മത്തായി 17
17
ഏസ്സ് ഉരുവ മാറ്‌ന്റാന്
1ആറ് നാള് കളിന്ത പ്‌റ ഏസ്സ് പത്ത്‌റോസുനാമ്, ആക്കോവുനാമ്, അയാള് തമ്പി ഓഗന്നാന്‌നാമ് കൂട്ട്യെ്ഡ്‌ത്ത് ഒന്റു ഉജാന്ത ഗുഡ്ഡേക്ക് പോനാന്. അദ്‌ല് അവാര് തനിഗെ ഇന്താര്. 2ഏസ്സ് അവാര്‌ക്ക് മുന്നുക്കു ഉരുവ മാറ്‌നാന്. ഏസ്സ് മോന്തെ നേരന പാസെ കനകനാത്ത് കത്ത്‌റ്റ്. അയാള് ഉഡുപ്പു പാല്‌ന പാസെ ബെ്ള്ളെബെ്ള്ള്യ ആറ്റ്. 3അന്നാല് താനെ മോസേമ് ഏല്യാവുമു ബെ്ളിപട്ട് ഏസ്സോഡ നായനൊഡിവാദ്‌ന അവാര് കണ്ടാര്.
4അദുക്കുള പത്ത്‌റോസു ഏസ്സ്‌ക്ക്: <<ആണ്ടവാനെ, നമ്മ ഇദ്‌ല് ഇര്‌ക്കുവാദ് എത്ത്‌റാഗോ നല്ലാദ്‌ത്തെ. നിനാക്ക് പിര്യ ഇന്തദാന നാന് ഇദ്‌ല് മൂറു സാളെ ബെക്ക്‌ന്റെ. നിനാക്ക് ഒന്റുമു, മോസേക്ക് ഒന്റുമു, ഏല്യാവുക്കു ഒന്റുമു>> എന്റ് സൊന്നാന്.
5ഇത്തെ പത്ത്‌റോസു സൊല്ലികൊണ്ടു ഇര്‌ക്കാട്ടിതാനെ ബെ്ള്‌സ ദഗദഗാത്ത് എരേവ മഞ്ച് ബന്ത് അവാര്‌ന മൂഡുറ്റു. അയി മഞ്ച്‌ലിന്ത്: <<ഇവാന് എനാക്ക് മെച്ച്‌പ്‌ഡിത്ത മഗാന്. ഇവാന്‌ന എനാക്ക് പിര്യപ്‌ഡിത്ത്‌റ്‌ക്ക്‌ന്റ്. ഇവാന് സൊല്ലുവാദ്‌ന കേ്ള്‌ന്>> എന്റ് ഒന്റു ജദ്ദാമ് ബന്ത്‌ദ്.
6സൊല്ലുപഡി നഡാക്ക്‌ന്റവാര് അദ്‌ന കേ്ട്ട് ഒന്റേപെ്ട്ട് അഞ്ചിക്കെപട്ട് സഡങ്ക ബ്‌ന്താര്. 7ഏസ്സ് അര്‌ഗെ പോയി അവാര്‌ന അണ്ണി: <<ഇ്ളാഗ്‌ന്, അഞ്ചദേന്>> എന്റ് സൊന്നാന്. 8അവാര് അണ്ണാന്ത് നോഡുഗാട്ടി ഏസ്സ്‌നത്തെ കണ്ടാര്. ബേ്റെ ആര്‌നാമ് അവാര് കാണാലെ.
9അവാര് മലേലിന്ത് ഇ്റാഗി ബര്‌ഗാട്ടി ഏസ്സ് അവാര്‌ക്ക്: <<മന്‌സാനായി പ്‌റാന്തവാന് സത്തവാര് പട്ട്‌ലിന്ത് ഉജുര്‌ളാഗമാട്ട്‌ക്ക് ഈ കണ്ടാദ്‌ന പറ്റി ആര്‌ക്ക്‌മ് സൊല്ല ബേ്ഡ>> എന്റ് സൊന്നാന്.
10സൊല്ലുപഡി നഡാക്ക്‌ന്റവാര് ഏസ്സ്‌ന: <<ആന മുദാല് ഏല്യാവുത്തെ ബരുഡൊ എന്റ് ബേദബാത്ത്യനാമ് സൊല്ലുവാദ് എന്ത്‌ക്ക്?>> എന്റ് കേ്ട്ടാര്.
11അദുക്കുള ഏസ്സ്: <<കണ്ടിപ്പായിമ് മുദാല് ഏല്യാവു ബന്ത് എല്ലാ കാര്യഗാള്‌നാമ് മറിസിമ് നലമായി ഗേന്ത് മുഡിക്കുവാന്. 12ആന ഏല്യാവു ബന്താന് എന്റ് നാന് നിമാക്ക് സൊന്റെ. എന്റാല്‌മ് അവാര്‌ക്ക് അയാള്‌ന തെര്യാത്താദ്‌നാലെ തമാക്ക് ഗേയ നെനേത്ത പാസെല്ല അയാള്‌ന ഗേന്ത് തള്ള്‌നാര്. അദേപാസെത്തെ മന്‌സാനായി പ്‌റാന്തവാന്‌മ് അവാര് കയില് കജട്ട പഡുവാന്>> എന്റ് സൊന്നാന്. 13ഏസ്സ് മുളുഗുസുവ ഓഗന്നാന്‌ന പറ്റിത്തെ അവാര്‌ക്ക് സൊന്നാദ് എന്റ് അവാര്‌ക്ക് തെരിന്ത്‌ദ്.
കെ്ട്ടജാദി തട്ടിര്‌ക്കുവ ഒന്റു മഗാന തെ്ള്‌സ്‌ന്റാന്
14ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് ജനകൂട്ട പട്ട്‌ക്ക് ബര്‌ഗാട്ടി ഒന്റൊരുത്താന് ബന്ത് ഏസ്സ് മുന്നുക്കു സന്തൂന്റിന്ത്: 15<<ആണ്ടവാനെ, എന്ന് മഗാന്‌ന സെറ്റെ ഗവപഡുഡോമെ. പക്കിമെ്ട്ട് നോയി തട്ടി ഒന്റൊന്റു ജമ്പ്‌ക്ക് തീക്ക്‌മ് ഒന്റൊന്റു ജമ്പ്‌ക്ക് നീര്‌ക്ക്‌മ് ബീ്ക്ക്‌ന്റ്. അത്തെ അവാന് അപ്പാര കജട്ട പഡ്‌ന്റാന്. 16ഇവാന്‌ന നാന് നിന്ന് സൊല്ലുപഡി നഡാക്ക്‌ന്റവാര് പട്ട്‌ക്ക് എ്ഡ്‌ത്ത് ബന്തെ. ആന അവാര്‌ക്ക് തെ്ളിസ്യ മുഡ്യാലെ>> എന്റ് സൊന്നാന്.
17അദുക്കുള ഏസ്സ് അവാര്‌ക്ക്: <<നമ്പിക്കെ ഇല്ലത്തവാര്‌മ് നേരെമൊറെ പെ്ളേക്കാത്തവാര്‌മ് ആന ഈ കാലാത്ത്‌ല ആള്‌ഗാളെ, നാന് ഇന്നി എഞ്ച് ഗളിഗെ നിമ്മോഡ ഇര്‌ക്കുവെ? നിമാക്ക് നമ്പിക്കെ ഇല്ലാദിര്‌ക്കുവാദ്‌ന നാന് എഞ്ച്‌കെ്ട്ട താങ്കുവെ? അവാന്‌ന ഈങ്ക് എന്ന് പട്ട്‌ക്ക് എ്ഡ്‌ത്ത് ബാന്>> എന്റ് സൊന്നാന്. 18ഏസ്സ് അയി മഗാക്ക് തട്ടിന്ത കെ്ട്ടജാദിന മെ്റ്‌ട്ട്‌നാന്. അയി ജാദി അവാന്‌ന ബ്‌ട്ട് ബെ്ളിഗെ പോറ്റു. അന്നാല് താനെ അയി മഗ തെ്ളിന്താന്.
19പ്‌റ സൊല്ലുപഡി നഡാക്ക്‌ന്റവാര് തമ്മ താനെ ഏസ്സ് പട്ട്‌ക്ക് ബന്ത്: <<എമാക്ക് അയി കെ്ട്ടജാദിന മുഡിക്കി ബ്‌ഡ്യ മുഡ്യാത്താദ് എന്ത്‌ക്ക്?>> എന്റ് കേ്ട്ടാര്.
20<<നിമാക്ക് അരെഗൊറ്യ നമ്പിക്കെ ഇര്‌ക്കുവാദ്‌നാലെത്തെ നിമാക്ക് മുഡിക്ക്യ മുഡ്യാദിന്താദ്. നിമാക്ക് സ്‌ന്ന ഒന്റു കഡ്‌ഗ് ബെദേക്ക് സമ സാമ്യോഡ നമ്പിക്കെ ഇന്തദാന ഈ മലെന: <ഇദ്‌ലിന്ത് അത്തഗ പൊ> എന്റ് സൊന്നദാന അദ് പോമു. നിമാക്ക് ഒന്റുമു മുഡ്യാദാഗമാട്ട എന്റ് നാന് സത്ത്യമായിമ് നിമാക്ക് സൊന്റെ. 21(എന്റാല്‌മ് പരേസനാലേമ് തീനി തിന്നാദെ പരേസുവ പരേസനാലേമല്ലാദെ ഈ ജാദി ജറേന്ത് പോഗമാട്ട#17:21എന്റാല്‌മ് പരേസനാലേമ് തീനി തിന്നാദെ പരേസുവ പരേസനാലേമല്ലാദെ ഈ ജാദി ജറേന്ത് പോഗമാട്ട ഈ സുലാക്ക മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദാത്ത്‌ല് ഇല്ലെ.) എന്റ് നാന് സത്ത്യമായി നിമാക്ക് സൊന്റെ>> എന്റ് ഏസ്സ് സൊന്നാന്.
ഏസ്സ് താന് സാവാദ്‌ന പറ്റി പിന്നേമ് സൊന്റാന്
22പ്‌റ ഏസ്സ് തന്ന് സൊല്ലുപഡി നഡാക്ക്‌ന്റവാരോഡ ഗലീലാക്ക് ബന്ത പ്‌റ അവാര്‌ക്ക്: <<മന്‌സാനായി പ്‌റാന്തവാന്‌ന മന്‌സാര് കയിക്ക് കൊഡുക്ക്യ പക്കായിര്‌ക്ക്‌ന്റ്. 23അവാര് അയാള്‌ന കൊല്ലുവാര്. അദ്‌ക്ക് പ്‌റ മൂറാവാദ് നാള് അയാള് ഉജുര്‌ളാഗുവാന്>> എന്റ് സൊന്നാന്. അവാര് അദ്‌ന കേ്ട്ട് അപ്പാര ദുക്കപട്ടാര്.
ഏസ്സ് സാമിബീ്ഡ്‌ക്കുള്ള ബരിപണ കെ്ട്ട്‌ന്റാന്
24അവാര് കവറ്‌ണഗൂമുക്കു എത്ത്‌ന പ്‌റ സാമിബീ്ഡ്‌ക്കുള്ള ബരിപണ പിരിക്ക്‌ന്റവാര് പത്ത്‌റോസു പട്ട്‌ക്ക് ബന്ത്: <<നിമ്മ് ഗുരുവു സാമിബീ്ഡ്‌ക്കുള്ള ബരിപണ കൊഡുക്കുവാദില്ലേഗ?>> എന്റ് കേ്ട്ടാര്.
25അദുക്കുള പത്ത്‌റോസു <<ഇ്, കൊഡുക്കുന്റാന്>> എന്റ് സൊന്നാന്.
പ്‌റ പത്ത്‌റോസു ബീ്ഡ്‌ക്ക് ബന്ത് എജ്ജ്‌നാദ്‌മ്, മുദാല് ഏസ്സ് അയാള്‌ക്ക്: <<സീമോനെ, നീ എത്തെ നെനേക്ക്‌ന്റായി? ബൂമില രാജാവുഗാള് എല്ലാ ദിന്‌സ്‌ല് കന്ത്യ കെ്ട്ടുവ പണ ആരോഡിന്ത് ബാങ്ക്‌ന്റാര്? മഗാനാരോഡാഗൊ ഇല്ലെ ബേ്റാളോഡഗൊ>> എന്റ് കേ്ള്‌ക്കാട്ടി: 26<<ബേ്റാളോഡിന്ത്>> എന്റ് അയാള് സൊന്നാന്.
ഏസ്സ് അയാള്‌ക്ക്: <<ആന മഗാനാര് അദ്‌ക്ക് എ്ണേഗത്തവാര്‌ത്തേഗൊ? 27എന്റാല്‌മ് നമ്മ അവാര്‌ന മൊനെ പഡ്‌സാദിര്‌ക്ക്യ ബേ്ണ്ടി നീ കഡാല്‌ക്ക് പോയി തൂണ്ട ബ്‌ട്ട് മുദാല് കെ്ഡേക്കുവ മീന്‌ന എ്ഡ്. അയി മീന് ബായി ത്‌റാക്കാട്ടി ഒന്റു പണ ഇര്‌ക്കുവാദ്‌ന കാണുവായി. അദ്‌ന എ്ഡ്‌ത്ത് എനാക്ക്‌മ് നിനാക്ക്‌മ് ബേ്ണ്ടി കന്ത്യ കെ്ട്ട്>> എന്റ് സൊന്നാന്.
လက်ရှိရွေးချယ်ထားမှု
മത്തായി 17: സാമി സേദി
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Life Computer Institute