མ་ཏི། 5

ཡི་ཤུ་གི་ཕུ་ཐུང་ཀ་ཡེ་ཉི་གནང་མ༌ལ།

1སོ་ངོ་མང་ཨ་ཉི་ གཟིགས་པ་ཀབ་ཉི་ ཡི་ཤུ་ཕུ་ཐུང་ཀ་ཏཱན་ བྱོན་མ༌ལ། ཉི་ས་ག་བཞུགས་ཏེན་གེ་ རོ་ཀ་སློ་མ་བ་ རོ་ཀ་སྐུན་མདུན་ག་ཤེག་པ༌ལ། 2ཉི་རོ་ཀི་ ཨོ་ཐེན་གསུངས་ཉི་ ཡེ་ལེ་གོ་ཙུག་པ༌ལ།

3ཐུགས་ཉིད་ག་དུག་པུ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ཤོ་ རོག་ཏེ་བ་ཀ་གི༌ལ།

4གེབ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ སེམས་གསོ་ཨ་ཉི་གནང་མེ༌ཅ།

5ཉམ་ཆུང་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ འཛམ་གླིང་ རོག་ཏེ་བ་ཀི་ཉོང༌པེ།

6དཀོན་མཆོག་ག་སྤྱན་ག་ དྲང་པུ་རི་ལེ་དེན་གེ་ བི་ནང་ཁུ་ཉི་ རི་ནང་སོབ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ ཚིམ་པ་རི༌ལེ།

7སྙིང་རྗེ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ཀ་བུ་ སྙིང་རྗེ་ཀེ་ཉི་གནང༌མེ།

8སེམས་ཙང་མ་ཆོ་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་མཇལ་བེ་རེ༌བེ།

9སྐྱིད་པུ་ཅོད་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ རོག་ཏེ་བ་ དཀོན་མཆོག་ག་ སྲས་སྲས་མོ་ཨ་ཉི་ཆིན༌མེ།

10དཀོན་མཆོག་ག་སྤྱན་ག་ དྲང་པུ་རི་ལེ་གོད་པ་ཀབ་ཉི་ ཀ་ལུ་ཏཱད་ཁཱན་བ་ བྱིན་རླབས་ཅན་གི༌ལ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ཤོ་ རོག་ཏེ་བ་ཀ་གི༌ལ།

11ཇ་ག་ཡོར་ཀེ་ སོ་ངོ་བ་ཀི་ ན་ཧ་མེམ་ཅོར་ཉི་ ཀ་ལུ་ཅོད་ཉི་ ཉི་ན་ཧ་ཀོར་གེ་ སོ་ད་ཕི་ཉི་ ཨ་ལ་ཀབ་ཉི་ ན་ཧ་བ་ཤོ་ བྱིན་རླབས་ཅན་གི༌ལ། 12ཨུ་ཉུ་གང་ཀ་ ཤོ་ནང་ཕེ་ཉི་ ངལ་རངས་ཉི་ཆོའི། ཧང་ཡ་དག་ནེ་ལ་ ན་ཧ་དེན་གེ་ ཞིང་ཁམས་ག་ སེ་རབ་ཆི་ལུ་ཐ་ཝ༌ཅ། ན་ཧ་བ་ཀེ་གོ་མ་ཆོ་ཁཱན་ ལུང་བསྟན་པ་བ་ཀ་བུ་ རོག་ཏེ་བ་ཀི་ ཨོ་ཉེན་རང་ མ་ལེག་པ་ཨ་ཝ་ཆོ་ཝ༎

ཨིན་ཆ་དང་འོད་ཟེར།

13ན་ཧ་བ་ཤོ་ འཛམ་གླིང་ག་ཨིན་ཆ་གི༌ལ། དག་པ་ཀབ་ཉི་ ཨིན་ཆ་ག་བོརོ་མ་ཝ་རི་ནེ་ལ་ ཧང་ཏེན་ཨ་ཉི་ལོག་ཉི་རང་ བོརོ་ཆོ་ཝ་ཅོད་པེ་རེ་བེ་ཡ། ཨོ་ཉ་ཨིན་ཆ་ཁེ་པ་ ལའི་ཧང་རང་མ་ན་ཝ་རི་ཉི་ གེམ་ཀུན་ཏི་ལེ་ཁེན༌ཅ། ཉི་སོ་ངོ་བ་ཀི་ ཨོ་ཉ་ཨིན་ཆ་ཐུང་ཐུང་ བི་ཏབ་ཉི་རང་བུ༌ལེ།

14ན་ཧ་བ་ཤོ་ འཛམ་གླིང་ག་ འོད་ཟེར་གི༌ལ། ཕུ་ཐུང་ཀ་ཆག་ཁཱན་ ཁྲོམ་ཆེན་ཁེ་པ་ གུམ་ཐ་ལེ་མར་བ། 15སོ་ངོ་གི་ ལ་ཝང་ཐོག་ཐཱན་ ཤོ་མ་གི་ བུག་ཐ་ལུ་མཱན༌ཅ། དག་པ་ཀབ་ཉི་ ཕའི་ནང་ཀ་ཆོ་ཁཱན་ ཐམས་ཅན་རང་ དབང་པེ་དེན་གེ་ ག་ཙ་ཐུང་ཀ་ཀེ་ཉི་ཐཱན༌ཅ། 16ཨུ་ཉུ་པུརུས་ཀིན་ཨ་ཉི་ ན་ཧ་འོད་ཟེར་ སོ་ངོ་བ་ཀ་གུབ་ཀ་ཤར༌ཤོ། ན་ཤི་ཨ་ཁཱན་ལའི་ལེག་པུ་ཁེ་པ་ རོག་ཏེ་བ་ཀི་ཐོང་ཉི་ ཞིང་ཁམས་ག་བཞུགས་ཁཱན་ ན་ཧ་ཡབ་ག་ བསྟོད་པ་ཕུལ་ཆེན༎

མོ་ས་ག་བཀའ་ཁྲིམས་ཀོར་གེ་ ཡེན་གནང་མ༌ལ།

17ཇང་མོ་ས་ག་བཀའ་ཁྲིམས་བ་ ཡང་ན་ལ་ ལུང་བསྟན་པ་བ་ཀི་ འབྲི་ཁཱན་བ་ མ་ཝ་ཅོད་པེ་དེན་གེ་ ཨོ་ཕ་གི་ཝ་ལ་དག་ཉི་མ་མི། ཇང་ཤོ་ མ་ཝ་ཅོད་པེ་དེན་གེ་ ཨོ་ཕ་མང་གི་ཝ་ ལག་ཏང་ ཨོ་ཉ་བ་ ཐམས་ཅན་རང་ འགྲུབ་ཕེ་དེན་གེ་ ཨོ་ཕ་གི༌ལ། 18ཇི་གི་ ན་ཧ་ཐྲང་ཉི་ཡེག་ཅ་ ཞིང་ཁམས་དང་འཛམ་གླིང་ག་ བསྟན་པ་མ་ལུ་ཕ་སག་པུ་ བཀའ་ཁྲིམས་ག་ ཡི་གུ་ཟེ་མུ་ཐུར་དང་ ཚ་ཟེ་མུ་ཐུར་བུ་ དེན་ཐ་མ་འགྲུབ་ཕེ་གོ་མ་ ཡེ་ཉི་མ་དི༌ལ། 19ཨོ་ཉི་ཨ་དེན་གེ་ ཨི་བི་གི་ བཀའ་རྒྱ་ཟེ་མུ་ཐུར་ག་ ཆ་གནས་མ་ཐ་ལཱན་ བཱརའ་ག་བུ་ ཨུ་ཉུ་ད་བུ་རང་ ཡེ་ཉི་བི་ནེ་ལ་ ཨོ་ཉ་སོ་ངོ་ཁེ་པ་ ཞིང་ཁམས་ག་རྒྱལ་སྲིད་ག་ ཐམས་ཅན་གེ་ཟེ་མུ་ཆིན༌མེ། དག་པ་ཀབ་ཉི་ ཨི་བི་གི་ ཨོ་ཐ་བཀའ་རྒྱ་ག་ ཆ་གནས་ཐ་ཉི་ བཱརའ་ག་བུ་ ཨུ་ཉུ་ད་བུ་རང་ ཡེ་ཝ་ཐུར་ ཨོ་ཉ་སོ་ངོ་ཁེ་པ་ ཆི་ལུ་ཙི༌ལེ། 20ཧང་ཡ་དག་ནེ་ལ་ ཇི་གི་ ན་ཧ་ཡེག་ཅ་ བཀའ་ཁྲིམས་ག་ སློབ་དཔོན་བ་དང་ ཕ་རི་སི་པ་བ་ཀེ་ལག་ཉི་ ན་ཧ་བ་ཤོ་ དཀོན་མཆོག་ག་སྤྱན་ག་ དྲང་པུ་མ་ནེ་ལ་ ན་ཤི་ ཞིང་ཁམས་ག་རྒྱལ་སྲིད་ག་ ཧ་ལ་རང་ནུ་ཕེ་མར་བ༎

རོ་ག་ཀོར་གེ་ ཡེ་ཉི་གནང་མ༌ལ།

21ན་ཤི་ སོ་ངོ་ཤེ་ལེ་མང་ཕ། ཉི་ཨི་བི་གི་ཤེ་ཝ་ཐུར་ ཨོ་ཉ་སོ་ངོ་ག་ ཁྲིམས་ཅཱད་པེ་གི་ལ་དག་ཉི་ དང་པོ་ག་སོ་ངོ་བ་ཀི་ཡེག་པ་ག་ ན་ཐ་ཝ་ཨོ་ཕེ། 22དག་པ་ཀབ་ཉི་ ཇི་གི་ ན་ཧ་ཡེག་ཅ་ ཨི་བི་གི་ རོ་ཀ་ཡུང་ཟི་ཀབ་ཉི་ རོ་ཙིག་པ་ཐུར་ ཨོ་ཉ་སོ་ངོ་ག་ ཁྲིམས་ཅཱད་པེ་གི༌ལ། ཉི་ཨི་བི་གི་ རོ་ཀ་ཡུང་ཟི་ག་ མེམ་ཅོར་བ་ཐུར་ ཨོ་ཉ་སོ་ངོ་ཁེ་པ་ ཚོགས་པ་ཆི་ལུ་གུབ་ཀ་ཀེ༌བེ། ཉི་ཨི་བི་གི་ རོ་ཀ་ཡུང་ཟི་ག་ ནཱན་ཡོང་བ་དག་ཉི་ཡེག་པ་ཐུར་ ཨོ་ཉ་སོ་ངོ་ཁེ་པ་ དམྱལ་བ་ག་མི་ནང་ཀ་ དི་ལེ་ག་ཉེན་ཁ༌ཅ།

23ཨོ་ཉི་ཨ་དེན་གེ་ ནཱན་གི་དཀོན་མཆོག་ག་ མཆོད་པ་ཕུལ་བེ་དེན་གེ་ མཆོད་གཤམ་ར་ག་ཐིང་མ་ཀབ་ཉི་ ན་ག་ཡུང་ཟི་ཐུར་ཀབ་ཉི་ མ་དྲིག་པ་ག་ཡིད་ཀ་ཨ་ནེ་ལ་ 24ནཱན་གི་ཕུལ་བེ་ཅམ་ཁཱན མཆོད་པ་ཁེ་པ་ མཆོད་གཤམ་གུབ་ཀ་ ཐུབ་ཐཱན་ཐཱན་ གོ་མ་རང་ ན་ག་ཡུང་ཟི་ཀབ་ཉི་ཆམ༌ཤོ། ཉི་ཤ་ ལོག་ཉི་ཨུན་ཐཱན་ མཆོད་པ་ཕུལ༌ཤོ།

25ན་ག་དགྲ་བྱང་ཕིཤི་གི་ ནཱན་ཁྲིམས་ཁང་ག་ ཀེ་བེ་དེན་གེ་ རིག་བུ་ནེ་ལ་ ཁྲིམས་ཁང་ག་མ་ཤེག་པེ་གོ་མ་ རོག་ཀབ་ཉི་ཆམ༌ཤོ། ཨུ་ཉུ་མ་ནེ་ལ་ རོ་ཀི་ ནཱན་དྲང་དཔོན་ག་ཀེ༌བེ། ཉི་དྲང་དཔོན་གི་ ནཱན་ཁྲིམས་སྲུང་འགག་པ་ག་ ག་དང་ག་སྤྲོད་ཉི་ བཙོན་ག་ཙུག༌པེ། 26ཇི་གི་ ན་ག་ཐྲང་ཉི་ཡེག་ཅ་ ནཱན་གི་ཏི་རུ་ཐམས་ཅན་རང་ ཚང་པ་ཨ་ཉི་མ་ཏ་པ་སག་པུ་ ནཱན་བཙོན་གེ་མ་ཐར་བ༎

གཉེན་གྲོགས་གེ་ཕིས་ཀ་ ལུས་འབྲེལ།

27གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་མང་ཕ་ཨ་ཉི་ མོ་ས་ག་བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། 28དག་པ་ཀབ་ཉི་ ཇི་གི་ ན་ཧ་ཡེག་ཅ་ ཨི་བི་གི་ མེ་ཝག་ཙ་ཐུར་ག་ཏཱན་ སེམས་མ་ཙང་མ་མི་ཉི་ གོད་པ་ཐུར་ ཨོ་ཉ་སོ་ངོ་གི་ རོ་ཀ་སེམས་ནང་ཀ་ ཨོ་ཉ་མེ་ཝག་ཙ་ཀབ་ཉི་ གཉེན་གྲོགས་གེ་ཕིས་ཀ་ ལུས་འབྲེལ་ཨན་ཆུ་མ་གི༌ལ། 29ན་ཧ་མིང་ལོག་ཐུར་གི་ སྡིག་པ་ཨ་ལེ་རིག་ནེ་ལ་ ཨོ་ཉ་མིང་ཁེ་པ་ ཇེག་ཐཱན་གེམ་ཀུན་ཏི། ན་ཧ་ལུས་པུ་ ཐམས་ཅན་རང་ དམྱལ་བ་ག་དི་ཝ་གེ་ཏ་ མིང་ལོག་ཐུར་མ་ཝ་ཨ་ཉི་ཆོ་ཝ་དྲག༌པེ། 30ཉི་ན་ཧ་ག་དང་ལ་ཉོང་གི་ སྡིག་པ་ཨ་ལེ་རིག་ནེ་ལ་ ཨོ་ཉ་ག་དང་ལ་ཉོང་ཁེ་པ་ ཅཱད་གེམ་ཀུན་ཏི། ན་ཧ་ལུས་པུ་ ཐམས་ཅན་རང་ དམྱལ་བ་ག་དི་ཝ་གེ་ཏ་ ག་དང་ལོག་ཐུར་མ་ཝ་ཨ་ཉི་ཆོ་ཝ་དྲག༌པེ༎

ཁ་བེརེ་བེ་མ་ན་ཝ་ཀོར་གེ་ ཡེན་གནང་མ༌ལ།

31ཨི་བི་གི་ རོ་ཀ་མེ་ཝག་ཙ་ཀབ་ཉི་ ཁ་བེརེ་བ་ཐུར་ ཨོ་ཉ་སོ་ངོ་གི་ རོ་ཀ་མེ་ཝག་ཙ་ཀབ་ཉི་ ཁ་བེརེ་བ་གི་ལ་དག་ འགན་རྒྱ་ཅོད་ཉི་ བི་ལེ་ཁེ་ལེ་ཨ་ཉི་ མོ་ས་ག་བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། 32དག་པ་ཀབ་ཉི་ ཇི་གི་ ན་ཧ་ཡེག་ཅ་ མེ་ཝག་ཙ་གི་ དམ་ཚིག་མ་ཙུང་མ་ཆོ་ནེ་ཤ་ རོ་ཀི་ རོ་ཀ་མེ་ཝག་ཙ་ཀབ་ཉི་ ཁ་བེརེ་བེ་ཆོག༌པེ། ཨུ་ཉུ་མང་གི་ཝ་ག་ རོ་ཀ་མེ་ཝག་ཙ་ཀབ་ཉི་ ཁ་བེརེ་བ་ཆོ་ནེ་ལ་ རོ་ཀི་ རོ་ཀ་མེ་ཝག་ཙ་བཱརའ་ཀབ་ཉི་ གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་རིག་ཅ་གི༌ལ། ཉི་ཨི་བི་གི་ ཨོ་ཉ་མེ་ཝག་ཙ་ཀབ་ཉི་ གཉེན་ཕི་ཝ་ཐུར་ ཨོ་ཉ་སོ་ངོ་གི་ གཉེན་གྲོགས་གེ་ཕིས་ཀ་ ལུས་འབྲེལ་ཨན་ཅ་གི༌ལ༎

ཁས་བླངས་ཨ་ཝ་ཀོར་གེ་ ཡེན་གནང་མ༌ལ།

33ན་ཤི་མོ་ས་ག་ བཀའ་ཁྲིམས་གེ་ ན་ཟ་ལེ་མང་ཕ། ཉི་ན་ཤི་གཙོ་བོ་ཀབ་ཉི་ ཁས་བླངས་ཨ་ཝ་ཆོ་ནེ་ལ་ ཨུ་ཉུ་ཁེ་པ་ དེན་ཐ་འགྲུབ་ཕེ་རང་ཁེ་ལེ་དག་ཉི་ ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། 34དག་པ་ཀབ་ཉི་ ཇི་གི་ ན་ཧ་ཡེག་ཅ་ ན་ཤི་ཧ་ལ་རང་ ན་ཟ་ལེ་མང་ཕ། ཞིང་ཁམས་ག་མིང་གེ་ཨ་ཉི་ ན་མ་ཟའི། ཧང་ཡ་དག་ནེ་ལ་ ཞིང་ཁམས་ཤོ་ དཀོན་མཆོག་ག་ གསེར་ཁྲི་གི༌ལ། 35ཉི་འཛམ་གླིང་ག་མིང་གེ་ཨ་ཉི་ ན་མ་ཟའི། ཧང་ཡ་དག་ནེ་ལ་ འཛམ་གླིང་ཤོ་ དཀོན་མཆོག་ག་ ཞབས་ཐ་ས་བཱརང་གི༌ལ། ཉི་ཡ་རུ་ཤ་ལེམ་ག་མིང་གེ་ཨ་ཉི་བུ་ ན་མ་ཟའི། ཧང་ཡ་དག་ནེ་ལ་ ཡ་རུ་ཤ་ལེམ་ཤོ་ དཔོན་ཆི་ལུ་ག་ རྒྱལ་ས་ལྟེ་བ་གི༌ལ། 36ན་ཧ་ཤ་རང་ག་ཀེ་ཉི་ ན་མ་ཟའི། ཧང་ཡ་དག་ནེ་ལ་ ན་ཤི་ ན་ཧ་ཚམ་བུ་དང་ཐུར་བུ་ བ་ལིང་མིན་ཅོད་པེ་མར་བ། ཉི་ཆང་ལུ་བུ་ཅོད་པེ་མར་བ། 37དག་པ་ཀབ་ཉི་ ན་ཧ་ལན་ཤོ་ གི་ནེ་ལ་གི་ལ་ ཉི་མང་གི་ནེ་ལ་མང་གི་ཨ་ཉི་ ཨོ་ཕེ་ཁེ༌ལེ། ཉི་ཨོ་ཐ་གེ་ལག་ཉི་ཆོ་ནེ་ལ་ ངན་པ་གེ་གི༌ལ༎

ཧིང་འགྲམ་ག་ཀོར་གེ་ཡེན་གནང་མ༌ལ།

38ཨི་བི་གི་ ན་ག་མིང་ཕོག་པ་ཐུར་ རོ་ཀ་མིང་བུ་ཕོག་ཅོ། ཉི་ཨི་བི་གི་ ན་ག་ཤ་ཕོད་པ་ཐུར་ རོ་ཀ་བུ་ ཤ་ཕོད་ཉི་གེམ་ཤོ་དག་ཉི་ མོ་ས་ག་བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། 39དག་པ་ཀབ་ཉི་ ཇི་གི་ ན་ག་ཡེག་ཅ་ ངན་པ་སོ་ངོ་མ་ཁག་ཅོ། ལག་ཏང་ རོ་ཀི་ ན་ག་ལ་ཉོང་ལོ་ཀ་ ནེ་ཟ་ག་དེན་ཇ་ཀི་ཕིན་ག་ནེ་ལ་ མི་ཉོང་ལོ་ཀ་ནེ་ཟ་བུ་གིར་ཉི་ དོག་ཅོ་ཨ༌ཉི། 40ཨི་བི་གི་ ནཱན་ཁྲིམས་ཁང་ག་བུ་ཉི་ ན་ག་ཁེན་ཇ་བུན་ཅ་གི་ལ་སྨོ་ ན་ག་ཕིས་ཀ་ཁ་མུང་བུ་བི། 41སོ་ངོ་ཐུར་ཕང་གི་ རོ་ཀ་རོང་ མི་ད་ཚེ་ལྔ་ཕང་ བང་མེ་ག་ག་ནེ་ལ་ ནཱན་གི་མི་ད་ཚེ་སེ་ཕང་ བང་ཉི་བི། 42ནཱན་གེ་ཕུན་ནེ་ལ་ རོ་ཀ་བི། ཨི་བི་གི་རང་གི་ནེ་བུ་ ནཱན་གེ་ཆི་ལེ་ག་ཤེག་ནེ་ལ་ ཆི་ལེ་ག་བི༎

སྙིང་རྗེ་ག་ཀོར་གེ་ ཡེ་ཉི་གནང་མ༌ལ།

43ན་ཤི་ ན་ཧ་ནོག་མིན་བ་ཕང་ཅོ། ཉི་ན་ཧ་དགྲ་བྱང་ཕིཤི་བ་ མ་ཟེས་ཅོ་དག་ཉི་ མོ་ས་ག་བཀའ་ཁྲིམས་གེ་ཤོ་ཁཱན་ཁེ་པ་ ན་ཤི་ན་ཐ་ཝ༌ཅ། 44དག་པ་ཀབ་ཉི་ ཇི་གི་ ན་ཧ་ཡེག་པེ་ ན་ཧ་དགྲ་བྱང་ཕིཤི་བ་ཕང་ཅོ། ཉི་ན་ཧ་ ཀ་ལུ་ཏཱད་ཁཱན་བ་ཀ་དེན་གེ་ སྨོན་ལམ་ཏབ་ཅོ། 45ཉི་ཤ་ ན་ཧ་བ་ ཞིང་ཁམས་ག་བཞུགས་ཁཱན་ ན་ཧ་ཡབ་ག་ སྲས་སྲས་མོ་རི༌ལེ། ཧང་ཡ་དག་ནེ་ལ་ རོ་ཀི་སོ་ངོ་ལེག་པུ་དང་མ་ལེག་པ་ ཐམས་ཅན་ག་དེན་གེ་ ངམ་ཚ་ལེ་བིན་གནང༌ཅ། ཉི་དྲང་པུ་ཆོ་ཁཱན་དང་ དྲང་པུ་མ་ཁཱན་ ཉིག་ཙིང་ག་རང་ རོ་ཀི་ངམ་སུ་ཀུན་ཏིན་གནང༌ཅ། 46ན་ཧ་ཏཱན་ ཕང་ཁཱན་བ་ཤ་ཕང་ནེ་ལ་ ན་ཤི་ཧང་ཨ་ཉི་ སེ་རབ་ཉོང་པེ་ཡ། ཨུ་ཉུ་ད་བུ་ཏ་ ཁྲལ་ཐེབ་དུས་ཁཱན་ སྡིག་ཅན་བ་ཀི་བུ་ཨན༌ཅ། 47ན་ཤི་ ན་ཧ་ཡུང་ཟི་བ་ཀ་ཤ་ སྐུ་གཟུགས་བཟང་པོ་དག་ཉི་ ཡེག་ནེ་ལ་ བཱརའ་གེ་ལག་ཉི་ ན་ཤི་ཧང་ཨ་ཝ་ཅ་ཡ། ཨུ་ཉུ་ད་བུ་ཏ་ དད་པ་མ་ཨ་ཁཱན་བ་ཀི་བུ་ཨན༌ཅ། 48ན་ཧ་བ་ཤོ་ ཅོན་ད་སུ་རང་མ་ཝ་ཨོ་ཕེ་ཁེ༌ལེ། ཧང་ཡ་དག་ནེ་ལ་ ཞིང་ཁམས་ག་བཞུགས་ཁཱན་ ན་ཧ་ཡབ་བུ་ ཅོན་ད་སུ་རང་མ་ཝ༌ཅ༎

လက်ရှိရွေးချယ်ထားမှု

མ་ཏི། 5: TNTB

အရောင်မှတ်ချက်

မျှဝေရန်

ကူးယူ