Simple Nepali Holy Bible © Nepal Bible Society, 2008.

सर्वशक्तिमान् परमप्रभु भन्‍नुहुन्‍छ, “त्‍यो समय आएपछि एउटा पानीको मूल फुटेर आउनेछ र त्‍यस पानीले दाऊदका सन्‍तानहरू र यरूशलेमका बासिन्‍दाहरूलाई तिनीहरूका पाप र अशुद्धताबाट शुद्ध पार्नेछ। त्‍यस बेला म त्‍यस देशबाट मूर्तिहरूको नाम-निशाना मेटिदिनेछु र फेरि कसैले तिनीहरूको सम्‍झना गर्नेछैन। आफैंलाई म अगमवक्ता हुँ भनी भन्‍नेहरूलाई र अशुद्ध आत्‍मालाई म देशबाट हटाइदिनेछु। तैपनि कसैले अगमवाणी बोल्‍ने ढिपी गर्छ भने त्‍यसका आफ्‍ना आमा-बुबाले नै त्‍यसलाई तँ मारिनुपर्नेछ भन्‍नेछन् किनभने त्‍यसले परमप्रभुको वचन बोल्‍दै छु भन्‍छ; तर त्‍यसले झूटै कुरा बोल्‍छ। त्‍यसले अगमवाणी गर्दा त्‍यसैका आमा-बुबाले त्‍यसलाई घोचेर मार्नेछन्। त्‍यस दिन हरेक अगमवक्ता आफ्‍नै पाएको दर्शनदेखि लजाउनेछ र अगमवाणीको धोका दिनलाई अगमवक्ताले रौंको वस्‍त्र लाउनेछैन। त्‍यसको सट्टामा त्‍यसले यसो भन्‍नेछ, ‘म अगमवक्ता होइनँ। म एउटा किसान हुँ। मैले सारा जीवन खेती गर्दैआएको छु।’ कसैले त्‍यसलाई ‘तिम्रो छातीमा केको चोट परेको हो?’ भनी सोधे त्‍यसले यस्‍तो जवाफ दिनेछ, ‘यो चोट मलाई मेरो साथीको घरमा लागेको हो।”

सर्वशक्तिमान् परमप्रभु भन्‍नुहुन्‍छ, “ए तरवार! उठ् र मेरो काम गर्ने गोठालोलाई हमला गर्‌, त्‍यसलाई मार्‌ र भेडाहरू छरपष्‍ट हुनेछन्। म आफ्‍नो प्रजामाथि आक्रमण गर्नेछु र देशभरि दुई तिहाइ मानिसहरू मर्नेछन्। अनि एक तिहाइ बाँच्‍नेछन्। बाँचेका एक तिहाइको म जाँच लिनेछु र आगोले चाँदी निखारेझैँ म तिनीहरूलाई निखार्नेछु। सुन जाँचेझैँ म तिनीहरूलाई जाँच्‍नेछु। तब तिनीहरूले मलाई बिन्‍ती गर्नेछन् र म तिनीहरूलाई उत्तर दिनेछु। तिनीहरू मेरा प्रजा हुन् भनी म तिनीहरूलाई भन्‍नेछु र म तिनीहरूका परमेश्‍वर हुँ भनी तिनीहरूले भन्‍नेछन्।”

सुन्नुहोस् जकरिया 13