KEJADIAN 30
30
1Tehu Rahel beita bongi anak boen. Hu ndia de, nape'da dalek no ka'an-na, boema nafa'da Yakob nae, “Fe au bongi anak, te metema ta soona, neukose mate au.”
2Yakob namanasa Rahel, de nafa'dan nae, “Manetualain, ta nde au ia fa. Ndia nde ta fe o bongi anak fa.”
3Boema Rahel nae, “Au atang Bilha nde ia; de sungu moon, fo ela ana bongi. No enok ndia, au bisa da'di mama, tunga ndia.” 4Boema, ana fe Bilha neu saon-na, de Yakob sungu no ata ndia. 5Bilha nailu, boema ana bongi anatouk esa. 6Rahel nafa'da nae, “Manetualain naketu basa, fo nok au so. Namanene au huhule-haladoing, de Ana fe au anatouk esa.” Boema ana foi ni'iana ndia na'de Dan. 7Bilha nailu seluk, de ana bongi anatouk esa. 8Rahel nafa'da nae, “Au puselaipana anseli, fo la'ban au ka'ang, de au sengi,” hu ndia de, ana foi ni'iana ndia na'de Naftali. 9Lelek fo Lea name'da, nae ndia ta bisa bongi anak so'on, boema ana fe atan-na, fo nde Zilpa neu Yakob, fo ana da'di saon-na. 10Zilpa bongi anatouk esa. 11Lea nafa'da nae, “Au hapu nanalak,” boema ana foi ni'iana ndia, na'de Gad. 12Boema, Zilpa bongi anatouk esa seluk, 13de Lea nafa'da nae, “Au aua-anale anseli! Besak ia, neukose basa inak-kala lafa'da lae au aua-anale.” Hu ndia de, ana foi ni'iana ndia, na'de Asyer.
14Nai fai ketu-kolu gandum-ma, boema Ruben neu leo mook-ka neu, de ana hapu bubu'u-palusa mo'do-akidook matak esa nai ndia, boema ana ho'i nenin leo inan Lea neu. Boema, Rahel nafa'da Lea nae, “Fe au, o anam-ma neni mo'do-akidook ndia faaanak dei.”
15Lea nataa nae, “O ho'i-ma au saong-nga so, de beita dai fa do? Besak ia, nakalenak o so'ba ho'i-ma mo'do-akidook fo au anang-nga nenik-ka bai.”
Boema Rahel nataa nae, “Metema, o nau fe o anam-ma mo'do-akidoon ndia leo au mai soona, le'odaek ia, o bole sungu moo Yakob.”
16Lelek le'donoso, de Yakob fali ma'in neme mook-ka mai boema, Lea neu soluk-kana, de nafa'dan nae, “Le'odaek ia, sungu moo au, nanahu au bae basa dede'ak ndia, nenik au anang-nga mo'do-akidoon so.” Boema, le'odaek ndia Yakob sungu non.
17Manetualain sipok Lea hule-haladoin, de nailu boema, ana bongi ka lima. 18Lea nafa'da nae, “Manetualain fe au ngga'di so, nana au fe basa Zilpa leo au saong-nga neu so,” hu ndia de, ana foi anan ndia na'de Isakhar. 19Lea nailu seluk, de ana bongi ana ka nee-a. 20Nafa'da nae, “Manetualain fe basa au, bua palsen mana'ahiik nanseli so. Besak ia, au saong-nga neukose ana fe ha'da-holomata neu au, nana au bongi-a, ni'ianatouk 6 so,” hu ndia de, ana foi anan ndia na'de Zebulon. 21Basa ndia boema, Lea bongi anainak esa, de ana foin na'de Dina.
22Boema, Manetualain nafandele neu Rahel; Manetualain sipok hule-haladoin, de Ana fen bongi anak. 23Boema Rahel nailu, de ana bongi anatouk esa. Rahel nafa'da nae, “Manetualain tao namopo au matasi'da-matasaeng so. 24Sa'di leo been-na, Manetualain fe au anatouk esa seluk.” Hu ndia de, ana foi anan ndia na'de Yusuf.
Yakob no Laban lakokolaok
25Rahel bongi basa Yusuf boema, Yakob nafa'da Laban nae, “Po'i au fali leo au nusang-nga u. 26Po'i au la'o, o au saong duas, ma au anang-ngala. Au hapus leme au aue-ale'di fe To'o so. To'o bubuluk, au aue-ale'di puselaipana anseli so.”
27Laban nafa'dan nae, “Mamanene dei: te au hapu hala nafa'da elak, nae hu kande o, de Amak-ka ba'e-pala basa au so. 28Ka'da mafa'da, o moke de'ubee.”
29Boema, Yakob nataa nae, “To'o mesak-kana nde bubuluk, au aue-ale'di puselaipana anseli so, ma To'o bana-manun boetai lamade'uk-ka, nanahu au nde akabobois-sala. 30Au beita mai fa, To'o hata-heton ta ba'uk-ka fa, tehu besak ia, To'o namasu'i so. Manetualain ba'e-pala basa To'o nanahu au. Besak ia fain-na losa, au aue-ale'di fe au teidaleng-ngala mesak-kasa.”
31Laban nae, “Da'di, au muse fe o beek?”
Yakob nataa nae, “Boso fe au hata esa boen. Neukose au foo ahele To'o bana-manun, sa'di To'o nakaheik au nonokeng-nga nde ia: 32Fe au loak nai faik ia, fo au u memete basa To'o bi'ihii bi'ilopon-nala, fo au ho'i-a basa bi'ilopo ana nggeok-kala, ma basa bi'ihii ana keke'ak do kokotok boe. Au ahiik ngga'di-a, nde ndia. 33Nai fai makabuin, no mudak la'i esak-kana, To'o bisa bubuluk, ade au tao tunga ndoon-na so do beik. Metema, To'o mai palisak au ngga'ding-nga, fo To'o nita, hapu bi'ihiik fo, ta kokotok do ta keke'ak do bi'ilopo fo ta nggeok fa soona, neukose To'o bubuluk, mae au amanako bana sila-la so.”
34Boema, Laban nataa nae, “Au akaheik! Neukose ata tao tunga o nonokem ndia!” 35Tehu neu faik ndia boema, Laban ta'daheni basa bi'ihii mane madulak do keke'ak-kala, ma basa bi'ihii ina keke'ak, kokotok do hapu nggelok fulan-na makahatuk; boeo ana ta'daheni basa bi'ilopo nggeok-kala. Basa boema, nadenu anan-na, fo nanea bana sila-la, 36boema ala foo leni bana sila-la leo dook-ka leu, fo sue kande dook-ka neme Yakob mai. La'ok faik telu soona, besak-ka losa mamanak ndia.
Yakob foo Laban bi'ihii bi'ilopo bubuan, fo bei elak-kala.
37Basa boema, Yakob ho'i ai daa maseek, ai ketapang, ma ai berangan-na ndana momo'don-na, de ana siiheni loun beke selik, nalosa ai ndanak sila da'di keke'ak. 38Ana pe'da ai ndanak sila-la, neu bi'ihii bubuak sila-la mamana nininun-nala dalek, nanahu bana sila-la sanga linu soona bi'ihii mane la'bi bi'ihii ina. 39Da'di, metema bi'ihii mane-a, la'bi bi'ihii ina deka no ai ndanak sila-la soona, anan-na madulak, ta soona, keke'ak do kokotok.
40Basa soona, Yakob foo neni bi'ilopo-la leo ndia neu, fo ana fes lasale leo, bi'ihii madulak ma nggeok-kala leu. No enok ndia, ana hapu bana-manu, de ana ta'da henis, leme Laban bana-manun-nala dalek mai.
41Metema, bi'i mane mapukak-kala, ala labi bi'i ina-la soona, Yakob pe'da ai ndanak nanasii louk sila-la deka no bi'i-la, fo nai mamana nininun-nala dalek. 42Tehu ana ta pe'da ai ndanak sila, deka no bana tapandoes-sala fa. Da'di, basa bana fulak sila-la tapandoes, de Laban nuun sila-la, tehu basa bana nggeok, keke'ak ma kokotok sila-la balakaik, de Yakob nuun sila-la. 43No enok ndia de, Yakob namasu'i hatu-hatu. Nanuu bi'ihiik bi'ilopo, onta, keledei ma ata makadotok.
လက်ရှိရွေးချယ်ထားမှု
KEJADIAN 30: twu
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ