Matayo 1
1
1Iki nkyo kitabu kiwore mboni ya ufwari lwa Yesu Kristo. Ye akee mfwari wa Davidi ulya akee mfwari wa Abraamu. 2Abraamu andeira Isaki, Isaki kaira Yakobo. Yakobo kaira Yuda na vanavamae. 3Yuda kaira Peresi na Sara na mae wawo yye Tamari. Peresi kaira Esiromu, Esiromu kaira Aramu. 4Aramu kaira Aminadabu, Aminadabu kaira Naasoni, Naasoni kaira Salimoni. 5Salimoni kaira Boasi, na mae yye Raabu. Boasi kaira Obedi na mae yye Ruti. Obedi kaira Isai. 6Isai kaira mangi Davidi. Davidi kaira Salomon na mae yye nka ulya wa Uria. 7Salomon kaira Roboamu, Roboamu kaira Abia. Abia kaira Asa. 8Asa kaira Yosafati, Yosafati kaira Yoramu, Yoramu kaira Usia. 9Usia kaira Yotamu, Yotamu kaira Ahasi. Ahasi kaira Hesekia. 10Hesekia kaira Manase, Manase kaira Amosi, Amosi kaira Yosia. 11Yosia kaira Yekonia na vanavamae kyeeri kilya vasamiswa vaende Babeli.
12Neeli vandemaa isamisyo kulya Babeli, Yekonia kaira Salitieli, Salitieli kaira Serubabeli. 13Serubabeli kaira Abiudi, Abiudi kaira Eliakimu, Eliakimu kaira Asori. 14Asori kaira Sadoki, Sadoki kaira Akimu, Akimu kaira Eliudi. 15Eliudi kaira Eliasari, Eliasari kaira Matani, Matani kaira Yakobo. 16Yakobo kaira Yosefu akee mmi wa Maria ulya andeira Yesu ito avaangwaa Kristo.
17Kyasia fishuku foose kuuka Abraamu kumande Davidi mfishuku ikumi na fiini. Na kuuka Davidi kumande kyeeri kilya vasamiswa vaende Babeli mfishuku ikumi na fiini. Na kuuka kyeeri kilya kya usami lwa Babeli kumande Kristo mfishuku ikumi na fiini.
18Kyasia iiriwa lya Yesu lyave kuri: Mae wamwi Maria eefingyoo ni Yosefu. Na kitaare veensangyaa andu emwi kamanyika sheeli akufingye kwa finya ya Mumuyo Nsongori. 19Na mmi wamwi Yosefu eekee nndu nsumani nta ikunda insuta kafura inreawo kiteeshiwa. 20Neeli eekusaṛaa kuro, malaika wa Iṛuva kanshea yorień kanumbua: Iwe Yosefu mwana wa Davidi, manya kutaeṛee yalika nka wafo Maria, amu ikufinga lyamwi nkwa finya ya Mumuyo Nsongori. 21Nae airaa mwana wa womi, na irina lyamwi kuvvaangaa Yesu. Amu yye akiṛaa vandu vamwi mareko awo. 22Na kiteveto kikava kuro, naamu kifike kilya kindererwa ni Nndumi na kana ka mwauya kisuku ulya eenumbuaa: 23Lla te sambuṛa ikufingaa na iira mwana wa womi, na irina lyamwi vavvaangaa Imanueli. Nkimwi na: Iṛuva akee neese. 24Neli Yosefu andeokia ruoń, katana sheeli malaika wa Nndumi andemwia. Kaalika nka wamwi. 25Nta ikwania nae, kumande ili andeira mwana wa womi. Kawaanga irina lyamwi Yesu.
လက်ရှိရွေးချယ်ထားမှု
Matayo 1: RWK72
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.