Ro i Som Muro 2
2
Rin Masapai Yes Mwen i Pentekos
1Mwen ti Pentekos ti ru, shak som koltifai sin ta kyel andek. 2Sin yus ta andi sik, Fo abet si hal se nin fu' ta fit fota uvuta ti njeng, hya ta wur ima sin ta. 3Si ɗing ɗama nin fota alis i man ɗorus hai, matkar ta hihai ames shak. 4Unai shak asussi si hya ti Rin Masapai si fur findelal ti alisas akat-akat tasi ngga' ima Rin Masapai fas shang ti findel ta.
5Myan mai, shini Ju, ima si mwen DeeƁwe fo si yes ta ramam wi, si mati mute ta Yerushalima. 6Ti hal ti ruwan i sei, ɗufal si suɓut ta kyel andek, a ɗingi lumus fwai ya, ɓurti shak ɗufali si hal ti findelal ima si laki ti alisas ima si laki. 7Aɗengi fas shok na fwai fwet, si far ɗama i laki wet, si ni, “Ka nyai ɗufal mii i ta Galili hoo? 8Atini shak a sikani ka halsus sin findelal ti alisas amukan ya? 9Kan mi a ɗufal ta Fartya, Medya, Elam, Mesofotamya, Judya, Kafadokya, Pontus, Asya, 10Firija, Pamfilya, ta Masar, hu ɓwayi i Libya hu kikyal i Sairin hu mwalmwat ta Rom, 11(a som Ju, hu ima si hatat ta kyel i koltifai i Ju hwak), Kirit hu Arabya. Shak asinini ni halsus sin findelal si roha munjengani ima DeeƁwe masi, ti alis aminin.” 12Shak asussi si shok na fwai, si far aɗeng i laki wet, sin lak ti ɗiyai nyai “Ami mai hwak ya?”
13Shini sin masus gbaf hai nyai, “Mi ɗufali si wo a likit si fiil.”
Findel i Ma Pita Lak Ɗufal Mwen ti Got i Pentekos
14Unai Pita luk fit mangra akul hu hure mulang andeki, findel ti la mbai nyus, “Hun shunun, hu shak ɗufal i Judya, hu ɗufal ima si ti mute na Yerushalima hal huni, ɓuhun mwal ya hu hal aɗeng ima i wa laksu. 15Mii ɗufali sima fiil kwa ta ngga' ima hu mbe'i ta, mwashi a shitam karfu' ti mwen kek wa. 16Aɗeng ima ai Jwel mashit lak mai nyai,
17“ ‘DeeƁwe ni,
Mukonan i anggwe' i wa shwaiti Rin amen
nasi ɗufal hai shak.
Femu muryai hu murwafi
si wa lak ti findel fota mashit.
Fe i waya amu si wa ɗing ti ɗamam ta fiɗyat,
kaya amu hwak si wa fiɗyat hai fiɗyat.
18Angga'i nai, nasi mukonan mii hwak,
I wa shwaiti Rin amen
tasi yarai amen arya ta arofi,
si wa lak ti findel fota mashit.
19I wa kofti ɗamam i lum na fo ya na fit,
hu ɗamam i shok na fo na naya,
wash, hu man, hu kikis makyawi.
20Kweneng i ɓwe ma wa hatat ii maɓing,
Ture ma wa cujuwat fota wash,
Ɗak mwen ndiyi hu cinjangat i Deembai yes.
21Mawa mute nasi myan mii,
shak maɗufal ima lai asum i Deembai
ma wa wisti bum.’#2:21 Ɗing huni hwak: Jwo 2:28-32.
22“A ɗufal i Isar'ila, hal hun findel mai. Yeso i Nazaret a maɗufal ima DeeƁwe shangus ndere. DeeƁwe kof mai ta fisel ti roha i lum na fo ya, hu i shok na fwai, hu mbayai i ɗamam ima Yeso masi na saa yuti. Ta ngga' ima hun ti haisu hu shangita, hu ɗingi ti shishat amu. 23DeeƁwe shang aɗeng ima ma wa mufur, hu aɗeng ima ai kin ta mulut wi, myan ima si cu kwinik i Yeso. Ti ɓweng ti sai i ramam mufwashi, hu nggwakus tasi shanggami hai, ɗak hu forus. 24Shak ta andiyi DeeƁwe matus ya ta ra i mot wi, luktus fit ta fiyai, ɓurti mot ti ndok ti ka'us ta fiyai wi kwa. 25Devid findel si yis hai ni,
“ ‘Ngang i ɗyangan ti Deembai nggas ti yin,
Ɓurti mana rai ucwa men,
ami ma wa kinsun i mwen ya?
26Ɓurti andi i pipel na mulut,
fo amen ma tang ti ador i jakak fwet,
lo' amen ma lafos ta kintiɓwi wi hwak.
27Ɓurti andi ma wa honsun ta fiyai kwa,
ahun u hon Masapai ames u rut kwa.
28Kofa yun fisel ti mupwet.
Ha wa hyasun ti jakak
ɓurti ha ma akul hu yin ngang.’#2:28 Ɗing huni hwak: Nak 16:8-11.
29“A shunun Isar'ila, i wa laksu findel kaciwa' myanat tasi hai i wash amukan mbai Devid. Tuu motus, fiyai ames ma akul hu kan yes kwai. 30Shak ta andi, yis hwak a mashit, shangi DeeƁwe fas findel i kintiɓwi ti shiɗat nyai, ma wa no' ti ɗeng i gung ames tasi kunggul i kaitat hai. 31Devid ɗingi hwak hati, unai findel si muluk fit i Kristi ta fiyai, nyai si wa honsus ta fiyai wi kwa, lo' ames hwak ma wa ɗarut kwa. 32DeeƁwe ha' Yeso mai fit, shak asinini ni ɗingi. 33DeeƁwe fas ngye ta rai ucwa ames, mat Rin Masapai ta kyel i Dee ngga ima masus findel i kintiɓwi ta. Mwashi ayis nai shunin ni hai. Ayis yes ti aɗeng ima hu ɗingi mai, hu ma hali hwak. 34A Devid ɗu ta fit kwa, shak ta andiyi yis ti haisus ni,
“ ‘Deembai lak Deembai amen ni,
“Teha amun na rai ucwa amen,
35Yes myan ima i wa kinti myayun
i wei ii kyel i shwaiti sisai ama.” ’#2:35 Ɗing huni hwak: Nak 110:1.
36“Ɓurti andi, shak ɗufal i Isar'ila ɓa si shangi nyai, Yeso mai ima hu nggwakus, DeeƁwe kinus ii Deembai hu Kristi.”
37Ti hal ti mai, findeli ngge'us mulwat, unai si lak Pita hu anggum i som muro i Yeso nyai, “A shunun, ni wa masi atini ya?”
38Unai Pita nyus, “Kabuk hun, si masu batisma ti asum i Yeso Kristi, ɓurti ɓa u shuhu mafwashani amu ya. Ɗak hu mat mal i DeeƁwe, Rin Masapai. 39Ɓurti andi kintiɓwi mai, a mal amu, hu femu, hu shak ɗufal ima si ta maleng. Deembai DeeƁwe amukan ma wa laisus shak.”
40Unai cu wei ti laksus findelal hyang yis zulsus mwal hwak, yis masus taɓak nyai, “Bum hun hihai amu nasi ɗufal mufwashi ima si masti mute mabuu hi.” 41Ɗufal ima si fa mwawei, si mat findel ima Pita lak si masus batisma. Mweni si wis ɗufal nggal ataat ima si fa hihai i hai hwak.
Ngga' ima Mute i Som koltifai Te ta
42Shak asussi si fa hihaisus ta kofiti i som muro i Yeso ima sima masi, sin mataa hwak, sin cwai tikul ta kyel andek, sin fwal ti DeeƁwe. 43Unai myanat ka' ɗufal shak, ɓurti DeeƁwe cu wei ti masti ɗamam i lum na fo ya, hu i shok na fo hyang, ti Som Muro ames.
44Shak ɗufal ima si fa mwawei si bam hihai ya ta kyel andek, ɗamam ames a ta kyel andek ruɓus. 45Si juwyal yangang hu ɗamam ima si mati ya, si kaar ɗufal cefafi ta ngga' ima si ɗing tirimi ta. 46Si shwayan ta Wur i DeeƁwe ngang ti ambe' andek. Sin cwai ta kyel andek tikul ta wurai i ɗiyai, sin cwai sin woi ti pipelat na mulwat, ti ɓweti i mulut, 47ta adorai i ha' ti asum i DeeƁwe fit. Si wis aweng ta kyel ɗufal wi shak. DeeƁwe kwalus ɗufal ima si wis bum ngang.
လက်ရှိရွေးချယ်ထားမှု
Ro i Som Muro 2: AlisIRonNT
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© Wycliffe Bible Translators, Inc. and © The Nigeria Bible Translation Trust 2018