Njɔyn 7
7
Ghɔ nyiə Njisə̀sghè ə pɔŋ tə nə ə pomə̂ va sê vəyn
1Epàm əghɛ ghɨ̀nə̀ ə̀kɨ̂m, Njisə̀s e sè kwîə ka ə telùʼ ə telùʼ apàs endaʼa Ngalìlîkè, kɔ̀ŋɔ̀ va se kwiə ndu apàs endaʼa Njòdyâkè, kûmə̀ nə ghɨə Njûsə̀ fu tè kyiŋə se zhwiə Vəyn. 2Shîŋə zhiə nə Mpfɨ̀ə əghɨ̀ Njûskè tè se paʼsə̂ pə ndò. 3Ghɔnyiə Njisə̀sghè ə pìə sê vəyn nə, “Zà luʼ vɨ̂yn ə ndù apàs endaʼ ə Njòdyâkè kə ghɨ ghɛ ə chûmtə̀ ghò fe ghɛ ə kayntə ghɛ ə Ò nə̂. 4Ghɨə ndətə̀ va ghɛ zɛ ə ghənə nə̂ ezhoghɛ ghənə kɔ̂ŋə̀ nə fɛtê ke ghənə. Zôyn kə Ò sè nə̂ ghɛ ghɨ̀nə̀, e tsɔ̂fə̀ nə Ò nəyn ə mbi èkɨ̂m ə ke Gho.” 5(Kè nâʼà ə̀ ghɔnyìə Njisə̀sghè tè paʼà pomə̂ se Vəyn.)
6Njisə̀s ə ke pì sê ghənə nə, “Shîŋə̀ kɨmke paʼà nyìəm kwəyn. Ə̀ nyi sê ghàyn, shîŋə̀ kaynke nyi ke shîŋə̀ tekɨ̂m. 7Ghɨə mbighe vayn kaʼa payn ghàyn, pîza panə̀ Mi kûmə̀ nə M tyə̀nə̀ paynsə̂ tèndom tə ghɛ ə pi ə ghənə̂tè. 8Ghàyn ndu elùʼ azhi nə vɛ. M ndùə va zôyn kûmə̀ nə shîŋə̀ Kɨmke pâʼà nyìəm kwəyn.” 9È və wàmnə̀ nyi ə faŋə kə ə Ngalìlî.
Njisə̀s ə ndù elùʼ azhi Mpfɨ̀əkè ə Njèlusalɛ̀m
10Epàm ashìŋə̀ nə kɛ, kə ghɔnyìə Njisə̀sghè ndù elùʼ azhi Mpfɨ̀ə nə kɛ, È və pɔŋɔ ndûə. È tè paʼà ndù chi ə ndayn, pîza ə nyaʼtə̂ ndûə endom vîve ghɨghe ke pî va nə ə̀ nyi Vəyn. 11Ghɨ ghaʼa ə Njûsə̀ tè nyîə kyiŋə vəyn fu elùʼ azhi pfɨfə nə, “È vàyn zə?”
12Ə̀ tè nyîə tsɨ̂mtə̀ wâmnə̀ kûmə̀ Vəyn nâʼà sə ŋaŋ ə fètə̂ ànɔ̀yn. Yîghe pîə nə, “È nyi ke nâʼà wùə èchùŋ.” Yîghe pîə nə, “Ngaŋ, È kwìə lesə̂ kə əghɨ səndô.” 13Pîza wùə vîvè e wâmnə̀ va kûmə̀ vəyn ə ndayn, kûmə̀ nə ghənə tè fànə ə ghɨ ghaʼa ə Njûsə̀.
14Ə zhiə tə̂mnə̀ èzhi ətəyn, Njisə̀s ə njiə ndûə ə Ndɛ Ètsə̀mə, sè zaʼlə̂ ə̀ghɨ fu. 15Ghɨ ghaʼâ Njûsə̀ tè nyi èkaynze ə pìə nə, “Wùə vɨ̀nə kwì zayn sə ngəsê ke ə̀ghɛ ghɨ̀yn mə è paʼà tyəmə ndùə ə ndɛ ŋwàʼlè àlâŋ ə?”
16Njisə̀s ə pə̀ynsə̀ nə, “Ghɛ zɛ M zaʼlə vachi Zɨm nə ezaʼlê, pîza ze pə̂ se Zhə̀ Fɛ Fe tom mi. 17Ə̂ nyì pîndè èpɨaʼtêzè se nə̀yn eghɛ zɛ ə Zhə̀fè kyiŋə, ə è və ke nə ghɛ zɛ M zaʼlə ndo se Zhə̀fè mə sè Mìə, mə M wamnə̀ sə Mì atyaʼa? 18Ghɨ ghɛ ə mômsə̀ sə̂ wâmnə̀ ə ghənə atyaʼ nyîə mômsə̀ se kyî epomsê se ngɨŋ sə ghənə̂sè. Pîza vɛ ə è kyiŋə pomsêzè se vɛ ə è tom vəyn nyîə nyi səmɔʼ, mə ghɛ zhîze va ə nyi akaŋ kûmə̀ vəyn. 19Mosîs ə tə fo Lâŋkè sê ghàyn, mə è tè paʼà fo? Pîza kè nâʼà wùə èmɔ̀ʼ ə ghàyn əfètəyn ə tàʼa ndə̀m ə kəynke. Kûmə̀ ghè ə ghàyn mɔ̀msə̀ se zhwiə mi ə?”
20Nɔ̂yn ətəynke ə pə̀ynsə̀ Vəyn nə, “Ò nyîə kyi èpamə̂ ə satàynzè ə ghò ewìyn! Ə̀ kyiŋə ndè se zhwiə ghò ə?”
21Njisə̀s ə pə̀ynsə̀ nə, “M tè nəyn eghɛ ekaynəze emɔ̀ʼ, ghàyn əkɨ̂m e nyi èkayn. 22Mosîs ə tə fo Lâŋə̀ nə ghàyn ə pîə vâyn èndômə̀, ghàyn ə se ə̀nam ə vəynghe, (nâʼàpî kə ze nyi nə ə̀ tè paʼà zhə̀tè Mosîs lâŋ ətəynke, pîza ə̀ tè zhə̀te ə pɨ̀a ə pɨ̀a ghaynghe.) Pîza ghàyn e sè koytə̂ pîə etuʼ endaʼ se kəndò. 23Ə se nam ə wùə ndomə̀ etuʼ endaʼ endom se tàʼa kəm alâŋ Mosîskè, kûmə̀ ghè ə ghàyn nyɔ̀ʼsə̀ tɔŋ sê Mi kûmə̀ nə m tsuʼ wùə etuʼ endaʼ è ve tɛ? 24Kə ghàyn ə saʼa ghɨ kè kûmə̀ ə̀ghɛ ghɛ ə ghàyn naynə ndûə fe əpɨəyn, Ghàyn e saʼa endom səmɔʼ.”
Ghɨ pfɨfə nə Njisə̀s nyi vɛ ə chɔʼ ndə̂m mə
25Ghɨ ə Njèlusalɛ̀m yîghe ə pìə nə, “Ə̀ vɨ̀nə va wùə vɛ ə ghɨ ghaʼlə̂ kyiŋə se zhwi ə? 26Nayne kə! È wàmnə̀ ə fètə̂ ghɨ̀, ghɨə ghaʼlə̂ ətəynghe pîə va ghɛ zhize sê Vəyn! Ze kaʼa zə nyi nə ghənə lote ke ndò nə È nyi vɛ ə chɔʼ ndə̂m mə ə? 27Pîza shîŋə̀ kɛ vɛ ə chɔʼ ndə̂m tə pə̂, ə wùə vîvè ə ke va luʼ vɛ ə è ndò ətəyn. Ghâsènì əkɨ̂m ke ndô luʼ vɛ ə wùə vɨ̀nə ndò ətəyn.”
28Kə Njisə̀s tè zaʼlə ə Ndɛ Ètsə̀mə, ə pìə è kyə̀ è tɛ nə, “Ghàyn lote ke ndò Mi è luʼ vɛ ə M ndô ə tə? M pâʼà pə̀yn fayn sə Mìə atyaʼa ngɨŋke. Vɛ ə è tom Mi, nyi ke səmɔʼ. Ghàyn ke va vəyn. 29Pîza M ke vəyn, kûmə̀ nə M ndo pə̂yn se Vəyn, ə̀ nyi Vəyn vɛ ə È tom Mi.”
30Ghənə e sè kyiŋə se kyîə Vəyn, pîza wùə vîvè ə tàʼa mɔ̀mə Vəyn è ghoke kûmə̀ nə shîŋə̀ Vəynke tè nyi mə ke paʼà nyìəm kwəyn. 31Pîza, ghɨghe setsɨ̀ ə fètə̂ ànɔ̀yn ə pomə̂ Vəyn. Ghənə tè pîə nə, “Shîŋə̀ kɛ ə vɛ ə chɔʼ ndə̂m tə pə̂, è tə nə̂ ndò ghɛ ekayntə ghe tsɨ̂ə tsɛ̂ kə wùə vɨ̀nə nyi mə è və nə̀yn ə?”
Ghɨə Falàsî ghə tom ghɨ fɨaʼa nə ndu kyî Njisə̀s
32Ghɨə Falàsîə tè zɨ kə ghɨ tè tsɨ̀mtə pîə ə̀ghɛ nə ghɨnə kûmə̀ Njisə̀s. Ghənə è ghɨ kɔʼsə nə eshyə̀ ngaŋtə ndɛ̂ ètsə̀mə ə tomə ə̀ghɨ ə fɨaʼa nə ə ndu kyî Vəyn. 33Njisə̀s ə pìə sê ghənə nə, “M pa nyi ghâsènì kè sə fendiŋə̀ fə ashìŋə̀fè nyi, ə M kɛse ndu se vɛ ə è tom Mi. 34Epàm ətəyn ə ghàyn ə kyiŋə Mi, fɨnə fe va Mi, mə luʼ vɛ M nyi ətəyn, ghàyn vayn kàʼa ghàyn pəyn fɨ fu.”
35Ghɨ Njûs eghaʼâ e sè pîə se ngɨŋ sə ghənə̂sè nə, “È kyiŋə se ndù nâʼà ghayn nə ghâsènì nə̂ tàʼa fɨnə fe və ə? È kyiŋə se ndù endaʼ ə ghɨ ə Nglêk zɛ ə ghɨ ghasènìghe ndamə ətəyn se zaʼlê ə ghɨə Nglekghè mə? 36È pi nə ghâsènì nə̀ nə̂ ə kyiŋə Vəyn, pîza fe va è kɨsè nə ghâsènì vayn kaʼa ndu elùʼ vɛ ə È nə̀ nə̂ ə È və nyi ətəyn. È tyə̂nə̀ nə ghe famə ewàmnè ə?”
Tso sɛ ə se fo ndamze
37Ə tè nyi etuʼ azhi ə kwuŋsəke, mə za nyi nâʼà etuʼe kɔʼnəve, Njisə̀s ə ndwìə tyəmə ə pìə è kyə̀ ètɛ nə, “Ə pfɨ̀ŋ m̀mò zuʼsə nâʼàpî ndè è və pə̀ sê Mi kə M fo môm, ə è mɨ. 38‘Ə pomə pîndè sê Mi, ŋwàʼlè ə̀ Fèzhə̀ pi nə, ‘Ə tso sɛ ə se fo ndamze ə sɨ̂sə̀ fɨə ə və fètəyn.’” 39Njisə̀s tè wàmnə kûmə̀ Sezuʼ se Ŋwaʼa sɛ ə tè nyi se fo sê ghɨ ghɛ ə ghe pomə sê Vəyn. Ə̀ tè nyi zâ, Zhə̀fè nyi ndɔʼɔ fe nyiəm fo Sèzuʼ se Ŋwaʼase sê Vəyn kûmə̀ nə è tè pa nyi ndɔ̀ʼɔ È ndwise kɔyn ə Njisə̀s vè ekwùtwəyn se fo epomsê sê Vəyn.
Chyâsèzè ə ndwì kûmə̀ Njisə̀s
40Ghɨ yîghe əfètəyn ànɔ̀yn ə zɨə ə̀ghɛ ghɛ ə Njisə̀s pì ə pìə nə, “Wùə vɨ̂nə lote nyi ke nâʼà Fɨ̀aʼtè vɛ ə È nə̀ pə̂.”
41Yîghe pîə nə, “È nyi vɛ ə chɔʼ ndə̂m.”
Pîza Yîghe pîə nə, “Vɛ ə chɔʼ ndə̂m vayn kaʼa è pəyn ə Ngalìlî! 42Ŋwàʼlè ə̀ Fèzhə̀ pi nə vɛ ə chɔʼ ndə̂m tə fɨə ndom və esas ə ndɛ Fɔ̀yn Ndàfîtzè, mə ə tə piə Vəyn ə Petlɛ̀ghêm ə tɔ̂ŋ zɛ ə Ndàfît tè ndamə ətəyn” 43Chyâsèzè tè nyîə nyi ə fètə̂ ànɔ̀yn kûmə̀ Njisə̀s. 44Yîghe sè kyiŋə se kyiə Njisə̀s pîza wùə ə tàʼa mɔ̀m ə vəyn è ghoke.
Ghɨ chisə Njûsghè ə tə nə ə pomə̂ va sê Njisə̀s
45Kə ghɨ fɨaʼa ndɛ ètsə̀mə ghɛ kɛse ndû, ghɨ kɔʼsə nə eshyə̀ engaŋtə è ghɨə Falàsîghè ə pfɨfə sê ghənə nə, “Ghàyn pâʼà pə̀yn è Vəyn kûmə̀ ghè?”
46Ghɨ fɨaʼa ətəynghe ə pìə nə, “Wùə pâʼà tyəmə wàmnə̀ endom vɛ ə wùə nə vɛ wàmnə̀ ətəyn!”
47Ghɨə Falàsî ghɛ ə pfɨfə nə, “È və lesê kepî ghàyn vâ? 48Ghànə tyəm zɨə nə wùə echisə kɨ̀sə ə̀ nyì pi wùə ə Falàsî vîvè pomə se Və ə? 49Nɔ̂yn kɨ̀nə keva lâŋ ə Mosîskè, e za nyi nə ghənə nyi ə Zhə̀fè etyə̂ ndi.”
50Wùə ə̀ Falàsî vîvè fumə tè nyi Nìkòndemùs, ə wùə vɛ ə è tè ndù fe Njisə̀s sə shi. È və pìə se ghəmɔ̀ʼɔ nə, 51“Lâŋ ə ghasènìke pîə nə ə vayn kàʼa pi nə wùə ə pfɨ̀ saʼ ndɔ̀ʼɔ ə zɨ cho ə vəynze.”
52Ghənə ə pìə se vəyn nə, “Ò ndò kepî ə Ngalìlî ə̀? Fɛte zaʼle Ŋwàʼlè ə̀ Fèzhə̀ ə ò fe nə fɨ̀aʼtè pâʼà tyəmə̂ fɨ ə Ngalìlî.”
Ə kyî pəyn wùzhɔyn e kwiə sê Njisə̀s
53Nâʼàpî ndè ə chyàsə̀ kwɨlə̂.
လက်ရှိရွေးချယ်ထားမှု
Njɔyn 7: bfm
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ