Lucas 16
16
Qaraloqojnaxana so neloxoỹaq se ỹa'maxata'gue ca leloxoiqatecsec
1So Jesús 'naapega qai'neeta so lapaxaguinatqaipi:
—'Uo' so ỹale ỹaatqajam nesallaxanec. Ca' so'maxare 'uo' so roỹaxana reloxoỹa'a nqai'en so la'a'. Ca' qara'qaataxana'a so'maxare quesojo neloxoỹaq queso la'a', so'maxare chi iualaxaintac da lesallaxa so na'co'. 2Ca' so na'co' roỹaxane'oga so'maxare, ca 'naapega, 'naaco': “¿Negue' ca 'neeta dá'maq qaỹa'xatetac caqami'? Naloqojñi' ma'le ca ro'ueenataxanaxaqui'. Ime, ca' nodo'iro quenajo, ma' totqa qami' neloxoỹaq ma'le quiyi ỹa'a'.” 3Ca' sojo neloxoỹaq queso na'a' ra'deenataxantac, 'naaco': “¿Negue' ca shinto' nagui, ma' ñi ña'co' tot ỹa'ue ca ỹo'ueenatec? Ma' ỹim qaica ca iquesaxanaxa quiyim so'ueenataxan quena 'laua. Chaqai 'xoic da ipocoxo quiyim saỹaata da ỹashiilaxanaxac. 4Ajá'a, sanata nagui da shine'tegue, qaiyi 'vii ma'le caua iconchiguit aỹim quiyim 'ue ca sau'a ca la'a', ma' qaica ca ỹo'ueenatec.” 5Ca roỹaxane'oga 'onatac nqai'en quesó'maq no'ueenaho la'uale queso na'co'. Ca só'maq 'au ỹoviro inat, 'naaco': “¿Ỹote' aca ra'ualli'i' queso ña'co'?” 6Ca' so'maxare 'naaco': “Cien aso lahi' na aceite so ỹa'uale.” Ca só'maq neloxoỹaq queso na'a' 'naaco': “'Ana na ra'ualli'i' lomalate; qamqai', nqa'xañiriñi. Ime, ca 'chiriñi caua cincuenta.” 7Ime, lotqai inat so liỹa, 'naac: “Qam qami' ¿ỹote' aca ra'ualli'i'?” Ca so'maxare 'naaco': “Cien naloqojnaxaqui na trigo.” Ca só'maq neloxoỹaq queso na'a' 'naaco': “'Ana na ra'ualli'i' lomalate; 'chiriñi aca ochenta.” 8Ca' so na'co' retan so se no'uen lelaatec, quiyim so'maxare se ỹouene'te ca 'ne'tegue ca lo'ueenataxanaxac. Ma' 'eda da 'neeta quena hueetalec na 'laua, ma' na'maxare ỹaatqajam se qalana'a quiyim 'ue ca 'ne'tegue queca liỹa, sqai 'nejem ná'maq hueetaugui ná'maq re'qoochiguiñi.
9Ca' vichiguiño' saqachiỹaxaua' qamiri quiyim 'ueenataxañiỹa dá'maq lesallaxa ná'maq qomyipi ỹo'ueeteta'pe naua se no'viiñi, qaiyi 'ue ca namigohi, qaiyi ma' ỹovita imeho da nesallaxa, ca' ishit quiyim 'ue ca ỹacoñiguita qamiri queca na'a' sqaica lqodoc queda piguim.
10Cá'maq ỹa'maxate'tegue quiyim sqa lo ca reloqota'a, ca chaqaida 'neeta ỹa'maxate'tegue quiyim 'xoic ca reloqota'a. Qam ca se ỹa'maxata'gue cá'maq sqo vite', qai'neeta se ỹa'maxata'gue ca 'xoic quiyim reloqota'a. 11Ca' vichiguiño' queda 'neeta quiyim sqa 'maxachiỹa'gue da lesallaxa na qomyipi sauaqhuaic, ca' ¿nega'ỹo' ca ishit quiyim pi'ỹa'alo qamiri quiyim pataxalgoto qamiri cá'maq ỹaatqajam nesallaxa? 12Chaqai no'm sqa 'maxachiỹa'gue cá'maq ỹoqa'a, ca' ¿nega'ỹo' ca ỹaanema qamiri cá'maq ralamaxarichii?
13Qaica ca nelaatec ishit quiyim ro'ueenataxanoto caua dos na'cooro', ma' noquii'a ca 'óna, ca nqo'ta ca liỹa, loqo'm na'xaỹaxane'ta ca 'óna, ca sqaica ca ỹauaaque ca liỹa. Chaqai se qaishit qaro'ueenataxanot ñi qota'olec, chaqai ca nesallaxa.
14Ca' 'qaatapega dajo sá'ogue so fariseoipi ma' ỹaatqajam lqo'itaxat da nesallaxa, ca chi i'neetac so Jesús. 15Ca' so Jesús 'naapegalo':
—Qamiri ma' nachaxañitac quiyim qamiri huagaxaraqa quena qom, qam ñi qota'olec ỹa'deene' naua re'taxanatahi. Ca' quecá'maq na qomyipi ỹaatqajam 'xoic lecaic nqai'en, ca' cajo ỹamaqa'gue ñi qota'olec.
Ná'maq naqataxaquipi chaqai dá'maq lo'ueenataxanaxac ñi qota'a quiyim ỹoiquentac ná'ogue najo
16Na naqataxaquipi chicqo'ot na'le so Moisés chaqai da lapaxaguinataxanaxac na la'qaataxanqajanqaipi ñi qota'a ñaqa 'uo' na' novi' so Juan. Ca' quiyi, ca qaỹa'xat da lo'ueenataxanaxac ñi qota'a quiyim ỹoiquentac ná'ogue najo, ca ná'ogue na qomyipi ỹaatqajam 'xoic da leuogoxo, ỹahotaque quiyim inoxoneu'a da'maxare.
17Qam paguec se qalaq quiyim ime na piguim chaqai na 'laua, qam se ishit quiyim se ipaguigui cá'maq ỹa'xat ca 'oonoqui' quena nerec quená'maq naqataxaquipi.
So Jesús ỹa'xat da leloxoỹaxac ca nalate'e' aca loua
(Mateo 19.1-12; Marcos 10.1-12)
18Ca qom quiyim nalate'e' aca loua, ime, ca lotqai o'ñiguit aca liỹa 'aalo, ca' ca'maxare 'ue ca lasauaxaset. Chaqai cá'maq o'ñiguit aca 'aalo nalate'e' ca loua, qai'neeta 'ue ca lasauaxaset.
So ỹale ỹaatqajam nesallaxanec chaqai so Lázaro
19'Uo' so ỹale ỹaatqajam nesallaxanec, so'maxare ỹansegueñi naua paguec loyaague' noho, chaqai qaica 'nejme'. Ca' so'maxare ỹo'ueetetac quenaua'que naua na'xata' ca lodegaxat lqui'ỹaxac. 20Chaqai qai'neeta 'uo' so ỹale ỹaatqajam 'xoraic, leenaxat Lázaro. So'maxare ỹaatqajam no'qaata na loshicmaxa quena li'i na lquenaxa, ca' so'maxare nqa'xantañi quena 'laua, nqa'xantau'a na lahi ñi lauo' lasom so nesallaxanec. 21Sojo 'xoraic nishiitaque quiyim quemategue na lete na na'ic najñi queso lqui'ỹaxala' so nesallaxanec. Chaqai vire'ta na pioqripi quepegue', colliitac na li'i na loshicmaxa so'maxare. 22Ca 'uo' so na'xa'a, ca' sojo 'xoraic ileu. Ca' anac na lelaatqaipi piguim laseripi ñi qota'a, ca' ỹaueguegue da piguim cá'maq neeta'ñi so Abraham. Ca' so nesallaxanec qai'neeta ileu. Ca' qaishinñi. 23Ca co'na' so nesallaxanec ỹaatqajam 'xoic da le'xoric queca hueeta'ñi lapooqo' na lqui'i na leuaxaiquipi. Ca' quiyi, ca' ra'ishiguim, ca iuane'ta so Abraham ỹaatqajam qoỹoqoshi'ma, chaqai so Lázaro huaqate'e' so'maxare. 24Ca' ỹaualaq, 'naaco': “Qami' ita'a Abraham, yi'xoriñi'. Ñaq nelachi' na Lázaro, quiyim pi'guiloxolaxat na lo'lo ada lpalaaqate queca huaxaỹaq, ca' anac quiyim ipenachit ñi ỹo'legaxanaxat, mashic ỹapaguec na i'xoric quena seuetañigui norec.” 25Qam so Abraham 'naapego' so'maxare: “Qami' ỹaalec, no'viñitegue quiyim caqami', ma' ỹaatqajam qaica ca viñire'e na' llaq rca'lli'sauec, qam ñi Lázaro se no'uen na'le. Ca' nagui ñi'maxare 'xoic da nqouagaxa quenajo neeta'ñi, qam qami' 'xoic da re'xoriqui'. 26Chaqai sqaidaata quedá'ogue dajo, ma' 'ue na ỹaatqajam qoỹoqochi'ñigui lqodoc hueetanguilo qamiri qai'neeta coqomi'. Ca' vichiguiño' se ishit quiyim 'ue ca chicqochi'ñi najo quiyim ta'ñina, chaqai se ishit quiyim 'ue ca chicqa'ñina, ca naashi'ma na senqata'ñi.” 27Ca' so nesallaxanec 'naaco': “Qami' ita'a Abraham, ñi'xoresene'tot qami' nagui quiyim lachi' ñi Lázaro quiyim quepegue' yi la'a' ca ita'a, 28yi'maxare neesa'ñi caua cinco ỹaqaỹa', qaiyi ra'qaataxanema, qaiyi caua'maxare sqa nara'a qai'neeta najo ne'xoyaqa'.” 29Qam so Abraham 'naapego' so'maxare: “Caua'maxare shi'gue hueeto'oto ana lerecse so Moisés chaqai so la'qaataxanqajanqaipi ñi qota'a, ca' ¡chaqainaua ma'le na'xaỹaxanalo!” 30Ca' so nesallaxanec 'naaco': “Ajá'a, qami' ita'a Abraham, qam no'm 'ue ca quiyim liỹa nca'leuec quena leuaxaiquipi, ca' quepegueto caua'maxare, ca ishit quiyim netogochigui na lauel, ca' ỹaxañiñi naua lanatqa.” 31Qam so Abraham 'naaco': “Quiyim se na'xaỹaxana so Moisés chaqai so la'qaataxanqajanqaipi ñi qota'a, ¡qaiyiita sqai huelec, 'eno'm 'ue ca liỹa nca'leuec, chicqochi'ñi ca leuaxaiquipi!”
လက်ရှိရွေးချယ်ထားမှု
Lucas 16: MCV91
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
Lucas 16
16
Qaraloqojnaxana so neloxoỹaq se ỹa'maxata'gue ca leloxoiqatecsec
1So Jesús 'naapega qai'neeta so lapaxaguinatqaipi:
—'Uo' so ỹale ỹaatqajam nesallaxanec. Ca' so'maxare 'uo' so roỹaxana reloxoỹa'a nqai'en so la'a'. Ca' qara'qaataxana'a so'maxare quesojo neloxoỹaq queso la'a', so'maxare chi iualaxaintac da lesallaxa so na'co'. 2Ca' so na'co' roỹaxane'oga so'maxare, ca 'naapega, 'naaco': “¿Negue' ca 'neeta dá'maq qaỹa'xatetac caqami'? Naloqojñi' ma'le ca ro'ueenataxanaxaqui'. Ime, ca' nodo'iro quenajo, ma' totqa qami' neloxoỹaq ma'le quiyi ỹa'a'.” 3Ca' sojo neloxoỹaq queso na'a' ra'deenataxantac, 'naaco': “¿Negue' ca shinto' nagui, ma' ñi ña'co' tot ỹa'ue ca ỹo'ueenatec? Ma' ỹim qaica ca iquesaxanaxa quiyim so'ueenataxan quena 'laua. Chaqai 'xoic da ipocoxo quiyim saỹaata da ỹashiilaxanaxac. 4Ajá'a, sanata nagui da shine'tegue, qaiyi 'vii ma'le caua iconchiguit aỹim quiyim 'ue ca sau'a ca la'a', ma' qaica ca ỹo'ueenatec.” 5Ca roỹaxane'oga 'onatac nqai'en quesó'maq no'ueenaho la'uale queso na'co'. Ca só'maq 'au ỹoviro inat, 'naaco': “¿Ỹote' aca ra'ualli'i' queso ña'co'?” 6Ca' so'maxare 'naaco': “Cien aso lahi' na aceite so ỹa'uale.” Ca só'maq neloxoỹaq queso na'a' 'naaco': “'Ana na ra'ualli'i' lomalate; qamqai', nqa'xañiriñi. Ime, ca 'chiriñi caua cincuenta.” 7Ime, lotqai inat so liỹa, 'naac: “Qam qami' ¿ỹote' aca ra'ualli'i'?” Ca so'maxare 'naaco': “Cien naloqojnaxaqui na trigo.” Ca só'maq neloxoỹaq queso na'a' 'naaco': “'Ana na ra'ualli'i' lomalate; 'chiriñi aca ochenta.” 8Ca' so na'co' retan so se no'uen lelaatec, quiyim so'maxare se ỹouene'te ca 'ne'tegue ca lo'ueenataxanaxac. Ma' 'eda da 'neeta quena hueetalec na 'laua, ma' na'maxare ỹaatqajam se qalana'a quiyim 'ue ca 'ne'tegue queca liỹa, sqai 'nejem ná'maq hueetaugui ná'maq re'qoochiguiñi.
9Ca' vichiguiño' saqachiỹaxaua' qamiri quiyim 'ueenataxañiỹa dá'maq lesallaxa ná'maq qomyipi ỹo'ueeteta'pe naua se no'viiñi, qaiyi 'ue ca namigohi, qaiyi ma' ỹovita imeho da nesallaxa, ca' ishit quiyim 'ue ca ỹacoñiguita qamiri queca na'a' sqaica lqodoc queda piguim.
10Cá'maq ỹa'maxate'tegue quiyim sqa lo ca reloqota'a, ca chaqaida 'neeta ỹa'maxate'tegue quiyim 'xoic ca reloqota'a. Qam ca se ỹa'maxata'gue cá'maq sqo vite', qai'neeta se ỹa'maxata'gue ca 'xoic quiyim reloqota'a. 11Ca' vichiguiño' queda 'neeta quiyim sqa 'maxachiỹa'gue da lesallaxa na qomyipi sauaqhuaic, ca' ¿nega'ỹo' ca ishit quiyim pi'ỹa'alo qamiri quiyim pataxalgoto qamiri cá'maq ỹaatqajam nesallaxa? 12Chaqai no'm sqa 'maxachiỹa'gue cá'maq ỹoqa'a, ca' ¿nega'ỹo' ca ỹaanema qamiri cá'maq ralamaxarichii?
13Qaica ca nelaatec ishit quiyim ro'ueenataxanoto caua dos na'cooro', ma' noquii'a ca 'óna, ca nqo'ta ca liỹa, loqo'm na'xaỹaxane'ta ca 'óna, ca sqaica ca ỹauaaque ca liỹa. Chaqai se qaishit qaro'ueenataxanot ñi qota'olec, chaqai ca nesallaxa.
14Ca' 'qaatapega dajo sá'ogue so fariseoipi ma' ỹaatqajam lqo'itaxat da nesallaxa, ca chi i'neetac so Jesús. 15Ca' so Jesús 'naapegalo':
—Qamiri ma' nachaxañitac quiyim qamiri huagaxaraqa quena qom, qam ñi qota'olec ỹa'deene' naua re'taxanatahi. Ca' quecá'maq na qomyipi ỹaatqajam 'xoic lecaic nqai'en, ca' cajo ỹamaqa'gue ñi qota'olec.
Ná'maq naqataxaquipi chaqai dá'maq lo'ueenataxanaxac ñi qota'a quiyim ỹoiquentac ná'ogue najo
16Na naqataxaquipi chicqo'ot na'le so Moisés chaqai da lapaxaguinataxanaxac na la'qaataxanqajanqaipi ñi qota'a ñaqa 'uo' na' novi' so Juan. Ca' quiyi, ca qaỹa'xat da lo'ueenataxanaxac ñi qota'a quiyim ỹoiquentac ná'ogue najo, ca ná'ogue na qomyipi ỹaatqajam 'xoic da leuogoxo, ỹahotaque quiyim inoxoneu'a da'maxare.
17Qam paguec se qalaq quiyim ime na piguim chaqai na 'laua, qam se ishit quiyim se ipaguigui cá'maq ỹa'xat ca 'oonoqui' quena nerec quená'maq naqataxaquipi.
So Jesús ỹa'xat da leloxoỹaxac ca nalate'e' aca loua
(Mateo 19.1-12; Marcos 10.1-12)
18Ca qom quiyim nalate'e' aca loua, ime, ca lotqai o'ñiguit aca liỹa 'aalo, ca' ca'maxare 'ue ca lasauaxaset. Chaqai cá'maq o'ñiguit aca 'aalo nalate'e' ca loua, qai'neeta 'ue ca lasauaxaset.
So ỹale ỹaatqajam nesallaxanec chaqai so Lázaro
19'Uo' so ỹale ỹaatqajam nesallaxanec, so'maxare ỹansegueñi naua paguec loyaague' noho, chaqai qaica 'nejme'. Ca' so'maxare ỹo'ueetetac quenaua'que naua na'xata' ca lodegaxat lqui'ỹaxac. 20Chaqai qai'neeta 'uo' so ỹale ỹaatqajam 'xoraic, leenaxat Lázaro. So'maxare ỹaatqajam no'qaata na loshicmaxa quena li'i na lquenaxa, ca' so'maxare nqa'xantañi quena 'laua, nqa'xantau'a na lahi ñi lauo' lasom so nesallaxanec. 21Sojo 'xoraic nishiitaque quiyim quemategue na lete na na'ic najñi queso lqui'ỹaxala' so nesallaxanec. Chaqai vire'ta na pioqripi quepegue', colliitac na li'i na loshicmaxa so'maxare. 22Ca 'uo' so na'xa'a, ca' sojo 'xoraic ileu. Ca' anac na lelaatqaipi piguim laseripi ñi qota'a, ca' ỹaueguegue da piguim cá'maq neeta'ñi so Abraham. Ca' so nesallaxanec qai'neeta ileu. Ca' qaishinñi. 23Ca co'na' so nesallaxanec ỹaatqajam 'xoic da le'xoric queca hueeta'ñi lapooqo' na lqui'i na leuaxaiquipi. Ca' quiyi, ca' ra'ishiguim, ca iuane'ta so Abraham ỹaatqajam qoỹoqoshi'ma, chaqai so Lázaro huaqate'e' so'maxare. 24Ca' ỹaualaq, 'naaco': “Qami' ita'a Abraham, yi'xoriñi'. Ñaq nelachi' na Lázaro, quiyim pi'guiloxolaxat na lo'lo ada lpalaaqate queca huaxaỹaq, ca' anac quiyim ipenachit ñi ỹo'legaxanaxat, mashic ỹapaguec na i'xoric quena seuetañigui norec.” 25Qam so Abraham 'naapego' so'maxare: “Qami' ỹaalec, no'viñitegue quiyim caqami', ma' ỹaatqajam qaica ca viñire'e na' llaq rca'lli'sauec, qam ñi Lázaro se no'uen na'le. Ca' nagui ñi'maxare 'xoic da nqouagaxa quenajo neeta'ñi, qam qami' 'xoic da re'xoriqui'. 26Chaqai sqaidaata quedá'ogue dajo, ma' 'ue na ỹaatqajam qoỹoqochi'ñigui lqodoc hueetanguilo qamiri qai'neeta coqomi'. Ca' vichiguiño' se ishit quiyim 'ue ca chicqochi'ñi najo quiyim ta'ñina, chaqai se ishit quiyim 'ue ca chicqa'ñina, ca naashi'ma na senqata'ñi.” 27Ca' so nesallaxanec 'naaco': “Qami' ita'a Abraham, ñi'xoresene'tot qami' nagui quiyim lachi' ñi Lázaro quiyim quepegue' yi la'a' ca ita'a, 28yi'maxare neesa'ñi caua cinco ỹaqaỹa', qaiyi ra'qaataxanema, qaiyi caua'maxare sqa nara'a qai'neeta najo ne'xoyaqa'.” 29Qam so Abraham 'naapego' so'maxare: “Caua'maxare shi'gue hueeto'oto ana lerecse so Moisés chaqai so la'qaataxanqajanqaipi ñi qota'a, ca' ¡chaqainaua ma'le na'xaỹaxanalo!” 30Ca' so nesallaxanec 'naaco': “Ajá'a, qami' ita'a Abraham, qam no'm 'ue ca quiyim liỹa nca'leuec quena leuaxaiquipi, ca' quepegueto caua'maxare, ca ishit quiyim netogochigui na lauel, ca' ỹaxañiñi naua lanatqa.” 31Qam so Abraham 'naaco': “Quiyim se na'xaỹaxana so Moisés chaqai so la'qaataxanqajanqaipi ñi qota'a, ¡qaiyiita sqai huelec, 'eno'm 'ue ca liỹa nca'leuec, chicqochi'ñi ca leuaxaiquipi!”
လက်ရှိရွေးချယ်ထားမှု
:
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.