Utumbulilu 12
12
Chapanga andoha Abulamu
1Bhela, Bambo Chapanga akumpwaghi Abulamu, “Ubhokaje mu inchi jako, ubhalekaje bhandu bhako na nyumba jako, na ujendaje mbaka ku inchi jenakulangihaje. 2Nepani ananukutenda wehapa kubha litaifa likolongwa. Ananukupengalyaje, na kulitenda lihina laku libya likolongwa, nanau anaubya upengalelu.
3Ananabhapengalya bhala bhabhukupengalela,
na mundu jokapi joanaakupekya masolu, nanatu ananumpekya masolu.
Na kupetela kwaku wehapa mataifa ghokapi gha pundema anaghapengalikaje.”
4Bhela Abulamu akabhokiki ngati Bambo Chapanga moakundaghalakile, najombi Lutu akabhokiki papamu naku. Abulamu akabhi na hyaka sabini na nhwanu chikahi paakabhokiki ku inchi ja Halani. 5Abulamu akuntoliki nhwanu waki Salai, papamu na Lutu mwana waka ndongu wake, na hindu yokapi yebhakabhi nayu papamu na bhandu bhala bhaakabhapatiki ku inchi ja Halani hoku, bhakajendiki mbaka ku inchi ja Kanaani.
Pabhakahikiki ku Kanaani, 6Abulamu akapetiki pachilanda ja inchi jeniheji na kuhika mbaka ku Shekemu, pandu pahuhu, papabhi na nkongu wa mwaloni waka Mole. Chikahi chenihechi Bhakanaani bhakabhi bhatama mu inchi jeniheji. 7Bambo Chapanga akumpitalili Abulamu, na kumpwaghila, “Ananabhapekya lubheleku lwaku inchi jenjenu.” Bhela, Abulamu akachengiki chihanja cha nyambiku kwa ndandi jaka Bambo joakumpitalile. 8Kuhuma konihoku Abulamu akapiti mbaka ku chitombi chekibhi upambala wa kolipita lyobha wa muchi wa Beseli, na kuchenga lihema laki, upambala wa kolijibhi lyobha ukabhi muchi wa Beseli, na muchi wa Ai upambala wa kolipita lyobha. Panihapa akunchengi Bambo chihanja cha nyambiku na kulobha kwa lihina laka Bambo. 9Bhela, Abulamu akatendiki mwanja kujenda upambala wa kunkachi.
Abulamu ku inchi ja Misili
10Chikahi chenihechi jakapitali injala mu inchi ja Kanaani. Injala heji jakabhi ngolongwa namaa, bhela Abulamu ikampaliki kuhelela kujenda kutama ku inchi ja Misili kwa chikahi. 11Paakabhi aheghalili kujingila mu inchi ja Misili, akumpwaghi Salai nhwanu waki, “Manyi kubha wehapa nde umbomba mnyahi kwa sula. 12Chikahi Bhamisili pabhakubhonaje, anabhapwaghaje, ‘Ajoju nhwanu wake.’ Bhela nepani anabhangomaje, nambu wehapa anabhakuleka mwomi. 13Chondi nukujopa upwagha kubha wehapa undombu wango, nahuli bhanhengila ghambone kwa ndandi jako, na matamu ghangu anaghajendalyaje kwa ndandi jako.” 14Bhela, Abulamu paakahikiki mu inchi ja Misili, Bhamisili bhakumbweni Salai kubha nde mbomba mnyahi namaa kwa sula. 15Bhatumika bhaka Falao pabhakumbweni Salai, bhakundumbalili kwaka Falao. Bhela, Salai akatolakiki na kumpeleka mu nyumba jaka Falao. 16Kwa ndandi jaka Salai, Falao akuntendi Abulamu ghambone, akumpekihi mambeleli, ng'ombi, maponda makambaku, bhatumika bha chikambaku na bha chimbomba, maponda mambomba na ngamia.
17Nambu Bambo Chapanga akundapwili Falao na bhandu bhokapi bha munyumba jaki kwa chitamu chikolongwa kwa ndandi jaka Salai, nhwanu waka Abulamu. 18Panihapa Falao akundohiki Abulamu, na kundalukila, “Bho, unhengi chindu bhole? Bho, maghambu kiki ngachewambwaghile kubha Salai nde nhwanu wako? 19Bho, maghambu kiki ukapwaghiki, ‘Jombi nde ndombu wango,’ mbaka nakuntoliki na kubha nhwanu wango? Henu, nhwanu wako ajo apapa. Untolaje na ubhoka nako!” 20Panihapa Falao akabhalaghalaki bhandu bhaki, nabhombi bhakunhindaki Abulamu mwindela akabya na nhwanu waki, na kila chindu cheakabhi nachu.
လက်ရှိရွေးချယ်ထားမှု
Utumbulilu 12: MpBV
အရောင်မှတ်ချက်
မျှဝေရန်
နှိုင်းယှဉ်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
The New Testament in Mpoto Language ©The Word for the World International and Mpoto Language Translation, 2020 All rights reserved.