These audio recordings contain books of the Rvwàng New Testament, in the Gvray Shànshér Mòngkà (GSM) translation.

Gvray Shànshér Mòngkà Kagvp Àngshv́r ℗ Rvcv́ngcè Kàru Gomidi Kristu Shvngø̀mré, 2026.
Gvray Shànshér Mòngkà Kagvp Àngshv́r © Rvcv́ngcè Kàru Gomidi Kristu Shvngø̀mré, 2025.

Gvray Shànshér Mòngkà Kagvp Àngshv́r

Kà yadv́ng pv̀n shø̀:nò dá:ngí, Yesu nø Àng coqcv́nrì nv̀ng tiqdø, Kidron Vkung kupa sv̀ng léshìá:mì. Weyv́ng Àng nv̀ng Àng coqcv́nrì nø kùlwàng tiqlòng sv̀ng gòngá:mì.
Yesu nv̀ng coqcv́nrì nø weyv́ngø àngkvtkvt dvkǿmshì dvr we í rvt, Àng sv̀ng nvmá:mò pè Yudaí gø wezàng sháòe. Wekvt Yudaí shvrúngshú vjìrì nv̀ng Parisirìí dvzá:rò we Noqngø̀m Tø̀ngnø vsóngshúrì gø cìlcè tiqmvdò gø shølatnà. Àngmaq nø svmi mv́dø̀mrì, svmigwìnrì nv̀ng cìldvmrì lá:ngò nø̀ tø̀m ráì.
Yesu nø, À:ngí vhǿmlv́m rì shvngbe sháshì rvt, àngmaq yv́ngsv̀ng di nø, “Nàmaqí kagǿ èlánø̀nge?” wa rø:tnòe.
Àngmaqí, “Nazaretpè Yesu láìe,” wa vtá:nòe.
Yesuí, “Ngà ǿngàe,” a:lòe. Àng sv̀ng nvmá:mò pè Yuda gø werì nv̀ng tiqdø ripme. Yesuí, “Ngà ǿngàe,” vl bǿà kvt, àngmaq nø mèpvng lap sv̀ng shøtshì sórí vbatø̀m sv̀ng vngaqá:mì.
Vrá tiqkvt À:ngí, “Kagǿ èlánø̀nge?” wa rø:tnò kvt, àngmaqí rá, “Nazaretpè Yesu láìe,” wae.
Yesuí, “‘Ngà ǿngàe,’ lavl bǿshà. Ngà sv̀ng èláshà nìnø, yarì nø shèlonø̀ng,” wa vtá:noe. Yalòng nø, “Nàí Ngà sv̀ng vzíshaq rì tiqgǿ gø Ngàí màshvmv́ngò,” wa À:ngí shø̀:nò kà dvhømlv́m dvpvt íe.
Wekvt Simon Piter nø, àng taq vbá we shv̀m rut shà:lò nø̀ shvrúngshú vgopèò vshuqpè vbàngpa vnà tøq vja cv́nga bǿà. Vshuqpè bø̀ng nø Malku íe.
Yesuí Piter sv̀ng, “Nà shv̀m nø àng dø̀nggàng taq èzá:ngò. Vpèí Ngà sv̀ng vzíshaq gwìn nø Ngàí mvaqlv́m í má?” a:lòe.


Wekvt cìldap øpshú dùpè ó àng cìlcè mvdò nv̀ng Noqngø̀m Tø̀ngnø vsóngshú Yuda vsv̀ngrìí Yesu sv̀ng ta:pmò nø̀ dù:ngò dá:ngí, Annaq yv́ngsv̀ng vzv̀ng shøl bǿà. Annaq nø wenǿng taq shvrúngshú vgo wáshìpè Kayapa àngkø̀ íe. Kayapa nø, bashàrì tvle vsv̀ng tiqgǿ shì lòng té shvlae, wa nø Yuda vsv̀ng shølshúrì kaq vraa:pmà pè íe.
Simon Piter ó coqcv́n dvgá tiqpèí Yesu mèpvng cv̀n bǿà. Coqcv́n wepè sv̀ng shvrúngshú vgopèí sháò rvt, àng nø Yesu nv̀ng tiqdø shvrúngshú vgopè chø̀m gùrpuq sv̀ng gòngá:mì. Piter mv̀ng nø bv́ngkà vngámlap yv́ng ripme. Wekvt shvrúngshú vgopèí sháò we coqcv́npè di daqì nø, bv́ngkà vsóngshú chø̀myorémè sv̀ng a:lò nø̀ Piter sv̀ng dvgòng lú:ngà.
Wekvt bv́ngkà vsù:ngò we vshuq svmasvré tiqmèí Piter sv̀ng, “Nà gø wepè coqcv́n tiqpè mèí má?” a:lòe.
À:ngí, “Mvǿngà,” a:lòe.
Weyv́ngø vshuqrì nv̀ng vsóngshúrì nø, zø̀ng rvtnø̀ shø̀l svmi wvrshì nø̀, lǿmshì sórí ripme. Piter gø àngmaq nv̀ng rip nø svmi lǿmshìe.

Welvng nø shvrúngshú vgopèí Yesu sv̀ng Àng coqcv́nrì dang nv̀ng À:ngí shvngø:tnò mvshǿl dang rø:tnòe.
Yesuí àng sv̀ng, “Ngàí nø rvgaqtø̀m sv̀ng dèdè chaqdap shø̀n bǿngà. Ngàí nø kadvgvp gø Yuda vsv̀ngrì shvngbe dvkǿmshì we júrøt chø̀m nv̀ng Noqngø̀m Tø̀ngnø taq shvngøtshaq íe. Mvyø̀:ní tiqpv̀n gø Ngàí mvshø̀nò. Ngà sv̀ng pàwá èrøtnàe? Ngàí kapà shø̀nò we táa:pmà rì sv̀ng èrø:tnò lè. Ngàí shø̀nò rì shvngbe àngmaqí sháòe,” wa vtá:nòe.
À:ngí yakà shø̀n bǿà kvt, shvnvngø rip we vsóngshú tiqpèí Yesu mv́r vpaqò nø̀, “Shvrúngshú vgopè sv̀ng Nà yadø vtv́nshì daq má?” wae.
Yesuí àng sv̀ng, “Ngàí shǿn vléngònø̀ng nø vléngò kà nàchakngà. Dìnglòng shø̀nònø̀ng nø pàwá Ngà sv̀ng nàpakngàe?” a:lòe. Wekvt Annaqí Yesu sv̀ng wedø vdóngshaq, shvrúngshú vgopè Kayapa yv́ngsv̀ng shøl dvzv́r bǿà.
Simon Piter nø wedøni rip nø svmi lǿmshì ke, àngmaqí, “Nà gø Àng coqcv́nrì kèní tiqgǿ èí we mø̀í má?” wa rø:tnòe.
Àng mashì nø̀, “Mvǿngà,” wae.
Piterí vnà sv́nga dárà pèò àngrì àngyàng vdu we, shvrúngshú vgopèò vshuq tiqgǿí àng sv̀ng, “Kùlwàng yv́ngø Yesu nv̀ng tiqdø ngàí nà sv̀ng yv̀ng dv́rà we mø̀í má?” a:lòe. Vrá tiqkvt Piter mashìe. Wela:ngí dv̀nggú gì daqì.

Wekvt Yuda vsv̀ng shølshúrìí Yesu sv̀ng Kayapa yv́ngkèní Roma gàmzø̀pè chø̀mdø̀ng yv́ngsv̀ng shøla:tnà. Welvng nø sháng mvgágá íe. Àngmaq nø Shvle Bóy v́mpà v́m lúnlv́m dvpvt, noqngø̀m tóng cà:nò nø̀ mvshèr we sv̀ng vyáshìlv́m, gàmzø̀pè chø̀mdø̀ng sv̀ng mvzv́ngshì. Wervt Pilat nø àngmaq yv́ngsv̀ng léshì daqì nø, “Vsv̀ng yapè sv̀ng nàmaqí pà shvràlv́m vle má?” wa rø:tnòe.
“Vsv̀ng yapèí màshvla we mvwàò nìnø, nøngmaqí nà sv̀ng màtvleì,” wa àngmaqí vtá:nòe.
Pilatní, “Nàmaqí ni Àng sv̀ng èshølnø̀ng nø nàmaq dvrá vl dø kà èngeshì bǿnø̀ng,” a:lòe.
Àngmaqí àng sv̀ng, “Nøngmaqí nø kagǿ sv̀ng gø shvtlv́m vko vkv́ng màvl,” a:lòe. Yalòng nø Yesu Àng kadøwa shìlv́m í we shǿnshìa:pmì tvrà dvhømlv́m dvpvt íe.
Wekvt Pilat nø vrá tiqkvt Roma gàmzø̀pè chø̀mdø̀ng vdòng sv̀ng gòngá:mì dá:ngí, Yesu sv̀ng go dvzá:rò nø̀, “Nà nø Yuda vsv̀ngrìò koqkv́m èí ó?” wa rø:tnòe.
Yesuí, “Yakà nø nà nø:tní èshø̀n we í má? Mø̀íni vsà:ngí Ngà dang dètá we í má?” wa vtá:nòe.
Pilatní, “Ngà nø Yuda vsv̀ng ǿngàe má? Nà dvcìcèrì nv̀ng shvrúngshú vjìrìí ni Nà sv̀ng ngà kaq tèle bǿì. Nàí kapà èwàa:pmà má?” wa rø:tnòe.
Yesuí, “Ngà móngdàn nø rvgaq móngdàn mø̀í. Rvgaq móngdàn la í nìnø, Yuda vsv̀ngrì kaq Ngà sv̀ng màtvlelv́m rvt, ngà mèpvng cv̀n rìí cìl wà lú:ngò ni we íe. Íwe Ngà móngdàn nø rvgaq móngdàn mø̀í,” a:lòe.
Wervtnø̀ Pilatní, “Wedø íni, Nà nø koqkv́m ni èí má?” a:lòe.
Yesuí, “Nàí ni èshø̀n bǿà. Ngà sv̀ng ègv̀l dakngà nø rvgaqtø̀m sv̀ng dø̀ng dakngà we nø dìnglòng dvpvt shvkse wáshìlv́m rvt íe. Dìnglòng lap wáshì rì kagǿ gø Ngà kà tae,” wa vtá:nòe.
Pilatní Àng sv̀ng, “Dìnglòng nø pà íe?” wa rø:tnò dá:ngí, vrá Yuda vsv̀ngrì yv́ngsv̀ng léshìá:mì nø, “Yapè taq ngàí pà mvrà gø lá mvlúnò. Íwe Shvle Bóy rvtø̀ taq ngàí nàmaq dvpvt tong rung vsv̀ng tiqgǿ shvlángalv́m vtóng vl dø, Yuda vsv̀ngrì Koqkv́m yapè shvlángaì we sv̀ng èshòngnø̀ng má?” a:lòe.
Wekvt, “Yapè nø mø̀í, Baraba mv̀ng shèlángashà!” wa àngmaq vkiqe. Baraba nø tølv́mshú tiqpè íe.

सुन्नुहोस् Yohan 18