kon logam topongkó bo tubáannea dongka tontaḷon in bobibil. Tua in inaidannea takin bayongan in ropot kon inia. Koyogot in mogaid, gogoyon in sia, morogang bo moḷopí.
13Mogogimok kon kayu in mogukur kon kayu. Gambaronnea in kapur onu in aidannea bo kurigonnea in pakakatnea bo aidannea patong in intau inta moḷunat, bo ukatonnea kon bonu in baḷoinea. 14Dika-dika bo kayu inta pinakénea in kayu ḷokuyú, pangkoi in eru andeka pangkoi in terpentin inta pinupuḷnea kon kayuon. Degá nomuḷa doman in sia kon pangkoi in salam, bo nogoḷat kon uyan inta mopobiag. 15-17Tongosilai in pangkoi in kayu tatua pinomia kayu pondungú sin ponayangan bo potubáan kon roti bo pogangagan kon ponoyá, bo mopuasdon in sia. Sia in monayang bo moguman, “O, mopiabí totok bo moanai! Totuu mokosanang in tuḷú tanaa!” Ki agat in kayu tatua in inaidannea patong. Sia in kumudung mosumba bo mosambayang, “Ikobí in ilahku, posaḷamatdon in Akuoi!” 18Totuu mobodok in intau mita ná tatua! Mosia in momilog kon mata bo gina monia dá diá momangaḻe kon onu bo onu. 19Mogogaid kon patong tatua in diábí norai, “Kayu tatua topongkó in sinubáku, bo buingnea in pinakéku pinotubáan kon roti bo pinoangagan kon ponoyá sin kaanonku. Bo kiagat in kayu tatua in inaidanku patong. Dá tanaa akuoi in nosumbabí kon kayu topongkó!”
20Aid natua in notongkaibí in nokaan kon ḷobud. Intau tatua in pinoḷaḻe in raiannea inta bodok, nodapot in sia in diádon kinotuḷungan bui. Sia in diábí mokopongaku kon patong inta kinadaiannea tatua in tongábí pongakaḷ.
Ki Tuhan, Momomaḻí bo mopoposaḷamat
21Ki Tuhan in noguman,
“Toropdon in naa komintan, ei Israel,
sin iko in mogogundoi-Ku.
Akuoi in nomia kon inimu, bo iko in mogogundoi-Ku,
Israel, diábí koḻiongan-Ku in iko!
22Taḷámu in buntunon-Ku naonda bo goḷom,
dosamu in untunon-Ku naonda bo topuot.
Pobuidon mangoi kon i-Nakó,
sin iko in pinoḷuat-Kudon!”
23Porogiowdon moḷunganga, ei ḷangit,
porogiowdon, ei bonu in butá!
Porogiowdon takin ḷunganga in gina, ei buḷud mita!
Natua doman in kayuon bo bayongan in pangkoi in kayu kon bonunea!
Sin ki Tuhan in nopoontongdon in kamuliaan-Nea
pinongin notobut kon Israel umat-Nea.
24Nanaa in guman i Tuhan mopoposaḷamatmu
inta nomia kon inimu pinangkoi kon bonupa in sian,
“Akuoibí in ki Tuhan inta nomia kon bayongan yagi-yagi,
inta tongá aku-akuoi mita in nosongká kon ḷangit,
bo diábí in noduḷu nomaḻí kon butá.
25 #
Kor.1. 1:20
Akuoibí naa inta noḷamboi kon toḻindap in mononoḻindap,
bo inta nopoyambá kon mogogoiní mita.
Tosingogon mita in intau mobijak binayowan-Ku,
kabijaksanaan monia binaḻí-Ku kabodokan.
26Akuoibí in noginrigon kon tosingogon in mogogundoi-Ku,
bo nopobayá in tomayá inta pinoniata in totabá-Ku,
Akuoi in noguman kon Yerusalem in pogutunanbí bui,
bo kotá mita in Yohuda in posindogon-Kubí bui;
rumbunnea mita in buibí tompiaan.
27Akuoibí inta noguman kon apad in dagat: Kogiotdon!
Moibog in Akuoi monggiot kon ongkagmu mita.
28 #
Taw.2. 36:23; Ezr. 1:2 Akuoibí inta noguman kon i Kores,
‘Ikobí inta momarenta sin kopontingan-Ku,
bo mogaid kon bayongan inta kinoibog-Ku.
Parentadon sinbá Yerusalem posindogon bui,
bo Baḷoi Tuhan aidandon in kinodoyonannea.’ ”
လက်ရှိရွေးချယ်ထားမှု
YESAYA 44: INOMOG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Alkitab Singog In Mongondow Masa In Tanaa © Indonesian Bible Society, 2016.