Obolo - 2005 Edition (NT) Drama

Otutuuk ebi Oru ebi Ju enanan̄a ikeke, mè isa Jisọs ije isi isi kè Pailet. Ema ebebene ikitumu ikọ ikeme Jisọs me ere ya ibe, “Eji mîweek iriọọn̄ ibe ke ene yi ìkifiat owuwa ebi ene ibot me ido kiji, mè ikijeen̄ ibe ekayaka ìtip otitip ido ìnyi ogwu Sisa. Ofifi si, ene yi ìkitumu ibe ke ọmọ ore ogwu Awaji otọkọbe aran̄ me ibot ya, òrere ogwu ubọọn̄.”
Pailet onenido Jisọs ibe, “Tumu-nu, ìre owu ore ogwu ubọọn̄ ebi Ju ya?”
Jisọs ofọfọọk ibe, “Owu otumu ma!”
Pailet onenitumu inyi ebi ibot ngwugwa mè ebi urum ene ya ibe ke ọmọ ìkamun̄ ijo inu geege eyi ogwu enerieen̄ yi orọbe, eyi ebesa ifieek oyerebet itip ene yi.
Ire, ema etetet lek inye, mè ikitumu ibe, “Inu ene yi okijeen̄ òkitap ijo wọlọwọlọ me otutuuk agan̄ Judia. Ìbene me agan̄ Galili, mè isa ikeya inu inigwook me ere keyi.”
Mgbọ Pailet onọbe ikeya, inenido ibe mè Jisọs ìre ogwu Galili ye? Ema echechieek ibe iin̄, ke îre ogwu Galili. Mgbọ Pailet oriọọn̄be ibe ke Jisọs ìnan̄a me Galili, òrere agan̄ Erọdu okikpulu, iraria Jisọs ijet Erọdu. Me ike mgbọ ya, Erọdu òwa me Jeruselem.
Mgbọ Erọdu omun̄be Jisọs, ejit îbele enenen, mije, îwuuk lek ikinọ inu ofolek kan̄ karake ujọn̄ọ mgbọ, mè ikiweek imumun̄ ọmọ isi mè isi. Mije inu chi îkinọ, ikekiweek isasa chieen̄ kan̄ imun̄ mgbọ Jisọs okirọ inu ukechieen̄. Eya orọ, ikpukpulu ikọ idodo ichit Jisọs me lek. Ire, Jisọs ìkafọọk ọmọ otu kubọk ge. Ebi ibot ngwugwa mè ebi ìjeen̄ Ikan ekekeke si me ere ya, mè ikitoon̄ Jisọs ikọ me unye me unye. Erọdu mè ebi akọn̄ kan̄ enenikisa Jisọs irọ inu ochak, mè itap ọmọ ofọnti ilile ebi ubọọn̄ ekitap, mè iyaka iria ọmọ ijet Pailet. Usen ya ke Erọdu mè Pailet ekana unene. Sabum usen ya, ema ekup me ochicha.
Pailet onenigwen ebi ibot ngwugwa, mè ebi ibot ama, mè otutuuk ebi ama ititiin̄, mè itumu inyi ema ibe, “Enyi esa ogwu enerieen̄ yi inu me isi n̄a kubọk ogwu òkifiat ebi ene ibot, inyi ekayaka ìsun̄ ikan me ido kinyi. Me isi kinyi me ere yi, emi nnin̄ emen ikọ enyi etumube itoon̄ ogwu enerieen̄ yi, mè iwọlọ ikpọ, ǹkamun̄ ikan geege òtetet ene yi. Ikeya si, Erọdu ìkamun̄ ikan geege eyi ene yi orọn̄be. Îre eya orọ îyakabe iria ene yi ijet eji. Enyi me lek kinyi ìkpọ ma! Ene yi ìkagbe mkpa, mije, ìkarọn̄ ikan geege eyi mêkọtbe isa itet ọmọ ikpan̄. Eya orọ, mâsulu ọmọ osusut òkekem, mè itele inyi ifo.” [ Me ijọk Iraraka geelek, Pailet îkisan̄a ene ge isibi me mkpọn inyi ebi Ju ibe ifo me ikike.]
Ebi ife cha etataan̄ ukpo me ida ge ibe, “Kpan̄ ogwu ene yi, mè san̄a Barabas sibi nyi eji!” Etap Barabas mkpọn, mije wọlọwọlọ îtapbe me Jeruselem, mè ikpan̄ ene.
Pailet okpọkpọk igwen ebi ife cha itumu ikọ inyi ike îtumube me adasi mgbọ, mije, ìkiweek isasan̄a Jisọs isibi, inyi ifo. Ire, ema ekpọkpọ ikitaan̄ ukpo unye unye ibe, “Gon kpan̄! Gon ọmọ kpan̄ me inyọn̄ uti nkwurieen̄!”
Pailet okpọkpọk itumu ikọ melek ife cha òso mgbọ ita, mè ido ema ibe, “Ìre mije keke? Ìre kpasi ikan ke ogwu enerieen̄ yi orọn̄? Emi ǹkamun̄ ikan mkpa geege òtetet ene yi. Eya orọ, mâsulu ene yi osusut, mè itele inyi ifo.”
Ire, ema etetet lek inye ikitaan̄ ukpo ikitumu inyi Pailet ibe igon Jisọs ikpan̄. Sa me ikeya, Pailet ogbagban̄ utọn̄ inyi ema, mè irọ inu ema ekiweek inyi ema. Isasan̄a ogwu etapbe me mkpọn mije wọlọwọlọ mè mkpan̄-ene isibi inyi ema kubọk ema edobe, mè isa Jisọs inyi ema esa esi erọ ike înemebe ema.


Ebi akọn̄ ebi Rom etetet Jisọs isa inan̄a me ere ya ije inin̄ oniin̄ ibesa isi igon ikpan̄. Me oniin̄ ya, ema echichichini ogwu enerieen̄ ge ekigwen Saimọn, ogwu ama Sairini, okinan̄a me sọntiik ama ge ika inu Jeruselem, mè itet ogwu enerieen̄ ya me unye ubọk, mè ibene uti nkwurieen̄ ebesa igon Jisọs itoon̄ ọmọ ibe iben isa igọọk Jisọs me udun̄. Owuwa ebibaan̄ òwa me etete ebi ìkigbuku igọọk Jisọs me udun̄. Ebibaan̄ cha ekekito ito, mè ikifieek ejit, mije kè Jisọs. Jisọs okakana chieen̄ ikpọ ema, mè itumu inyi ema ibe, “Enyi ebibaan̄ Jeruselem, ikayaka ìto ito me ibot n̄a, ìto ito ìnyi lek kinyi mè nsabọn kinyi. Mije, mgbọ òkinu eyi enyi mêkitumu ibe, ‘Uga ubelejit okup inyi ebibaan̄ ebi òra, mè ebi kpenin̄ owot iman bọn, mè ebi nsabọn geege kpenwọ ebe me ejit!’ Mgbọ ya si, ebi ene mêkitumu inyi ikpele ogoon̄ ibe,
“ ‘Gbugbọ keme eji!’
mè ikitumu inyi orioon̄ ibe,
“ ‘Let eji!’
Mije, ire ebi ene irọ ojelek inu òkup ikeyi me lek njijoon̄ uti, kpelọlọ irọrọ eyi òfefieek igak ikeyi me lek uti òkwukwu ichiaak.”
Ebi akọn̄ cha mîsa si ebirieen̄ iba ìrọrọn̄ ikan igbaalek ije ibesa isi igon ikpan̄ melek kè Jisọs. Mgbọ ema erebe ere ekigwen “Ngigọ Ibot Ene,” ema egogon Jisọs me uti nkwurieen̄, mè igon si ebirieen̄ iba cha igbaalek kan̄, ene ge me agan̄ ubọk ulom kan̄, ene ge me agan̄ ubọk ujit. Jisọs onenikup me inyọn̄ uti nkwurieen̄ ya iriaak uriaak ibe, “Ute, tele nyi ema, mije, ema kperiọọn̄ inu ema ekirọ.” Ebi akọn̄ cha enenikup me ere ya iroon̄ nriroon̄ isa iche ofọnti kè Jisọs inyi lek kiban̄.
Urum ebi ene ìgọgọọk inu me ere ya ekekeke ikikpọ inu òkirọ. Ebi ibot ebi Ju ekekirọ Jisọs inu ochak, mè ikitumu ibe, “Înyan̄a ebi ofifi ene. Inyan̄a-nu lek kan̄ ire me atikọ ke ọmọ ore ogwu Awaji otọkọbe aran̄ me ibot ya, òrere ogwu Awaji ogobobe isibi inyi lek kan̄.”
Ebi akọn̄ cha ekekirọ si Jisọs inu ochak, mè inyi ọmọ miin̄ agburu, mè ikitumu inyi ọmọ ibe, “Ire owu ore ogwu ubọọn̄ ebi Ju, nyan̄a lek kwun̄!”
Îkaan̄ inu egebe igon me lek uti nkwurieen̄ ya me agan̄ ibot kè Jisọs. Inu ya egebe ìre, OGWU ÌRE OGWU UBỌỌN̄ EBI JU.
Ene ge me lek ebi ene iba cha egonbe me agba lek kè Jisọs, otutumu inyi Jisọs ibe, “Ke owu ore ogwu Awaji otọkọbe aran̄ me ibot ya? Nyan̄a lek kwun̄, mè nyan̄a eji gbaalek ma!”
Ire, ogwu òso iba me lek ebi ene iba cha egonbe igbaalek kè Jisọs ogagana inyi ogwu melek kan̄ ya ibe, “Ya! Ìre ukpook Awaji ìkakitet owu? Ìre ìkare oyerebet yaage efieekbe inyi ene yi ke efieek si inyi eji? Eyi kiji, osusut kiji îtat, mije, eji ekibọkọ osusut igọọk me lek ijo inu eji erọbe. Ire, ogwu enerieen̄ yi ìkarọ ijo inu geege.” Ogwu enerieen̄ ya onenitumu inyi Jisọs ibe, “Jisọs, keek emi mgbọ owu mômọnọbe irek ubọọn̄ kwun̄.”
Jisọs ofọfọọk ọmọ ibe, “Me atikọ, cherekeyi, owu melek n̄a mêkup me Paradais !”


Me ike mgbọ yi, òfuk-mgbọ îsulu akọp mè iba eyi ejit ikarek. Utoon̄ ura ochechep, uga udun okakana otutuuk ido ya ichit bùk, mè ikup ikeya mege ire mgbọ òfuk-mgbọ osulube ita eyi ikarek. Ekwut esabe ifieek ikwek Ere Mbuban me Uwu Mbuban otọtọbọ ibum iba, ibene me inyọn̄ inire ijọn̄. Jisọs otataan̄ ukpo itumu ibe, “Ute, nkana ekwukwu n̄a itap owu me ubọk.” Ikọ yi itata ọmọ me otu, ifufuuk òta efuuk, mè itọbọ.
Mgbọ ogwu ibot akọn̄ òkup me ere ya omun̄be inu ya òrọrọ, itọtọn̄ Awaji, mè itumu ibe, “Me atikọ, ogwu enerieen̄ yi ìre ogwu ata irọrọ!” Mgbọ otutuuk ebi ìnunu ere ya ibenikpọ chieen̄ emun̄be otutuuk inu cha òrọrọ, ema efefieek owot, mè ikisulu ubọk me ejit kiban̄, mè ikpọk iyat. Ire, otutuuk ebi ìrọriọọn̄ Jisọs, mè ebibaan̄ ebi ìgọgọọk ọmọ ije inan̄a me Galili inire Jeruselem, ekekeke me ujọn̄ọ ere ikikpọ inu cha òkirọ.


Îkaan̄ ogwu enerieen̄ ge ekigwen Josefu, òrere ene ge me etete ebi Oru ebi Ju, mè ire si ata ene ogwu ògbegbe utoon̄-ejit. Josefu yi ìnan̄a me ama ekigwen Arimatia me ido Judia. Ọmọ ìkagọọk ìchieek me lek inu ebi ibot ebi Ju etọtbe, mè irọ me lek kè Jisọs, mije, ọmọ ìre ogwu òkikpọ chieen̄ me inunu eyi mkpulu Awaji. Josefu yi ojeje isi lek kè Pailet isi ibeek ibe inyi ọmọ nkwukwu kè Jisọs. Pailet ochechieek. Inenisi ijene nkwukwu kè Jisọs isibi me inyọn̄ uti nkwurieen̄, mè isa ekwut-ufuun̄ ikat, mè iben isi imaan̄ me emen udọn̄ erọkọbe me lek ewuuk, eyi kperarak ifuun̄-nu ene geege me emen. Usen ya ìre usen ebi Ju ekinen̄e lek isun̄. Usen Mbuban ìbobene me otu ikakwun̄ usen ya, me ikajọn̄ọge mgbọ.
Ebibaan̄ cha ebi melek Jisọs enan̄abe me Galili inu egọgọọk Josefu ije, mè isi imun̄ udọn̄-ufuun̄ ya, mè imun̄ si ubọk emaan̄be nkwukwu kè Jisọs me emen udọn̄ ya. Ema enenigwu ikom ifo, mè isi irọ ugwun̄ mè aran̄ utop olu ebesa iniken nkwukwu kè Jisọs, inyi ikajọ. Ire, ema esisiki efuuk me Usen Mbuban igọọk ubọk Ikan kè Mosis otumube.

सुन्नुहोस् Luk 23