Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

अब्राहम का बेटा, दाऊद का बेटा ईसु मसी ताँई की पिडी अंय्यां ह: अब्राहम को बेटो इसाक अर इसाक को बेटो याकूब अर याकूब क यहूदा अर बिका भाई होया। फरिस अर जोरह यहूदा का बेटा हा अर आकी माँ को नाम तामार हो। फरिस हेजरोन को बाप हो। हेजरोन ऐराम को बाप हो। ऐराम अमिनादाब को बाप हो। अमिनादाब नहसोन को बाप हो। नहसोन सलमोन को बाप हो। सलमोन अर बिकी लूगाई राहाब क बोआज जलम लिआ। बोआज अर बिकी लूगाई रूत क ओबेद पैदा होयो। ओबेद यिसै को बाप हो। अर यिसै राजा दाऊद को बाप हो। सुलेमान दाऊद को बेटो हो। जखो बि लूगाई क जलम लिओ जखी पेल्या उरीया की लूगाई ही। सुलेमान रहबाम को बाप हो। अर रहबाम अबिया को बाप हो। अबिया को बेटो असाफ हो। अर असाफ ओसापात को बाप हो। अर ओसापात को बेटो ओराम हो। अर ओराम उजिया को बाप हो। उजिया ओताम को बाप हो। अर ओताम अहाज को बाप हो। अर अहाज हिजकिया को बाप हो। अर हिजकिया मनसे को बाप हो। मनसे अमोन को बाप हो। अर अमोन ओसिया को बाप हो। इजरायल का मिनखानै गुलाम बणार जद बेबिलोन लेज्यायो जार्यो हो जणा बि टेम का ओसिया क यकुन्या अर बिकाळा भाई होया। बेबिलोन म लेजाबा क पाछै यकुन्या क सालतिएल होयो। अर सालतिएल को बेटो जरूबाबील हो। जरूबाबील अबिउद को बाप हो। अबिउद इल्याकीम को बाप हो। अर इल्याकीम अजोर को बाप हो। अजोर को बेटो सदोक हो। सदोक अखीम को अर अखीम अलिऊद को बाप हो। अलिऊद को बेटो एलिआजर हो। अर एलिआजर मतान को बाप हो। अर मतान को बेटो याकूब हो। अर याकूब युसूफ को बाप हो। जखो मरीयम को मोट्यार हो। मरीयम क ईसु जलम लिओ जखो मसी खुवावै ह। अर अंय्यां अब्राहमऊँ लेर दाऊद ताँई चोदा पिडी जलम लिनी। दाऊदऊँ लेर बंदि बणार बेबिलोन लेजाया जाबा ताँई चोदा पिडी होई। बठै पुग्या पाछै मसी क जलम ताँई चोदा पिडी होई।


ईसु मसी को जलम अंय्यां होयो; जद बिकी माँ मरीयम की सगाई युसूफ क सागै होई जणा बाको ब्या होबाऊँ पेली मरीयम पबितर आत्मा की सक्‍तिऊँ आसऊँ होई। जणा बिको होबाळो मोट्यार युसूफ आपकी धारमिक्‍ता क चलतै मरीयमऊँ सगाई तोड़बा की मन म करी। पण बो लोगा म मरीयम की बदनामी बी कोनी चातो हो इ ताँई बो बिनै चुपचालोई छोडबा को बिचार कर्यो। युसूफ बा बाता क बारां म सोचर्योई हो क परबु को ईस्बर नगरी दुत युसूफ क सपना म आर बोल्यो, “युसूफ! दाऊद का बेटा, तू मरीयमनै ब्यार ल्याबा म मना डर, क्युं क जखो बिकै पेट म ह बो मिनखऊँ कोनी पण पबितर आत्मा की सक्‍तिऊँ ह। बा एक बेटो जलमसी जखो आपका मिनखानै बाका पापऊँ बचासी। तू बिको नाम ईसु राखजे, जिको मतबल ह! परबु आपका मिनखानै बचावै।” ओ इ ताँई होयो ह क्युं क जखा बचन परबु आपका दासा क जरिए बोल्यो ह, बे पूरा होवै:
“देखो, एक कुंआरी छोरी आसऊँ होसी अर एक बेटो जलमसी अर बिको नाम इम्मानुअल राख्यो ज्यासी बिको मतबल ह परमेसर म्हारै सागै ह।”
जद युसूफ निंदऊँ जाग्यो जणा बो बंय्यांई कर्यो जंय्यां ईस्बर नगरी दुत बिनै करबा को हुकम दिओ हो। बो मरीयमनै ब्यार आपकै घरा लिआयो। पण जद ताँई बा बेटो नइ जलमी युसूफ बिकन कोनी गयो। अर युसूफ बेटा को नाम ईसु राख्यो।

सुन्नुहोस् मत्ती 1