Budu: Neta 2021 WBT (NT) Non Drama

Budu: Koya 2021 WBT (NT) Drama

Budu: Koya 2021 WBT (NT) Non Drama

Ʉmbɔ wʉ Pasɨka, uwa ɓombi ɓi꞉nye dya‑ɔɔ mikati ngia ɓambikinye ɨkyɨa nʉ ɓʉtɨ ɓɔɔ ɓufukise wi꞉nye tiga kʉ tinene. Ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓi꞉nye kyɨa kʉhata ɨngbaa tɨmanɨ ɓawa‑ɔɔ nayɔ Yeso. Ɨkyɛmɨngana, ɓi꞉nye kukumo ɓombi.
Tiga kʉ ɓwanɨ, Sɨtanɨ ambukumunio amati ʉ Yuda ngia ɓi꞉nye musoko ɓɔ Ɨsɨkalɨɔta, iya i꞉nye kʉ mʉngana ʉ ɓatitima kumi nʉ ɓapɨnɨ ngiɓangɔ. Kija ɛyɔ Yuda a꞉sa kʉyakanaka nʉ ɓangama ɓʉ ɓakumu‑kumu nʉ ɓangama ɓʉ ɓapɨmakɨa ɓʉ ɨkáa yɨ Asʉɓɨɨ, kʉhata ɨngbaa tɨmanɨ a꞊ɓʉgabɨa‑ɔɔ nayɔ Yeso. Kija ɓa꞉kwa ɨgyagya nadɨndɨ, ɓambʉkɔnɔ ɓɔ ɓamunzo falanga. Yuda ambʉbaya, ambufaniso hata wati wɔɔ uɗo uwa a꞊kwanana‑ɔɔ naɓɔ kʉgabɨa Yeso, chʉkɔmʉ akʉ ungbutu wʉ ɓombi wambɨa‑ɔɔ.


Kija ɓisi ɓʉ ʉmbɔ wɔɔ dyɛ mikati ngia yambikinye kyɨa nʉ ɓʉtɨ ɓɔɔɓufukise ɓa꞉ya. Yi꞉nye ɓisi ngiɓa yi꞉nye kwanana‑ɔɔ ɓɔ ɓʉwa ɓandambʉ ɓʉ ɓakɔndɔlɔ akʉ ʉmbɔ wʉ Pasɨka. Kija Yeso a꞉tʉma ɔɔ Pɛtɛlɔ nʉ Yʉanɨ, ambuɓusigio ɓɔ: « Seni nisu kʉtambanakɨa idyo yɨ ʉmbɔ wʉ Pasɨka. »
Kija ɓa꞉muɓukuo ɓɔ: « Wakʉkʉnda ɓɔ kaɨtambanaka gbanɨ? »
Yeso ambuɓusigio ɓɔ: « Iya na꞊kumunio na anʉ Yelusalɛma, na꞊jono nʉ ɔɔ gue mʉngana iya aɓio ufuɓueni izikio yɨ mepo. Mʉkpateni tʉkʉ kpataa, nambʉɓʉya akʉ ɨkáa ngia a꞊kumunio‑ɛɛ. Kija na꞊sigio mambɨnyɨ ʉ ɨkáa ngiinanɨ ɓɔ: ‹ Mʉpananakɨa anɔwɛ kuɓukuo ɓɔ: Mbɛnɨ ngia ma꞊dya‑ɔɔ idyo yɨ ʉmbɔ wʉ Pasɨka ɨzɔ nʉ ɓakpataka ngiɓʉsɛmɛ a gbanɨ? › Mombi ngiinanɨ a꞊nɨpana mbɛnɨ mʉngana ɔɔ 'ʉja ekoo ʉ ɨkáa ngiinanɨ, iya anʉ kumbo kʉ 'uɓomu ngia kaɓio nʉ taa yengo. Na꞊tambanaka moni kʉ muɓomu nani. »
Kija ɓa꞉sa, ɓambʉgbʉka moni kʉ muɓomu tʉkʉ ndʉ akʉ Yeso i꞉nye ʉɓʉngakieni‑ɔɔ. Kija ɓa꞉tambanaka idyo yɨ ʉmbɔ wʉ Pasɨka.


Tiga ndʉ wati wa꞉ndana, Yeso ambuwulo kʉdyakaka izi mɨngana nʉ ɓatitima ngiɓangɔ. Kija a꞉ɓusigio ɓɔ: « Mi꞉nye pongo kʉtananɨa nadɨndɨ ɓɔ mʉdya idyo yɨ ʉmbɔ wʉ Pasɨka nguakɛ izi mɨngana ninu, pɛɛ ngia ma꞊dya‑ɔɔ ikoko. Jʉ maninu kusigio ɓɔ ma꞊mbʉkʉʉdya sina tii ɓata, kʉɓʉya tʉkʉ akʉ inyi yɨ moni kɔngɔ ya꞊kyananakɨa sinani‑ɔɔ akʉ Ɓʉngama ɓʉ Asʉɓɨɨ. »
Mbise ɔngɔ ambʉchɨka ʉpata, ambutuisio Asʉɓɨɨ ɨbɨba ambusigo ɓɔ: « Chɨkeni ʉpata nguakɛ nambʉɨpakana ati ʉndɛnʉ, jʉ maninu kusigio ɓɔ kʉʉngwa ɨtakɨ‑takɨ ngia, mambʉkʉmwa sinani ɓata vinyo ngiakɛ, kʉɓʉya tʉkʉ akʉ Ɓʉngama ɓʉ Asʉɓɨɨ ɓaka‑ɔɔ. »
Ambʉchɨka mukati, mbise ɔngɔ, ambutuisio Asʉɓɨɨ ɨbɨba, ambuuɓundo, ambuɓunzo, ambusigo ɓɔ: « Ndʉtʉ ngiisɛmɛ iyakɛ, iya makunzo engo ekoo ʉndɛnʉ. Kyɨeni ɓwanɨ nɛmɛ kutunguo. » Mbise ʉ dyakaka, ambʉchɨka ʉpata ngbanga kʉ ɓwanɨ ambuɓunzo, ambusigo ɓɔ: « Vinyo ngiakɛ a agɔmɔ ngia wʉ ɨtakɨ‑takɨ, iya Asʉɓɨɨ a꞉napɨa ati angɔ nʉ ɓombi, 'upi akʉ miniki ngikʉsɛmɛ ka꞉chichio.
Ɨkyɛmɨngana ʉneni‑zʉ, mombi ngia anɛmɛ kʉgaba, ɛyɔ tʉkʉ iya kakʉdyakaka kʉ izi mɨngana nayɔ akɛ. Jʉ kingono, ɛmɛ Mwana ngia ʉ Mombi makʉsa kuwo tʉkʉ ndʉ aka Asʉɓɨɨ a꞉kwaisio‑ɔɔ. Ɨkyɛmɨngana, ya ikoko nʉ mombi ngia akʉsa nɛmɛ kʉgaba! »
Tiga aka ekoo ʉ moni ngikʉnanɨ, ɓambufaniso ɓokono ati ʉndaɓʉ kusigo ɓɔ: « Anɨ‑zʉ iya ati ʉndɛsʉ akʉsa kʉkyɨa moni ngikʉnanɨ? »


Kija wai ya꞉kwa ati ʉ ɓakpataka. Ɓi꞉nye kʉkʉnda kʉmbɨa ɓɔ anɨ‑zʉ a mombi ɔɔ 'ʉja ati ʉndaɓʉ. Yeso ambuɓusigio ɓɔ: « Ɓangama ɓʉ mababa kʉ ɓombi ɓanʉ ʉpanʉ ekoo ʉ ɓombi, nʉ ɓaakʉnda ɓɔ ɓuɓio naɓɔ kusoko ɓɔ: ‹ Ɓombi ɓɔɔ iɗo. › Ɨkyɛmɨngana, akʉ inu yeeɓiokɔmʉ ɓwanɨ. Pɛpɛ tɔ gɔ, mombi ɔɔ 'ʉja ati ʉndɛnʉ ʉkwanana kuɓio ngbanga tʉkʉ ndʉ mwana ati ʉndɛnʉ. Nʉ mombi ngia anʉ ʉpanʉ ati ʉndɛnʉ, ʉkwanana kuɓio ngbanga tʉkʉ ndʉ mombi ngia a ninu kʉkyananakɨa. Jʉ anɨ‑zʉ a mombi ɔɔ 'ʉja? Ajʉ ya mombi ngia akʉdyakaka, gʉ ɓɔ ya mombi ngia akunapioko idyo? Ʉneni‑zʉ, ɛmɛ ma ati ʉndɛnʉ ndʉ mombi ngia aninu kʉkyananakɨa.
Inu na ɓombi ngiɓa na꞉tukuo ɨzɔ nɛmɛ amati ʉ kanyo kʉ di di di ngiisɛmɛ. Nʉ kʉndʉ Tidoo a꞉nanzo ɛmɛ ɓʉngama, ɛmɛ ma꞊ninzo ɛɓɔ kʉ ɓwanɨ. Na꞊dyakaka sina nʉ mwakanaka tʉkʉ izi mɨngana nɛmɛ amati ʉ ɓʉngama ngiɓʉsɛmɛ. Nʉ na꞊wulo sinani ekoo ʉ kiti ʉ ɓʉngama kʉtɨna 'ʉkɔmbɔ ngua wʉ lɨkáa lʉ ɓanza kumi nʉ dyepini ngila lʉ Ɓaɨsalaɛlɛ. »


Kija Yeso a꞉sigo ɓata ɓɔ: « Simoni, Simoni, kanga! Asʉɓɨɨ ʉ꞉sɨa Sɨtanɨ ɨngbaa ninu kukanyo kʉ ɓuɓomu ngbanga tʉkʉ ndʉ iya ɓaapɨka‑ɔɔ ʉpʉnga. Ɨkyɛmɨngana, ɛmɛ ma꞉ta Asʉɓɨɨ aka ekoo asɔɔ ɓɔ baya ngiisɔɔ ekoo asɛmɛ yɔimuniokɔmʉ. Ati ngia ɔwɛ wa꞊natʉɨa‑ɔɔ, nzo ɓamananʉ angu. » Pɛtɛlɔ ambumusigio ɓɔ: « Makʉʉɓɨɨ ma'ʉndanɛ kukumunio akʉ ɨkáa yɨ boloko ɨzɔ nɔwɛ, abana kʉɓʉya tʉkʉ akʉ ingyo. » Kija Yeso a꞉tisio Pɛtɛlɔ ɓɔ: « Manɔwɛ kusigio ɓɔ ɓʉɓʉnɨ ngia gue ʉ kɔɓɔ a꞊natɨa wʉpanatateni nɨsɨ kaatʉ ɓɔ wambakanambɨa. »

Kija Yeso a꞉ɓuɓukuo ɓɔ: « Ati ngia ma꞉nɨtʉma‑ɔɔ kʉɓɨakɨa Ɨsaʉ yɛɛ Iɗo chʉkɔmʉ nʉ iɓongi yɨ falanga, gʉkʉ mbakaya, gʉkʉ lɨkpakʉ, ajʉ na꞉nangyɨa‑zʉ ɨkyɛmɛ kʉnangyɨanɨ ɓiɛ? » Ɓambumutisio ɓɔ: « Ka꞉nangyɨakɔmʉ ɨkyɛmɛ kpa. » Ambuɓusigio tiga ɓɔ: « Ɨkyɛmɨngana, tiga ɨtakɨ‑takɨ ngia, ndʉ mombi waɓio nʉ iɓongi yɨ falanga ɨchɨka tiga chɨkaa, abana mombi ngia wanʉ mbakaya wʉkwanana nayɔ kʉ kʉchɨka. Abana ɓata mombi ngia wambʉkɔmʉ nʉ bakanza, wʉkwanana gabiso ɨpʉkʉ yɨ ɨkʉʉ ngiisɔɔ, wambʉ'ʉkʉa. Jʉ maninu kusigio ɓɔ, yɨkwanana moni ngika ɓa꞉tɨndakɨa amati ʉ Mubio kɔɔ tu kʉkyananakɨa ekoo asɛmɛ ɓɔ: ‹ Ɓa꞉mupoo amati ʉ 'undindo wʉ ɓombi ɓɔɔ ɓɨɓɨ ›. Moni ngikʉnanɨ kakʉsa kʉkyɨanɨa ekoo asɛmɛ tiga kʉ ɨtakɨ‑takɨ. »
Ɓakpataka ɓambumusigio tiga ɓɔ: « Makʉʉɓɨɨ, ʉna‑zʉ ɓabakanza ɓapɨnɨ ngiɓa. » Kija a꞉ɓutisio ɓɔ: « Yɨpa tʉkʉ ndʉ ananɨ. »


Yeso ambʉɓʉa aɓei ʉ gʉlʉ, ambʉsa ekoo ʉ ɨkpangba ngia ɓi꞉nye soko ɓɔ ɨkpangba yɨ Mijeituni kʉndʉ i꞉nye sa kʉ gomu. Kija ɓakpataka ngiɓangɔ ɓa꞉mʉkpata. Iya ɓa꞉ɓʉya nani, kija a꞉ɓusigio ɓɔ: « Teni, ambʉ nɔɔkumuniokɔmʉ amati ʉ kanyo. » Kija Yeso a꞉sɨngana nʉpɛɛ, tine tine ndʉ ɓʉta ɓʉ giso ikopi. Ambʉgbʉkʉmɨa muwuu akɛsɨ, ambufaniso ta Asʉɓɨɨ kusigo ɓɔ: « Tidoo, ndʉ wakʉnda, nungwisio ɓaka ʉpata wʉ ɓʉka‑ɓʉkaɨ ngua wa apɛɛ asɛmɛ akɛ. Yɛɛɓiokɔmʉ akʉ ɓʉkʉnda ɓʉsɛmɛ, ɨkyɛmɨngana yiɓio tʉkʉ akʉ ɓʉkʉnda ɓʉsɔɔ. » [ Kija malaika mungono ʉwa wa꞉ʉngwa ekoo ɓisi wa꞉mʉɓwanɨa nayɔ kunzo angu. Ndʉ ikoko yɛɛ ɨja yi꞉nye yɨɓoteni Yeso, kija a꞉ta tiga nʉ angu nadɨndɨ. Ʉhʉ ngua wi꞉nye nayɔ kʉɓʉa, wa꞉ka tiga ndʉ miniki kʉnzɨlaka akɛsɨ ɓʉ ta ta ta.]
Iya Yeso a꞉pipo nayɔ ta Asʉɓɨɨ, ambʉʉngwa ɨkʉʉ, ambʉtʉa kʉgbʉka ɓakpataka ngiɓangɔ. Ɨkyɛmɨngana, a꞉ɓʉgbʉka tiga akʉ tɔɔ, aka ekoo ʉ ikoko ngia ɓi꞉nye amati ɔngɔ. Kija a꞉ɓusigio ɓɔ: « Na‑zʉ kʉkwaa tɔɔ akʉ moni kʉ ɨmanɨ? Ʉngweni ɨkʉʉ nambʉta Asʉɓɨɨ, ambʉ nɔɔkumuniokɔmʉ amati ʉ kanyo! »


Ati ngia Yeso i꞉nye zʉ‑ɔɔ tʉkʉ kʉngaka moni ngikʉnanɨ, ungbutu wʉ ɓombi wambʉɓwanɨa. Kʉ mʉngana ʉ ɓatitima kumi nʉ ɓapɨnɨ ngiɓangɔ iya i꞉nye ino ɓɔ Yuda i꞉nye ɓangapɛɛ. Kija a꞉sɨngana apɛɛ ʉ Yeso, ambʉmʉmwa ingyengye nayɔ kuɓukuo. Ɨkyɛmɨngana, Yeso ambumusigio ɓɔ: « Yuda, ɔwɛ iinanɨ wʉnagaba ɛmɛ Mwana ngia ʉ Mombi ɨngbaa nɛmɛ kʉmwa ingyengye ɓiɛ? »
Iya ɓombi ngiɓa ɓi꞉nye nʉ ɔɔ Yeso ɓa꞉na nayɔ moni ngikʉnanɨ ki꞉nye kʉkyɨanɨa, kija ɓa꞉sigio Yeso ɓɔ: « Makʉʉɓɨɨ, ajʉ kʉmana nʉ ɓabakanza ngiɓʉndɛsʉ mananɨ ɓiɛ? » Kija mombi mʉngana ati ʉndaɓʉ a꞉buso mombi ʉ kuu wʉ kumu‑kumu ngia ɔɔ 'ʉja nʉ bakanza, ambʉmʉtɨna 'uchwei wʉ guɔngɔ ɓʉ cha. Ɨkyɛmɨngana, Yeso ambuɓusigio ɓɔ: « Sɨeni, yɨpa tʉkʉ ndʉ ananɨ. » Kija a꞉ɓoto uchwei wʉ bayo ngiinanɨ, ambumuhiiso.
Yeso ambusigio ɓangama ɓʉ ɓakumu‑kumu nʉ ɓangama ɓʉ ɓombi ngiɓa ɓi꞉nye pɨmakɨa ɨkáa yɨ Asʉɓɨɨ, nʉ ɓʉkʉʉ ngiɓa ɓa꞉ka nayɔ kʉfa ɓɔ: « Nʉka nʉ ɓabakanza nʉ lingba ndʉ mʉnɨtanaka mombi ʉ ndiɓo? Makwaa kʉ muɓomu maakyɨa ati ʉndɛnʉ akʉ ɨkáa yɨ Asʉɓɨɨ, chʉkɔmʉ mombi gʉkʉ mʉngana ambʉnafa. Ɨkyɛmɨngana, ɨtakɨ‑takɨ ngia ya tiga wati nguʉndɛnʉ, uwa angu wʉ umomo a‑ɔɔ kʉkyɨa kuu. »


Kija ɓa꞉fa Yeso, ɓambʉsa nayɔ, ɓambumusingo akʉ ɨkáa yɨ ngama ʉ ɓakumu‑kumu. Pɛtɛlɔ i꞉nye naɓɔ kʉkpata tʉkʉ danga ɓʉ kɛlɛ. Tiga ndʉ ɓi꞉nye ɓʉgbʉndeni dyaa akʉ ɓʉmba, Pɛtɛlɔ ambʉka kuwulo kʉ ananɨ ati ʉ ɓombi ngiɓa ɓi꞉nye ɓuwei anambamba ʉ dyaa. Moi mʉngana mombi ʉ kuu ɔngɔ ambʉna Pɛtɛlɔ ɓuwei kʉ na anambamba ʉ dyaa, ambʉmʉkanga ɓʉ gbɔɔ ambusigo ɓɔ: « Abana gʉ gwa ngia ɓi꞉nye pongo kʉ ɨzɔ nʉ ɔɔ Yeso. » Ɨkyɛmɨngana, Pɛtɛlɔ ambʉtata ɓʉ ngbɔmʉ kusigo ɓɔ: « Ɔwɛ moi ngia, mambʉkɔmʉ ɛmɛ nayɔ kʉmbɨa. » Ɓata mbise ɗɛkɛkɛ, mombi nga kɔmɔ a꞉mʉna ambumusigio ɓɔ: « Abana gʉ ɔwɛ wakʉ mʉngana ʉndaɓʉ! »
Ɨkyɛmɨngana, Pɛtɛlɔ ambutisio ɓɔ: « Ɔwɛ gwa ngia, mambʉkɔmʉ ɛmɛ mʉngana ʉndaɓʉ kpa. »
Mbise ʉ wati ndʉ saa mʉngana, mombi nga kɔmɔ ɓata a꞉ɓakana kusigo tʉkʉ ɓɔ: « Kingono, mombi ngia i꞉nye pongo tʉkʉ ɨzɔ nʉ ɔɔ Yeso, jʉ a kʉ 'Ugalilaya. » Pɛtɛlɔ ambumutisio ɓɔ: « Ɔwɛ gwa ngia, mambʉkɔmʉ ɛmɛ kʉmbɨa moni ngika wakʉkʉnda kusigo engo. » Kʉ nɨma ngiinanɨ i꞉nye‑ɔɔ kʉyaka, gue ʉ kɔɓɔ ambʉnatɨa. Makʉʉɓɨɨ ambʉnɨtana, ambʉmʉkanga ɓʉ gbɔɔ. Kija Pɛtɛlɔ a꞉tunguo moni ngika Makʉʉɓɨɨ i꞉nye ʉyakeni ɓɔ: « Ɓʉɓʉnɨ gue ʉ kɔɓɔ a꞊natɨa wʉpanatateni nɨsɨ kaatʉ ɓɔ wambakanambɨa. » Kija Pɛtɛlɔ a꞉ɓʉa aɓei ambʉndɨa ɓʉkaɨ nadɨndɨ.


Ɓombi ngiɓa ɓi꞉nye kuɓioko Yeso ɓa꞉faniso tiga nayɔ kʉnʉa nʉ ɓɛnda. Kija ɓa꞉mʉsanga ɨpʉkʉ akʉ mesu, ɓi꞉nye muɓukueni‑sa ɓɔ: « Kwa ɨgbɛ! Chwa ɓɔ anɨ ʉnaɓɛnda? » Kija ɓa꞉munapioko nʉ lɨpɨ lʉ zɨa nga lɔmɔ chʉkɔmʉ nʉ imbi.


Iya ɓisi ɓa꞉ya kʉɓa, ɓʉkʉʉ ɓʉ Ɓayuda ɨzɔ nʉ ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓambujunikio. Ɓambʉka nʉ Yeso apɛɛ ʉ Ubua ngua wʉndaɓʉ wʉ Ɨkʉʉ Nadɨndɨ. Kija ɓa꞉musigio ɓɔ: « Tɨɓɨa‑zʉ ɓɔ ajʉ wa Masɨa ɓiɛ? »
Yeso ambuɓutisio ɓɔ: « Abana tʉkʉ mʉnɨɓɨeni, na꞊mbʉkʉbaya kʉ ɓwanɨ. Abana tʉkʉ muniɓukueni moni, na꞊mbukunatisio kʉ ɓwanɨ. Ɨkyɛmɨngana, kʉʉngwa ɨtakɨ‑takɨ ngiakɛ, ɛmɛ Mwana ngia ʉ Mombi makʉsa kuwulo akʉ ɨkɔndɔ yɨ guɔngɔ ngia yɨ Asʉɓɨɨ ngia wʉ Angu. » Ɛɓɔ kʉ ɓuɓomu ɓambʉgbʉngana kusigo ɓɔ: « Ɓiɛ, ambʉ wa‑gʉ mwana ʉ Asʉɓɨɨ? » Ambuɓutisio ɓɔ: « Tʉkʉ inu nusigo ɓɔ ma mwana angɔ. » Kija ɓombi ngiɓʉnanɨ ɓa꞉sigo ɓata ɓɔ: « Ajʉ ya ɓata kʉ kʉta ɓɔ kuɓio nʉ tɛmʉ ɓiɛ? Jʉ tʉkʉ isu ɓambɨnyɨɓɔngɔ kʉkɔ moni ngikangɔ nʉ muchwei kʉndɛsʉ. »

सुन्नुहोस् Luka 22