Njɔyn 15
15
Njisə̀s nyi kàyntè ə̀ fèkàʼ fetwɔmfe
1Njisə̀s ə tè pì nə, “M nyi kàyntə̀ fèkàʼ fə etwɔmfe, Pɨ̀a vɨmve nyi pɛ̀ àfùʼ. 2È tsɔynə màʼa nâʼàpî ngɔyn èkè ə Mì ewìyn zɛ ə è muə va twɔmve, fɨnə chɔʼtə̂ tsɨsə̀ sèngɔyn sɛ ə se muə va twɔmve, kə fə zo kɛsə̂ muə ètwɔm etsɨəve 3Ghàyn kàyne nyi ndò ezoze kûmə̀ èzaʼlê zɛ ə m zaʼlə sê ghàyn. 4Ghàyn e nyi ke sê Mi, kə mə pɔŋ nyi ke sê ghàyn. Twɔmve vayn tsɨ̀ynə muə ngɔyn ə fèkàʼ sə vəyn və ngɨŋ, ve kaʼa ve nəyn ke zɨnə mə ezhoghɛ ve faŋ ə fekàʼ. Ngɔnə̀ fèkàʼ vayn mu etwɔm sə zə̂ynzè ə ngɨŋ ə̀ tsɛ̂ kə va mə è zə zùŋ ə nyìə fèkàʼ. E nyi kepî èghɨ nə ghàyn vayn mu etwɔm ə̀ tsɛ̂ kə va mə ghàyn zùŋ ə mì ewìyn.
5M nyi fekâʼ, ghàyn nyi sèngɔyn. Ghɨ ghɛ ə faŋ ə mì ewìyn, mə faŋə sê ghənə, tə muə ètwɔm ve tsɨ̂ə kə nyi. Ə va mi, ghàyn vayn kàʼa nəyn ghɛ zhîze. 6Ghɨ ghɛ ə tàʼa faŋə kə Mì ewìyn, ə nə nji tsɨsè ghənə kə ngɔ̂nə̀ fèkàʼ. Ə ngɔyn ə̀təyn ə nyi tsɛ ke mə è zə zom. Ə komtə̂ ekyì ə sengɔyn nə sɨ̂nə̀ mə ə màʼà ndzɨsə̂ ewùs, elùʼ vɛ ə se nə pɛ. 7Ə ghàyn faŋ ke ə mi ewìyn, ə zaʼlê zɨmze ə pɔŋ nyi sê ghàyn, ghàyn ə pfɨfə pî ghè, ə ghàyn kyi. 8Ə nə̀ fe èpomsê ə Pɨ̀a vɨ̂mzè ə ghàyn mu twɔmve setsɨ̀. Ə zɨnə mə nəyn ə ghà ə nyi sèchùmtè èpàm sɨmse. 9M nyiə kɔ̂ŋɔ̀ ghàyn kè eghɨ kə Pɨ̀a vɨm kɔ̀ŋɔ̀ Mi. E za nyi nə ghàyn kyi se faŋə kə sê Mi, kə mə pa kɔ̂ŋɔ̀ ghàyn. 10Ə ghàyn ndə̀mə̀ lwɔ̂ŋ vɨmve, M mə pa kɔ̂ŋɔ̀ kə ndò ghàyn. E nyi kepî èghɨ kə M ndəmə̀ lwɔ̂ŋ ə Pɨ̀a vɨ̂mvè, è pa kɔ̂ŋɔ̀ kə ndò Mi.
11M tsâ ə̀ghɛ nə ghɨ̂yn sê ghàyn kə ghàyn ə kyi kepî esaŋnê zɛ ə M kyi, ə nyi esaŋnê mə ze ə lwiyn kwəyn. 12Ə kɨnə nyi alâŋ kɨma nə, ghàyn kɔŋ ngɨŋ saynse kèpi kə m kɔ̂ŋɔ̀ ghàyn. 13Kɔ̂ŋ engaŋtə zɛ ə ghàyn kàʼa kyi sê soyn saynse nyi nə ghàyn kwu ə ghənə elùʼ. 14Ə ghàyn ə nyi sèsoyn sɨmse ə ghàyn nə̀ ghɛ ghɛ m tsâ sê ghàyn. 15M fɨnə tɔŋtə̂ va ghàyn zôyn nə ghɨ efɨaʼaghe kûmə̀ nə wùə èfɨ̀aʼa ke va ghɛ zɛ ə Pɛ̀ èfɨaʼ ə vəyn nə̂. M pɨlə tɔŋtə̂ ghàyn zôyn nə soyn sɨmse kûmə̀ nə mə tsàyn ghɛ ghɛ Pɨ̀a vɨ̂m tsàyn sê Mi nâʼà ə̀kɨ̂m sê ghàyn. 16Ghàyn tè pâʼà chɔʼ Mi, ə̀ tè chɔʼ Mi ghàyn ə tomə ghàyn nə ghàyn nəyn ghɛ ghɛ ə ghe muə twɔm echûŋvè. Kyì tə ghɛ nə tɨnə mə ə ndam faŋ ke ndò. Ə ghàyn nə̀yn zamə, ə Pɨ̀a vɨm fo nâʼàpî ghè vɛ ə ghàyn pfɨfə sê vəyn tɔynə̂ ə mì ezə. 17Ə kɨnə nyi alâŋ kɨma nə, ghàyn kɔŋ ngɨŋ saynse.”
Njisə̀s ə tsàyn nə mbi panə̀ sèchùmtè èpàm sə vəynse
18Njisə̀s ə fɨnə pîə sê chùmtè èpàm sə vəynse nə, “Ə mbi panə̀ ghàyn, ghàyn ə kê nə ə̀ nyi Mi kə tè pàyn sə shi. 19Ə ghàyn fè nyi kə əghɨ mbiə mə ghənə kɔ̂ŋɔ̀ ndò ghàyn kə ghɨə ghənə̂ghè. Ə̀ zo se nyi mə mə tə chitê fɨse ghàyn ə mbi, ghàyn e sè fɨyn va ə̀ghɨə mbiə. Ə̀ za nyi eghɛ zɛ ə ghɨ mbiə panə̀ ghàyn sətəyn. 20Kə ghàyn tə lɛse èghɛ zɛ ə m tè zaʼle sê ghàyn nə, ‘Wùə èfɨ̀aʼa pâʼà tyəmə̂ tsɛ̂ pɛ̀ èfɨ̀aʼ ə̀ vəyn.’ Ə nyi mə ə tə tsə̀fsè mi, ə nə tsə̂fsè kepî ghàyn zâ. Ə nyi mə ə tè zɨte zaʼlê zɨmze, ə nə pɔŋ zɨte zaynze. 21Ə nə nə̂ ə̀ghɛ nə ghɨ̂yn sê ghàyn nâʼà ə̀kɨ̂m ə Mì ezə, kûmə̀ nə ghənə ke va wùə vɛ ə è tom Mi. 22Ə M tè tàʼa pə̀yn se wàmnè sê ghənə kûmə̀ sèpi sə ghənə̂sè mə ze tyə̀nə̀ va nə ghənə ə nə̀yn pi kə ze tyə̂nə̀ zôyn. Ghənə fɨyn kyi va ghɛ zhîze zôyn se pì kûmə̀ sèpi sə ghənə̂sè. 23Ə̀ pànə̀ pîndè mi, ə è və panə̀ kəpî pɨ̀a vɨ̂mvè. 24Ə̂ tè nyi nə m paʼà nə̀yn ghɛ nə ghɨ̂yn ə ghənə əfètəyn, ndɔ̀ʼɔ wùə tyəm nəyn, mə ze tyə̀nə̀ va nə ghənə ə nə̀yn pi kə ze tyə̀nə̀ zôyn. Ə̀ zô sè nyi mə ghənə ə fe ghɛ əkayntə nə ghɨ̂yn pîza fɨnə pànə̀ kə ndò mi, è kɨsè Pɨ̀a vɨm. 25Zɨnə tè kyi se kyàyn endom kə ghɛ zɛ ə tè nyàʼ ə ghənə alàŋ pəyn səmɔʼ nə, ‘Ə tè pàyn kê Mi sə ndô.
26Tsàmtè nə̀ ndô pə̂ se Pɨ̀a. È nyi Sezuʼ sɛ ə se nə̀ nə̂ nə ghɨghe ə ke səmɔʼ. Kə M nə nə mə nyi ghâsè Pɨ̀a, M nə tomə vəyn sê ghàyn, ə nyi vəyn vɛ è nə tsâ ghɛ sê ghàyn kûmə̀ Mi. 27Ghàyn nə̀ nə̂ ə pɔŋɔ wàmnə̀ kə səmɔʼ sê ghɨ kûmə̀ mi kûmə̀ nə ghàyn tè nyi ghâsènì, ə zhə̀te.”
လက်ရှိရွေးချယ်ထားမှု
Njɔyn 15: bfm
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ