Matayɔ 3
3
Yʉanɨ ngia i꞉nye ɓatiso ɓombi unzo mapanʉ
(Mak 1:1-8; Luk 3:1-18; Yʉa 1:19-28)
1Ati ngiinanɨ, Yʉanɨ ngia i꞉nye ɓatiso ɓombi ambʉɓwanɨa akʉ 'ukengu, amati ʉ gɨpa ʉ Yudɛa. I꞉nye kʉɓɨakɨa ɨsaʉ yɨ Asʉɓɨɨ ɓɔ: 2« Nicheni mɨtʉma ngiindɛnʉ, jʉ Ɓʉngama ngiɓa ɓa ekoo ʉ ɓisi ɓa tiga kʉ tinene! »
3Tʉkʉ Yʉanɨ mʉngana ngiinanɨ, iya ɨgbɛ Ɨsaya a꞉sigo jɛnɛ moni ekoo angɔ ɓɔ:
« Mombi akʉtʉɓɨa akʉ 'ukengu ɓɔ:
‹ Tambanakeni lɨngbaa ngila lʉ Makʉʉɓɨɨ!
Liyumokeni ɓʉ gɔ, gɔ, gɔ! › »
4Yʉanɨ i꞉nye pɨnya ɨpʉkʉ ngia ɓa꞉ɨkyɨa nʉ mata kʉ nama ngia ɓaamusoko ɓɔ ngamia, nʉ i꞉nye sanga 'ʉkaɓa wʉ ʉmba wʉ nama akʉ ɨɓʉnɨ. I꞉nye dya ɓanimene nʉ ɨɓɔkɔ. 5Ɓombi ɓʉ gʉlʉ ʉ Yelusalɛma, ɓombi kʉ ɓuɓomu ɓʉ gɨpa ʉ Yudɛa, nʉ ɓagɨpa ngiɓa ɓʉ ɨtɛtɛtɛ yɨ ɗei ngia ɓaamusoko ɓɔ Yɔlɔdanɨ, ɓi꞉nye sa akʉ i꞉nye‑ɛɛ. 6Iya ɓi꞉nye panzaka ɓʉɓɨɓɨ ngiɓʉndaɓʉ, kija Yʉanɨ i꞉nye ɓuɓatiso tiga amati ʉ ɗei ʉ Yɔlɔdanɨ.
7Iya a꞉na Ɓafalisayɔ nʉ Ɓasadukayɔ ɓaja, kʉka ɓɔ ɓʉɓʉɓatiso, gʉ ɛyɔ naɓɔ ɓɔ: « Inu ɓazɨɨ ngiɓa, anɨ ʉnɨpanɨa kʉchwɨa 'ʉnganga ngua wʉ Asʉɓɨɨ bangʉ, uwa wa kʉka? 8Pananiseni tɔ ɨkyananakɨa ngia yambiiso kingono ɓɔ na꞉nicho mɨtʉma ngiindɛnʉ nichoo. 9Nɔɔɓiokɔmʉ kutunguo amati ʉ mɨtʉma ngiindɛnʉ ɓɔ: ‹ Isu ka yɨndɛsʉ ɓanɔnɔ ɓʉ Abalama! › Jʉ maninu kʉɓɨa kingono ɓɔ, Asʉɓɨɨ a tʉkʉ ikanzi ngia akwanana kʉnɨtanakiso mukopi ngikakɛ kʉka ɓanɔnɔ ɓʉ Abalama. 10Angbaka a tiga 'ʉnapɨɛ akʉ litindi‑tindi lʉ matɨ. Kʉ ɓwanɨ, ɓʉtɨ ngiɓa ɓambʉkʉmɔ lipumo lɔɔ manzanza ɓa꞊ɓʉkwaka kwakaa, ɓambuɓugiso akʉ dyaa. 11Ɛmɛ maninu kuɓatiso amati ʉ mepo, kupananiso ɓɔ na꞉nicho mɨtʉma ngiindɛnʉ nichoo. Ɨkyɛmɨngana, mombi ngia akʉka mbise asɛmɛ, anʉ angu nɛmɛ kʉɓaa tʉkʉ ɓʉ chɨla chɨla. Nʉ ɛmɛ mambʉkɔmʉ 'ʉkwananakɛ gʉkʉ ɗɛkɛkɛ kuɓono miki yɨ lɨkpakʉ ngilangɔ. Ɛyɔ a꞊niɓatiso ɓisi nʉ 'Ʉtʉma wɔɔ Tu nʉ dyaa. 12Ɛyɔ anʉ lunga akʉ lɨkɔndɔ ngilangɔ kʉpɨka nganʉ. A꞊mʉma nganʉ amati ʉ ɨkáa yɨ masɔɔ ngiangɔ, kija a꞊ya lɨpapɨ lɔngɔ akʉ dyaa ngia yambakaimunio. »
Yʉanɨ uɓatiso Yeso
(Mak 1:9-11; Luk 3:21-22)
13Ɓisi mʉngana, Yeso a꞉ʉngwa akʉ gɨpa ʉ Galilaya, ambʉɓʉya anambamba ʉ ɗei ʉ Yɔlɔdanɨ, Yʉanɨ ambumuɓatiso. 14Ɨkyɛmɨngana, Yʉanɨ a꞉yaa‑zʉ tʉkʉ yaa, gʉ ɛyɔ ɓɔ: « Gʉ kʉ ɗɛkɛkɛ! Ɔwɛ kʉ wʉkwanana nɛmɛ kuɓatiso ɛmɛ. Jʉtanɨ wʉka tiga ya andɛmɛ? » 15Gʉ Yeso nayɔ aka ɓɔ: « Baya‑zʉ tʉkʉ bayaa. Jʉ nɨngbaa ngiinanɨ iiya kakwanana‑ɔɔ kʉkyananakɨa moni ngika Asʉɓɨɨ akʉkʉnda ɓɔ kʉkyɨa. » Kija Yʉanɨ a꞉baya tiga aka.
16Iya Yeso a꞉kwa nayɔ uɓatiso, tʉkʉ nɨma ngiinanɨ, ambʉɓʉa anizini. Kija ɓisi ekoo ɓa꞉gananɨa, ambʉna 'Ʉtʉma wʉ Asʉɓɨɨ kijo ndʉ ɨvaka‑vaka, wambuwulo ekoo angɔ. 17Kija iyo mɨngana ya꞉kɔnɨɔ ekoo ʉ ɓisi kusigo ɓɔ: « Mwana ngiasɛmɛ wʉ ɓʉkʉnda iyakɛ. Maakwa ɨgyagya ekoo angɔ! »
လက်ရှိရွေးချယ်ထားမှု
Matayɔ 3: BudKoya
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2021, Wycliffe Bible Translators, Inc.