 Nuestros sitios Web:   https://awarnarebbi.net/es/   https://www.abridnarrif.net/es/  AwalnArebbi@gmail.com

Ṯamaziɣṯ n Arrif

ذِي ڒْوقْث نِّي يمظْهَار-د يَحْيَى، ئِتْطهَّار إِ يِوْذَان س وَامَان يتْبشَّر-يثن ذِي ڒخْڒَا ن يَهُوْذِيَا. ئِقَّار-اَسن: "تُوْبم، أَقَا يُوْذس-د ڒْمُلْك ن وجنَّا." خ يَحْيَى إِݣ ينَّا نَّبي ؤُمِي قَّارن إِشَعْيَا ذݣ يِجّن ن زْمَان:
<ثْمِيجَّا تْڒَاغَا ذِي ڒخْڒَا ثقَّار:
سْوجْذث اَبْرِيذ إِ سِيذِي أَربِّـي،
ݣّم يبْرِيذن نّس نِيشَان.>

يَحْيَى اَرُّوْض نّس خذْمن-ث س شْعَر ن وڒْغم، خ نّصّ نّس يجّن ن وحزَّام ن يِيڒم. ئِتتّ ثْمُوْرْغِي ذ ثَامّنْت ثَحُوْرّشْت. تَاسن-د غَارس يمزْذَاغ ن ثنْدِينْت ن لْقُدْس ذ يِنِّي ن يَهُوْذِيَا اَمن-ثكْمَاڒ ذ مَارَّا يِنِّي إِي د ينّْضن إِ يغْزَار ن لأُرْدُن. تعْتَارَافن س ڒْمُعْصِيَاث نْسن، يَحْيَى يتْطهَّار-يثن س وَامَان ذݣ يِغْزَار ن لأُرْدُن.
وَلَكِن وَامِي يࢲْرَا يَحْيَى بلِّي اَطَّاس ن ڒْفُقَهَا ذ يفَرِّسِيْين ذ يصَدُّوْقِيْين تَاسن-د غَارس حمَا اَثَن يطهَّار س وَامَان ينَّا-ٱسن: "يَا ثَارْوَا ن يفِيغرَان، وِي ذَاوم يعڒْمن اَذ تَروْڒم زِي لْغَضَب ن سِيذِي أَربِّـي إِي د غَا يَاسن؟ مڒَا ثْتُوْبم ذ صَّح، ݣّث ڒخْذَايم ثِصبْحَانِين. مَاشِي اَذ تِينِيم ذِي نّفْس نْوم قَا نشِّين ذ ثَارْوَا ن بْرَاهِيم أُو صَافِي. مڒَا يخس أَربِّـي ثَارْوَا ن بْرَاهِيم، أَتَاف اَذ ييْسِي يزْرَا-يَا اَثن يَرّ ذ ثَارْوَا ن بْرَاهِيم! أَقَا شَاقُوْر يوْجذ حمَا اَذ يقسّ يࢲوْرَان ن ڒْشجُّوْر. مْكُڒ ثَشجَّارْث إِي وَار يتِيرْون شَا مِين يدْجَان ذ اَصبْحَان اَتَاف اَذ تْوَاقسّ اَذ تْمنْضَار ذِي ثْمسِّي. نش تْطهَّارغ-كنِّيو س وَامَان بَاش اَذ تُوْبم، وَلَكِن ونِّي إِي د غَا يَاسن منْبَعْد إِ نش، نتَّا يجْهذ خَافِي. وَار سْذِيهِيدْجغ شَا اَذَاس يْسِيغ ؤُڒَا ذ ثِسِيڒَا نّس. نتَّا اَكنِّيو يطهَّار س أَرُّوْح يقدّْسن ذ يِيڒسَاون ن ثْمسِّي. غَارس ثَازَّارْث ذݣ وفُوْس حمَا اَذ يزُوْزَّار ثَافَّا نّس قَاع. أَذ يسْمُوْن ثِحبَّا ن يرْذَان اَثنْت يݣّ ذِي ثْسْرَافْث. مِين وَار ينفّْعن شَا اَث يسّشْمض ذِي ثْمسِّي إِي وَار يخْسِين عمَّارْص."

سّنِّي يُوْسَا-د عِيْسَى زِي ثْمُوْرْث ن لْجَلِيل غَار يِغْزَار ن لأُرْدُن بَاش اَث يطهَّار يَحْيَى س وَامَان. وَلَكِن يَحْيَى يُوْݣِي ينَّا-ٱس: "نش يتْخصَّا شك إِي ذَايِي غَا يطهَّارن، أُو شك ثُوْسِيذ-د غَارِي؟"
ئِنْدق-د عِيْسَى ينَّا-ٱس: "غِير قْبڒ ڒخُّو، ذ مَانَايَا إِݣ يدْجَان نِيشَان حمَا اَذ يكمّڒ مَارَّا مِين يخس سِيذِي أَربِّـي." أُوشَا يقْبڒ يَحْيَى.
وَامِي يتْوَاطهَّار عِيْسَى يفّغ-د ڒخْدّنِّي زݣ وَامَان نِّي. أَقَا ينُوْرْزم-اَس-د وجنَّا يࢲْرَا أَرُّوْح ن أَربِّـي يهوَّا-د يݣَّا اَم يِجّن ن ثذْبِيرْث ثْمَارْس-د خَاس. سّنِّي يڒَاغَا-د يجّن ن صُّوْت زݣ وجنَّا ينَّا-د: "وَا ذ ممِّي يعِيزّن، نش فَرّْحغ زَّايس."

सुन्नुहोस् متى 3