Jɔn 3
3
Yesu nɛ Nikodimɔs be asheŋ
1Kanyɛn ko e daa wɔtɔ nɛ baa tre mo Nikodimɔs. E daa la Farisi nna nseŋ daa la Juwebi be bejuŋkparpoana na be eko. 2Kachako kiidiso nɛ e yɔ Yesu kutɔ n ya kaŋɛ mo le: “Rabai, mamachi be asheŋ nɛ fee wora ere e shin nɛ an pin fanɛ fo ka la eŋinipo nɛ e shi Ebɔrɛ kutɔ m ba, ŋkpal manɛ so, nɛ Ebɔrɛ maŋ wɔ esa to, e maaŋ tiŋ n wora asɔ nɛ fee wora ere.” 3Ndoŋ nna nɛ Yesu kaŋɛ mo le: “Kashenteŋ nɛ mee kaŋɛ fo na fanɛ, nɛ esa baa maŋ nya kakurge nyɔsopo na, e maaŋ wu Ebɔrɛ be kuwura na kikɛ.” 4Nɛ Nikodimɔs bishi mo le: “Nuso nɛ b naa lɔŋɛ a kurge esa kpar? E beeŋ naŋ tiŋ n luri mo nio be epun to kela nyɔsopo pɔɛŋ nɛ b kurge mo a?” 5Nɛ Yesu kaŋɛ mo: “Kashenteŋ nɛ mee kaŋɛ fo na fanɛ nɛ b baa maŋ bɔla nchu nɛ Kiyoyu na so ŋ kurge esa, e maaŋ tiŋ n luri Ebɔrɛ be kuwura na to. 6Dimɛdi e naa kurge dimɛdi nɛ Kiyoyu na malɛ bee bar kiyoyu na be kakurge. 7Sa maŋ shin nɛ k baa chinchiŋ fo ŋkpal ŋ ka kaŋɛ fo fanɛ: A daga fanɛ b ka naŋ kurge menyi kela nyɔsopo so. 8An ta fanɛ afu le. Kaplɛkama nɛ afu bee sha, ndoŋ nɛ a bee ber a yɔ. Feeŋ tiŋ n nu amo be egbri, ama fo maaŋ tiŋ m pin kakpa nɛ a shi ŋko kakpa nɛ a bee yɔ. To, loŋ gbagba malɛ nɛ k du n sa esa kama nɛ e nya kakurge ashi Kiyoyu na kutɔ.” 9Nɛ Nikodimɔs naŋ bishi Yesu le: “Nɛ nuso nɛ le be kesheŋ beeŋ tiŋ n wora?” 10Nɛ Yesu bishi mo le: “Fo baa la Israɛlebi be eŋinipo ŋkaa maa pin le be asheŋ ere to a? 11Kashenteŋ nɛ mee kaŋɛ fo na fanɛ kusɔ nɛ an nyi be asheŋ nɛ anyee malga nsaa ji kusɔ nɛ an wu na malɛ be shɛda, ama men kraa maŋ yirda shɛda nɛ anyee ji a sa menyi. 12Keni, durnya ere to be asheŋ nɛ m malga n sa menyi nɛ menyi maŋ yirda amo na. To, nɛ ŋ kaŋ malga ebɔrɛso be asheŋ n sa menyi, nuso nɛ menyeeŋ wora n yirda amo? 13Esa kama maŋ naŋ yɔ ebɔrɛso she emo nɛ e shi ndoŋ m ba na nawule, mo e la ma, Nyiŋgbasa Pibinyɛn na.
14Kananɛ anebi Mosis daŋ kre danyaŋ be kabulpi nɛ k du fanɛ kuwɔ ashi kiyi to m mata kedibi nseŋ maŋ kumo so n yili na, loŋ gbagba na nɛ a daga fanɛ b maŋ Nyiŋgbasa Pibinyɛn na gba so. 15Saŋɛ na so ekama nɛ e yirda mo beeŋ nya ŋkpa nɛ k maŋ kɔ ekar na. 16Ŋkpal manɛ so, Ebɔrɛ daŋ sha durnya ere ga so nna nɛ e ta mo Pibinyɛn koŋwule n sa durnya fanɛ nɛ esa kama nɛ e yirda mo, e maaŋ shir, ama e beeŋ nya ŋkpa nɛ k maŋ kɔ ekar na. 17Ŋkpal manɛ so, Ebɔrɛ maŋ shin nɛ mo Pibinyɛn na ba durnya to nna fanɛ e ba ji kumo demu. Ebɔrɛ shin nna nɛ e ba ki durnya be emɔlgapo. 18Esa kama malɛ nɛ e yirda mo, Ebɔrɛ maaŋ ji mo demu, ama emo nɛ e maŋ yirda mo bre, Ebɔrɛ teŋ ji mo demu, ŋkpal e ka maŋ yirda Ebɔrɛ Pibinyɛn koŋwule na so. 19Ekpa nɛ demu be keji na beeŋ bɔla so nde fanɛ: Kefulto na ba durnya ere to, ama ŋkpal basa be ashuŋ shunso ka lubi so, baa sha tentembiri a chɔ kefulto na. 20Alubiworapo kikɛ maa sha kefulto. E maaŋ shuli n luri kefulto to, ŋkpal manɛ so, e maa sha mbe asheŋ lubi na ka lar efuli. 21Ama esa kama nɛ e bee wora asheŋ a bɔla ekpa, bee luri kefulto to nna nɛ ekama e wu fanɛ kesheŋ nɛ e wora na, Ebɔrɛ nɛ e nu n sa nseŋ wora kumo.”
Jɔn kabɔrɛbɛrpo ka ji Yesu be shɛda be asheŋ
22Asheŋ ere be kaman nɛ Yesu nɛ mbe bebɛsopo yɔ Judiya be kasawule so nɛ mo nɛ bumo ya ji nchɛnnyɔ ndoŋ nseŋ bɛr basa kabɔrɛbɛr. 23Jɔn gba daa wɔtɔ nna a bɛr basa kabɔrɛbɛr ashi Eenɔn be kade to nɛ k mata Seelɛm be kade to na, ŋkpal manɛ so, nchu damta ko e daa wɔ ndoŋ nɛ basa daŋ baa ba nɛ e daa bɛr bumo kabɔrɛbɛr. 24Kumo be jemanɛ na so nɛ b maŋ naŋ ti Jɔn ebu.
25Kachako Juwnyɛn ko nɛ Jɔn be bebɛsopo ko nya emɔrɔ ŋkpal eyur so be kefɔr be daŋkare be kabɔrɛbɛso so. 26Ndoŋ nna nɛ Jɔn be bebɛsopo yɔ mo kutɔ n ya kaŋɛ mo le: “Eŋinipo, fo nyiŋi kanyɛn nɛ fo nɛ mo daa la ashi Jɔɔdan be lɔr be kaba ndoŋ na ŋko? Kanyɛn nɛ fo daŋ ji mbe shɛda na. Keni, e wɔtɔ a bɛr basa kabɔrɛbɛr nɛ basa kikɛ shile a yɔ mo kutɔ.” 27Nɛ Jɔn kaŋɛ bumo: “Nyiŋgbasa maaŋ tiŋ n nya shɛŋ mo gbagba be kumu so ama Ebɔrɛ e baŋ sa mo kumo. 28Menyi alɛ gba beeŋ tiŋ n ji shɛda ŋ kaŋɛ fanɛ ŋ ka daŋ kaŋɛ fanɛ: ‘Mannɛ ma e la Mesaya na, ama b shuŋi ma nna fanɛ n juŋkpar mo m ba.’ 29Kejafɔ mo kul e wɔ eche nɛ baa kre kejafɔ na. Kejafɔ mo teri na bre bee kaa yil nna nseŋ kaŋ kusoe a jo saŋɛ nɛ e beeŋ nu mo teri kejafɔ mo kul na be ebɔl nɛ mbe kagbene e fuli mo ga. Le e naa shin nɛ kagbenefuli bee bɔlɔ ma alɛ gba to. 30A daga fanɛ Yesu na be ketre e baa dii nɛ ma ere peya e baa yɔ kaseto.”
Esa nɛ e shi ebɔrɛso na be asheŋ
31Esa nɛ e shi ebɔrɛso na e chɔ ekama. Emo nɛ e shi kasawule so nfe la kasawule ere so be esa nna nɛ e bee malga kasawule ere so be asheŋ. Ama emo nɛ e shi ebɔrɛso na bre e chɔ ekama nyam. 32Kusɔ nɛ e wu nɛ kusɔ nɛ e nu be asheŋ be shɛda nɛ e bee ji, ama basa maa sha kesɔ loŋ be shɛda na. 33Esa kama malɛ nɛ e sɔ loŋ be shɛda na gbagba bee ji shɛda nna fanɛ Ebɔrɛ ka la kashenteŋ be Ebɔrɛ. 34Emo nɛ Ebɔrɛ shuŋi na bee malga Ebɔrɛ be mmalga nna, ŋkpal manɛ so, Ebɔrɛ shin nɛ mbe Kiyoyu na bɔlɔ mo to felɛlɛ. 35Amodoŋwura e la Ebinyɛn na nɛ Etuto na malɛ bee sha mo, amoso, e ta kusɔ kama nna m bɔɔ mo enɔ. 36Esa kama nɛ e yirda Ebinyɛn na kɔ ŋkpa nɛ k maŋ kɔ ekar na, ama esa kama nɛ e kini Ebinyɛn na, maaŋ wu ŋkpa na, ama Ebɔrɛ be agbo e naaŋ baa wɔ mo so.
अहिले सेलेक्ट गरिएको:
Jɔn 3: GJNb
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2015 GILLBT Ghana Institute of Linguistics, Literacy and Bible Translation