If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

येशू ख्रीष्ट, राजा दाऊद और अब्राहामको पिढी। येशू ख्रीष्टको पुर्खनको नाउँको सुची जा प्रकारसे हए: अब्राहामको लौंणा इसहाक, इसहाकको लौंणा याकूब, याकूबके लौंणा यहूदा और बिनको भइया। यहूदाको लौंणा फारेस और जाहेर, जौन तामारसे जन्मे रहएं (जहे तामार यहूदाकी बहु रहए)। फारेसको लौंणा हेस्रोन, हेस्रोनको लौंणा अराम। अरामको लौंणा अम्मीनादाब, अम्मीनादाबको लौंणा नहशोन, नहशोनको लौंणा सल्मोन। सल्मोनको लौंणा बोअज और बोकी अइया राहाब, बोअजको लौंणा ओबेद और बोकी अइया रुथ (रुथ और राहाब यहूदी नाए रहएं), ओबेदको लौंणा यिशै रहए।
और यिशैको लौंणा राजा दाऊद, राजा दाऊदको लौंणा सोलोमन रहए: सोलोमन कि अइया राजा दाऊदसे बेहा करनसे अग्गु उरियाहकी बैयर रहए। सोलोमनको लौंणा रहबाम, रहबामको लौंणा अबिया, अबियाको लौंणा आसा। आसाको लौंणा यहोशापात, यहोशापातको लौंणा यहोराम, यहोरामको लौंणा उज्जियाह। उज्जियाहको लौंणा योताम, योतामको लौंणा आहाज, आहाजको लौंणा हिजकिया। हिजकियाको लौंणा मनश्शे, मनश्शेको लौंणा अमोन, अमोनको लौंणा योशियाह। योशियाहको नतिया यकोनियास और बिनके भइया रहए, जौन इस्राएलीन्के बेबिलोन देशमे बन्दी बानएके लैजानेसे अग्गु बे जन्मे रहएं।
बेबिलोन देशमे बन्दी बनानके समयसे लैके येशूको जनम तक, बिनको पुर्खानको सुची जा प्रकारसे हए: यकोनियासको लौंणा शालतिएल जन्मो, शालतिएलको लौंणा यरुबाबेल। यरुबाबेलको लौंणा अबिउद, अबिउदको लौंणा एल्याकीम, एल्याकीमको लौंणा आजोर। आजोरको लौंणा सादोक, सादोकको लौंणा आखिम, आखिमको लौंणा एलिउद। एलिउदको लौंणा एलाजार, एलाजारको लौंणा मत्तान, मत्तानको लौंणा याकूब रहए। याकूबको लौंणा योसेफ, योसेफ कि बैयर मरियम रहए। मरियम येशू कि अइया रहए, जोके ख्रीष्ट कहात हएं।
अइसियए अब्राहामसे लैके दाऊद तक चौधा पिढी हुइगओ रहए, और राजा दाऊदके समयसे लैके इस्राएलके आदमी बेबिलोनमे बन्दी बनाएके लैजानके समय तक चौधा पिढी हुइगओ। इस्राएलके आदमी बेबिलोन देशमे बन्दी होनके समयसे ख्रीष्टको जनम तक चौधा पिढी हुइगओ रहए।


येशू ख्रीष्टको जनम होनसे पहिले जा प्रकारसे भओ: बाकी अइया, मरियमकी मंगनी योसेफके सँग भइ रहए। बिनको बेहा होनसे अग्गु मरियम पबित्र आत्माकी शक्तिसे गरबबती भइ रहए। मरियमको लोगा योसेफ एक अच्छो आदमी रहए, और बोके समाजमे बदनाम नाए करन चाँहत रहए, जहेमारे बोके चुप्पएसे अपनी मंगनी तोणनके फैसला करी (काहेकी बो बेहा होनसे पहिली गरबबती हुइगै रहए, जौन ब्यवस्थाके बिरुद्ध रहए)। तओ योसेफ, अइसो बातको बिचार करत पेती, स्वर्गदूत सपनामे दिखानो और कही, “योसेफ, राजा दाऊदको पिढी, मरियमके अपनी बैयर बनानके मत् डराए, काहेकी जो बोके गरबमे हए, बो पबित्र आत्मा कि शक्तिसे हए। बो एक बच्चाके जनम देहए, और तुम बाको नाउँ येशू धरियओ, काहेकी बा अपन आदमीनके उनको पापसे छुटकारा देहए।”
जे सब बात जहेमारे भओ ताकी बे सब बात पुरा होबए, जौन परमेश्वरसे यशैया अगमबक्ता येशूको जनमके बारेमे कही रहए। यशैया जा प्रकारसे लेखी:
“देखओ, एक कन्या गर्भधारण करैगी,
और बो एक बच्चाको जनम देबैगी,
और बाको नाउँ इम्मानुएल धरो जाबैगो,”
जाको अर्थ हए, “परमेश्वर हमरे सँग हए।”
योसेफ निंधसे जगो, और दूतको कहोअनुसार बो मरियमसे बेहा करी और अपने घरमे ल्याइ। मरियम लौंणा नाए जन्मान तक योसेफ कोइ शारीरिक सम्बन्ध नाए रक्खी और योसेफ बच्चाको नाउँ येशू धरी।

सुन्नुहोस् मत्ती 1