San Mateo 18
18
¿Unku ra chee ka nuu xáꞌnda chiñu Ndioxi?
(Mr. 9:33-37; Lc. 9:46-48)
1Suvi mii kivi ikán ndi̱xaa nda ítaꞌan xiꞌin Jesús nuu ra, ndi̱ndaka tuꞌun nda ra, káchi nda saa:
―¿Tata, unku ra ku ra chee ka nuu nde, nuu xáꞌnda chiñu Ndioxi? ―káchi nda xiꞌin ra.
2Saa ka̱na Jesús iin ya taa loꞌo, ta ki̱ꞌin ra ya ka̱ndichi ra maꞌñu nda, 3saa ndi̱kaꞌan ra xiꞌin nda, káchi ra saa:
―Ya ndixa káꞌan i xiꞌin ndo, tá tu köo ndíko ini ndo nduu ndo tá íyo ini na vali, ta küchiñu ndo kiꞌvi ndo koo ndo nuu xáꞌnda chiñu Ndioxi. 4Naꞌa na chee ni nuu xáꞌnda chiñu Ndioxi ku na ndása ni̱nu̱ xiꞌin mií, na íyo ini tá kuꞌva íyo ini na vali, na ikán ku na chee ni ka. 5Ta ndiꞌi na ndíkiꞌin vaꞌa na vali xaꞌa yeꞌe, xaꞌa ya kándixa na yeꞌe, ta yeꞌe ku i ndíkiꞌin na ―káchi Jesús.
Ndaꞌvi ni na táa sii naꞌa ikan na ya väꞌa
(Mr. 9:42-48; Lc. 17:1-2)
6Saa ndi̱kaꞌan tuku Jesús, káchi ra saa:
―Ndá ka naꞌa táa sii naꞌa, na sikan ndíkundikun sata i ya ikan na ya väꞌa, ¡ta ndee ni ndoꞌo na íkan saa! Án vaꞌa ka yachi ndítikaa na yu̱ú yoso molinu sukun na ta kiꞌin ñaꞌa na sikana na nda kaꞌa nduta ñûꞌu nuu kunu ni, ndíkuu. 7¡Ndee ni kundoꞌo na ñuu ivi yóꞌó! saa chi ndiꞌi saa kivi íyo ñaꞌa ya chíndaꞌa na kuakiꞌvi na kuachi. Sundi ndee ni ka kundoꞌo na táa sii naꞌa ikan na ya väꞌa!
8’Tá ndá ya väꞌa íkan ndo xiꞌin ndaꞌa ndo án xaꞌa ndo, ta vaꞌa ka kaꞌnda ndo ya ta kiꞌin ndo ya kata xika ndo. Kuchiñu ka ndo koo ndo xiꞌin Ndioxi tá íyo iin ndaꞌa ndo án iin xaꞌa ndo, ta süvi ka vi ya íyo uvi saa ndaꞌa ndo án xaꞌa ndo, ta kuꞌun ndo ndaya. 9Tá tu iin nduchi nuu ndo kua chíndaꞌa ndóꞌo̱ ndikava ndo nuu ya väꞌa, ta vaꞌa ka tava ndo ya sikana xika ndo. Kuchiñu ka ndo koo ndo xiꞌin Ndioxi tá tu köo iin nduchi nuu ndo, süvi ka vi ya íyo uvi saa ya, ta kuꞌun ndo xiꞌin ya ndaya ―káchi Jesús.
Tuꞌun ndíchi xaꞌa levo loꞌo kiti nda̱ñuꞌu
(Lc. 15:3-7)
10Saa ndi̱tuꞌun tuku ra iin tuꞌun ndíchi xiꞌin na sínaꞌa ra na, káchi ra saa:
―Koto ndo ndïkani ini ndo ya köo ndáa yaꞌvi na vali yóꞌó. Saa chi na tatun ndáa na vali yóꞌó, ta ndiꞌi saa kivi íyo na xiꞌin Iva i Ndioxi nuu ndivi. 11Saa chi yeꞌe, Taa ra xa̱a ñuu ivi yóꞌó, ta xa̱a i ñuu ivi yóꞌó ya sikaku i na nda̱ñuꞌu.
12’¿Ta unkua ndíkani ini ndóꞌo̱? Tá íyo iin taa kúu mií ra iin ciento levo sana ra. Tá ná ndañuꞌu iin sana ra, ta saa sindoo ra kumi xiko xaꞌun kumi ti ikán, ta kuꞌun ra nduku ra kiti nda̱ñuꞌu. 13Ya ndaa káꞌan i xiꞌin ndo, tá ndi̱niꞌi ra ri ikán ta kusini ni ka ra xiꞌin ri ikán nuu kiti kumi xiko xaꞌun kumi, kiti köo ndi̱ndañuꞌu. 14Tá kuꞌva káa ra ndá levo ikán, saa káa Iva yo Ndioxi ra íyo nuu ndivi, köo kúni ra ndañuꞌu nda iin na vali yóꞌó ―káchi Jesús.
Ndá kuꞌva xaa kaꞌnu ini naꞌa xaꞌa na taꞌan na
(Lc. 17:3)
15Saa ndi̱kaꞌan ka Jesús xiꞌin na, káchi ra saa:
―Tá íyo iin ra ñani un, ta íkan ra ya väꞌa xiꞌin un, ta vaꞌa kuꞌun iin mií un kaꞌan un xiꞌin ra ndá xaꞌa kua íkan ra saa xiꞌin un. Tá xi̱ni soꞌo ra ya ndi̱kaꞌan un xiꞌin ra, ta vaꞌa ni ke̱e un chi si̱xinu un ini ra ndi̱kitaꞌan vaꞌa ra xiꞌin un. 16Sundi tá tu köo xíin ra kuni soꞌo ra ya káꞌan un xiꞌin ra, vaꞌa kaꞌan un xiꞌin iin án uvi ka nda ñani un ya kuꞌun nda xiꞌin un kaꞌan un xiꞌin ra, ya ná koo nda testigo ndikuiin nda xaꞌa ndo. 17Tá köo ndíxiin ra kuni soꞌo ra ya káꞌan ndo xiꞌin ra, ta vaꞌa ndituꞌun ndo xiꞌin na veꞌe ñuꞌu xaꞌa ya íkan ra. Tá tu köo ndíxiin ra kuni soꞌo ra ni ya káꞌan na veꞌe ñuꞌu xiꞌin ra, ta kütaꞌan ka ndo xiꞌin ra, vaꞌa ikan ndo tá íkan ndo xiꞌin naꞌa na, na köo xíni Ndioxi án na ndíkaya xuꞌun kuaꞌan ndaꞌa gobierno ñuu Roma.
18’Chi Ndioxi ta̱xi ra ichí ndaꞌa ndo tá kúu ndiꞌi ñaꞌa ya kátun ndo ñuu ivi yóꞌó, ta ndíkunuꞌni ya nuu ndivi, tá kúu ndiꞌi ñaꞌa ya ndáxin ndo ñuu ivi yóꞌó, ta saa ndáxin tu ya nuu ndivi va.
19’Yakan káꞌan i xiꞌin ndo, tá iin yuꞌu íyo uvi ndo ñuu ivi yóꞌó, ta ndúku ndo ndá ka ñaꞌa nuu Ndioxi, ra íyo nuu ndivi, ta xaa súvi ra ya ndúku ndo nuu ra, taxi ra ya ndaꞌa ndo. 20Saa chi nuu ndíkitaꞌan uvi ndo, án uni ndo tixin kivi yeꞌe, ta ikán íyo i xiꞌin ndo ―káchi Jesús.
21Saa ku̱yati ra Pedro nuu Jesús ta ndi̱kaꞌan ra xiꞌin ra, káchi ra saa:
―Tata, tá ndá iin ñani i íkan ya väꞌa xiꞌin i, ta ¿ndisaa ichí xíniñuꞌu i xaa kaꞌnu ini i xaꞌa na? ¿án ndisaa uxa ichí xíniñuꞌu i xaa kaꞌnu ini i xaꞌa na? ―káchi ra.
22Saa ndi̱kuiin Jesús ndi̱kaꞌan ra xiꞌin ra, káchi ra saa:
―Káꞌan i xiꞌin un, süvi ndisaa uxa ichí xíniñuꞌu un xaa kaꞌnu ini un xaꞌa na íkan ya väꞌa xiꞌin un. Nda uni xiko uxi ichí uxa vi kua xíniñuꞌu un xaa kaꞌnu ini un xaꞌa na ―káchi Jesús xiꞌin ra.
Iin taa ra köo ndi̱xiin xaa kaꞌnu ini xaꞌa taꞌan
23Saa ndi̱tuꞌun Jesús inka tuꞌun ndíchi nuu sínaꞌa ra na, káchi ra saa:
―Nda tá káa iin ra rey kúni xaa súvi kuenta xiꞌin na xáa chiñu nuu ra, saa káa nuu xáꞌnda chiñu Ndioxi. 24Tá xa̱á ra rey ikán xáa súvi ra kuenta xiꞌin na xáa chiñu nuu ra, ta saa ndáka na iin ra xáa chiñu nuu ra ndi̱xaa ra, ta yáꞌa ni kuaꞌa ku ya níka ra ikán, kúu ya nda uxi mil xuꞌun ya náni talento. 25Ta köo xuꞌun ra cháꞌvi ra nuu ra rey, ta saa xa̱ꞌnda chiñu mií ra rey ikán ya kiaꞌvi ra moso ikán xiꞌin yá síꞌi ra tin seꞌe ra xiꞌin ndiꞌi ñaꞌa kúu mií ra. Ta xuꞌun ya kana ikán ndikiꞌin mií ra rey xaꞌa ya níka ra nuu ra. 26Saa si̱kusiti ra ikán nuu ra rey xáku ndaꞌvi ra nuu ra, káchi ra saa: “Tata, ndaꞌvi ni i, xaa kaꞌnu loꞌo ini un xaꞌa i, kundatun naꞌa loꞌo un xiꞌin i saa chaꞌvi ndiꞌi i ya níka i nuu un”, káchi ra xiꞌin ra rey.
27Saa ku̱ndaꞌvi ini ra rey xi̱ni ra ta ikán, ra xa̱a kaꞌnu ini ra xaꞌa ya níka ra nuu ra, ñaa sa̱ña ñaꞌa ra. 28Saa ke̱ta ra moso ikán kuaꞌan ra, ñaa ndi̱kitaꞌan ra xiꞌin inka moso taꞌan mií ra, ta níka ra ikán iin ciento xuꞌun vali ya náni denario nuu ra. Ñaa xa̱á ra xáxin ra sukun ra xáa nduxa ra xiꞌin ra, káchi ra saa: “¡Chaꞌvi ya níka un nuu i!”, káchi ra xiꞌin ra. 29Ta ra taꞌan ra, ra níka loꞌo nuu ra, xa̱a ra si̱kusiti ra nuu ra, xáku ndaꞌvi ra nuu ra, káchi ra saa: “Tata, ndaꞌvi ni i, xíkan i ya mani nuu un, kundatun loꞌo un xiꞌin i, ta chaꞌvi ndiꞌi i ya níka i nuu un”, káchi ra xiꞌin ra. 30Ta köo ndi̱xiin ra kundatun ra, ndi̱xaꞌan ra chi̱kaa ñaꞌa ra veꞌe kàà ndakua ná chaꞌvi ndiꞌi ra ya loꞌo níka ra nuu ra. 31Saa xi̱ni inka nda xáa chiñu nuu ra rey ikán ya ndo̱ꞌo ra, ta ku̱suchi ni ini nda, ñaa ndi̱xaꞌan nda ndi̱tuꞌun nda xiꞌin ra rey ya ndo̱ꞌo ra taꞌan nda. 32Saa ka̱na ra rey ikán ra ta ndi̱kaꞌan ra xiꞌin ra, káchi ra saa: “¡Süvi ra vaꞌa ku un! Xa̱a kaꞌnu ini i xaꞌa ya xi̱nika un nuu i, saa chi xa̱ku ndaꞌvi un nuu i. 33Tá kuꞌva xa̱a kaꞌnu ini i xaꞌa un, saa ndíxaa kaꞌnu ini un ra taꞌan un,” káchi ra xiꞌin ra. 34Saa ndi̱saa ni mií ra rey ikán ta chi̱kaa ñaꞌa ra veꞌe kàà, ta xa̱ꞌnda ra chiñu ya ná sitixuꞌvi ni na ra, ndakua chaꞌvi ndiꞌi ra ya níka ra, nda saa keta ra veꞌe kàà. Saa káchi tuꞌun ndíchi yóꞌó ―káchi Jesús xiꞌin ra Pedro.
35Saa ndi̱kaꞌan ka ra xiꞌin na, káchi ra saa:
―Tá i̱kan ra rey ikán saa ikan Iva i Ndioxi ra íyo nuu ndivi xiꞌin ndo, tá tu köo ndinuꞌu ini ndo xáa kaꞌnu ini ndo xaꞌa ya íkan na taꞌan ndo xiꞌin ndo ―káchi Jesús xiꞌin na.
လက်ရှိရွေးချယ်ထားမှု
San Mateo 18: xta
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Active: ©Wycliffe Bible Translators, Inc. All rights reserved.