മത്തായി 19
19
ആളാന്‌പെ്ണ്ട് പ്‌റ്‌വാദ്‌ന പറ്റി
1ഇദെല്ല സൊല്ലി തീന്ത പ്‌റ ഏസ്സ് ഗലീലാലിന്ത് ഓറ്‌ദ്ദാന് ബാനിക്ക് അക്കരെ ഇര്‌ക്കുവ എഗുദ നാഡ് സാരി പോനാന്. 2ദൊഡ്ഡ ഒന്റു ജനകൂട്ട ഏസ്സ് പിന്ന്‌ക്ക് പോനാര്. അവാര് കൂട്ടാത്ത്‌ലിന്ത നോയിഗാറാര്‌ന ഒട്ടുക്കു ഏസ്സ് തെ്ള്‌സ്‌നാന്.
3ലേസ പരിസാര് അയാള് പട്ട്‌ക്ക് ബന്ത്: <<ഏദൊന്റു കാര്യന സൊല്ലി ഒരുത്താന് തന്ന് പെ്ണ്ട്‌ന ബ്‌ഡുവാദ് എഗുദാര് സട്ടപഡി നായഗ?>> എന്റ് അയാള്‌ന സിക്ക്‌സ്യ ബേ്ണ്ടി കേ്ട്ടാര്.
4അദുക്കുള ഏസ്സ്: <<ദ്‌ട്ട്‌സ്‌നവാന് ആദില് അവാര്‌ന <ഗണ്ട്‌മ് പെ്ണ്ണ്‌മ് ആയി ദ്‌ട്ട്‌സ്‌നാന്>#ഉറുപത്തി 1:27 എന്റ് സാമി സൊല്ലുസുലാക്കാത്ത്‌ല് നിമ്മ പഡിത്ത് നോഡാലേഗ? 5<അദ്‌നാലെ മന്‌സാന് അപ്പാന്‌നാമ് അവ്വെനാമ് പ്‌റ്‌ന്ത് പെ്ണ്ടോഡ എജേവാന്. അത്തെ അവാര് റാഡാള്‌മ് ഒന്റാവാര്>#ഉറുപത്തി 2:24 എന്റ്‌മ് സൊല്ലിര്‌ക്ക്‌ന്റാന്. 6അദ്‌നാലെ അവാര് ഇന്നി റാഡല്ല, ഒന്റുത്തെ. സാമി ഒന്റായി സേത്ത്‌നാദ്‌ന മന്‌സാന് പ്‌റ്‌ക്ക ബേ്ഡ>> എന്റ് സൊന്നാന്.
7അവാര് അയാള്‌ന: <<ആളാന്‌പെ്ണ്ട് പ്‌റ്‌ന്റേമ് എന്റ് എ്ള്‌ദികൊഡുത്തു അവാള്‌ന ബ്‌ഡ്യ മോസെ സൊന്നാദ് എന്ത്‌ക്ക്?>> എന്റ് കേ്ട്ടാര്.
8അദ്‌ക്ക് ഏസ്സ് അവാര്‌ക്ക്: <<നിമാക്കിര്‌ക്കുവ മരനെഞ്ച്‌ന നെനേത്ത്‌ത്തെ പെ്ണ്ടച്ച്യാമ്‌ന ബ്‌ഡ്യ മോസെ സൊന്നാദ്. ആന ആദി കാലാത്ത്‌ലിന്തേ അത്തെ ഇല്ലാദിന്ത്‌ദ്. 9നാന് നിമാക്ക് സൊല്ലുവാദ് എന്തെന്റ് സൊന്ന, ബേസ്യാഡി നഡാക്ക്‌ന്റവാളാനത്തെ പെ്ണ്ട്‌ന ബ്‌ഡ്‌ഡൊ. അല്ലാദെ പെ്ണ്ട്‌ന ബ്‌ട്ട് ബേ്റൊന്റൊരുത്തിന എ്ഡ്‌ക്ക്‌ന്റവാന് ബേസ്യാഡി നഡാക്ക്‌ന്റാന്>> എന്റ് സൊന്നാന്.
10സൊല്ലുപഡി നഡാക്ക്‌ന്റവാര് ഏസ്സ്‌ക്ക്: <<ആള്‌ന്‌പെ്ണ്ട്‌കുള്ളുക്കു ഇത്തവ ദിന്‌സ് സട്ടഗാള് ഇന്തദാന പെ്ണ്ണെ്ഡ്‌ക്കാദെ ഇര്‌ക്കുവാദ്‌ത്തെ നല്ലാദ്>> എന്റ് സൊന്നാര്.
11ഏസ്സ് അവാര്‌ക്ക്: <<ഇദ് എല്ലാവാര്‌ക്ക് നെപ്പ്‌കെ്ഡേക്കുവാദില്ലെ. ആന സാമി ആര്‌ക്കെല്ല ഇദ്‌ന നെപ്പ്‌കെ്ഡേസ്യ കയിതാങ്ക്‌ന്റാനൊ അവാര്‌ക്ക് ഇദ് നെപ്പ്‌കെ്ഡേക്ക്‌മ്. 12ഗണ്ടാള്‌ഗാള് പെ്ണ്ണെ്ഡ്‌ക്കാദെ ഇര്‌ക്ക്യ പല കാര്യഗാള്‌മ് ഇര്‌ക്ക്‌ന്റ്. അവ്വെ ബേ്റ്‌ലിന്ത് പെ്ണ്ട്‌രിപെ്ണ്യാനായി പ്‌റാന്തവാര് ഇര്‌ക്ക്‌ന്റാര്. ആള്‌ഗാള് പെ്ണ്ട്‌രിപെ്ണ്യാന് മാഡ്‌നവാര്‌മ് ഇര്‌ക്ക്‌ന്റാര്. സാമി ആളുവ കാലാക്ക് ബേ്ണ്ടി പെ്ണ്ണെ്ഡ്‌ക്കാദിര്‌ക്കുഡൊ എന്റ് മുഡിവെ്ഡ്‌ത്തവാര്‌മ് ഇര്‌ക്ക്‌ന്റാര്. ഇദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് കേ്ള്‌ക്കുഡൊ>> എന്റ് സൊന്നാന്.
ഏസ്സ് മക്കാള്‌ഗാള്‌ക്ക് ബര കൊഡുക്കുന്റാന്
13ലേസ ആള്‌ഗാള് മക്കാള്‌ഗാള്‌ന കയി ബെത്ത് പരേസി ബ്‌ഡ്യ ഏസ്സ് പട്ട്‌ക്ക് എ്ഡ്‌ത്ത് ബന്താര്. ആന സൊല്ലുപഡി നഡാക്ക്‌ന്റവാര് അവാര്‌ന നൊഡിന്താര്.
14ആന ഏസ്സ്: <<മക്കാള്‌ഗാള്‌ന എന്ന് പട്ട്‌ക്ക് എ്ഡ്‌ത്ത് ബര്യ ബ്‌ഡ്‌ന്. അവാര്‌ന തഡ്‌ക്കാദേന്. എന്ത്‌ക്കെന്റ് സൊന്ന ഇവാര്‌ന പാസെ ഇര്‌ക്ക്‌ന്റവാര്‌നാത്തെ സാമി ആളുവാദ്>> എന്റ് സൊന്നാന്. 15അത്തെ ഏസ്സ് മക്കാള്‌ഗാള്‌ക്ക് കയി ബെത്ത് പരേസി ബ്‌ട്ടാന്. പ്‌റ അദ്‌ലിന്ത് പോനാന്.
ഒന്റു ബാലിവെ പണഗാറാന്
16അദ്‌ക്ക് പ്‌റ ഒന്റൊരുത്താന് ബന്ത് ഏസ്സ്‌ക്ക്: <<ഗുരുവെ, എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കെ്ഡേസ്യ നാന് എന്ത് നല്ല കാര്യ ഗേയ?>> എന്റ് കേ്ട്ടാന്.
17അദ്‌ക്ക് ഏസ്സ്: <<നല്ലാദ് എന്ത് എന്റ് നീ എനാന കേ്ള്‌ക്കുവാദ് എന്ത്‌ക്ക്? നല്ലവാന് ഒരുത്താന്‌ത്തെ. എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കെ്ഡേസ്യ നീ ആസെപഡുവദാന സാമി ബെത്ത സട്ടപഡി നഡ>> എന്റ് സൊന്നാന്.
18അദ്‌ക്ക് അയാള്: <<ഏദ് സട്ടഗാള്?>> എന്റ് ഏസ്സ്‌ന കേ്ട്ടാന്.
അദുക്കുള ഏസ്സ്: << <കൊലെഗേഗ ബേ്ഡ, ബേസ്യാഡ ബേ്ഡ, ത്‌റ്‌ഡ ബേ്ഡ, കുറ്റഗാറാര് അല്ലത്തവാര്‌ന കുറ്റഗാറാര് എന്റ് സൊല്ല ബേ്ഡ, 19നിമ്മ് അവ്വ്യപ്പാന്‌ന മദ്‌സുഡൊ>#പയണ 20:12–16; മറിസി സൊല്ലുവ സട്ട 5:16–20 എന്റ്‌മ് <നിമാന സീവാന്‌ബെത്ത് നഡാക്കുവ പാസെത്തെ അഡ്‌ത്തവാര്‌നാമ് സീവാന്‌ബെത്ത് നഡാക്കുഡൊ>#ലേവ്യാര് 19:18 എന്റ്‌മ് ഇര്‌ക്കുവ ഈ സട്ടഗാള്‌ത്തെ>> എന്റ് സൊന്നാന്.
20അദ്‌ക്ക് അയി ബാലിവെഗാറാന്: <<ഈ സട്ടഗാളെല്ല നാന് ഗേന്ത് ബന്റെ, ഇന്നി എനാക്ക് എന്ത് കൊറേവു ഇര്‌ക്ക്‌ന്റ്?>> എന്റ് ഏസ്സ്‌ന കേ്ട്ടാന്.
21അദുക്കുള ഏസ്സ് അയാള്‌ക്ക്: <<എല്ലാ നല്ല ഗുണഗാള്‌മ് തുമ്പുനവാന് ആയിര്‌ക്ക്യ ആസെപഡുവദാന നീ പോയി നിനാക്ക് ഇര്‌ക്കുവാദ്‌ന ഒട്ടുക്കു ബിറ്റ്, പണാന ഒന്റുമില്ലാത്തവാര്‌ക്ക് ദാന ഗേഡൊ. അന്നാപ്പ് മേലോഗാത്ത്‌ല് നിനാക്ക് സൊത്തു കെ്ഡേക്കുവു. പ്‌റ എന്ന് പിന്ന്‌ക്ക് ബാ>> എന്റ് സൊന്നാന്.
22അയി ബാലിവെഗാറാന് ദൊഡ്ഡ പണഗാറാന് ആയിന്താദ്‌നാലെ ഇദ്‌ന കേ്ട്ട് ദുക്കപട്ട് പോനാന്.
23പ്‌റ ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക്: <<സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് ഒന്റു പണഗാറാന്‌ക്ക് സെറ്റെ കഡ്‌പ്പാത്തെ എന്റ് നാന് സത്ത്യമായിമ് നിമാക്ക് സൊന്റെ. 24ഒന്റു പണഗാറാന് സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് സെറ്റെ കഡ്‌പ്പാത്തെ. അദ്‌ന ബ്‌ഡ സൂഞ്ചി ഓട്ടെ മേലെ ഒന്റു ഒട്ടഗ നൊഗേവാദ് എത്ത്‌റാഗോ എ്ള്‌പ്പ എന്റ് നാന് പിന്നേമ് നിമാക്ക് സൊന്റെ>> എന്റ് സൊന്നാന്.
25അദ്‌ന കേ്ട്ട് സൊല്ലുപഡി നഡാക്ക്‌ന്റവാര് ഒന്റേപെ്ട്ട് അദിസ്യപട്ട്: <<അത്ത്യാന ആര്‌ക്ക് തപ്പിസി കഡാക്ക്യ മുഡിമ്?>> എന്റ് ഏസ്സ്‌ന കേ്ട്ടാര്.
26ഏസ്സ് അവാര്‌ന നോഡി: <<മന്‌സാന്‌ക്ക് അദ് മുഡ്യാമാട്ട. ആന സാമിക്ക് എല്ലാമ് ഗേയ മുഡിവു>> എന്റ് സൊന്നാന്.
27അദുക്കുള പത്ത്‌റോസു ഏസ്സ്‌ക്ക്: <<എമാക്ക് ഇര്‌ക്കുവാദ്‌ന ഒട്ടുക്കു ബ്‌ട്ട് എമ്മ നിന്ന് പിന്ന്‌മേലെ ബന്ത്‌റ്‌ന്റേമ്. അന്നാപ്പ് എമാക്ക് എന്ത് കെ്ഡേക്ക്‌മ്?>> എന്റ് കേ്ട്ടാന്.
28അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<സാമി എല്ലാദ്‌നാമ് പുദ്യാദ് മാഡ്‌ഗാട്ടി മന്‌സാനായി പ്‌റാന്തവാന് തന്ന് മദ്‌പ്പുള്ള കുറുഞ്ചില് കുക്കാന്ത് ആള്‌ഗാട്ടി എന്ന് പിന്ന്‌മേലെ ബന്ത്‌റ്‌ക്കുവ നിമ്മാമ് പന്നന്റ് കുറിഞ്ചില് കുക്കാന്ത് ഇസ്‌റവേല്‌ല പന്നന്റ് കുലഗാറാര്‌ന ആളുവുറു എന്റ് നാന് നിമാക്ക് സത്ത്യമായിമ് സൊന്റെ. 29എനാക്ക് ബേ്ണ്ടി സൊന്ത കാഡ്‌ബീ്ഡ്‌നാഗോ, അണ്ണാര്‌തമ്പ്യാര്‌നാഗോ, അക്ക്യാര്‌തങ്ക്യാര്‌നാഗോ, അവ്വ്യപ്പാന്‌നാഗോ, മക്കാള്‌നഗൊ ബ്‌ട്ട്‌തള്ള്‌നവാര്‌ക്ക് ബ്‌ട്ട്‌തള്ള്‌നാദ്‌ന ബ്‌ഡ ഇദ്‌ഗാളെല്ല അളാവുക്കു മീ്റി കെ്ഡേക്ക്‌മ്. അദ്‌താനേമല്ല എന്നാല്‌ക്ക്‌മ് ഇര്‌ക്കുവ പെ്ളേപ്പ്‌മ് കെ്ഡേക്ക്‌മ്. 30ആന ഇന്നാല് ഉജാന്ത്‌റ്‌ന്റവാര്‌ല് പല ആള്‌ഗാള്‌മ് താന്തവാര് ആവാര്, ഇന്നാല് താന്ത്‌റ്‌ന്റവാര്‌ല് പല ആള്‌ഗാള്‌മ് ഉജാന്തവാര് ആവാര്.>>
လက်ရှိရွေးချယ်ထားမှု
മത്തായി 19: സാമി സേദി
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
New Life Computer Institute