Lûk 24
24
Njisə̀s ə zòmə̀
(Matyò 28.1-10; Mâk 16.1-8; Njɔyn 20.1-10)
1Tuʼ və̂ zo pə̂ ə etuʼ əshi və ngàm ətəyn, zəyn ghɛ ə ndùə echo eshyə̀ eghaʼâzè è mngwɨl mə èlɨ̀mtə̂ fɔmə̂m kə ghənə fɛte 2ə fe anayn kɛ ə fìyn cho èshyə̀ eghaʼâzè ətəyn, mə və pɨŋse tsɨ̂sè. 3Ghənə ə njiə eshyə̀ ətaʼa fe èpfɨyn ə Pɛ̂pɛ Njisə̀s e 4ə tyəmə fumə sè kayntə eghɛ zɛ ze kyàyn. Ndômnè ghə pɛ ə pfɨ̀ŋə̀ tyəmə paʼsə ə ghənə ə ngwùŋ mə ghənə màʼ ndzɨs se fɨfə nyaynə se. 5Fâynzè ə ko ghənə, ghənə tsosə etu ə chi. Ghɨ ətəyn ə pfɨfə sê ghənə nə, “Kûmə̀ ghè ə ghàyn kyiŋə wùə e twɔ əfètə̂ ə ghɨə kwutə ghə? 6E va chi fayn, è və kwu zômə̀. Ghàyn kwaʼte kə e te pi sê ghàyn etuʼ vɛ e tè pa nyi endaʼ ə Ngalìlî 7nə, ə kyi sè nə̀ fo Va Wùə ə ghɨə piə əgho, nə ə paynte vəyn ə fekàʼ fə awâmnèfè, ə nyi ə mtuʼ mta, ə è zomə.”
8Kə sa ashìŋə̀, ghənə kɛse kwaʼtə ewâmnè vəyn nə zɛ. 9Ghənə ə kɛse kwɨlə pə eshyə̀ eghaʼâzè ə tsà əghɛ nə ghɨynə mə nâʼà ə kɨm sê ghɨətom ə Njisə̀s ə̀ njò èmɔ̀ʼ paʼsə̂ naʼapi se ndɛ fumə. 10Ghɛ nə ghɨynə mə sê ghɨətom ə Njisə̀sghè tè ndù tsâyn Mèli və Màkndàlɛ̂n e Njòwanà e Mèli nyìə Njə̂m e zəyn əmɔʼɔ. 11Pîza ghənə tàʼa pomə kûmə̀ nə ghɛ nə ghɨnə mə tè fusə̂ əghɛ akaŋə sê ghənə. 12Pîza Pità ə ndwìə ə nyɨŋə ndùə ngɨmtə̂ naynə̂ ndzɨsə eshyə̀ eghaʼâzè, pîza ə fe kə akɨ̂m ə ndo sè kayntə kwɨlə̂ ndûə e eghɛ zɛ ze kyàyn.
Njisə̀s ə kotê ghɨ ghə pɛ̀ endomə Emayùs vè
(Mâk 16.12-13)
13Ə tè nyi kəpi mtuʼ nə mɛ mə, chùmte pàm sə Njisə̀s e sè mɔʼɔ, sê pɛ ə ndò se ndù ə tə̀ʼ zhîzè, mə tɔŋtə̂ nə Èmayùs, mə nyi se mâyl sèsɛmbɛ sè ndò ə Njèlusalɛ̀m. 14Ghənə tè kwiə, wamne, kâtə̀ ndûə əghɛ ghɛ ə ghe kwuʼte kyâyn. 15Kə ghənə wamnə̀, kâtə̀ kɔʼɔ ə əghɛ, nâʼà Njisə̀s e ngɨŋə̂ vəyn ə pə̀ paʼsə̂ se kwiə ndùə yî ghənə. 16Pîza ghɛ ze tâsə̀ ghənə sè fe kè vəyn. 17Njisə̀s ə pfɨfə sê ghənə nə, “Ə nyi əghɛ ə̀kè ə ghàyn kwìə kâtə̀ kɔʼɔ ə ghəynghe nyiə ə?”
Kè sə ashìŋə̀, ghənə pfɨ̀ŋə̀ tsosə̂ tekyàʼ ə chi èkomə ewìynze. 18Viu ə ghənə fètəyn, mə tɔŋtə̂ nə Klèopàs, ə kə̀mnə̀ pfɨfə sê vəyn nə, “Ə nyi ke ghò wùə ve e pəyn ə Njèlusalɛ̀m mə kɛ va ghɛghe ə ghe kwuʼte kyàyn fa mtuʼlə̂ mɨ̂nə̀ mə?”
19È və pfɨfə nə, “Ə nyi əghɛ ə kɛ?”
Ghənə pə̀ynsə̀ nə, “Ə nyi ghɛ ə ghe kyàyn sê Njisə̀s və Nazalɛ̀t. E vâ nyi fɨ̀aʼtè, pìə əghɛ ə kayntə, nə̂ ghə mɔʼɔ. Zhə̀fè ə pomə̂ vəyn, ghɨghə pɔŋɔ pomə. 20Ghɨ ə kɔʼsə nə eshyə̀ ə ngaŋtəghe è tu vɛ ve chisə ghàs va fo vəyn nə ə zhwi, a nji vəyn ə ndùə paynte awâmnè, 21mə ghàs a kwaʼtə nə ə tə nə ə nyi vəyn sè ə zhɔnə atu ə Isìlây. Naʼapi za, zôyn nyi mtuʼ m ta kə ghɛ təyn e kyàyn. 22Zəyn ə mɔʼɔ ə ghàs anɔ̀yn ə fɨyn nəyn, ghàs e nyi e kayn kə ghənə pɨs ndû echo eshyə̀ eghaʼazè ndàyn, 23ə tàʼa fe epfɨyn ə vəyn fu, ə kɛsə̂ pə̀ piə nə tsì sə mɔ̀ʼɔse ndù fɨə ə ghənə ekyàʼ fumə ətelaynəlayn ə pìə sê ghənə nə e nyi etwɔ. 24Ghɨ əmɔʼɔ mə ghe nyi ghasè ghənə fɨnə ndò ndùə echo eshyə̀ fumə, ə fe kə eshyə̂ eghaʼâ e zome, kè eghɨ kə zəyn ghɛ pəyn pì, pîza ə tàʼa fe Njisə̀s.”
25È və kê pì sê ghənə nə, “ghayn nyi ke nâʼà engô, ze njîə ghàyn eshîŋə̀kè se pomə əghɛghe ə fɨ̀aʼtèsè tè piə! 26Wùə vɛ ə Zhə̀fè chɔʼ ndə̂m tè va se nə fe ngəʼ tsɔ̀fə kə è nji ə vəyn elùʼ epomsə və?” 27È və wàmnə̀ zâ, ə pìə paynsə̂ əghɛ ghɛ ə tè pì ə Ŋwàʼlè ə Fèzhə̀ kûmə̀ ngɨŋə̂ vəyn, sè zhə̀tè kə ə ŋwàʼlè ə Mosîs se ndùə tayn əfètə̂ sèfɨ̀aʼtè.
28Ə te nyi kə ghənə paʼse ndo ə tə̀ʼ ze ə ghənə tè ndùə ətəyn, Njisə̀s e se kyaʼà kə e kyiŋə se tsɛ̂ ndò ndùə əshi. 29Ghənə kitə vəyn ə piə nə è pɨəyn yîghə̀ ghənə kûmə̀ nə shîŋə̀ kə tsɛ̂, tuʼve fɨyn nyi mə ve ə chi. È və njiə sè pɨ̂əyn yî ghənə. 30Ə te nyi ashìŋə̀ ə zhiəke, è və njiə apayn ə kwaŋke ə pɔsə̂ ə chàtə̀ fo sê ghənə. 31Shi ə ghənə̂ghè ə zo, ghənə ə fe kê vəyn, kè sə ashìŋə̀, è və saŋə ə ghənə əfètəyn. 32Naʼapî nde sè pfɨfə sê ànyì nə, “Piə kə è fə wamnə̀ sê ghâsènì endom ashìŋə̀ kɛ ə ke piə paynsə̂ eghɛ Fezhə̀zè za, wiynə ghâsènì ve nyuŋnə̂ ə?”
33Ghənə ndwìə kə ashìŋə̀ nə kɛmə ə kɛse ndùə ə Njèlusalɛ̀m ə fe ghɨətom ə Njisə̀s ghe njò èmɔ̀ʼ e ghɨ mɔʼɔ ghe ə te nyi fumə. 34Ghɨ mɔ̀ʼɔ te nyiə pìə nə, “Səmɔʼ Pɛ̂pɛ və kwu zômə̀. È və tyəyn ngɨŋə̂ vəyn sê Shimùyn!”
35Ghɨ, ghɛ ə pɛ̀ ə tsà eghɛ zɛ ze kyàyn sê ghənə endom ə fɨnə tsâ kə ghənə fə fe kê vəyn ashìŋə̀ kɛ ə è fə pɨaʼ payn ə kwaŋke.
Njisə̀s ə tyəyn ngɨŋə̂ vəyn se chùmte èpàm sə vəynse
(Matyò 28.16-20; Mâk 16.14-18; Njɔyn 20.19-23; Ətefɨ̂aʼ 1.6-8)
36Kə ghənə te wâmnə̀ kɔʼɔ ə əghɛ nə ghɨynə mə, Njisə̀s nâʼà è ngɨŋə̂ vəyn ə pfɨ̀ŋə̀ tyəmə ə ghənə fètəyn ə pìə nə, “pɔyne nyi sê ghàyn.”
37Ndɨmke ə tsɛ ghənə, ghənə fânə̀, kwaʼtə nə ghənə fe wùəchi. 38Njisə̀s ə pfɨfə sê ghənə nə, “Kûmə̀ ghɛ ə ghɛ nə ghɨynə mə fo ngəʼ se ghàyn ə, e kɨsè nə ghɛ ə tsɨə ghə nyi ə ghànə ə tekwaʼtə ə? 39Ghàyn naynə̂ kə gho ghɨmə e ghol ghɨmə. Ə nyi mi nyi. Ghàyn kom kè nâʼà mi ə fe səmɔʼ kûmə̀ nə wùəchi kyi va njà ewiyn e kɨ̀sə wofe ewiyn nyiə kə m kyi.”
40È və piə nyi ə kê tyəyn əgho vəyn ghe e gholə vəyn ghe sê ghənə. 41Ghənə tè saŋnə nâʼà àchûŋ, zə ghaʼə ghənə sè pomə, ghənə faŋa kə ekayntê. È və se pfɨfə sê ghənə nə, “ghayn kyi ndo fɨa ə zhiəke fa ə?” 42Ghənə fo apɨaʼə ə ambwɔ̀ ə nyɔʼa sê vəyn. 43È və fiə ə kwɨlə ke nâʼà ə ghənə əsi.
44Epam ətəyn, è və piə sê ghənə nə, “Ghɛ ghɨnə ə ghàyn fe nyi ə nyi əghɛ ghɨm ghɛ ə m tè tsàyn sê ghàyn kə ghâsènì te pa nyi əmɔʼ nə, naʼapi ghè kə nyi mə nyaʼ kûmə̀ mi ə ŋwàʼlè esaʼ ə Mosîsè e ŋwàʼlè sə fɨ̀aʼtè sè ghaʼasè e ŋwàʼlè se Njàŋ kyi sè nə kwəyn nâʼà ə kɨm.”
45È və wàmne za e paynsə̂ mɨ̂sè etu ghənə kə ghənə zɨ ke əghɛ ghɛ ə ghe nyi ə Ŋwàʼlè Fèzhə̀, 46ə fɨnə pîə sê ghənə nə, “Ə tè nyàʼ nə, Klâys kyi se fe ngəʼ nə ə nyi mtuʼ mta, e zomə e kwu, 47ə fɨyn kyi sè zhə̀tə ə Njèlusalɛ̀m sè tsà eghɛ ə Fezhə̀zè ə vəyn ezə, nə ghɨə kwiyne təmə kə Pɛ Zhə̀fè lɛse fo sèpi sə ghənə̂sè. 48Ə nyi ghàyn ghɛ ə ghàyn nyi se tsɛ se saʼ sè əghɛ nə ghɨyn. 49Ghàyn ə kɛ nə, m nyi tom efe zɛ Pɨ̀a vɨm te tsɨ̀ne sê ghàyn. Pîza ghàyn tsɨsə kə fayn endaʼ sè zaʼâ kə tyaʼ nə ke ndo ekwùtwəyn, ə ke tso ə ghàyn ə tu.”
Njisə̀s ə kɔʼ e kwutwəyn
(Mâk 16.19-20; Ətefɨ̂aʼ 1.9-11)
50È və wamnə̀ za ə njìə fɨə e ghənə endaʼ nə zɨ̀yn ə ndùə paʼsə ə tə̀ʼ ə̀ Petanì ə ndwisè əgho vəyn ghe ekwùtwəyn se pɔsə̂ ghənə. 51Kə e te pa pɔsə̂ ghənə, ə njìə kɔʼsə̂ vəyn ekwùtwəyn. È və ndò zâ ghənə 52Ghənə ə kɛsə̂ ndô ndûə ə Njèlusalɛ̀m mə ghənə lwiyn èsaŋne eghaʼè 53ə ke nduə faŋə kə ə Ndɛ Ètsə̀mə sè zɨsə̂ fo kə àzɔ̀ŋnè se Zhə̀fè.
လက်ရှိရွေးချယ်ထားမှု
Lûk 24: bfm
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ