Luke 21
21
Sikwa sa'eyadi yadi velekawowo fa'ina.
Maki 12:41-44
1Yesu manuwa-tafalolo lakahina againe givetoga ada gi'italele be wakalivadiyao yadi velekawowo abavedodoga againe hiseusena-ma gi'itadi. 2Kadu sikwa koyokoyodi gi'itadi, hi'ela kabala kukwauhina luhei hidodona. 3#2Ko 8:12Au gigahe gigayo, “Gagahe velemo'ena wakalivadiyao yadi velekawowo mani lakahina hidodona tu hida sikwa koyokoyodi yadi velekawowo kabi'ona againe hitubuhegedi. 4Fa'ina badi wakalivadiyao yadi mani tufonaga hidodona ada yadi tufo lakahina aimo gidadauda, tu badi sikwa koyokoyodi gavadi againe adiga o adi kaleko hidakimonena-ma mani-nadi matatabuna hidodo-'owona.”
Tova mulina aulolo tagiya lakahina babiya ginalakayemu.
Madiu 10:17-22, 24:1-14; Maki 13:1-13
5Tu Yesu ana tomuliya tufoidi manuwa-tafalolo lakahina hiyofeyofena higayo, “U'ita, manuwa ana kabala gavavewaga! Kaliva yadi abahawahega againe manuwa hivevigauna.” 6#Lu 19:43-44Bana Yesu bonadi ginogalini-yo gigahe gigayo, “Hida manuwa wa'ita'itana-ma tova gi'ela'ela be badi nibaimiyao hinaluyaweyaweli-'owona. Kabala againe hikivetalana tu aimo keke tamo kabala kabalahiyana tabone ginada, au moya'aina hinatutuyauyaulena.”
7Badi higayo, “Tovehawala, gava tova hidedemi ginalakayemu? Gava aituha ana'ita-yo anahalamaneni mena gaitomai-dina ulukahihiyedi-ma kabisona hinalakayemu?”
8Yesu gigayo, “Aituha hidede amine. Taumiyao wana'itave'avimi be keke tamo hakwadi yana fwaya againe ginanuwa'abiyemi. Fa'ina aimo kaliva moya'aidi hina'ela aku egana hinayakahina hinagayo, Kaliva Yaubada givegidena-ma iya kaliva-mo'eku. Kadu hinagayo, Keliso yana yewa'ela ana tova giluveda'ufo-mo'a. Tu bonadi keke wanavenogaleni. 9Kadu aituha sa'eyana ma gaviya kadu vekwageya moya'aina valeyadi wananogalina againe keke ase'asemi gina'akolukoluni lakahina. Mena gaitoma anafaiweya gidalakayemu tu tova ana lauyabu keke auhe'ama ginamadulakayemu.” Au hidemi Yesu givenuwa'atadi.
10Kadu Yesu gigayo, “Yo'o sa'eyana mali yo'o buye hinave'amunumunuga, kadu fafali sa'eyana mali fafali buye hinalulugaviya. 11Fafali tulina tulina agaidiya li'uli'u lakahina kadu lokabudubudula kadu aulolo koyona nudamadamanina hinalakayemu. Ada abamatauta kadu iya'iyaya ase'asekolukoludi lobameya hinalakayemu.
12 #
Lu 12:11-12
Tu hida gaitomai-dina aimo keke hinalakayemu tu nagona hinakive'avimi be hinakivekoyomi, kadu manuwa-abavehawala ana tonagona agaidiya hinahegenauwemi o ka'i deliya hinasemi. Kadu omi yaku kaliva fa'ina kini be kabemani matadiya hinahegeliyemi be hinavedewayaugimi. 13Au higa tova yamumuna be Iya fa'ikuya wana'awatalatalaina. 14-15Kadu yami bonalaufata aimo kotu againe fa'ina keke wanavenuwanauna, fa'ina kotu againe wanamidi ana toveya gana'alavelevelemi kadu gananuwahuyavelemi be nibaimiyao agaidiya keke tamo hakwadi anafaiweya yami gahe ginamadubodani o ka'i ginavele'atuyewemi. 16Ada tamamiyao hinamiyao o tobohiyamiyao o tubudelideli o ami kusebo nonogana tovehimeya agaidiya hinahegenauwemi, ada hinavehimeya be tufoimi hinaluve'alikami. 17E, omi yaku kaliva fa'ina moya'aidi hinavenikohiyemi. 18Atu u'umi keke tamo gina'agologolohi, au yamumumiyao wanamiyami. 19Ada yami atuvefa'ila againe yawai-vagahimi wananuhagana.
Yelusalema ana lauyawela fa'ina gigaheye-vagahina.
Madiu 24:16-21; Maki 13:14-19
20 #
Lu 19:41-44
Tu tolugaviya adi yo'o moya'aina Yelusalema hinabodafifina-ma wana'itadi ana toveya, au wanahalamanena melalai-nadi ana lauyawela giluveda'ufo. 21Medema tovai-nadi omi Yudiya ana fafaliya wanamiyami-ma au oyeya wana'ota, kadu omi melala hinagene wanamiyami-ma melala wananuyabuyabuna, ada omi wala'aiya wanamiyami-ma keke wanayewami melaleya. 22#Dan 9:25-26Fa'ina hida aiyetai-dina agaidiya Yaubada miYuda ginavematahiwadiyemi be higa gavaimi Bana bonana eto'etoladina gigaheye-vagahini, medema ginalakayemu velemo'ena. 23Hoiyoi vevine wahifugadi kadu vevine natudiyao aimo hivehuvehuhudi amanadi! Fa'ina medema tovai-nadi mulolova lakahina omi miYuda yami fafali againe ginalakayemu, ada Yaubada yana ila'a wananuhagana. 24#Lo 11:25; Dan 8:13; Ais 63:18-19Nibaimiyao feto againe tufoimi hinaluve'alikami, tufoimi hinakive'avimi be fafali tulina tulina agaidiya hinanauwemi. Ada yo'o tulidiyao Yelusalema hinavagatagona be hinanunauwena tu yo'o tulidiyao yadi abavehimeya ana tova Yaubada gisena-ma ginahavaina ana maka.
Tohobu'ela yana yemuna-havagi fa'ina.
Madiu 24:29-36; Maki 13:24-33
25 #
Ais 13:6-13; Yow 2:1-2; Ha 6:12-14 Kadu'e iya'iyaya kauwana vaikohi ibadibadi agaidiya hinalakayemu. Babi againe yo'o tulina tulina ase'asedi gina'u'aulolo, lehaga mala yadi wainefa fa'ina nuwadi ginavegafo'uya'uya. 26Kaliva yadi matauta fa'ina hina'enota'u, kodulele babiya ginalakayemu-ma fa'ina asekolukolu againe keke ma'ita hina'ilova. Hinamatauta fa'ina lobama ana gaitoma fifiwaladiyao adi iviya gina'atuliyeliyedi. 27#Md 16:27Hidedemi lobama ana loi hinahuluva tu Iya Tohobu'ela buhibuhi tabone gayewayewa'ela-ma hina'itaku. Yaku wafaiwala kadu yaku wamahalina ve'akinamanamalina gayewayewa'ela-ma hina'itaku. 28Hida gaitomai-dina hinavebutu hinalakayemu wanamididi-mo'a wanavedadaga, fa'ina ami tutuvehobu tova kabi'ona wananuhagana.” Au hidedemi Yesu givenuwa'ata.
29Kadu Yesu badi agaidiya gigahetalahobuhobu gigayo, “Lalava kadu ai moya'aina adi dewa wananuwenuwena. 30Ai hinatafa ma taumiyao nuwamiya wa'itahalamanena wagayo, Kauwana yana tova giluvedaveda'ufo. 31Meda anafaiweya mena aituhai-dina hinalakayemu ma wana'itadi againe, au wanahalamanena tova kabisona kaliva Yaubada yana itave'avina againe hinamiyami be ase'asediya ginavehivehimeya.
32Gagahe velemo'ena hida tova ana yo'o keke moya'aidi hina'alika-'owoga tu nagona mena gaitomai-dina moya'aina hinalakayemu. 33Lobama be babi ginayawowola tu bonaku keke ginayawowola, au ginaduva-vagata.
34 #
Lo 13:10-14
Tu taumiyao wana'itave'avimi be higa abavemwamwala kwavakwavana kadu gufa laulaugina yana ivekwava kadu babi ana gaitoma ana venuwanauna keke nuwami ginavaini-yo yaku yewa'ela ana tova dai amine ginavefuta'ami. 35Fa'ina tovai-nadi tomiyababi moya'aidi fafali tulina tulina agaidiya ginavefuta'adi. 36Tova moya'aina wanavanevanenega kadu wanave'ove'o'ola be higa Yaubada ginafaiwalavelemi-yo mena vitai-dina hinalakayemu-ma agaidiya wana'atuvefa'ila, kadu Iya Tohobu'ela matakuya amifaiweya wanamidi.” Au hidedemi Yesu givenuwa'ata.
37Tu aiyeta sa'eyana sa'eyana agaidiya Yesu manuwa-tafalolo lakahina againe givehavehawala, ada mala gibobogi gilolowoga ginana oya Olive ginunauda. 38Ada kaliva moya'aidi manuwa-tafalolo againe hi'eno'enohobu be bonana hinanogalina.
अहिले सेलेक्ट गरिएको:
Luke 21: viv
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2003, Wycliffe Bible Translators, Inc. All rights reserved.