मत्ती 2
2
पूरब कनु कई ज्योतिषी आले
1हेरोदेस राजे चे ङिहां मां जिसे बेले यहूदिया चे बैतलहम मां ईशु चा जनम हुला तां पूरब कनु कई ज्योतिषी लौक यरुशलेम मां आती कर पूछु लाग़ले, 2यहूदिया चा राजा जाया जनम हुला, किठे छै? कांकि अम्ही पूरब मां ओचा तारा ङेखला ते ओनु प्रणाम करने वास्ते आले।
3ईं सुणती कर हेरोदेस राजा ते ओचे लारे यरुशलेम चे सारे लौक घब़राती गेले। 4बल्ति ओणे लौका चे सारे प्रधान याजका नु ते शास्त्रीया नु भेले करती कर वाकनु पूछले “मसीह चा जनम किठे हुवणा चाही छै?” 5वाणे ओनु केहले, “यहूदिया चे बैतलहम मां, कांकि भविष्यवक्ता चे जरिये ईं लिखले आले छै।
6“ ‘हे बैतलहम, तु जको यहूदा चे प्रदेस मां छी,
तु कुई वी रीति लारे यहूदा चे
अधिकारीया मां सबकनु छोटा कोनी,
कांकि दुधे महु हेक अधिपति निकली,
जको माई प्रजा इस्राएल ची रखवाली करी।’ ”
7बल्ति हेरोदेस ने ज्योतिषिया नु चोप-चाप हकारती कर वाकनु पूछले कि तारा ठीक किसे बेले ङिसला हुता, 8ते ओणे ईं केहती वानु बैतलहम भेज़ले जावा ओ ब़ाला चे बारे मां ठीक-ठीक पता करा, ते जिसे बेले मिलती जाये तां मनु बावड़जा कि मैं वी आती कर ओनु प्रणाम करे।
9वे राजे ची बात सुणती कर चाह्ले गेले, ते जको तारा वाणे पूरब मां ङेखला हुता ओ वांचे आग़ु-आग़ु टुरला, ते जिठे ऊं ब़ाल हुते, वे जग़हा चे उपर रुकती गेला। 10ओ तारे नु ङेखती कर वे ब़ोहत खौश हुती गेले 11बल्ति वे घरा चे भीतर गेले ते वाणे ओची आई मरियम लारे ब़ाला चे वी दर्शन करले ते वाणे ओनु मत्थे टेकले ते आपणा-आपणा थैला खोलती कर ओनु सोने, ते लोबान, ते गन्धरस ची भेंट चढ़ाली। 12तब नरीकारा ने वानु हेक खाबा मां चौकस करती ङिले, कि हेरोदेस चे गोढु बल्ति ना जजा, वे ङुजे मार्ग़ा कनु आपणे देशा नु चाह्ले गेले।
मिस्र नु चाह्ले गेले
13ज्योतिषिया चे चाह्ले जाणे चे बाद, यूसुफ नु खाबा मां प्रभु चा हेक स्वर्ग़दूत ङिसला ते ओणे केहले, “उठती कर ब़ाला नु ते ओची आई नु गेहती कर चोप-चाप करती मिस्र नु चाह्ला जा, ते जब तक मैं ना किहे, तब तक उठी रिहो, कांकि हेरोदेस ऐ ब़ाला नु सोता फिरे कि ओनु मरवाती नाखे।” 14यूसुफ खड़ा हुला ते ब़ाला नु ते ओची आई नु गेहती कर राती नु ही मिस्र वास्ते टुरती पला। 15ते हेरोदेस चे मरणे तक यूसुफ उठी रेहला। ईं ऐवास्ते हुले कि प्रभु ने भविष्यवक्ता चे जरिये जको केहले ले पुरे हो सग़ो, “मैं आपणे पूता नु मिस्र कनु हकारले।”
ब़ाला नु मारणे
16हेरोदेस ने जिसे बेले ईं ङेखले कि ज्योतिषिया ने माये लारे धोक्का करला, ओनु गुस्सा आला, ते लौका नु भेज़ती कर, ज्योतिषिया चे केहले आले समय चे अनुसार, बैतलहम ते ओचे आस-पास ची जग़हा चे सारे छोरा नु जको ङुंहु साला ची जा वाकनु छोटी हुती मरवाती नाखले।
17बल्ति जको वचन भविष्यवक्ता यिर्मयाह चे जरिये केहला गेला पूरा हुला।
18“रामाह गांवा मां ङोख भरला आला हेक शब्द सुणला गेला,
रोवणे ची अवाज ते ब़ोहत ङुखा ची बात,
राहेल आपणे ब़ाला चे वास्ते रोवे पलती,
ते वा चोप ना हुवणे चाहवेली,
कांकि वे ब़ाले मरती गेलती।”
मिस्र देशा कनु वापिस आला
19बल्ति हेरोदेस ची मौत चे बाद मिस्र मां यूसुफ चे खाबा मां प्रभु चा स्वर्ग़दूत प्रकट हुला, 20ओनु केहले, “ऊठ आपणे ब़ाला नु ते ओची आई नु गेहती कर इस्राएल ची धरती उपर चाह्ला जा कांकि जको ब़ाला ची जान गेहणे आले हुते, वे मरती गेले।” 21यूसुफ खड़ा हुला ते ब़ाला नु ते ओची आई नु गेहती कर इस्राएल देशा मां पुज़ला।
22बल्ति जिसे बेले यूसुफ ने ईं सुणले कि यहूदिया उपर आपणे ब़ा हेरोदेस ची जग़हा उपर अरखिलाउस राज़ करु लाग़ला ते ओ ओठे जाणे कनु ङरु लाग़ती गेला, बल्ति खाबा मां नरीकारा ची चितावनी गेहती कर ओ गलील प्रदेस सनु चाह्ला गेला। 23#मरकु 1:24; लूक 2:39; यूह 1:45ओठे नासरत नांवा चे शहरा मां जती बसला, ताकि ओ वचन पूरा हो, जको भविष्यवक्ता चे जरिये केहला गेलता, “ओ नासरी किहवावी।”
လက်ရှိရွေးချယ်ထားမှု
मत्ती 2: ODR
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
CC BY-NC-ND 4.0