If you would like a copy of this version please contact info@davaraudiobibles.org

Gonja Bible

Bodobodo nɛ a maŋ kɔ yiisi be Kejigboŋ nɛ baa tre Kebansonchoŋ na ka ba kaa taga to nɛ bɔrɛmatapowuraana nɛ mbraŋinipoana daa fin kananɛ baaŋ nya mo m mɔ, ŋkpal manɛ so, b daa ŋana basa na nna.
Ndoŋ nna nɛ Setani luri Judas Iskareɔt nɛ e daa la bebɛsopo kuduanyɔ na be eko na to, nɛ e yɔ bɔrɛmatapowuraana na nɛ bɔrɛlambu to be benimuana na kutɔ nɛ b ya kre kananɛ e beeŋ wora n debɔr Yesu n sa bumo be nia. B ka nu loŋ na nɛ bumo be ŋgbene fuli bumo ga nɛ bumo nɛ mo ji amansherbi nɛ baaŋ sa mo be asheŋ n yili. Nɛ Judas shuli fanɛ e beeŋ debɔr Yesu nseŋ fara a fin ekpa nɛ e beeŋ bɔla so ŋ ŋana n lar jimaŋ na be kaman n debɔr Yesu n sa bɔrɛmatapowuraana na nɛ benimuana na.


Ndoŋ nna nɛ bodobodo nɛ a maŋ kɔ yiisi na be kachɛ fo. Kumo be kamɔnchɛ nɛ baa mɔ Kebansonchoŋ be kpakpafɔlbi a lara sarga na. Nɛ Yesu ta le be kubɔya n shuŋi Pita nɛ Jɔn: “Men ya wora Kebansonchoŋ be ajibi na n yili nɛ an ba ji.” Nɛ b bishi mo le: “Nnɛ nɛ fee sha fanɛ an ya wora amo?” Nɛ e kaŋɛ bumo le: “Men keni nfe, men baŋ luri kade to, kanyɛn ko ka sulɔ kapuya nɛ nchu na beeŋ shɛr menyi to. Men bɛ mo so n ya luri laŋ mo nɛ e beeŋ luri na to, nseŋ kaŋɛ laŋ na wura le: ‘Eŋinipo na yɛ: Befɔ be ebu nɛ ma nɛ ma bebɛsopo beeŋ chena n ji Kebansonchoŋ be ajibi na wɔ nnɛ?’ E beeŋ ŋini menyi esoso be ebu gboŋgboŋi ko nɛ b bela ase n yili na. Men ya wora ajibi na n yili ndoŋ.” Ndoŋ nna nɛ bebɛsopo na yɔ n ya tu asɔ kananɛ Yesu daŋ baŋ malga na chap nseŋ ya wora Kebansonchoŋ be ajibi na n yili.


Kebansonchoŋ be ajibi na be keji be saŋɛ ka fo nɛ mo nɛ beshuŋipoana na ya kaa tase ejikpa. Nɛ e kaŋɛ bumo le: “Pɔɛŋ nɛ n luri ma tɔrɔ to m baŋ yili kumo ma kagbene to nna fanɛ a daga fanɛ ma nɛ menyi e ji Kebansonchoŋ be ajibi ere. Ŋkpal manɛ so, m maaŋ naŋ ji kumo kikɛ hale nɛ kumo be kachɛ gbagba na e ya fo m bɔla ekpa ashi Ebɔrɛ be kuwurgboŋ na to.” Nɛ e ta kawiebi nɛ asɔnuuso n chɔrɔ Ebɔrɛ n loge nseŋ kaŋɛ le: “Men sɔ n chige abar n nuu, ŋkpal manɛ so, ma e kaŋɛ menyi na fanɛ yili kabre a yɔ m maaŋ naŋ nuu le be waindibi be yabra kikɛ hale nɛ Ebɔrɛ be kuwura na be jemanɛ e ya ba.” Kumo be kaman nɛ e ta bodobodo n chɔrɔ Ebɔrɛ n loge nseŋ bu kumo to n ta a sa bumo nsaa kaŋɛ le: “Ma eyur nɛ ŋ kɔ a sa menyi nde. Men baa wora loŋ a nyiŋi ma.” Ajibi na be kaman nɛ e ta kawiebi na malɛ n wora kananɛ e daŋ keta bodobodo na n wora na nseŋ kaŋɛ bumo: “Kawiebi ere to be asɔnuuso nɛ baa duga a sa menyi ere e la Ebɔrɛ nɛ dimɛdi be kɔnɔkoŋwule be ŋkre popɔr nɛ k wɔtɔ ŋkpal ma ŋklaŋ so na.
Men keni, emo nɛ e beeŋ debɔr ma e tase ma kutɔ ejikpa nfe a ji na. Ma, Nyiŋgbasa Pibinyɛn bee yɔ luwu to fanɛ kananɛ b nase kumo abɔrɛsibɛ na to na, ama asheŋ maaŋ nyalɛ n sa emo nɛ e beeŋ debɔr ma na kikɛ.” Nɛ b fara a bishi abar fanɛ bumo to be emo e naaŋ nya kagbene n debɔr mo na.

Ndoŋ nna nɛ bebɛsopo na ji abar emɔrɔ a fin bumo to be emo nɛ e beeŋ ba ki bumo kikɛ be enimu. Nɛ Yesu kaŋɛ bumo le: “Durnya to be bewura e wɔ basa a ŋini bumo eleŋ, nɛ basa malɛ bee tre bumo be benimuana belelapo. Ama menyi ere to, mannɛ aloŋ nɛ k du. Menyi ere e shin nɛ menyi kikɛ to be enimu e ki ekama be kebibi n shin nɛ menyi kikɛ to be ejuŋkparpo e ki ekama be emantopo a shuŋ ekama. Ŋkpal manɛ so, esa nɛ e bee chena ejikpa a wushi nɛ emo nɛ e bee bar mo ajibi ndoŋ, emo e chɔ mo barkasa? Mannɛ emo nɛ e bee chena ejikpa a wushi na e chɔ emo nɛ e bee bar ajibi na a? Ama men keni, ma ere ka wɔ menyi to a shuŋ menyi.
Menyi e la bumo nɛ b ji kanyiti ŋ kraŋ tu ma a wɔ ma awurfoŋ to na. Kananɛ n Tuto lara ma nɛ ŋ ki ewura na nɛ ma alɛ gba bee lara menyi nɛ men ki bewura n tu ma n ji nseŋ nuu ashi ma kuwura to nseŋ naaŋ chena nwurputiana so n ji Israɛlebi be nnaŋ kuduanyɔ na demu.”


Nɛ Yesu kaŋɛ: “Saimɔn Saimɔn, keni, Setani kule Ebɔrɛ ekpa fanɛ e bee sha kewora menyi yɛryɛrbi fanɛ kananɛ baa gbaŋgbaŋ aboyunyifu to na, ama ŋ kule Ebɔrɛ n sa fo fanɛ fo yirda e tiŋ a kɔ fo to kpakpa a yil. Nɛ fo alɛ ka baŋ lar loŋ be kebaawɔtɔ na to, fo leŋ fo kurgepoana na to.” Nɛ Pita kaŋɛ mo le: “Enyɛnpe, nɛ fee yɔ kabuti to nɛ luwu to gba, ma nɛ fo beeŋ yɔ.” Nɛ Yesu kaŋɛ Pita le: “Pita, ma e kaŋɛ fo na fanɛ pɔɛŋ nɛ koshinyɛn e boŋ kanyɛ ere, feeŋ chɛ ale asa ŋ kaŋɛ fanɛ fo maŋ nyi ma.”
Nɛ e bishi bumo le: “Ŋ ka daa maŋ ta kɔlgu ŋko adiiku ŋko asɛbta n shuŋi menyi nɛ men yɔ na, men daŋ ya paŋ kusɔ ko a?” Nɛ b kaŋɛ mo: “An daa maŋ ya paŋ shɛŋ.” Nɛ e kaŋɛ bumo: “To, naniere bre, ekama nɛ e kɔ kɔlgu ŋko adiiku, e ta kumo. Nɛ ekama malɛ nɛ e maŋ kɔ tokobi e fa mbe kusɔbuuso n ta amansherbi na n tɔ kuko. Ŋkpal manɛ so, ma e kaŋɛ menyi na fanɛ abɔrɛsibɛ nɛ a bee kaŋɛ fanɛ b ta ma n ti alubiworapoana so na daga kebɔla ekpa, ŋkpal manɛ so, asɔ nɛ b sibɛ a malga ma asheŋ na kikɛ bee bɔla ekpa nna na.” Nɛ b kaŋɛ mo: “Enyɛnpe, keni etokobi anyɔ nde.” Nɛ e kaŋɛ bumo le: “A kukwe loŋ.”


Nɛ e lar kade na to n yɔ Ɔlifs be kebee so fanɛ kananɛ e chɛr a wora na nɛ mbe bebɛsopo na bɛ mo so n yɔ. E ka fo ndoŋ nɛ e kaŋɛ bumo le: “Men baa kule Ebɔrɛ fanɛ men maaŋ luri kechɔŋkeni to.” Ndoŋ nɛ e yige bumo nseŋ yɔ anishito gbrɛ n ya gbir ŋ kule Ebɔrɛ ŋ kaŋɛ le: “Etuto, nɛ k par fo, fo ta awurfoŋ ere ashi ma so, ama mannɛ ma keparso, shin nɛ k baa la feya.” Nɛ malaika ko shi ebɔrɛso n lar mo so m ba kaa leŋ mo to. Mbe kagbene ka jija mo alegaiso nɛ e bugi kagbene ŋ kule Ebɔrɛ ga hale nɛ kebleŋ ya kaa lar mo so a do kasawule so fanɛ ŋklaŋ. E ka yige kabɔrɛkule na nɛ e niŋi to m ba mbe bebɛsopo na kutɔ nɛ baa di ŋkpal kagbenejijaso. Nɛ e bishi bumo le: “Manɛ e ba nɛ menyee di? Men koso a kule Ebɔrɛ fanɛ men maaŋ luri kechɔŋkeni to.”


E kraa malga nna nɛ bebɛsopo kuduanyɔ na to be emo nɛ baa tre Judas na juŋkpar jimaŋ ko m ba ndoŋ m ba firgi n taga to Yesu nɛ e pipe mbe kegbuŋ kechɔrɔso. Nɛ Yesu bishi mo le: “Judas, ma, Nyiŋgbasa Pibinyɛn nɛ fee sha kepipe ma kegbuŋ kechɔrɔso n debɔr a?” Mbe bebɛsopo nɛ b daa yil ndoŋ na ka wu kesheŋ nɛ k daa shin nɛ k wora na nɛ b bishi mo le: “Enyɛnpe, an baa ŋe bumo etokobi a?” Ndoŋ nna nɛ bebɛsopo na to be eko ŋe bɔrɛmatapo nimuso be kenya ko be jiso so be kusoe n chuge. Nɛ Yesu kaŋɛ mo: “A kukwe, men sa maŋ naŋ ŋe n ti so.” Kumo be kaman nɛ e beta kenya na be kusoe na n chɔga mo so.
Nɛ Yesu bishi bɔrɛmatapowuraana na nɛ bɔrɛlambu to be benimuana na nɛ kade na to be benimuana na nɛ b daŋ ba nɛ b ba pɛ mo na: “Men ta etokobi nɛ mprɛ nna m ba nɛ men ba pɛ ma fanɛ eyu a? Ma nɛ menyi e daa la bɔrɛlambu na to kachɛ kama nɛ men daa maŋ beta ma. Ama naniere bre menyi be saŋɛ nna nɛ tentembiri e ŋini kumo be eleŋ.”


Ndoŋ nna nɛ b nyaŋ Yesu m pɛ mo n yɔ bɔrɛmatapo nimuso na pe. Saŋɛ na so nɛ Pita bɛ kufɔ a wɔ kaman. B ka ya puga edɛ laŋ na to a wɔl nɛ Pita tu bumo a tase ndoŋ. E ka tase ndoŋ na nɛ bɔrɛmatapo nimuso na be kebita ko wu mo kefulto na to m pɛshɛ mo loŋ nseŋ kaŋɛ le: “Mo nɛ kanyɛn ere gba e daa la.” Nɛ Pita chɛ kumo ŋ kaŋɛ le: “Kache manɛ, m maŋ nyi mo.” K maŋ chɛr ko nɛ esa ko malɛ naŋ wu mo nseŋ kaŋɛ le: “Fo alɛ gba la bumo to be eko nna.” Nɛ Pita kaŋɛ: “Kanyɛn manɛ, ma alɛ maŋ la bumo to be eko.” Kumo be awa koŋwule be kaman nɛ basa na be eko naŋ kaŋɛ: “K baŋ fuli nna fanɛ kanyɛn ere gba nɛ Yesu e daa la, ŋkpal manɛ so, Galili be esa e la mo.” Nɛ Pita kaŋɛ le: “Kanyɛn manɛ, ma ere maŋ pin kusɔ nɛ fee malga ere gba to.” E kraa malga nna nɛ koshinyɛn boŋ epul na to. Ndoŋ nna nɛ Enyɛnpe kilgi ŋ keni Pita nɛ e nyiŋi Enyɛnpe be kamalga mo nɛ e daŋ kaŋɛ mo fanɛ: “Pɔɛŋ nɛ koshinyɛn e boŋ kabre, feeŋ chɛ ale asa ŋ kaŋɛ fanɛ fo maŋ nyi ma na.” Ndoŋ nna nɛ e lar kowu n ya shu ga.


Basa nɛ b daa kɔ Yesu to na wora mo eyurto nseŋ bri mo nseŋ naŋ wora mo kebuumbuuanishi nseŋ ŋmɛa mo nsaa kaŋɛ mo: “Pin esa nɛ e ŋmɛa fo ere.” Amo be kaman nɛ b malga mmalga damta ŋ gbiti mo a tege mo.


Kare ka chɛ nɛ bɔrɛmatapowuraana na nɛ mbraŋinipoana nɛ baa tre Juwebi be benimuana be nshɛrwuraana na kikɛ shɛr. Amo be kaman nɛ b keta mo n yɔ bumo be demujikpa n ya kaŋɛ mo le: “Nɛ fo e la Kristo na, fo kaŋɛ anyi.” Nɛ e kaŋɛ bumo: “Ŋ kaŋɛ menyi gba, men maaŋ yirda. Nɛ ma alɛ naŋ bishi menyi kamalga ko, men maaŋ sa ma kumo be kifito. Ama yili kabre a yɔ ma, Nyiŋgbasa Pibinyɛn beeŋ ya chena Elempo Ebɔrɛ be jiso so.” Nɛ basa na kikɛ bishi mo le: “Ama fo e la Ebɔrɛ Pibinyɛn na ŋko?” Nɛ Yesu kaŋɛ bumo: “Loŋ gbagba nɛ men yɛ na.” Ndoŋ nna nɛ b kaŋɛ abar: “To, manɛ be shɛda nɛ an naa sha? Mo gbagba be kɔnɔ to nɛ an nu kumo na.”

सुन्नुहोस् Luuk 22