Matayo 9
9
Jesu kumuboesa mundu wa kupooza
(Marko 2:1-12; Luka 5:17-26)
1Nao Jesu kajoka mashua, kawambuka kaghenda kele muzi ghwake ghwenyi. 2Nao wakamletela mundu wa ukongo ghwa kupooza anarage ulilini. Naye Jesu aghenda aona idumusi lyawe, kamuza mundu wa ukongo ghwa kupooza, “Swaoghe mwana wangu! Kaung'a zako zafwilo waya.” 3Nao wamoju wa walimu wa Sheria wakaghora wenyi kwa wenyi, “Uyu mundu waghora masholi kwa Mlungu.” 4Ela Jesu kemanya maririkanyo ghawe, kaghora, “Kudani mririkanya ghawase ngoloni kwenyu? 5Ni lyio lyiwanguwe? Kughora, ‘Kaung'a zako zafwilo waya’ ango kughora, ‘Uka ughende’? 6Ela eri mumanye kamba Mwana wa Mdamu uwo na ndighi urumenguni kufwila waya,” kamuza ulya mkongo wa kupooza, “Uka, uuse ulili ghwako na ugale nyumba kwako.” 7Nao ulya mundu kauka kagala. 8Nao makoghano waona agha wakangilo ni wogha, wakamlika Mlungu uyu ahawile wandu ndighi sezo.
Jesu kumpang'a Matayo amwirime
(Marko 2:13-17; Luka 5:27-32)
9Nao ilyi Jesu eluo kefuma alye, kamwona mundu mumoju aitogho Matayo kitembo kele ofisi ya kodi, kamuza “Niirime.” Naye Matayo kauka kamwirima.
10Nao ilyi Jesu ekalile kitembo mezeni kelya kele nyumba ya Matayo, wafunyi kodi na wakaung'a wengi wekeja wakakala kitembo na Jesu na wairimi wake. 11Nao Wafarisayo waona agha wakawauza wairimi wake, “Kudani mwalimu wenyu alyanya na wafunyi kodi na wakaung'a?” 12Ela Jesu aghenda asikila hung'u, kaghora, “Wandu weo banana siwashayagha mghanga, sala awa weo wakongo. 13Ghendeni mkufundise kutambula kwa agha, ‘Nanashaile mbazi, na si sadaka.’ Kwani sijile kuwapang'a wandu wa hachi kungi sala wakaung'a.”
Ikotelo ighulu ya kufunga kulya
(Marko 2:18-22; Luka 5:33-39)
14Nao wairimi wa Johana wakamjila Jesu wakamkotela, “Kudani isi na Wafarisayo tifungagha kulya ngelo nyingi, ela wairimi wako siwafungagha?” 15Jesu kawatumbulila, “Ado waichi wa Bwana harusi wanafurusagha ngelo Bwana harusi ewo ngila mojori nawo? Ela ngelo ikujagha Bwana harusi efunyogho kwawe, na niyo ijekala ngelo yawe yefunga kulya.
16“Sikwesi mundungi angizagha kiraka cha nguo kiishi kele nguo ya kale, kwani kiraka kiishi chiirashuragha nguo na ijuzilike kurashuka. 17Hata wandu siwangizagha divei mbishi kele viriba va kale, ango wakaingiza irashuragha viriba na divei itike na viriba vihakilike. Ela divei mbishi yanangizogho kele viriba viishi eri vose vili vikale kirani.”
Mchana wa ofisa mumoju na muke awatile nguo ya Jesu
(Marko 5:21-43; Luka 8:40-56)
18Nao ilyi Jesu eluo keghora hung'u, keja ofisa mumoju wa Wayahudi kamudyaila ngokoro kemuza, “Mchana wangu wafwa indakwenyi, ela njuu umwikilile mkonu eri akale moyo.” 19Nao Jesu kauka kairimana naye ngila mojori na wairimi wake.
20Nao muke mumoju eluo kesirima na ukongo ghofunya bighati miaka ikumi na mili keja nyuma ya Jesu kawata kitambi cha nguo yake, 21keghora mwenyi, “Nikawata tu nguo yake nibowagha.” 22Nao Jesu kaghaluka, kamwona na kamuza “Swaoghe mwanwangu, idumusi lyako lyakuboesa.” Nao iyo ngelo yenyi ulya muke kaboa.
23Nao Jesu abusa nyumba kwa ulya ofisa kaona wakwiti nguli na wandu wengi wekelila 24kaghora, “Fumeni, Kwani uyu mchana safwile anduangi ela ondetungura.” Nawo wakamseka. 25Nao wandu waghenda wafunyo shighati, Jesu kangila kamwata ulya mchana mkonu, naye kauka. 26Nao uvoro ughu ghukaera isanga lyose.
Jesu kuboesa vifondo waili
27Nao ilyi Jesu eluo keita kufuma alye, kairimo ni wandu waili vifondo weluo wekekema, “Ee Mwana wa Daudi, tifwile waya.” 28Nao Jesu angila nyumba, walye wandu waili vifondo wakamjila, naye Jesu kawauza, “Mwadumusa kamba nadima kumuboesa-ba?” Nawo wakamuza, “Ee Bwana!” 29Nao Jesu kawata meso ghawe kewauza, “Siikale selyi mwadumusa.” 30Nao awoenyi meso ghawe ghakafunguka. Naye Jesu kawaonya na ndighi, “Manyeni simwamghorere mundungi malagho agha.” 31Ela wakafuma na kueresa uvoro ghwa Jesu isanga lyilya lyose.
Jesu kumuboesa bubu
32Nao ilyi weluo wekeghenda, Jesu kaletelo mundu bubu eluo na pepo. 33Nao ilya pepo ighenda iguso, ulya mundu wa pepo kadyowa kughora; na wandu wose wakashinika, wakaghamba, “Na lyingi sitionile ilagho selyi kele Israeli.” 34Ela Wafarisayo wakaghora, “Wagusa pepo kwa ndighi za mubwaa wa pepo.”
Jesu kuwafwila waya wandu
35Nao Jesu kaghenda kele mizi yose mibwaa na michache, kefundisa kele sinagogi na kuchila Ilagho Lyaloli lya Uzuri na kuboesa makongo ghose na manyonge gha kila mbari. 36Nao aghenda aona makoghano, kawafwila waya, kwani weluo wasirima na siwewesi wa kuwawarura sa ng'onzi sizewesi mlisa. 37Kwa hung'u kawauza wairimi wake, “Mvono ni mungi ela wadei kazi ni wachache. 38Mlombeni Bwana wa mvono atume wadei kazi kukwasha mvono ghwake.”
လက်ရှိရွေးချယ်ထားမှု
Matayo 9: SAGALLANT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
(C) The Bible Society of Kenya, 1993
Matayo 9
9
Jesu kumuboesa mundu wa kupooza
(Marko 2:1-12; Luka 5:17-26)
1Nao Jesu kajoka mashua, kawambuka kaghenda kele muzi ghwake ghwenyi. 2Nao wakamletela mundu wa ukongo ghwa kupooza anarage ulilini. Naye Jesu aghenda aona idumusi lyawe, kamuza mundu wa ukongo ghwa kupooza, “Swaoghe mwana wangu! Kaung'a zako zafwilo waya.” 3Nao wamoju wa walimu wa Sheria wakaghora wenyi kwa wenyi, “Uyu mundu waghora masholi kwa Mlungu.” 4Ela Jesu kemanya maririkanyo ghawe, kaghora, “Kudani mririkanya ghawase ngoloni kwenyu? 5Ni lyio lyiwanguwe? Kughora, ‘Kaung'a zako zafwilo waya’ ango kughora, ‘Uka ughende’? 6Ela eri mumanye kamba Mwana wa Mdamu uwo na ndighi urumenguni kufwila waya,” kamuza ulya mkongo wa kupooza, “Uka, uuse ulili ghwako na ugale nyumba kwako.” 7Nao ulya mundu kauka kagala. 8Nao makoghano waona agha wakangilo ni wogha, wakamlika Mlungu uyu ahawile wandu ndighi sezo.
Jesu kumpang'a Matayo amwirime
(Marko 2:13-17; Luka 5:27-32)
9Nao ilyi Jesu eluo kefuma alye, kamwona mundu mumoju aitogho Matayo kitembo kele ofisi ya kodi, kamuza “Niirime.” Naye Matayo kauka kamwirima.
10Nao ilyi Jesu ekalile kitembo mezeni kelya kele nyumba ya Matayo, wafunyi kodi na wakaung'a wengi wekeja wakakala kitembo na Jesu na wairimi wake. 11Nao Wafarisayo waona agha wakawauza wairimi wake, “Kudani mwalimu wenyu alyanya na wafunyi kodi na wakaung'a?” 12Ela Jesu aghenda asikila hung'u, kaghora, “Wandu weo banana siwashayagha mghanga, sala awa weo wakongo. 13Ghendeni mkufundise kutambula kwa agha, ‘Nanashaile mbazi, na si sadaka.’ Kwani sijile kuwapang'a wandu wa hachi kungi sala wakaung'a.”
Ikotelo ighulu ya kufunga kulya
(Marko 2:18-22; Luka 5:33-39)
14Nao wairimi wa Johana wakamjila Jesu wakamkotela, “Kudani isi na Wafarisayo tifungagha kulya ngelo nyingi, ela wairimi wako siwafungagha?” 15Jesu kawatumbulila, “Ado waichi wa Bwana harusi wanafurusagha ngelo Bwana harusi ewo ngila mojori nawo? Ela ngelo ikujagha Bwana harusi efunyogho kwawe, na niyo ijekala ngelo yawe yefunga kulya.
16“Sikwesi mundungi angizagha kiraka cha nguo kiishi kele nguo ya kale, kwani kiraka kiishi chiirashuragha nguo na ijuzilike kurashuka. 17Hata wandu siwangizagha divei mbishi kele viriba va kale, ango wakaingiza irashuragha viriba na divei itike na viriba vihakilike. Ela divei mbishi yanangizogho kele viriba viishi eri vose vili vikale kirani.”
Mchana wa ofisa mumoju na muke awatile nguo ya Jesu
(Marko 5:21-43; Luka 8:40-56)
18Nao ilyi Jesu eluo keghora hung'u, keja ofisa mumoju wa Wayahudi kamudyaila ngokoro kemuza, “Mchana wangu wafwa indakwenyi, ela njuu umwikilile mkonu eri akale moyo.” 19Nao Jesu kauka kairimana naye ngila mojori na wairimi wake.
20Nao muke mumoju eluo kesirima na ukongo ghofunya bighati miaka ikumi na mili keja nyuma ya Jesu kawata kitambi cha nguo yake, 21keghora mwenyi, “Nikawata tu nguo yake nibowagha.” 22Nao Jesu kaghaluka, kamwona na kamuza “Swaoghe mwanwangu, idumusi lyako lyakuboesa.” Nao iyo ngelo yenyi ulya muke kaboa.
23Nao Jesu abusa nyumba kwa ulya ofisa kaona wakwiti nguli na wandu wengi wekelila 24kaghora, “Fumeni, Kwani uyu mchana safwile anduangi ela ondetungura.” Nawo wakamseka. 25Nao wandu waghenda wafunyo shighati, Jesu kangila kamwata ulya mchana mkonu, naye kauka. 26Nao uvoro ughu ghukaera isanga lyose.
Jesu kuboesa vifondo waili
27Nao ilyi Jesu eluo keita kufuma alye, kairimo ni wandu waili vifondo weluo wekekema, “Ee Mwana wa Daudi, tifwile waya.” 28Nao Jesu angila nyumba, walye wandu waili vifondo wakamjila, naye Jesu kawauza, “Mwadumusa kamba nadima kumuboesa-ba?” Nawo wakamuza, “Ee Bwana!” 29Nao Jesu kawata meso ghawe kewauza, “Siikale selyi mwadumusa.” 30Nao awoenyi meso ghawe ghakafunguka. Naye Jesu kawaonya na ndighi, “Manyeni simwamghorere mundungi malagho agha.” 31Ela wakafuma na kueresa uvoro ghwa Jesu isanga lyilya lyose.
Jesu kumuboesa bubu
32Nao ilyi weluo wekeghenda, Jesu kaletelo mundu bubu eluo na pepo. 33Nao ilya pepo ighenda iguso, ulya mundu wa pepo kadyowa kughora; na wandu wose wakashinika, wakaghamba, “Na lyingi sitionile ilagho selyi kele Israeli.” 34Ela Wafarisayo wakaghora, “Wagusa pepo kwa ndighi za mubwaa wa pepo.”
Jesu kuwafwila waya wandu
35Nao Jesu kaghenda kele mizi yose mibwaa na michache, kefundisa kele sinagogi na kuchila Ilagho Lyaloli lya Uzuri na kuboesa makongo ghose na manyonge gha kila mbari. 36Nao aghenda aona makoghano, kawafwila waya, kwani weluo wasirima na siwewesi wa kuwawarura sa ng'onzi sizewesi mlisa. 37Kwa hung'u kawauza wairimi wake, “Mvono ni mungi ela wadei kazi ni wachache. 38Mlombeni Bwana wa mvono atume wadei kazi kukwasha mvono ghwake.”
လက်ရှိရွေးချယ်ထားမှု
:
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
(C) The Bible Society of Kenya, 1993